Тросэз черкъёсы ветлэмысь дугдо, малы ке шуоно отысь духовной кивалтэт но буйгатскон уг шедьто. Малы соку Иеговалэн Адӟись-Ивортӥсьёсызлэн христиан пумиськонъёсазы ветлоно?

Ӟеч сямо, умой адямиосын дырмес ортчытӥськомы. Нырысетӥ даурын христианъёс кенешъёсы огазеямын вал. Христиан пумиськонъёсын оскисьёс быгато вал ваньзы ӵош Инмарлы йыбырттыны, Священной Гожтэмез эскерыны но ог-огзылэсь мылкыдзэс ӝутыны (Еврейёслы 10:24, 25). Соос пӧлын шунытэсь кусыпъёс вал, котькудӥз ассэ зэмос эшъёсыз пӧлын кадь шӧдӥз — духовной вын-агайёсыз но сузэр-апайёсыз пӧлын (3 Иоанн 14, 15; 2 Фессалоникаослы 1:3). Ми соослэсь адӟем кариськомы но озьы ик шумпотӥськомы.

Библиысь возетъёсты уже кутыны дышетскиськомы. Библиын вераське, азьвыл пиосмуртъёс, кышномуртъёс но нылпиос, Инмар сярысь тодон-валан басьтон понна, огазе люкасько вал. Ми но озьы ик люкаськиськомы. Быгатӥсь дышетӥсьёс юртто милемлы валаны, ызьы Библиысь возетъёсты улонамы кутоно (Кыкетӥ Закон 31:12; Неемия 8:8). Вань мылкыд карисьёс Библиез эскеронэ пыриськыны но кырӟаны быгато. Со туж умой луонлык трос калык пӧлын Инмарез данъяны (Псалтирь 34:18).

Осконмес юнматӥськомы. Апостол Павел одӥг кенешлы гожтӥз: «Мынам тӥледыз туж адӟеме потэ... асьмелэн огъя осконэнымы огмес огмы юнматыны мед быгатомы шуыса» (Римъёслы 1:11, 12). Вын-агайёсын но сузэр-апайёсын ялан дырмес ортчытыса, милям осконмы будэ но Инмарлэн катъёсызъя улыны мылкыдмы юнма.

Сюлмысь ӧтиськомы тӥледыз милям кенешмылэн вуоно пумиськоназ лыктыны но ваньзэ ас синмыныды адӟыны. Тӥледыз отын шумпотыса пумиталозы. Пумиськонъёсамы пырон понна дун тыроно ӧвӧл, коньдон уг бичало.

• Кинъёслэсь адӟем каризы Иеговалэн Адӟись-Ивортӥсьёсыз, пумиськонъёссэс радъякузы?

• Малы христиан пумиськонъёсы ветлоно?

Кузь но секыт сюресэз мыноно ке но луэ, урамын куазь ке но урод, ми ялан пумиськонъёсамы ветлӥськомы. Мар меда косэ Иеговалэсь Адӟись-Ивортӥсьёссэ, уж бере жадён но улонын шуг-секытъёс шоры учкытэк, кужым поныны, огъя оскисьёсын пумиськон понна?

Ми зэмос юрттэт басьтӥськомы. «Огмылы огмы юрттӥськыса уломе»,— гожтӥз Павел, вераса соос сярысь, кинъёс христиан пумиськонъёсы ветло (Еврейёслы 10:24). Апостол мылкыдмес ӝутэ, вын-агайёсмы но сузэр-апайёсмы сярысь сюлмаськыса, соослы юрттыны. Со понна милемлы ог-огмес умойгес тодыны кулэ. Кенешысь мукетъёсыныз матэгес тодматскимы ке, адӟомы, куд-огезлэн милям кадь шуг-секытъёссы вал шуыса, но соос соосты вормизы. Со христианъёслэн визь-кенешъёссы юрттозы милемлы шуг-секытъёсмес вормыны.

