Мон Инмарлы оскисько

1—3. а) Вакчияк вералэ, малы ми оскиськомы. б) Малы кулэмысь улӟыса султон сярысь дышетонэз ми туж кулэен лыдъяськомы? (Учке статья кутсконысь суредэз.)

ТӤЛЕДЫЗ курысалзы ке вакчияк вераны, малы тӥ оскиськоды, мар сярысь тӥ верасалды? Тӥ верасалды, вылды, ваньзэ Иегова кылдытӥз шуыса, Иисус Христос, милемыз сьӧлыкъёслэсь мозмытон понна, кулӥз шуыса но азьланяз музъем вылын рай луоз шуыса, кытын Инмарлэн ужась-тыршисьёсыз пырак дауръёс ӵоже улозы. Нош верасалды-а тӥ улӟытыса султытонлы оскемды сярысь?

² Тӥ бадӟым куректон пыр потыны но музъем вылын пырак дауръёс ӵоже улыны оскиськоды ке но, улӟытыса султытонлы оскон тӥ понна дуно луэ. Апостол Павел валэктӥз, малы улӟытыса султытон сокем бадӟым инты басьтэ. Со гожтӥз: «Кулэмысь улӟыса султон ӧвӧл ке, соку Христос но улӟыса ӧз султы». Зэмзэ но, Христос улӟыса ӧй султысал ке, со милям Эксэймы ӧй луысал но милям Эксэйлык сярысь ӟеч иворез вераммы юнме луысал. (Лыдӟы 1 Коринфъёслы 15:12—19.) Но ми оскиськомы, Инмар Иисусэз улӟытӥз шуыса. Соин ми пӧртэм луиськомы «улӟыса султон ӧвӧл» шуыса дышетӥсь саддукейёслэсь. Милемыз серекъязы ке но, улӟытыса султытонлы оскемысь ми ум дугдэ (Марк 12:18; Ап. уж. 4:2, 3; 17:32; 23:6—8).

³ Апостол Павел «кулэмысь улӟыса султон» сярысь дышетонэз Христос сярысь валтӥсь дышетонъёс пӧлы пыртӥз (Евр. 6:1, 2). Солы со туж дуно потэ вал (Ап. уж. 24:10, 15, 24, 25). Кулэмысь улӟыса султон сярысь дышетон Инмарлэн Кылысьтыз валтӥсь дышетонъёс пӧлы пыре ке но, валаны сое туж ик капчи ӧвӧл (Евр. 5:12). Малы?

4. Улӟытыса султытон сярысь кыӵе юанъёсты ми эскеромы та статьяын?

⁴ Куке адямиос Библиез дышетыны кутско, соос тодо, вашкала дыръёсы Инмар кулэм адямиосты улӟытъяз шуыса. Кылсярысь, со улӟытӥз Лазарез. Озьы ик соос лыдӟыса тодо, Авраам, Иов но Даниил оско вал, азьланяз кулэм адямиос выльысь улыны быгатозы шуыса. Нош мар тӥ вералоды, тӥлесьтыд юазы ке, малы тӥ оскиськоды, улӟытыса султытон одно ик луоз шуыса, со сярысь туж кемалась верамын вал ке но? Верамын-а Библиын, ку адямиос улӟытэмын луозы? Та юанъёслы валэктонъёс осконмес юнматыны быгатозы. Соин ик ойдолэ учкомы, мар со сярысь верамын Библиын.

УЛӞЫСА СУЛТОН, КУДӤЗ СЯРЫСЬ ТРОС ДАУРЪЁС ТАЛЭСЬ АЗЬЛО ВЕРАМЫН ВАЛ

5. Кыӵе юанъёслы валэктонъёс ми али учкомы?

⁵ Адями кемалась ӧз кулы на ке, милемлы капчигес валаны, со улӟытэмын луыны быгатэ шуыса (Иоанн 11:11; Ап. уж. 20:9, 10). Нош кин ке вера ке, улӟытыса султытон азьланяз луоз шуыса, трос аръёс яке дауръёс ортчыса? Луоз-а оскыны со кылъёслы, учкытэк со шоры, кин сярысь соос верамын вал: со сярысь, кин кемалась ӧвӧл кулӥз яке со сярысь, кин туж кемалась кулӥз ини? Малпалэ ай, улӟытыса султытон, кудӥз сярысь трос дауръёс талэсь азьло верамын вал, ортчиз ини, но тӥ солы оскиськоды. Кыӵе улӟытыса султытон сярысь вераськон мынэ но кызьы со улӟытонлы осконэнымы герӟаськемын?

6. Кызьы 117-тӥ Псаломысь кылъёс Иисус вылын быдэсмизы?

