Учкиськоды-а тӥ шонерлык шоры Иегова сямен?

1, 2. а) Кыӵе шонерлыктэм ужен пумиськиз Навуфей? б) Кыӵе кык сямъёсты ми эскеромы та статьяын?

ПУКТЭ син азяды таӵе учырез. Одӥг пиосмуртэз янгыше уськыто, со секыт йыруж лэсьтӥз шуыса. Сое виыны судъяло. Ӵыжы-выжыосыз но эшъёсыз юн кайгыро, малы ке шуоно тодӥзы, со, возьыттэм адямиослэн пӧяса верам кылъёссы вылэ пыкиськыса, янгыше уськытэмын шуыса. Та янгыштэм адямиез виемзэс адӟыса, ваньзылэн, кинъёс шонерлыкез ярато, сюлэмъёссы ик позыртӥсько, вӧсь луэмзылы чидатэк. Та учыр малпамын ӧвӧл. Со зэмзэ но вал Иеговалэн Навуфей нимо оскымон ужась-тыршисеныз, кудӥз улӥз Израильын, отын Ахав нимо эксэй кивалтыку (3 Экс. 21:11—13; 4 Экс. 9:26).

² Таяз статьяын, Навуфеен луэм учырез эскерем сяна, ми эскеромы на сое, кыӵе бадӟым янгыш лэсьтӥз нырысетӥ даурын христиан кенешысь одӥг оскымон тӧро. Библиысь таӵе примеръёс вылын малпаськыса, ми тодомы, шонерлык шоры Иегова сямен учкеммы потэ ке, милемлы зӥбыт-востэм луоно но мылысь-кыдысь простить карыны дась луоно шуыса.

СОКЕМ ШОНЕРЛЫКТЭМ УЖ

3, 4. Кыӵе адями вал Навуфей? Малы со пумит луиз аслэсьтыз виноград бакчазэ Ахав эксэйлы вузаны?

³ Навуфей Иеговалы оскымон кылиз соку но, куке тросэз израиль пиос адӟем каризы Ахав эксэйлэсь но солэн Иезавель нимо лек кышноезлэсь урод примерзэс. Соос Вааллы йыбыртъязы но Иеговаез но солэсь законъёссэ ӧз гажалэ. Нош Навуфей понна Инмарен эшъяськон улонэз сярысь но дуногес вал.

⁴ Лыдӟы 3 Эксэйлыкъёслэсь 21:1—3. Ахав Навуфеез куриз солы виноград бакчазэ вузаны яке умоезлыгес воштыны, нош Навуфей пумит луиз. Малы? Навуфей зӥбытэн вераз Ахавлы: «Атайёсылэсь мыным сюрем люкетэз тыныд сётонлэсь Кузё-Инмаре монэ мед утёз!» Навуфей тодэ вал, Иеговалэн израиль пиослы сётэм законэзъя, люкет музъемез пырак ӵожелы вузаны уг яра шуыса (Лев. 25:23; Лыд. 36:7). Адӟиське, Навуфей ваньмыз шоры Иеговалэн синмыныз учке вал шуыса.

5. Мар кариз Иезавель Навуфейлэсь виноград бакчазэ басьтон вылысь?

⁵ Жаляса верано луэ, Навуфейлэн пумит луэменыз сэрен Ахав но солэн кышноез йыруж лэсьтыны малпазы. Виноград бакчазэ картэзлы карон вылысь Иезавель кык адямиосты косӥз Навуфеез янгыше уськытыны со ужын, кудзэ со ӧз лэсьты. Соин сэрен Навуфеез но солэсь пиоссэ виизы. Мар кариз Иегова, сокем шонерлыктэм уж лэсьтэмез адӟыса?

ИНМАРЛЭН ШОНЕРЛЫКО СУДЭЗ

6, 7. Кызьы Иегова возьматӥз, со шонерлыкез яратэ шуыса? Малы со Навуфейлэсь ӵыжы-выжыоссэ но эшъёссэ буйгатӥз?

⁶ Иеговаез кема возьмано ӧз луы: со Илияез Ахав доры мыныны косӥз. Илия Ахавез адями виись но лушкаськись шуыса нимаз. Кыӵе ужпум кутӥз Иегова? Ахав, солэн кышноез но пиосыз Навуфей сямен виемын луозы (3 Экс. 21:17—25).

⁷ Навуфейлэн ӵыжы-выжыосыз но эшъёсыз юн кайгыризы Ахавлэн лек уженыз сэрен. Но соосты буйгатэ вал, со шонерлыктэм ужез Иегова адӟиз но соку ик аслэсьтыз пророксэ ыстӥз шуыса. Озьы ке но, куке югдур шӧдтэк шорысь воштӥськиз, соослэн зӥбыт-востэм луэмзы но Иеговалы осконзы эскериськиз.