Ми зэмос эшъёс шедьтӥськомы. Соос, кинъёс христиан пумиськонъёсы ветло, огшоры тодмоосмы гинэ ӧвӧл. Соос — милям матысь эшъёсмы. Ми кенешъёсын сяна но ог-огенымы пумиськылӥськомы, озьы ик ӵош шутэтскиськомы. Мар со милемлы сётэ? Ми дышетскиськомы ог-огмес тросгес дунъяны, нош со милесьтым яратонмес юнматэ. Куке огъя оскисьёсмы шуг-секытъёсын пумисько, ми котьку дась соослы юрттыны, малы ке шуоно милемыз юн эшъяськон герӟа (Мадёнъёс 17:17). Кенешысь ваньмыныз кусып возьыса, ми ог-огмы сярысь сюлмаськеммес возьматӥськомы (1 Коринфъёслы 12:25, 26).

Ми ӧтиськомы тӥледыз эшъёсты утчаны соос пӧлысь, кинъёс Инмарлэсь эриксэ быдэсъяло. Сыӵе эшъёсты тӥ шедьтоды Иеговалэн Адӟись-Ивортӥсьёсыз пӧлысь. Номыр тӥледлы медаз люкеты милемын дырдэс ортчытыны!

• Кыӵе пайда вае христиан пумиськонъёсын дырмес ортчытон?

• Ку тӥ малпаськоды милям кенешенымы тодматскыны?

Нырысетӥ христианъёс пумиськонъёсазы кырӟанъёс кырӟало, вӧсясько, озьы ик Священной Гожтэмез лыдӟо но эскеро вал (1 Коринфъёслы 14:26). Туннэ но пумиськонъёсмы со выллем ик ортчо.

Дышетскон Библия вылэ пыкиське но улонын юрттэ. Одӥгаз шутэтскон нуналэ котькуд кенешын 30-минутъем библейской речь верало, кудӥз возьматэ, кызьы Библия милемлы улонын юрттыны быгатэ но кызьы со дуннеысь югдуръёсты валэктэ. Ваньзы ӧтисько асьсэлэсь Библизэс усьяны но чакланы, мае лыдӟо. Речь бере одӥг час ӵоже Библиез дышетыны юрттӥсь статьяез эскерон ортче. Ваньмыз мылкыд карисьёс со эскеронэ пыриськыны быгато. Сыӵе эскерон юрттэ милемлы Библиысь возетъёсты улонамы кутыны. Быдэс дунне вылын котькудаз 110 000 кенешъёсын одӥг материал эскериське.

Дышетыны быгатонлыкъёсмес умоятӥськомы. Озьы ик, котькуд арня вискысь одӥгаз ӝытазе ми люкаськылӥськомы куинь люкетъем пумиськонын, кудӥз нимаське «Христиан улонмы но ужан-тыршонмы». Со ортче котькуд толэзе потӥсь «Христиан улонмы но ужан-тыршонмы» ужан тетрадьысь материалъя. Пумиськонлэн нырысетӥ люкетэз, «Инмарлэн Кылысьтыз узырлык», юрттэ милемлы умойгес валаны Библиысь люкетэз, кудзэ кенеш азьло ик лыдӟыса дасяз. Собере мукетыз люкет — «Дышетскиськомы устогес ивортыны». Та люкетын возьматонъёс вань, кызьы Библия сярысь мукетъёсыныз вераськоно. Визь-кенешъёс сётъясь агай котькуд дышетскисьлы лыдӟиськон но вераськон быгатонлыкъёссэ умоятыны юрттэ (1 Тимофейлы 4:13). Пумиськонлэн берпуметӥ люкетаз, кудӥз нимаське «Христиан улон», ми дышетскиськомы Библиысь возетъёсты улонамы кутыны. Отын ми юанъёсын но валэктонъёсын эскериськомы материалэз, кудӥз юрттэ милемлы Библиез мургес валаны.

Пумиськонъёсамы туж умой дышето. Сое тӥ асьтэос адӟоды, одӥгаз сыӵе пумиськонэ лыктыса (Исаия 54:13).

• Кызьы ортчо Иеговалэн Адӟись-Ивортӥсьёсызлэн пумиськонъёссы?

