11-ТӤ ЛЮКЕТ
Малы сомында курадӟонъёс?
1, 2. Кыӵе юанзы кылдэ тросэзлэн адямиослэн?
МУЗЪЕМ ЗУРКАН быдэс карез куашкатэ. Пиосмурт вузкарон центре пыре но адямиосты ыбылэ. Кышномурт, кудӥзлэн вить пиналъёсыз, ракен висьыса кулэ.
2 Куке адямиос кыло та выллем кышкыт учыръёс сярысь, соослэн юанзы кылдэ: «Малы?» Соос малпаськыны кутско, малы музъем вылын сомында курадӟонъёс. Нош тӥляд куке кылдылӥз-а таӵе юанды?
3, 4. а) Мар сярысь юаз Аввакум Иеговалэсь? б) Мар вераз солы Иегова?
3 Библиысь ми тодӥськомы, адямиослэн но, кудъёсызлэн Инмарлы юн осконзы вал, та выллем юанъёссы кылдылӥзы шуыса. Кылсярысь, пророк Аввакум Иеговалэсь юаз: «Сьӧсь ужъёсты адӟыны, курадӟонъёс шоры учкыны малы мыным эрик сётӥськод? Талан-лушкаськон, ӝикатыса-ёртыса возён мынам азям уло, тупатэк улон ӝутӥське, керетыса-ёртыса улон султэ» (Аввакум 1:3).
4 Аввакумлэн 2:2, 3 гожтэмын, мар вераз Инмар та пророклы. Со сяна, Инмар Аввакумлы кыл сётӥз кылдэм югдурез тупатыны. Библиын верамын, Иегова адямиосты туж яратэ шуыса. Отын гожтэмын: «Со тӥ сярысь сюлмаське» (1 Пётр 5:7). Вераны кулэ, Инмар лек ужъёсты но курадӟонъёсты милесьтым но юнгес адӟемпотостэм каре шуыса. Соку малы сомында курадӟонъёс? Ойдолэ тодомы, мар вера Библия.
МАЛЫ СОМЫНДА КУРАДӞОНЪЁС?
5. Мар верало тросэз священникъёс, куке кыӵе ке шудтэм учыр луэ? Нош мар вера Библия?
5 Адямиен мар ке луэ ке, верало, солэн адӟонэз сыӵе вал шуыса. Нош куке кин ке курадӟе, тросэз пасторъёс но священникъёс верало, со Инмарлэн эрикез шуыса. Мукетъёсыз верало, адямиос, озьы ик нылпиос но, куло, малы ке шуоно Инмар соосты ас дораз басьтэ. Но со озьы ӧвӧл. Курадӟонъёс нокызьы но Иегова бордысь потыны уг быгато. Библиын верамын: «Ӧрекчаськон Инмар дорысь уг поты, шонертэм суд Дунне Кутӥсь дорысь уг лыкты» (Иов 34:10).
6. Малы тросэз адямиос лыдъяло, вань курадӟонъёсын Инмар янгыш шуыса?
6 Тросэз адямиос лыдъяло, музъем вылысь вань курадӟонъёсын Инмар янгыш шуыса,— соос малпамъя, та дуннеен Инмар кивалтэ. Но, кызьы асьмеос тодӥмы 3-тӥ люкетысь, та дуннеен Шайтан кивалтэ.
7, 8. Малы музъем вылын сомында курадӟонъёс?
7 Библиын гожтэмын: «Та дуннелэн адямиосыз шайтанлэн киулаз возисько» (1 Иоанн 5:19). Та дуннелэн кивалтӥсез, Шайтан Дьявол, туж лек. Со «быдэс дуннелэсь визьзэ» туга (Усьтӥськон 12:9). Тросэз адямиос солэсь адӟем каро, соин сэрен соос но туж лек луо. Та одӥгез муг, малы музъем вылын сомында пӧяськон, адӟемпотостэм карон но лек ужъёс.
8 Вань на мукет мугъёс но, малы музъем вылын сомында курадӟонъёс. Инмарлы пумит султэмзы бере Адам но Ева сьӧлыко луизы но, соослэн сьӧлыксы мукет адямиослы выжиз. Сьӧлык — со эшшо одӥгез муг, малы адямиос курадӟо. Сьӧлыко луэменызы сэрен, соос ог-огенызы вожвылъясько, кивалтон понна нюръясько, ожмасько но ог-огзэс ултӥяса возё (Екклесиаст 4:1; 8:9). Озьы ик, шудтэм учыръёс луо, «малпамтэ шорысь секыт вакытъёс» вуэмен (Екклесиаст 9:12). Со возьматэ, адями шуг-секытэ сюрыны быгатэ, малы ке шуоно со тупасьтэм дыре тупасьтэм интые учыраз.