8. Мар кариз Ахав, куке Иеговалэн кутэм ужпумез сярысь тодӥз, но кытчы со вуттӥз?

⁸ Мар луиз, куке Ахав Иеговалэн кутэм ужпумез сярысь тодӥз? Библиын верамын: «Ахав вылысьтыз дӥськутсэ кесяз но вылаз чурыт бышкись дӥськут дӥсяз, визь утьыны кутскиз, чурыт бышкись дӥськутэныз ик кӧлаз, ӝожомыса ветлӥз». Со зӥбыт-востэм кариськиз. Мар луиз азьланяз? Иегова вераз Илиялы: «Мон азьын зӥбыт-востэм кариськемез понна со вылэ шугадӟонъёс уг лэзьы; солэн пиез дыръя солэн выжыез вылэ шугадӟонъёс лэзё» (3 Экс. 21:27—29; 4 Экс. 10:10, 11, 17). Озьы Иегова, кудӥз сюлэмез чакла-эскере, Ахавез гажаз-жаляз (Мад. 17:3).

ЗӤБЫТ-ВОСТЭМ СЯМ МИЛЕМЫЗ УТЕ

9. Кызьы валано, зӥбыт-востэм сям Навуфейлэсь ӵыжы-выжыоссэ но эшъёссэ утьыны быгатэ вал шуыса?

⁹ Кызьы Иеговалэн кутэм ужпумез шоры учкизы соос, кинъёс Ахавлэн лек ужез сярысь тодо вал? Соос малпаны быгатысалзы, Иегова Ахав вылэ шугадӟон лэзьыны кутэм ужпумезлэсь куштӥськиз шуыса. Озьы Навуфейлэн ӵыжы-выжыосызлэн но эшъёсызлэн осконзы эскериськиз, вылды. Сыӵе учыре соослэсь осконзэс зӥбыт-востэм сям утьыны быгатысал. Соос зӥбыт-востэм луысалзы ке, азьланяз но Иеговалы оскымон ужасалзы-тыршысалзы но оскысалзы, Иегова ноку но шонерлыктэм ужъёс уг лэсьты шуыса. (Лыдӟы Кыкетӥ Законэз 32:3, 4.) Куке Иегова шонер улӥсьёсты улӟытоз, Навуфей но солэн ӵыжы-выжыосыз ас вылазы шӧдозы, мар со сыӵе зэмос шонерлык (Иов 14:14, 15; Иоанн 5:28, 29). Со сяна, зӥбыт-востэм адямиос тодо, «вань ужъёс понна Инмар адямиез судить кароз, вань ватӥськем ужъёслы но суд луоз: ӟечез понна одӥг суд, уродэз понна мукет суд луоз» шуыса (Екк. 12:14). Ужпум кутыкуз, Иегова лыдэ басьтэ сое но, мар сярысь ми ум но тодӥське, вылды. Озьыен, зӥбыт-востэм сям уте янгыштэм адямиосты: со юрттэ соослы осконзэс утьыны.

10, 11. а) Кыӵе учыръёсы милям осконмы эскериськыны быгатэ? б) Кызьы милемыз зӥбыт-востэм сям уте?

¹⁰ Мар тӥ кароды, тӧроос кутӥзы ке сыӵе ужпум, кудӥз тӥледлы паймоно кадь яке шонертэм кадь потоз? Кылсярысь, матысь адямидэс ӧз лэзе ни кенешын со ужъёсты быдэсъяны, кудъёссэ со туж дуноен лыдъя вал. Яке тӥлесьтыд кузпалдэс, пидэс, нылдэс яке эштэс кенешысь поттӥзы, нош тӥ кутэм ужпуменызы соглаш ӧвӧл. Яке тӧроос, тӥ малпамъя, шонертэм каризы, куке жалязы сое, кин сьӧлыказ. Мар тӥ кароды сыӵе учыръёсы? Сыӵе учыръёс эскерыны быгато, макем юн ми оскиськомы Иеговалы но оскиськомы-а, солэн организацияз тупатэм радлык шонер луэ шуыса. Ойдолэ эскеромы, кызьы милемыз утёз зӥбыт-востэм сяммы.

