Мар уз луы ни, куке Инмарлэн Эксэйлыкез лыктоз?
«Таиз дунне ортче-быре, солэн ортчыт кужмо кулэ каронъёсыз но быро, нош Инмарлэсь эриксэ быдэсъясь пумтэм вапумъёс улэ» (1 ИОАНН 2:17).
1, 2. а) Мар огкадез та дунне но кулонлы судъям йыруж лэсьтӥсь вискын? (Учке статья кутсконысь суредэз.) б) Мар шӧдозы кылчинъёс но адямиос сьӧлыклэсь кышкасьтэм дуннеез быдтэм бере?
«КУЛЭМ МУРТ МЫНЭ!» Тазьы кеськем куара тюрьматӥ чузъяське, куке камераысь кышкыт йыруж лэсьтӥсез потто. Нош малы сое возьмасьёс озьы кесько? Та адями улэп но таза кадь адӟиське ук. Возьмасьёс озьы кесько, малы ке шуоно йыруж лэсьтӥсез казнить карон интые нуо но со шоры кулэм мурт шоры кадь учко иниa.
2 Сьӧлыклэсь кышкасьтэм дуннемы маин ке но со йыруж лэсьтӥсьлы тупа. Со кемалась судъямын ини но ӝоген быдтэмын луоз. Библиын верамын: «Таиз дунне ортче-быре» (1 Иоанн 2:17). Ми оскиськомы, со озьы ик луоз шуыса. Озьы ке но, кулонлы судъям йыруж лэсьтӥсь но сьӧлыклэсь кышкасьтэм дунне вискын одӥг бадӟым пӧртэмлыкез вань. Йыруж лэсьтӥсь сярысь ке верано, кулонлы приговор шонертэм лэсьтэмын вал шуыса вераны луэ но курыны сое выльысь эскерыны, яке казнить карон дырез кӧнялы ке ӝегатыны. Нош та дунне сярысь ке верано, сое судъяз Дунне вылысь самой шонерлыко Судъясь (К. Зак. 32:4). Приговор дырыз дыръя быдэстэмын луоз, но нокинлэн малпанэз но уз кылды, со шонертэм вал шуыса. Та дуннеез быдтэм бере кылчинъёс но, адямиос но шумпотозы, табере шонерлыко улон вуиз шуыса. Макем капчиен шокчозы соос соку!
3. Мар ортчоз-быроз, куке Инмарлэн Эксэйлыкез кивалтыны кутскоз?
3 Мар пыре «дунне» пӧлы, кудӥз ортчоз-быроз? Тросэз та дуннеысь, мае туннэ адямиос улонын валтӥсез луэ шуыса лыдъяло, быдтэмын луоз. Со ивор урод-а? Ӧвӧл! Ӵапак со сярысь вера Эксэйлык сярысь ӟеч ивор (Матф. 24:14). Озьыен, ойдолэ эскеромы, мар ортчоз-быроз, куке Инмарлэн Эксэйлыкез кивалтыны кутскоз. Бырозы сьӧлыклэсь кышкасьтэм адямиос; кырсь ужъёсын вырись организациос; лек ужъёс; вӧсь луон, кулон но курадӟонъёс. Пыр-поч эскерыку сое, мар пыре «дунне» пӧлы, ми вераськомы: 1) кызьы ваньмыз со милям улонмы вылын шӧдӥське, 2) мар Иегова ваньмыныз соин кароз но 3) со сярысь, мар ваньзэ сое воштоз.
СЬӦЛЫКЛЭСЬ КЫШКАСЬТЭМ АДЯМИОС
4. Кызьы сьӧлыклэсь кышкасьтэм адямиослэн ужъёссы милям улонмы вылын шӧдӥсько?