• Кудаз котькуд арняе ортчись пумиськонамы тӥляд лыктэмды потэ?

Тӥ адӟиды-а та брошюраысь туспуктэмъёсын, макем ӝикыт дӥсяськыса, Иеговалэн Адӟись-Ивортӥсьёсыз асьсэлэн пумиськонъёсазы мыно? Малы ми бадӟым саклык висъяськомы дӥськутлы но вылтуслы?

Инмармылы гажанмес возьматон понна. Зэм, Инмарлы, адямилэн вылтусыз сярысь, сюлэмезлэн чеберлыкез кулэгес луэ (1 Эксэйлыкъёслэн 16:7). Озьы ке но, куке ми Иеговалы йыбырттон понна люкаськиськомы, милям туж потэ сое но огъя оскисьёсмес гажаськомы шуыса возьматэммы. Милемлы кунлэн азьмуртэз доры мыноно луысал ке, ми, сое гажаса, туж умой малпаськысалмы, дыр, мае дӥсяны. Озьы ик милям христиан пумиськонъёсын вылтусмы вера, «Пумтэм вапумъёсысь Эксэез», Иегова Инмарез, но интыез, кытын ми сое данъяськомы, гажаськомы шуыса (1 Тимофейлы 1:17).

Инмарлэн вылӥ эсэпъёсызлы тупан понна. Библия христианъёсты ӧте, соос «йӧспӧртэм, гольтрес медаз дӥсяське, асьсэды зӥбыт-востэм мед возёзы» шуыса (1 Тимофейлы 2:9, 10). Та курон-косон юрттэ бырйыны сыӵе дӥськут, со укыр яркыт но мынчырес медаз лу шуыса. Со сяна, со юрттэ асьмелы кельшымон дӥсяськыны, но со дыре ик чебер но ӝикыт. Со возетъёс милемлы луонлык сёто бырйыны, мар дӥсяны. Ярамон но валаса дӥсяськыса, ми быгатӥськомы, «Инмарлэн, Утисьмылэн, дышетонэзлы» данлык вайыса, улыны но «Инмарез данъяны» (Титлы 2:10; 1 Пётр 2:12). Со, кызьы ми пумиськонъёсамы мыныны дӥсяськиськомы, мукет адямиослэсь Иеговалы йыбырттон шоры учкемзэс воштыны быгатоз.

Тӥляд чебер дӥськутты ӧвӧл ке, эн сюлмаське! Дӥськутты чылкыт но ӝикыт гинэ мед луоз. Эксэйлык юртын тӥледыз котьку но шумпотыса пумиталозы.

• Макем саклык висъяны кулэ солы, кызьы ми христиан пумиськонъёсамы мыныны дӥсяськиськомы?

• Кыӵе возетъёсты ми лыдэ басьтӥськомы вылтус но дӥськут пумысен?

Иеговалэн Адӟись-Ивортӥсьёсыныз Библиез дышетӥськоды ке, дышетонлы тӥ азьло ик дасяськыны тыршиськоды, луоз. Озьы ик кенешлэн пумиськонъёсызлы но дасяськоно. Умой луоз, тӥ солы дышиды ке. Соку со тӥледлы пайда ваёз.

Малпаське, ку но кытын дасяськоды. Ку тӥледлы капчигес мур малпаськыны? Вазь ӵукна, уже мынон азяды? Яке бер ӝыт, куке нылпиосты кӧло ини? Кема дасяськемды ӧз луы ке но, малпаське, кӧня дыр тӥ висъяны быгатӥськоды, но тырше вань саклыктэс дасяськонлы висъяны. Шедьтэ чалмыт но шыпыт инты, кытын тӥледлы номыр уз люкеты. Кысэ радиодэс, телевизордэс но телефондэс. Дышетон азяды вӧсяське, со юрттоз тӥледлы вань сюлэмшугъяськонъёстэс вунэтыны но Инмарлэн Кылыз сярысь гинэ малпаськыны (Филиппыослы 4:6, 7).

