Ватсам валэктонъёс

1. Мар со сыӵе «Быдӟым Вавилон»

2. Ку Мессия лыктыны кулэ вал?

3. Медицинской процедураос, кудъёсаз вир кутӥське

4. Люкиськытэк нимаз улон

5. Праздникъёс но шулдыръяськонъёс

6. Паласькись висёнъёс

7. Коньдонэн но судэ сётонэн герӟаськем

1. Мар со сыӵе «Быдӟым Вавилон»

Кытысь ми тодӥськомы, «Быдӟым Вавилон» — со ваньмыз зэмос луисьтэм религиос шуыса? (Усьтӥськон 17:5). Тани малы озьы вераны луэ:

• Солэн ужъёсыз быдэс дунне вылын шӧдӥсько. Библиын верамын, Быдӟым Вавилон «выжыос, калыкъёс» вылын пуке шуыса. Со «туж бадӟым город, музъем вылысь эксэйёсын эксэйяськыса улӥсь» (Усьтӥськон 17:15, 18).

• Со политика но вузкарон система ӧвӧл. «Музъем выл эксэйёс» но «вузкарисьёс», со бырыку, быдтэмын уз луэ (Усьтӥськон 18:9, 15).

• Со Инмар сярысь пӧяса вера. Быдӟым Вавилон азыса-калгыса улӥсь кышномуртэн нимамын, малы ке шуоно со кивалтӥсьёсын тупан кыл кутэ, аслыз пайда басьтон понна (Усьтӥськон 17:1, 2). Со вань калыкъёсты пӧяса возе. Трос адямиослэн кулэмзы понна со янгыш луэ (Усьтӥськон 18:23, 24).

Берытсконо 13-тӥ уроке, 6-тӥ подзаголовоке.

2. Ку Мессия лыктыны кулэ вал?

Библиын верамын, Мессия лыктытозь 69 пол 7 ар ортчоз шуыса (Лыдӟе Данииллэсь 9:25).

• Ку кутскиз 69 пол 7 ар? Асьме вакытлэсь азьло 455-тӥ арын. Со аре Неемия «Иерусалимез выльдыны-ӝутыны» лыктӥз (Даниил 9:25; Неемия 2:1, 5—8).

• Ку йылпумъяськиз 69 пол 7 ар? Асьме вакытлэсь азьло 455-тӥ арысен кутскыса, 483 (69 x 7) ар лыдъямы ке, асьме вакытысь 29-тӥ аре вуомыa. Ӵапак та арын Иисус пылатӥськиз но Мессия луиз! (Лука 3:1, 2, 21, 22).

Берытсконо 15-тӥ уроке, 5-тӥ подзаголовоке.

3. Медицинской процедураос, кудъёсаз вир кутӥське

Куддыръя, адямиез эмъян понна, эмъясьёс висисьлэсь аслэсьтыз ик вирзэ куто. Но христиан муртъёс котьку ик соглаш уг карисько озьы эмъяськыны. Кылсярысь, соос соглаш уг карисько донор луыны. Озьы ик операция лэсьтон азьын соос асьсэлэсь вирзэс уг сёто, сое кытын ке но мед возёзы но берлогес со вирез соослы асьсэлы ик вирсэразы мед лэзёзы шуыса (Кыкетӥ Закон 15:23).

Но христиан мурт соглаш кариськыны быгатэ, кылсярысь, вирзэ анализлы сётыны, гемодиализ, гемодилюция лэсьтыны яке искусственной кровообращение кылдытӥсь аппаратлы. Малы ке шуоно та выллем процедураос дыръя эмъясьёс висисьлэсь вирзэ уг басьто, сое кытын ке возён понна но берлогес сое выльысь уже кутон понна. Но та выллем процедураослы соглаш кариськон азьын котькуд христиан муртлы тодоно, кызьы эмъясь сое ортчытоз, малы ке шуоно котькуд эмъясь та процедураосты пӧртэм сямен ортчытэ. Соин ик ужпум кутон азьын христиан муртлы ваньзэ умой-умой тодоно но та юанъёс вылын малпаськоно:

• Мынэсьтым вирме басьтӥзы но ӝамдэлы солэсь мугортӥ бергамзэ дугдытӥзы ке, лэзёз на-а мынам возьытлыке лыдъяны сое мугорылэн люкетэныз яке куроз сое «сюй вылэ кисьтыны»? (Кыкетӥ Закон 12:23, 24).