9. Малы ми вераны быгатӥськомы, Инмарлэн мугез вань шуыса, малы со курадӟонъёсты ӧз быдты на?
9 Иегова адямиосты уг курадӟыты. Со янгыш ӧвӧл, адямиос йыружъёс лэсьто, ожмасько но ог-огзэс зӥбыса возё шуыса. Озьы ик со янгыш ӧвӧл, музъем зурканъёс, сильтӧлъёс, ву тудӟонъёс но мукет шугадӟонъёс луо шуыса. Озьы ке но тӥляд юанды кылдыны быгатэ: «Иегова — Ваньзэ Быгатӥсь Инмар ке, малы соку со курадӟонъёсты уг быдты?» Библиын верамын, Инмар милемыз туж яратэ шуыса. Озьыен, солэн мугез вань, малы со курадӟонъёсты ӧз быдты на (1 Иоанн 4:8).
МАЛЫ ИНМАР КУРАДӞОНЪЁСТЫ ӦЗ БЫДТЫ НА
10. Мар вераз Шайтан Иегова сярысь?
10 Едем садын Шайтан Адамез но Еваез пӧяз. Со оскытӥз соосты, Иегова — урод кивалтӥсь шуыса. Шайтан вераз, Инмар Адамлэсь но Евалэсь мае ке умойзэ ватыса возе шуыса. Шайтан адямиосты оскытыны тыршиз, со Иеговалэсь умойгес кивалтоз но адямиослы Инмар кулэ ӧвӧл шуыса (Улон-вылон 3:2—5; учке 27-тӥ ватсам валэктонэз).
11. Кыӵе юанлы милемлы валэктон шедьтоно?
11 Адам но Ева Иеговалы пумит мынӥзы но солэсь кылзӥськемысь дугдӥзы. Соос малпазы, асьсэос ужпум кутыны быгато шуыса, мар ӟечез, нош мар уродэз луэ. Кызьы Иегова возьматыны быгатысал, соос шонертэм малпало но со гинэ тодэ, мар кароно, ми шудо мед луомы шуыса?
12, 13. а) Малы Иегова Адамез но Еваез ӧз быдты? б) Малы Иегова лэзиз, Шайтан дуннеен мед кивалтоз но адямиос асьсэлы кивалтэтъёс мед кылдытозы шуыса?
12 Иегова Адамез но Еваез ӧз быдты. Солэн малпамезъя, музъем вылын тырбыдэс адямиос улыны кулэ вал. Соин ик со лэзиз, Адамлэн но Евалэн нылпиоссы мед вордӥськозы но асьсэлы кивалтӥсь бырйыны мед быгатозы шуыса. Озьыен, Шайтан пӧртэм сямен Инмарлы люкетыны тыршиз ке но, Инмарлэн малпанэз одно ик быдэсмыны кулэ вал (Улон-вылон 1:28; Исаия 55:10, 11).
13 Шайтан трос миллион кылчинъёс азьын Иегова сярысь пӧяса вераз (Иов 38:7; Даниил 7:10). Иегова Шайтанлы дыр сётӥз тыршыны аслэсьтыз шонер луэмзэ возьматыны. Озьы ик Инмар адямиослы но дыр сётӥз, соос дуннеын, кудаз кивалтэ Шайтан, асьсэлы кивалтэтъёс мед кылдытозы но возьматыны мед тыршозы, соос Инмартэк но умой кивалтыны быгато шуыса.
14. Мае возьматӥз дыр?
14 Трос сюрс аръёс ӵоже адямиос асьсэос кивалтыны выризы, но умой кивалтыны ӧз быгатэ. Дыр ортчыса, валамон луиз, Шайтан — пӧяськись шуыса но адямиос Инмартэк кивалтыны уг быгато шуыса. Тани мар со сярысь гожтӥз Иеремия пророк: «Тодӥсько, Кузё-Инмаре, адямилэн улон сюресэз ас киулаз ӧвӧл, мынӥсьлэн но вамышъянэз ас тодэмъяз ӧвӧл» (Иеремия 10:23).
МАЛЫ ИЕГОВА СОКЕМА ВОЗЬМА?
15, 16. а) Малы Иегова лэзе, адямиос сокема курадӟыса мед улозы шуыса? б) Малы Иегова Шайтанэн ваем шуг-секытъёсты сэрттыны-пертчыны уг дырты?
15 Малы Иегова лэзе, адямиос сокема курадӟыса мед улозы шуыса? Малы со курадӟонъёсты уг быдты? Малы ке шуоно дыр кулэ вал, ваньмыз мед адӟозы, Шайтан умой кивалтыны уг быгаты шуыса. Адямиос пӧртэм амалъёсын кивалтыны турттӥзы, но ноку но умой кивалтыны ӧз быгатэ. Наука но техника удысын трос азинсконъёс лэсьтэмын ке но, шонерлыктэм ужъёс йыло но йыло. Котыр куанер улон, йыружъёс но ожъёс. Адӟиське, Инмартэк адямиос умой кивалтыны уг быгато шуыса.