Пыр-поч эскере материалэз но дасяське эскеронэ пыриськыны. Нырысь материалэз вакчияк учкыса потэ. Малпаське статьялэн яке люкетлэн нимыз вылын. Малпалэ, кызьы котькуд пичи люкет валтӥсь темаен герӟаськемын. Висъялэ саклыктэс суредъёслы но тодэ ваён понна юанъёслы, кудъёсыз валтӥсь малпанъёсты пусъё. Собере котькуд абзацез лыдӟе но улӥынгес сётэм юанлы отысь валэктон шедьтэ. Усьтэ но лыдӟе Библиысь кылбуръёсты, кудъёсыз скобкаосын сётэмын. Малпаське, кызьы со малпанъёс материалэн герӟаськемын (Апостолъёслэн ужъёссы 17:11). Валэктон шедьтэм бере пусъе абзацын куд-ог валтӥсь кылъёсты яке кыл тэчетъёсты, кудъёсыз юрттозы тӥледлы малпандэс ӝогак тодады вайыны. Соку кенешын тӥ быгатоды, кидэс ӝутыса, асьтэ кылъёсыныды вакчияк валэктон сётыны.

Пӧртэм темаосты эскерыса, кудъёссэ пумиськонъёсын котькуд арняе валэкто, тӥ быгатоды Библиысь тодон-валанъёсын шыкысады выль малпанъёс ватсаны (Матфей 13:51, 52).

• Ку но кытын тӥ пумиськонъёслы дасяськыны быгатысалды?

• Кызьы дасяськоно, кенешын умой валэктонъёс сётъян понна?

Иеговалэн котьку потэ вал, семьяос дырзэс ӵош мед ортчытозы шуыса, духовно будыса но семья кусыпъёссэс юнматыса (Кыкетӥ Закон 6:6, 7). Соин Иеговалэн Адӟись-Ивортӥсьёсыз котькуд арняе дырзэс висъяло семьяен йыбырттонлы — духовной юанъёсты капчи мылкыдын эскеронлы. Соос материалэз семьязылэн кулэяськонъёсызлы тупатыны тыршо. Тӥ огнады улӥськоды ке, со дырез луоз кутыны, Инмарен кусыпъёстэс юнматон понна но тӥледлы тупась амалэн Библиез дышетон понна.

Со Иеговалы матэгес каре. «Инмарлы матэ кариське, Со но тӥляд матады лыктоз»,— верамын Библиын (Иаков 4:8). Иеговаез умойгес тодыны милемлы юрттэ солэн Кылыз, кудаз верамын солэн сямъёсыз но ужъёсыз сярысь. Семьяен йыбырттондэс кутскыны быгатоды Библиез шара лыдӟонэн, кылсярысь, «Улон но ужан-тыршон» пумиськонлэн графикезъя. Текстэз пичи люкетъёслы люке но семьяысьтыды котькудӥзлы сётэ. Лыдӟем берады вералэ, лыдӟем кылбуръёсысь кыӵе пайда котькудӥз аслыз басьтӥз.

Со семьяез огазея. Библиез ӵош дышетон картъёсты но кышноосты, озьы ик анай-атайёсты но нылпиосты огазея. Сыӵе дышетон быдэс семьялы шумпотон вайись но кема возьмам дыр луыны кулэ. Анай-атайёслы нылпиоссылэн арлыдзыя темаез бырйыны кулэ. Кылсярысь, Библия вылэ пыкиськем публикациосты уже кутыса, нылпиосын луоз вераськыны шуг-секытъёс сярысь, кудъёсыныз соос школаын пумисько. Озьы ик, учкыны луоз организацилэн интернет-ресурсысьтыз видеоез но собере эскерыны сое. Дышетске кырӟаны кырӟанъёсты, кудъёсыз вуоно пумиськонын луозы. Нош семьяен йыбырттон бере ческыт сиён пӧралэ яке шудэ.

Котькуд арняе Иеговалы ӵош йыбырттонлы дыр висъяса, быдэс семья Инмарлэсь Кылзэ яратыны быгатоз. Оскелэ, Иегова тӥлесьтыд тыршемдэс бакель кароз шуыса (Псалтирь 1:1—3).