• Медицинской процедура дыръя мынэсьтым вирме басьтӥзы но сое, кылсярысь, сузязы яке эмъюмен суразы но выльысь мугорам лэзизы ке, мар шуоз мынам возьытлыке?

Берытсконо 39-тӥ уроке, 3-тӥ подзаголовоке.

4. Люкиськытэк нимаз улон

Библия вера, кузпалъёслы ӵош улыны кулэ шуыса. Нош кузпалъёс люкиськытэк нимаз улыны малпазы ке, Библия вера, соослы выльысь бызьыны яке выльысь кышно басьтыны уг яра шуыса (1 Коринфъёслы 7:10, 11). Но кылдыны быгато югдуръёс, куке адямилы кузпалэз дорысь кошконо но нимаз улоно луэ.

• Кузпал семьяез сярысь сюлмаськыны пумит. Карт пумит луэ семьязэ сюдыны-вордыны, соин ик кышноез но нылпиосыз сиёнтэк но коньдонтэк кылемын (1 Тимофейлы 5:8).

• Кузпал жугиськыса улэ. Одӥг кузпал мукетсэ жугыса возе но сое сӧсыр кельтыны яке виыны но быгатэ (Галатъёслы 5:19—21).

• Иеговаен кусыпъёс сӧриськыны быгато. Одӥгез кузпал мукетызлы Иеговалы ужаны-тыршыны уг лэзьы (Апостолъёслэн ужъёссы 5:29).

Берытсконо 42-тӥ уроке, 3-тӥ подзаголовоке.

5. Праздникъёс но шулдыръяськонъёс

Христианъёс уг пусъё праздникъёсты, кудъёсыз Иеговалы уг ярало. Но улонамы праздникъёсын герӟаськем пӧртэм учыръёс кылдыны быгато, кудъёсаз милемлы шонер ужпум кутоно. Со понна тодамы ваёно сое, малы дышетэ Библия, но малпаськоно, уз йырйы-а милемыз возьытлыкмы кутэм ужпуммы понна. Учкомы куд-ог учыръёсты, кудъёсыз кылдыны быгато.

• Кин ке но тӥледыз праздникен ӟечкыла. Тӥ со адямилы «тау» шуыны быгатоды. Нош солэн тодэмез потэ ке, малы тӥ та праздникез уд пусйиське, тӥ солы валэктыны быгатоды.

• Кузпалды, кудӥз Иеговалы уг оскы, ӧте тӥледыз кыӵе ке праздник дыръя ӵыжы-выжыосты доры куное мыныны. Тӥ ужпум кутӥды ке мыныны но валады ке, возьытлыкты тӥледыз со понна уз йырйы шуыса, умой луоз кузпалдылы азьло ик вераны, пӧртэм йылол-сямъёсы тӥ уд пыриське шуыса.

• Уж дорысьтыды кузёды праздниклы тӥледлы премия сётыны малпа. Басьтоды-а тӥ со премиез? Асьтэос учке. Малпаське: тӥ со премиез басьтӥды ке, малпалоз-а кузёды, озьы тӥ празднике пыриськиськоды шуыса? Яке, премиез сётыса, кузёдылэн тӥледлы ужамды понна тау каремез потэ-а?

• Тӥледлы кыӵе ке празднике кузьым кузьмало. Кузьым кузьмакуз, адями тазьы вераны быгатэ: «Мон тодӥсько, тон та праздникез уд пусйиськы шуыса, но мынам тыныд кузьым кузьмаме потэ». Оло нош, озьы со адямилэн тӥледыз зэмзэ ик шумпоттэмез потэ. Оло нош, кузьым кузьмаса, солэн эскеремез потӥз, зэмзэ ик-а тӥляд Иеговалы оскымон луэмды потэ, яке солэн потэ тӥледыз кужмысь празднике пыриськытэмез. Кызьы гинэ медам луы, тӥ асьтэос ужпум кутыны кулэ. Валтӥсез — Иеговалы оскымон кыльыны но сыӵе ужпум кутыны, кудӥз понна возьытлыкты тӥледыз уз йырйы (Апостолъёслэн ужъёссы 23:1).