4 Кызьы милям улонмы вылын шӧдӥсько сьӧлыклэсь кышкасьтэм адямиослэн ужъёссы? «Берпум аръёсы секыт дыръёс вуозы» шуыса, азьпалзэ ивортыса верамез бере апостол Павел святой духлэн кивалтэмез улсын гожтӥз: «Нош кескич адямиос, пӧяськисьёс эшшо но тросгес урод ужъёс лэсьтыны кутскозы» (2 Тим. 3:1—5, 13). Адӟиськоды-а тӥ, кызьы та кылъёс быдэсмо? Тросэз асьмеос пӧлысь пумиськылӥзы урод ужъёсын, кудъёссэ лэсьтӥзы сьӧлыклэсь кышкасьтэм адямиос. Куд-огъёсыз соос пӧлысь лек ужъёссэс ватытэк лэсьто, нош мукетъёсыз — ӟеч ужъёс лэсьтэм амал. Ми асьмеос сыӵе адямиосын ӧм пумиськылэ ке, озьы ке но соослэн ужъёссы ми вылын шӧдӥсько. Ми куалектӥськомы, куке кылӥськомы, макем лек ужъёс соос лэсьто. Нош иворъёс, кудъёсаз верамын, кызьы сьӧлыклэсь кышкасьтэм адямиос сюлэмтэм выро нылпиосын, арлыдоосын но соосын, кинъёс асьсэды утьыны уг быгато, милесьтым сюлэммес пилиськымон ик вӧсь каро. Сыӵе адямиос сьӧсьёс кадь луо, периос кадь лек выро (Иак. 3:15). Шумпотоно, умоез сярысь малпаськыны милемлы Инмарлэн Кылысьтыз ӟеч ивор юрттэ шуыса.
5. а) Кыӵе луонлыкез вань котькудӥзлэн сьӧлыклэсь кышкасьтэм адямилэн? б) Мар луоз сьӧлыклэсь кышкасьтэм адямиосын, кудъёсыз воштӥськыны пумит луозы?
5 Мар кароз соосын Иегова? Али Иегова сьӧлыклэсь кышкасьтэм адямиослы воштӥськыны луонлык сётэ (Ис. 55:7). Нимаз адямиос судъямын ӧвӧл, нош судъямын оглом та дунне. Мар меда луоз соосын, кинъёс воштӥськыны пумит луо но бадӟым куректон кутскытозь ик та дуннелы дурбасьтозы? Иегова кылзэ сётэ музъем вылысь сьӧлыклэсь кышкасьтэм адямиосты пыраклы быдтыны. (Лыдӟы Псалтирез 36:10.) Соос малпало, дыр, соослы номыр но уз луы шуыса. Тросэз дышизы лек ужъёссэс ватыны, но ӵем дыръя, соос вуысь кӧсын пото кадь адӟиське (Иов 21:7, 9). Но тани мар Библиын верамын Иегова сярысь: «Солэн синъёсыз адямилэсь улон сюресъёссэ чаклало, Со солэсь вань вамышъёссэ адӟе. Пеймыт азе но, кулонлэн вужераз но законлы пумит улӥсьёс ватскыны уг быгато» (Иов 34:21, 22). Инмарлэсь пегӟыны уг луы. Нокин но сое пӧяны уг быгаты. Тём-тём пеймыт азьын но лек ужъёсты Инмарлэсь уд ваты — со ваньзэ адӟе. Армагеддон бере ми котыр учкомы но одӥгзэ но сьӧлыклэсь кышкасьтэм адямиез ум адӟе. Ваньзы соос пыраклы бырозы! (Пс. 36:12—15).
6. Кин кылёз музъем вылэ сьӧлыклэсь кышкасьтэм адямиосты быдтэм бере? Малы со шумпотымон луэ?
6 Кин кылёз музъем вылэ сьӧлыклэсь кышкасьтэм адямиосты быдтэм бере? Иегова оскытэ: «Зӥбыт-востэм улӥсьёс музъем басьтозы, каньыллыклэн трос луэменыз эзылозы». Со псаломын ик гожтэмын на: «Шонер улӥсьёс музъем басьтозы но со вылын пумтэм вапумъёс улозы» (Пс. 36:11, 29). Кинъёс со «зӥбыт-востэм улӥсьёс» но «шонер улӥсьёс»? Зӥбыт-востэм улӥсьёс — со адямиос, кудъёсыз Иеговалэсь дышетско но кылзӥсько солэсь, нош шонер улӥсьёс — со адямиос, кудъёсыз шумпотыса лэсьто сое, мар Инмарлэн син азяз шонер луэ. Туннэ сьӧлыклэсь кышкасьтэм адямиос шонер улӥсь адямиослэсь тросгес. Нош выль дуннеын зӥбыт-востэм но шонер улӥсь адямиос гинэ луозы. Макем умой луоз улыны сыӵе адямиос пӧлын! Со зэмос рай луоз.