• Малы ми семьяен йыбырттонлы дырмес висъяськомы?

• Кызьы анай-атайёс семьяен йыбырттонзэс быдэс семьязылы тунсыко карыны быгато?

Малы та адямиослэн ымныръёссы шумпотонэн пишто? Малы ке шуоно соос конгрессэ лыктэмын. Вашкала дыръёсы Инмарлэн ужась-тыршисьёсызлы араз куинь пол огазе люкаськоно вал (Кыкетӥ Закон 16:16). Ми но туннэ возьмаськомы луонлыкез, ку быгатомы трос кузя люкаськыны. Котькуд аре милям куинь нимысьтыз пумиськонъёсмы ортчо: кык одӥгнуналъем ёросысь конгрессъёс но куиньнуналъем улосысь конгресс. Малы ми сокем дунъяськомы та пумиськонъёсты?

Соослы луыса ми асьмеды христиан вынлыклэн люкетэныз шӧдӥськомы. Вашкала израильтянъёс Иеговаез «калык люкаськон интыосын» шумпотыса данъязы, туннэ но ми люкаськиськомы нимысьтыз пумиськонъёсы, Инмарлы ӵош йыбырттон понна (Псалтирь 25:12; 110:1). Таӵе пумиськонъёсын милям луонлыкмы вань тодматскыны но вераськыны мукет кенешъёсысь, озьы ик мукет шаеръёсысь но Адӟись-Ивортӥсьёсын. Вис карон дыръя ми дорамы ум бертӥське, нош огазьын нуназезэ сиськон понна кылиськомы. Соин духовной ужрадъёсамы ми быгатӥськомы выль эшъёсты шедьтыны (Апостолъёслэн ужъёссы 2:46). Конгрессъёсын ми асьме синмынымы адӟиськомы яратонэз, кудӥз калыккуспо вынлыкмес огазея (1 Пётр 2:17).

Соос милемлы духовно будыны юртто. Израиль калык огазе люкаськылӥз, Инмарлэсь катъёссэ валэктонэз кылзон понна (Неемия 8:8, 12). Ми но дунъяськомы Библиысь визьноданэз, кудзэ пумиськонъёсамы кылӥськомы. Котькуд конгресслэн темаез Библия вылэ пыкиськемын. Тунсыко речьёс но возьматонъёс дышето милемыз Библиысь возетъёсты улонамы кутыны. Милемыз юнмато соослэн примеръёссы, кинъёс та секыт дыръёсы быгато христиан сюрес вылын пумиськись шуг-секытъёссэс вормыны. Улосысь конгрессъёсын костюмъёсын постановкаос юртто милемлы яркыт син азямы пуктыны Библиын верам учыръёсты но дышетскыны соос вылын. Конгрессъёсамы соос, кинъёс асьсэды Инмарлы сӥзизы, вуын пылатӥськыса, сӥзиськемзэс возьмато.

• Малы конгрессъёс трос шумпотон ваё?

• Малы тӥледлы конгрессэ одӥг пол ке но вуылыны кулэ?

Кулэмезлэсь кӧня ке азьлогес Иисус вераз: «Вань калыкъёс мед тодозы шуыса, Эксэйлыклэн та Евангелиез быдэс дунне вылын тодытэмын луоз; собере пум вуоз» (Матфей 24:14). Нош мар кароно, ӟеч ивор быдэс музъем вылын верамын мед луоз шуыса? Иисуслэсь адӟем кароно (Лука 8:1).

Ми тыршиськомы адямиосты дорысьтызы шедьтыны. Иисус пытьытӥз мынӥсьёссэ ӟеч иворез коркась корка тодытыны дышетӥз (Матфей 10:11—13; Апостолъёслэн ужъёссы 5:42; 20:20). Нырысетӥ даурын тодытӥсьёслэн тодытон понна юри висъям интызы вал (Матфей 10:5, 6; 2 Коринфъёслы 10:13). Туннэ милям ужмы озьы ик умой радъямын. Котькуд кенешлы нимысьтыз инты висъямын. Со юрттэ милемлы, Иисуслэсь косонзэ быдэстыса, тросгес адямиослы ӟеч иворез тодытыны (Апостолъёслэн ужъёссы 10:42).