16 Малы Иегова Шайтанэн ваем шуг-секытъёсты сэрттыны-пертчыны уг дырты? Малы ке шуоно со возьматысал, Иегова Шайтанлы юрттэ шуыса. Со сяна, Инмар вань шуг-секытъёсты сэрттысал-пертчысал ке, адямиос малпаны быгатысалзы, соос асьсэос но умой кивалтыны быгато шуыса, кызьы Шайтан вераз вал. Но Шайтан пӧяз. Иегова ноку но уз кары сое, мар адямиосты со пӧяськонлы оскыны косысал. Иегова ноку но уг пӧяськы (Лыдпусъёс 23:19).
17, 18. Кызьы Иегова Шайтанэн ваем изъянэз тупатоз?
17 Быгатоз-а Иегова вань шуг-секытъёсты быдтыны, кудъёсыз кылдӥзы адямиослэн кылзӥськымтэенызы но Шайтанэн сэрен? Быгатоз, малы ке шуоно Инмар ваньзэ быгатэ. Иегова со шуг-секытъёсты сэрттоз-пертчоз, куке ваньзы адӟозы, Шайтан пӧяз шуыса. Музъем вылын, кызьы Иегова малпаз вал, выльысь рай луоз. «Шайгуосын кыллисьёс» улӟытэмын луозы (Иоанн 5:28, 29). Адямиос ноку но уз висе, уз но кулэ. Иегова Иисус пыр «диаволлэсь ужъёссэ куашкатоз» но соин ваем изъянэз тупатоз (1 Иоанн 3:8). Нош али Иегова адямиослы дыр сётэ, соос со сярысь тодыны но сое асьсэлы кивалтӥсе бырйыны мед быгатозы шуыса. (Лыдӟе 2 Пётрлэсь 3:9, 10.) Туннэ асьмеос шуг-секытъёслэсь палэнскыны ум быгатӥське, но Иегова юрттэ милемлы соосты чиданы. (Лыдӟе Исаиялэсь 40:29.)
18 Иегова милемыз кужмысь уг косы сое кивалтӥсенымы лыдъяны но солэсь кылзӥськыны. Со адямиослы асьсэлы бырйыны эрик сётӥз. Со туж дуно кузьым. Ойдолэ тодомы, мае со возьматэ.
МАР КАРОДЫ ТӤ?
19. Мае Иегова адямиослы кузьмаз? Малы милемлы сое дунъяно?
19 Иегова милемлы паймымон кузьым кузьмаз. Со милемлы асьмелы бырйыны эрик сётӥз. Ми асьмеос бырйиськомы, кин милям луэммы потэ, кинэн эшъяськеммы но мар кареммы. Соин ми пӧртэм луиськомы пудо-животъёслэсь. Ми роботъёс ӧвӧл, кудъёсыз лэсьто сое гинэ, мае соосты косо. Иегова милемыз кужмысь уг косы лэсьтыны сое, мар солы кельше (Кыкетӥ Закон 30:19). Иеговалэн потэ, ми шумпотыса мед уломы шуыса.
20, 21. Кыӵе сюрес самой умой улон сюрес луэ?
20 Иеговалэн потэ, ми сое мед яратомы шуыса (Матфей 22:37, 38). Малпалэ, мар атайлы тросгес шумпотон ваёз: куке пиналыз, кин ке косэмъя, солы вера «Мон тонэ яратӥсько» яке куке пиналыз, вань сюлэмзэ поныса, сое вера? Иегова — милям Атаймы. Со кужмысь уг косы милемыз сое яратыны. Ми асьмеос бырйыны быгатӥськомы, ужано-тыршоно солы яке ӧвӧл. Шайтан, Адам но Ева Инмарлэсь кылзӥськытэк улыны малпазы. Нош мар кароды тӥ?
21 Быръе самой умой улон сюресэз — Иеговалы ужаны-тыршыны кутске! Трос миллион адямиос сыӵе быръён лэсьтӥзы ини. Инмар шумпотэ, соос солы ужаны-тыршыны мылкыд каризы шуыса, Шайтанлы ӧз (Мадёнъёс 27:11). Иегова кылзэ сётэ, вуонояз адямиос уз курадӟе ни шуыса. Нош мар карыны быгатӥськоды тӥ, Инмарлэн сётэм кылызлэсь быдэсмемзэ адӟон понна? Со сярысь ми вуоно люкетысь тодомы.