КЫРСЬ УЖЪЁСЫН ВЫРИСЬ ОРГАНИЗАЦИОС
7. Кызьы милям улонмы вылын шӧдӥсько кырсь ужъёсын вырись организациослэн ужъёссы?
7 Кызьы милям улонмы вылын шӧдӥсько кырсь ужъёсын вырись организациослэн ужъёссы? Та дуннеын троссэ урод ужъёсты нимаз адямиос уг лэсьто, нош быдэс организациос. Басьтомы, кылсярысь, со религиозной организациосты, кудъёсыз трос миллион адямиосты пӧяло, соослэсь Библилы осконзэс быдтыны тыршыса, Инмар сярысь но вуоноез сярысь шонертэмзэ вераса но мукет. Нош мар вераны луоз кивалтӥсьёс сярысь, кудъёсыз войнаосты кенжыто но пӧртэм калыкъёсты ваче пумит ӝуто, куанер но ляб адямиосты зӥбыса возё, кузьмаськонэн но чеберъяськонэн узырмо? Нош малпано ке огазеяськонъёс сярысь, кудъёсыз узырмыны тыршыса, чик жалятэк котырысь инкуазез кырсёмыто, инкуазь ресурсъёсты быдто но адямиосты пӧяло со дыре, куке трос миллион адямиос туж куанер уло? Кызьы адӟиськомы, сыӵе организациосын сэрен дуннеын сомында курадӟонъёс.
8. Библия верамъя, мар луоз организациосын, кудъёсыз туж юнэсь кадь адӟисько?
8 Мар кароз соосын Иегова? Бадӟым куректон кутскоз соку, куке политической кужымъёс пумит ӝутскозы вань зэмос луисьтэм религиозной организациослы, кудъёсыз Библиын азыса-калгыса улӥсь кышномурт, Быдӟым Вавилон, шуыса нимамын (Усьт. 17:1, 2, 16; 18:1—4). Зэмос луисьтэм религия быдэсак быдтэмын луоз. Нош мар луоз мукетъёсыныз кырсь ужъёсын вырись организациосын? Тросэз соос пӧлысь туж юнэсь кадь адӟисько, соин ик Библиын соос гурезьёсын но шормуӵъёсын ӵошатэмын. (Лыдӟы Усьтӥськонэз 6:14.) Инмарлэн Кылаз азьло ик верамын вал ини, кивалтэтъёс но вань организациос, кудъёсыныз соос кивалто, быдтэмын луозы шуыса. Бадӟым куректон йылпумъяськоз, куке та вуж дуннелэн вань кивалтэтъёсыз но ваньмыз, кинъёс соин ӵош Инмар Эксэйлыклы пумитъясько, быдтэмын луозы (Иер. 25:31—33). Собере музъем вылэ одӥгез но кырсь ужъёсын вырись организация уз кыльы ни.
9. Малы ми оскиськомы, «выль музъем» вылын радлык луоз шуыса?
9 Мар воштоз кырсь ужъёсын вырись организациосты? Армагеддон бере музъем вылэ одӥг ке но организация кылёз-а? Библиын верамын: «Ми, Солэсь сӥзем кылзэ кабыл басьтыса, выль инъёсыз, выль музъемез витиськомы, кудъёсыз вылын шонерлык улэ» (2 Пётр 3:13). Вуж инъёс но вуж музъем, яке кырсь ужъёсын вырись кивалтэтъёс но адямиос, кудъёсыз соос пала пыро, уз луэ ни. Нош мар соосты воштоз? «Выль инъёс но выль музъем» — со выль кивалтэт но адямиос, кудъёсыныз со кивалтоз. Со Эксэйлыкын кивалтӥсьёс Иисус Христосэн ӵош, кудӥз отын йыр луэ, Иеговалэсь, радлыклэн Инмарезлэсь, сямъёссэ адӟем карозы (1 Кор. 14:33). Соин ик «выль музъем» вылын радлык луоз. Адямиослэн кулэяськонъёссы сярысь сюлмаськозы шонер улӥсь пиосмуртъёс (Пс. 44:17). Соосын кивалтоз Иисус Христос аслаз 144 000 юрттӥсьёсыныз. Малпалэ гинэ, макем умой луоз улонмы, куке кырсь ужъёсын вырись вань организациос интые луоз одӥг гинэ организация, кудӥз ноку но кырсь ужъёсын уз выры!