Ми тодытӥськомы котькытын, кытын адямиос вань. Иисус ӵем дыръя тодытӥз трос калыко интыосын, кылсярысь, зарезь ярдурын но колодча дорын (Марк 4:1; Иоанн 4:5—15). Солэсь адӟем карыса, ми но тыршиськомы адямиосын Библия сярысь вераськыны котькытын, кытын луонлык вань: урамын, адямиослэн ужан интыосазы, паркъёсын но телефон пыр. Со сяна, котькуд тупась учыре ми ивортӥськомы бускельёсмылы, ӵош ужасьёсмылы, ӵош дышетскисьёсмылы но ӵыжы-выжыосмылы. Солы луыса быдэс дунне вылысь трос миллион адямиос кыло утиськон сярысь ӟеч иворез (Псалтирь 95:2).

Кинлы тӥ вераны быгатысалды ӟеч иворез Инмарлэн Эксэйлыкез сярысь но азьланяз умой улонлы оскиськон сярысь? Та тодон-валанъёсты пушкады эн возе. Тупась учыр луиз ке, соку ик вералэ соосты мукетъёсызлы!

• Кыӵе ивор быдэс музъем вылын верамын луыны кулэ?

• Кызьы Иеговалэн Адӟись-Ивортӥсьёсыз Иисуслэсь адӟем каро?

Пионер шуыса ӵем нимало соосты, кинъёс выль интыос усьто но выль сюресъёс лёго. Со сярысь верано ке, Иисус но пионер вал, малы ке шуоно со музъем вылэ лыктӥз, адямиослы ужан-тыршон но утиськонэ сюрес усьтон понна (Матфей 20:28). Солэсь адӟем карыса, Иеговалэн Адӟись-Ивортӥсьёсыз трос дырзэс висъяло, адямиосты дышетон понна (Матфей 28:19, 20). Куд-огъёсыз соос пӧлысь пионер луыса ужаны-тыршыны быгато.

Пионер — со ужась-тыршись, кудӥз трос дырзэ тодытон ужлы сӥзе. Иеговалэн вань Адӟись-Ивортӥсьёсыз ӟеч иворез верало. Со ужлы соос сомында дырзэс сёто, кӧня быгато. Нош куд-огъёсыз улонзэс озьы радъяны быгато, толэзяз 70 час тодытон уже пыриськон понна. Сыӵе ужась-тыршисьёс пионеръёс шуыса нимасько. Пионер луыса ужан-тыршон понна, тросэз вакчи нуналэн уж быръё. Кинлы ке но ӵекто нимысьтыз пионер луыны но ужаны-тыршыны отын, кытын юрттэт кулэ. Сыӵе ужась-тыршисьёс котькуд толэзе 130 яке солэсь тросгес час ӟеч иворез вӧлмыто. Пионеръёс огшоры уло. Соос оско, Иегова соосты уз кельты но улон понна ваньзэ кулэзэ сётоз шуыса (Матфей 6:31—33; 1 Тимофейлы 6:6—8). Соос, кинъёс югдуръёссы сэрен трос дырзэс тодытон ужлы сётыны уг быгато, юрттӥсь пионер луыса ужаны-тыршыны быгато, 30 яке 50 час толэзяз тодытыса.

Пионер ужа-тырше, малы ке шуоно со Инмарез но адямиосты яратэ. Иисус сямен ик, ми адӟиськомы, тросэз туннэ духовно куанер уло шуыса (Марк 6:34). Но ми сыӵе адямиослы юрттыны быгатӥськомы, вуоноезлы юн оскиськон сярысь вераса. Пионеръёс матысьёссэс ярато, соин ик соос, кужымзэс но дырзэс жалятэк, адямиослы духовно юртто (Матфей 22:39; 1 Фессалоникаослы 2:8). Озьы ужаса-тыршыса, пионер аслэсьтыз осконзэ юнматэ, Иеговаен эшшо но матэгес кариське но бадӟым шумпотон басьтэ (Апостолъёслэн ужъёссы 20:35).