¹¹ Нырысетӥез, зӥбыт-востэм сям юрттоз милемлы валаны, ми ваньзэ ум тодӥське шуыса. Югдур сярысь ми ваньзэ тодӥськомы кадь потэ ке но, Иегова гинэ адӟе, мар адямилэн сюлэмаз (1 Экс. 16:7). Ми сое тодамы возиськомы ке, милемлы капчигес луоз зӥбыт-востэм луыны, валаны, ми ваньзэ тодыны ум быгатӥське шуыса, но югдур шоры мукет сямен учкыны. Кыкетӥез, зӥбыт-востэм сям юрттоз милемлы кылзӥськыны но чидаса возьманы, ку Иегова тупатоз югдурез, кудаз зэмзэ но шонерлыктэм уж лэсьтэмын вал. Одӥг визьмо адями гожтӥз: «Инмарлэсь кышкаса, Солы вӧсяськыса улӥсьёслы ӟечлык луоз; нош сьӧлыклэсь кышкасьтэмлы ӟечлык уз луы... со кема уз возиськы» (Екк. 8:12, 13). Оскыны быгатӥськомы, зӥбыт-востэм сям пайда ваёз ваньмызлы, кинъёс сыӵе учырен пумиськизы. (Лыдӟы 1 Пётрлэсь 5:5).

КЕНЕШЫН ЧЕБЕРЪЯСЬКЫСА ЛЭСЬТЭМ УЖ

12. Мае ми эскеромы но малы?

¹² Сирияысь Антиохияын улӥсь христианъёс пумиськизы учырен, кудаз эскериськиз соослэн зӥбыт-востэм луэмзы но простить карыны дась луэмзы. Ойдолэ эскеромы та учырез но малпаськомы, дась-а ми мукетъёссэ простить карыны но кызьы герӟаськемын простить карыны дась луон соин, кызьы Инмар учке шонерлык шоры.

13, 14. Кыӵе уж оскемын вал Пётрлы? Кыӵе учырын солэн кышкасьтэм сямыз адӟиськиз?

¹³ Апостол Пётр — нырысетӥ христиан кенешысь ваньмызлы тодмо тӧро. Со Иисусэн тодмо вал, но солы кенешын трос уж оскизы (Матф. 16:19). Кылсярысь, Пётр а. э. 36-тӥ арын Корнилийлы но солэн семьяезлы ӟеч иворез вераз. Со аспӧртэмлыко учыр, малы ке шуоно Корнилий мукет калыкысь вал, но солы вандӥськон сям ортчытэмын ӧй вал. Куке Корнилийлы но солэн семьяезлы святой дух сётэмын вал, Пётр вераз: «Та адямиос асьмеос кадь ик Святой Духез басьтӥзы. Соин ик кин ке но соослы вуын пылатонэз алыны быгатоз шат?» (Ап. уж. 10:47).

¹⁴ Апостолъёс но тӧроос Иерусалимын пумиськизы, ужпум кутон понна, кулэ-а еврей луисьтэм калыкъёслы, кудъёсыз христианъёс луизы, вандӥськон сямез ортчытыны. Со вал а. э. 49-тӥ арын. Та пумиськонын Пётр вын-агайёслы кышкатэк тодазы вайытӥз, кӧня ке ар талэсь азьло еврей луисьтэм вандӥськымтэослы но святой дух сётэмын вал шуыса. Пётр сое ас синмыныз адӟиз бере, солэн верам кылъёсыз юрттӥзы кивалтӥсь кенешлы шонер ужпум кутыны (Ап. уж. 15:6—11, 13, 14, 28, 29). Еврей калыкысь но мукет калыкъёсысь христианъёс туж дунъязы, Пётр ваньзэ кышкатэк но шонерак вераз шуыса. Макем капчи вал, вылды, соослы оскыны адямилы, кудӥзлэн Инмарен юн кусыпъёсыз вал! (Евр. 13:7).

15. Кыӵе янгыш лэсьтӥз Пётр Сирияысь Антиохияын дыръяз? (Учке статья кутсконысь суредэз.)

¹⁵ Ӝоген со пумиськон бере Пётр Сирияысь Антиохияе мынӥз. Отын со номырлэсь кышкатэк еврей луисьтэм вын-агайёсын вераськиз. Со вын-агайёс тросэзлы дышетскизы улонэз адӟем Пётрлэсь, кудӥзлэн мур тодон-валанэз вал. Нош табере малпалэ ай, кыӵе соослэн шӧдонъёссы вал, куке Пётр шӧдтэк шорысь соосын вераськемысь дугдӥз. Соос туж паймизы но ӝоже усизы, луоз. Мукетъёсыз но еврей луись христианъёс Пётрлэсь адӟем каризы. Соос пӧлын Варнава но вал. Малы юн осконэн, адӟем карымон христиан тӧро сокем бадӟым янгыш лэсьтӥз, кудӥз сэрен кенешын валамтэос кылдыны быгато вал? Тӧроос кылъёсынызы яке ужъёсынызы милемыз вӧсь каризы ке, малы милемыз дышетыны быгатоз Пётрлэн учырез?

16. Кин тупатӥз Пётрез но кызьы? Кыӵе юанъёсты ми эскеромы?