УРОД УЖЪЁС
10. Кыӵе урод ужъёс вӧлмемын отын, кытын тӥ улӥськоды? Кызьы со шӧдӥське тӥляд улонды но семьядылэн улонэз вылын?
10 Кызьы милям улонмы вылын шӧдӥсько урод ужъёс? Ми улӥськомы дунне вылын, кытын паськыт вӧлмемын законлы пумит улон: азон-калгон, пӧяськон но лек ужъёс. Тужгес но секыт анай-атайёслы, малы ке шуоно соослы трос тыршоно луэ, нылпиоссэс вань со урод ужъёслэсь утён понна. Та дунне урод ужъёсты шулдыръяськонъёс пыр умоен возьматэ, нош Инмарлэсь ӟечез но уродэз шоры учконзэ серекъя (Ис. 5:20). Нош зэмос христианъёс озьы уг малпало. Соос вань кужмысьтызы тыршо Инмарлы оскымон кыльыны та лек дуннеын, кудаз Иеговалэсь курон-косонъёссэ уг гажало.
11. Малы милемыз дышетэ Иеговалэн Содомез но Гоморраез судъямез?
11 Мар кароз Иегова? Эскеромы, мар кариз Иегова Содомен но Гоморраен, кудъёсаз кырсь ужъёс вӧлмемын вал. (Лыдӟы 2 Пётрез 2:6—8.) Шонер улӥсь Лот нимо адямилы туж секыт вал адӟыны, макем кырсь ужъёс лэсьто вал котырысьтыз адямиос. Куке Иегова со палъёсысь вань каръёсты быдтӥз, отын вӧлмем кырсь ужъёсты быдтэм сяна, озьы со «сьӧлыклэсь кышкасьтэмъёс понна мар луонэз» возьматӥз на. Ӝоген Иегова та дуннеез судъяны кутскоз, соку со вань кырсь ужъёсты озьы ик выжытэм быдтоз.
12. Мар карыны тӥ малпаськоды выль дуннеын?
12 Мар воштоз урод ужъёсты? Рай музъем вылын туж трос тунсыкоез луоз! Кылсярысь, пуктэ син азяды, макем шумпотыса ми музъемез райлы пӧрмытомы, асьмелы но ӵыжы-выжыосмылы коркаос пуктомы. Яке малпаське со сярысь, кызьы ми пумиталомы трос миллион улӟыса султэмъёсты но юрттомы соослы тодыны Иеговалэн эсэпъёсыз сярысь но со сярысь, кыӵе кусыпъёсыз вал Иеговалэн адямиосын (Ис. 65:21, 22; Ап. уж. 24:15). Соку ваньмылэн асьмелэн трос ужъёсмы луозы, кудъёсыз милемлы бадӟым шумпотон ваёзы но Иеговаез данъялозы.
ВӦСЬ ЛУОН, КУЛОН НО КУРАДӞОНЪЁС
13. Кытчы вуттӥз Шайтанлэн, Адамлэн но Евалэн пумит ӝутскемзы?
13 Кызьы вӧсь луон, кулон но курадӟонъёс милям улонмы вылын шӧдӥсько? Сьӧлыклэсь кышкасьтэм адямиос но кырсь ужъёсын вырись организациос сэрен быдэс дунне вылын вӧлмемын вӧсь луон, кулон но курадӟонъёс. Быгатоз-а кин ке вераны, ожъёсын, куанер улонэн ӧз пумиськылы но мукет калыкысь луэмез понна ултӥянэз ас вылаз ӧз шӧдылы шуыса? Быгатэ-а кин ке висёнлэсь но кулонлэсь утиськыны? Ваньзэ сое ми ас выламы шӧдӥськомы. Музъем вылын сыӵе урод югдур кылдӥз, малы ке шуоно Шайтан, Адам но Ева Иеговалы пумит ӝутскизы. Котькудмылы со пумит ӝутсконлэн секыт бервылъёсыныз пумиськоно луиз.