• Кызьы тӥ валэктысалды, кин со сыӵе пионер?

• Мар косэ куд-огъёссэ трос дырзэс тодытон ужлы сӥзьыны?

Иеговалэн Адӟись-Ивортӥсьёсыз кемалась ини ужаны-тыршыны дышетэменызы тодмо луо. Соослы, кинъёс трос дырзэс висъяло Эксэйлык сярысь ӟеч ивор веранлы, нимысьтыз школаос радъямын. Со юрттэ тодытӥсьёслы ужан-тыршонзэс быгатыса быдэсъяны (2 Тимофейлы 4:5).

Пионеръёсты дышетӥсь школа. Одӥг ар ӵоже пионер луыса ужам-тыршемез бере, тодытӥсез 6-нуналъем дышетсконэ ӧтё, кудӥз ӵем дыръя матысь Эксэйлык юртын ортчытӥське. Сыӵе школалэн ужпумез — пионерлы юрттыны Иеговалы эшшо матэгес кариськыны, тодытонлэн вань удысъёсаз быгатыса пыриськыны но азьланяз но Инмарлы оскымон ужаны-тыршыны.

Эксэйлыкез тодытӥсьёслы школа. Та 2-толэзьем школалэн ужпумез — дышетыны азинлыко пионеръёсты, кудъёсыз дась ужаны-тыршыны отын, кытын юрттэт кулэ. Соос верало кадь: «Тани мон, монэ ысты» (Исаия 6:8). Озьы соос адӟем каро Иисуслэсь, быдӟым Тодытӥсьлэсь, кудӥз куке но музъем вылын улӥз (Иоанн 7:29). Соослы, кинъёс мукет интые мыно, дась луоно дышетскыны огшоры улыны. Культура, куазь но сиён туж пӧртэм луыны быгато солэсь, малы адями дышемын. Выль кыл но дышетоно луоз, вылды. Та школае ӧтё кышнояськымтэ вын-агайёсты, бызьымтэ сузэр-апайёсты но кузпалъёсты, кудъёсызлы 23—65 арес. Со школа юрттэ соослы духовной сямъёсты будэтыны, кудъёсыз ужан-тыршонын кулэ луозы, но быгатонлыкъёсты басьтыны, кудъёссэ Иегова но солэн организациез уже кутыны быгатозы.

Галаад библейской школа. «Галаад» кыл «пичи гурезь адӟись-тодытӥсь» шуэм луэ. 1943-тӥ арын та школаез кылдытэм бере 8 000-лэсь тросгес отын дышетскемъёс миссионер карыса ыстэмын вал, «музъемлэн вань сэрегъёсаз» ӟеч иворез адӟытон-тодытон понна (Апостолъёслэн ужъёссы 13:47). Со уж туж азинлыко луиз. Куке школаын дышетскемъёс нырысетӥзэ Перуэ вуизы, отын одӥг кенеш но ӧй вал, нош али отын 1 000-лэсь тросгес кенешъёс! Куке милям миссионеръёсмы Япониын ужаны-тыршыны кутскизы, отын 10 Адӟись-Ивортӥсь но ӧй вал, нош туннэ соос отын 200 000-лэсь тросгес ини. Та вить толэзьем дышетсконын дышетскисьёс Инмарлэсь Кылзэ мур эскеро. Школае ӧтё нимысьтыз пионеръёсты, миссионеръёсты, озьы ик филиалын ужасьёсты но ёросэз чакласьёсты. Сыӵе мур дышетон дася соосты быдэс дунне вылын Инмарлэсь организацизэ юнматыны.

• Кыӵе ужпумез Пионеръёсты дышетӥсь школалэн?

• Кинэ ӧтё Эксэйлыкез тодытӥсьёслы школае?