Берытсконо 44-тӥ уроке, 1-тӥ подзаголовоке.

6. Паласькись висёнъёс

Ми адямиосты яратӥськомы. Соин ик, ми тодӥськомы ке яке малпаськомы гинэ, паласькись висёнэн висиськомы шуыса, ми туж чакласькомы, висёнмы мукетъёсызлы медаз пала шуыса. Ми озьы лэсьтӥськомы, малы ке шуоно кылзӥськиськомы Библиысь таӵе возетлэсь: «Матысьтэ астэ ачид кадь ик яраты» (Римъёслы 13:8—10).

Кызьы ужъёсын возьматоно, ми та возетлэсь кылзӥськиськомы шуыса? Ми висиськомы ке, мукетъёсыныз, кылсярысь, кизэс кутыса ум ӟечбуръяське, ум ӟыгыръяське но ум чупаське. Озьы ик кӧтмес ӝож ум каре, милемыз куное ӧз ӧте ке. Пылатӥськыны малпась адями паласькись висёнэн висе ке, со вералоз со сярысь тӧроослэн кенешсылэсь ужзэ радъясьлы. Соку агайёс утьыны быгатозы мукет пылатӥськисьёсты. Кузпалъяськыны малпась адями пумиськылыны кутскемезлэсь азьло сюрылӥз ке учыре, кудаз со паласькись висён кутыны быгатэ вал, солы вирзэ анализлы сётоно. Озьы со возьматоз, ас сярысьтыз гинэ уг сюлмаськы, нош мукетъёсыз сярысь но сюлмаське шуыса (Филиппыослы 2:4).

Берытсконо 56-тӥ уроке, 2-тӥ подзаголовоке.

7. Коньдонэн но судэ сётонэн герӟаськем юанъёс

Коньдонэн герӟаськем ужез быдэстон азьын адямиос куспазы вераськизы но вераськемзэс, огкылэ вуэмзэс бумага вылэ гожтӥзы ке, берло валамтэос шергес кылдозы. Озьы лэсьтыны умой луоз, куспазы христиан муртъёс вераськизы ке но (Иеремия 32:9—12). Ваньзэ шонер лэсьтыса но, христиан муртъёс куспын валамтэос кылдыны быгато. Озьы луиз ке, соослы ӝоггес тупаны тыршоно но валамтэоссэс куспазы гинэ сэрттоно-пертчоно.

Нош мар кароно, огъя оскись коньдонэн пӧяз яке кыл нуллыса ветлӥз ке? (Лыдӟе Матфейлэсь 18:15—17.) Иисус вераз, таӵе куинь вамышъёс лэсьтоно шуыса:

1. Тыршоно валамтэосты куспамы гинэ сэрттыны-пертчыны. (Учке 15-тӥ кылбурез.)

2. Ӧз ке пӧрмы, ӧтёно одӥгзэ яке кыксэ христианъёсты, кудъёсыз Инмарлэн визь-кенешъёсызъя улыны быгато ини. (Учке 16-тӥ кылбурез.)

3. Озьы но кылдэм шуг-секытэз сэрттыны-пертчыны ӧз луы ке, соку гинэ тӧроослы вазиськоно. (Учке 17-тӥ кылбурез.)

Куспамы валамтэос кылдо ке, тыршоно соосты судэ сётытэк сэрттыны-пертчыны, Иеговалэсь нимзэ но кенешез медам сапталэ шуыса (1 Коринфъёслы 6:1—8). Но луыло учыръёс, куке христиан муртлы судэ вазиськоно луэ, кылсярысь, люкиськыку, пиналэз вордосэ басьтыку, страховка яке наслед­ство басьтыку. Сыӵе учыре христиан мурт, мукетъёсыныз огкылэ вуон понна, судэ вазиське ке, Библиысь возетъёсты со уг тӥя.

Христиан мурт адӟиз ке, бадӟым муртэ яке пичи пиналэз эриктэмазы шуыса, кин ке лушкаськиз яке кинэ ке виизы шуыса, но полицилы вераз ке, соку но со Библиысь возетъёсты уз тӥя.

Берытсконо 56-тӥ уроке, 3-тӥ подзаголовоке.