¹⁶ Лыдӟы Галатъёслы 2:11—14. Пётр адямиослэсь кышканлы сётскиз (Мад. 29:25). Со туж умой тодэ вал, кызьы Иегова еврей луисьтэм адямиос шоры учке, но Пётр кышказ, мар со сярысь малпалозы Иерусалим кенешысь еврей луись вандӥськем христианъёс. Апостол Павел, кудӥз озьы ик а. э. 49-тӥ арын Иерусалимын пумиськонын вал, Антиохияын дыръязы ваньмыз азьын Пётрез янгыше уськытӥз, со чеберъяськыны выриз шуыса (Ап. уж. 15:12). Кызьы асьсэды возизы еврей луисьтэм христианъёс, кудъёссэ Пётр ӝоже уськытӥз? Лябӟиз-а соослэн осконзы? Лэзизы на-а Пётрлы азьланяз но кенешын ужъёсты нуыны?

ДАСЬ ЛУЭ ПРОСТИТЬ КАРЫНЫ

17. Кыӵе пайда вайиз Пётрлы Иеговалэн простить каремез?

¹⁷ Адӟиське, Пётр зӥбыт-востэм мылкыдын Павеллэсь верамзэ кылзӥз но тупатэмзэ санэ басьтӥз шуыса. Библиын верамын ӧвӧл, Пётрлы азьланяз кенешын ужъёсты нуыны ӧз оске ни шуыса. Берлогес со святой духлэн кивалтэмез улсын кык гожтэт гожтӥз, кудъёсыз Библие пыртэмын вал. Тунсыко луэ, кыкетӥ гожтэтаз Пётр Павелэз «гажано Павел братмы» шуыса нимаз (2 Пётр 3:15). Пётр ассэ воземеныз еврей луисьтэм христианъёсты вӧсь кариз ке но, вылды, Иисус, кенешлэн йырыз, азьланяз но солы троссэ оскиз (Еф. 1:22). Та учыр Антиохияысь христианъёслэсь мылкыдзэс ӝутӥз, вылды, Иисуслэсь но солэн Атаезлэсь адӟем карыса, Пётрез простить карыны. Оскем потэ, тырбыдэстэм адямилэн янгышеныз сэрен нокудзы но соос пӧлысь осконзэс ӧз ыштэ шуыса.

18. Кыӵе учыръёсы милемлы шонерлык шоры Иегова сямен учконо?

¹⁸ Туннэ но, нырысетӥ даурысь кенешын кадь ик, христиан кенешысь тӧроос тырбыдэстэмесь луо, малы ке шуоно ми ваньмы ӵем янгышаськомы (Иак. 3:2). Ми валаськомы ке но сое, кызьы асьмеды возиськомы, куке кин ке но милемыз ӝоже уськытэ? Учкиськомы-а ми со шоры Иеговалэн синмыныз? Кылсярысь, кызьы тӥ асьтэдыз возёды, тӥледлы потэ ке, тӧролэн кылъёсаз вылтус шоры учкемез шӧдӥське шуыса? Тӧро малпатэк вераз ке сое, мар тӥлесьтыд сюлэмдэс вӧсь кароз, лябӟытоз-а со тӥлесьтыд оскондэс? Малпалоды-а тӥ, со вын-агай тӧро луон понна куронъёслы уг тупа ни шуыса, яке чидаса возьмалоды, мар кароз Иисус, кенешлэн йырыз? Тӧролэн янгышезлы саклыктэс висъям интые, тыршоды-а тӥ лыдэ басьтыны, со вын-агай трос аръёс ӵоже ини Инмарлы оскымон ужа-тырше шуыса? Со вын-агай, кудӥз тӥледыз ӝоже уськытӥз, озьы ик тӧро луыса ужа-тырше яке солы эшшо тросгес уж оско на ке, шумпотоды-а тӥ со понна? Тӥ простить карыны дась ке, озьы тӥ возьматоды, шонерлык шоры Иегова сямен учкиськоды шуыса. (Лыдӟы Матфейлэсь 6:14, 15.)

19. Мар карыны милемлы тыршоно?

¹⁹ Ми ваньмы чидатэк возьмаськомы со нуналэз, куке Иегова быдтоз вань шонерлыктэм ужъёсты, кудъёсыз Шайтан бордысь но солэн лек дуннеез бордысь пото (Ис. 65:17). Нош али ойдолэ тыршомы шонерлык шоры Иегова сямен учкыны: зӥбыт-востэм луомы но валаломы, кылдэм югдур сярысь ми ваньзэ тодыны ум быгатӥське шуыса, но сюлмысь простить каромы соосты, кинъёс милемыз ӝоже уськыто.