14. Мар луоз вӧсь луонэн, кулонэн но курадӟонъёсын?
14 Мар кароз Иегова? Кылсярысь, Иегова кылзэ сётэ ожъёсты дугдытыны. (Лыдӟы Псалтирез 45:9, 10.) Нош мар луоз висёнъёсын? Иегова соосты быдтоз (Ис. 33:24). Мар кароз Иегова кулонэн? Со сое пумтэм вапумъёслы ньылоз (Ис. 25:8). Озьы ик со куанер улонлы но пум поноз (Пс. 71:12—16). Инмар быдтоз ваньзэ, мар улонмес секыт каре, вӧсь луон но курадӟонъёс вае. Иеговалы луыса милемлы уз пыӵа ни та дуннелэн урод «омырез», кудӥз Шайтан но солэн периосыз бордысь потэ (Еф. 2:2).
Пуктэ син азяды дуннеез, кудаз ӧвӧл ожъёс, висёнъёс но кулон (Учке 15-тӥ абзацез.)
15. Мар пыраклы быдтэмын луоз Армагеддон бере?
15 Пуктэ син азяды дуннеез, кудаз ӧвӧл ожъёс, висёнъёс но кулон. Ӧвӧл армиос, ожтӥрлык, больницаос, эмъясьёс но шайвылъёс. Ӧвӧл ни йыружъёс, соин ик кулэ ӧвӧл полиция, сигнализациос, оло нош, тунгонъёс но усьтонъёс гинэ но кулэ ӧвӧл ни. Сюлмамы ноку но уз кылдэ ни сюлмаськонъёс но сюлэмшугъяськонъёс.
16, 17. а) Кыӵе шӧдонъёссы луозы соослэн, кинъёс Армагеддонын улэп кылёзы? Вералэ пример. б) Мар кароно, ми оскыны мед быгатомы, та дуннеез быдтыку улэп кылёмы шуыса?
16 Кыӵе улон луоз, куке ваньмыз уродэз ортчоз-быроз? Сое син азе пуктыны капчи ик ӧвӧл. Ми туж кема улӥськомы ини та дуннеын, соин ик ми ум шӧдӥське ни, вылды, макем трос курадӟонъёс милемлы вае та дуннеын кылдэм югдур. Ми укшаськомы чугун сюрес вӧзын улӥсь адямилы, кудӥз дыр ортчемъя поездъёслэн дыбыртэмзылы дыше. Яке солы, кин жаг куян инты вӧзын улэ но, озьы ик пумен урод зынлы дыше но сое уг шӧды ни. Нош ваньмыз со ӧз луы ни ке, макем капчи луоз соку!
17 Псалтирьын 36:11 верамын: «Зӥбыт-востэм улӥсьёс музъем басьтозы, каньыллыклэн трос луэменыз эзылозы». Макем сюлэмез шунто та кылъёс! Ӵапак сыӵе улон сӥзе милемлы котькудмылы Инмар. Соин ик лэсьтэ ваньзэ, мае быгатӥськоды, та берпум нуналъёсы Иегова Инмарен матысь кусыпъёсты утён но солэн организацияз кылён понна. Уте оскондэс, сое тодады возе, со котьку тӥляд йырады но сюлмады мед луоз. Котькуд тупась учыре вералэ со сярысь мукет адямиослы (1 Тим. 4:15, 16; 1 Пётр 3:15). Озьы лэсьтыса, тӥ оскыны быгатоды, быдтыны судъям дуннеен валче тӥ уд быре шуыса. Тӥ пырак дауръёс ӵоже музъем вылын райын шумпотыса улоды!
a Азьло сыӵе сям вӧлмемын вал Огазеяськем Штатъёсысь куд-ог тюрьмаосын.