⁶ Ойдолэ тодамы ваёмы 117-тӥ Псаломез, кудзэ Давид гожтӥз, вылды. Псаломъёсты гожъясь куре Инмарлэсь: «Кузё-Инмаре, уть милемыз! [...] Кузё-Инмарлэн нимыз понна лыктӥсь дано!». Адямиос Мессия сярысь азьпалзэ ивортонысь та кылъёсты веразы, Иисус Христосэз пумитакузы, куке со 9-тӥ нисанэ, кулон азяз, Иерусалиме пыриз (Пс. 117:25, 26; Матф. 21:7—9). Нош мар верамын та псаломын улӟытон сярысь, кудӥз трос аръёс ортчыса луыны кулэ вал? Ойдолэ сак учкомы та кылъёсты: «Корка пуктӥсьёслэн кулэтэм карыса куштэм иззы корка сэреглэн улаз инъет йыр луыса пуксиз» (Пс. 117:22).

7. Кызьы еврейёс Иисусэз кулэтэм каризы?

⁷ «Корка пуктӥсьёс», кудъёсыз сярысь верамын псаломын,— со иудейёслэн религиозной кивалтӥсьёссы. Соос Мессияез кулэтэм каризы. Кытысь со адӟиськиз? Соос Иисуслэсь ӧз кылзӥське но сое Христосэн ӧз лыдъялэ. Со сяна, тросэз еврейёс сое виыны куризы (Лука 23:18—23). Зэм, Иисуслэн кулэмез понна соос но янгыш вал.

8. Кызьы Иисус «корка сэреглэн улаз инъет йыр» луиз?

⁸ Кызьы Иисус «корка сэреглэн улаз инъет йыр» луыны быгатэ вал, сое кулэтэм каризы но виизы бере? Со ӧй быгатысал, ӧй ке улӟысал. Тодамы ваёмы Иисуслэсь мадёнзэ, кудаз виноград будэтӥсьёс жугылӥзы соосты, кинэ виноград бакчалэн кузёез соос доры ыстэ вал. Израиль калык озьы ик выриз пророкъёсын, кудъёссэ Инмар со доры ыстылӥз. Мадёнлэн пумаз виноград бакчалэн кузёез виноград будэтӥсьёс доры аслэсьтыз яратоно пизэ ыстӥз, кудӥз атай юртаз кузёе кылёно вал. Кылзӥзы-а соос сое? Ӧз, соос сое виизы. Та мадёнэз йылпумъякуз, Иисус Псалтирьысь 117:22 кылъёсты вераз (Лука 20:9—17). Берлогес апостол Пётр но 117-тӥ Псаломез Иисусэн герӟаз. Иерусалимын кузёйыръёс, тӧроос но книга тодӥсьёс азьын сылыкуз, Пётр вераз «Назаретысь Иисус Христос» сярысь, кудзэ соос кортӵогазы но кудзэ Инмар кулэмысь улӟытыса султытӥз. Со вераз: «Иисус — Со из, тӥледын, лэсьтӥськисьёсын, кулэтэм карем, корка сэреглы инъет луэм из» (Ап. уж. 3:15; 4:5—11; 1 Пётр 2:5—7).

9. Мар верамын вал Псалтирьын 117:22?

⁹ Озьыен, Псалтирьын 117:22 трос дауръёс талэсь азьло верамын вал, Мессияез кулэтэм карозы, виёзы, нош собере со улӟытэмын луоз шуыса, «корка сэреглэн улаз инъет йыр» луон понна. Улӟытэм Иисус сярысь Библиын верамын: «Инбам улын адямиослы сётэмын ӧвӧл мукет ним, кудӥз пыр асьмеос мед быгатысалмы утиськыны» (Ап. уж. 4:12; Еф. 1:20).

10. а) Мар азьло ик верамын вал Псалтирьын 15:10? б) Малы ми вераны быгатӥськомы, Псалтирь 15:10 Давид вылын ӧз быдэсмы шуыса?

¹⁰ Ойдолэ эскеромы Библиысь улӟытыса султытон сярысь мукет кылбурез. Со, трос сюрс аръёс ортчыса, быдэсмиз. Со оскытэ милемыз, улӟыса султон луоз шуыса, со сярысь трос аръёслы азьлогес верамын вал ке но. Псалтирьын 15:10 верамын: «Мынэсьтым лулме Тон адэ [«шайгуэ», ВД] уд кельты уго, дун-чылкыт улӥседлы сисьмонэз уд адӟыты». Давид ӧз вера, со ноку но уз кулы но шайгуэ уз вуы шуыса. Библиысь ми тодӥськомы, Давид пересьмиз но кулӥз шуыса — «атайёсыз кадь ик Давид кулӥз, Давидлэн городаз сое ватӥзы» (3 Экс. 2:1, 10). Соку мар сярысь верамын Псалтирьын 15:10?

11. Ку Пётр Псалтирьысь 15:10 кылбурез валэктӥз?

¹¹ Та кылбурез, трос аръёс ортчыса, валэктӥз апостол Пётр. Со, Иисус улӟем бере кӧня ке арня ортчыса, трос сюрс еврейёслы но иудей осконэ выжемъёслы вазиськиз. (Лыдӟы Апостолъёслэсь ужъёссэс 2:29—32.) Пётр вераз, Давид кулӥз но ватэмын вал шуыса. Сое кылзӥсьёс со сярысь туж умой тодо вал. Апостол йылпумъян лэсьтӥз: Давид «азьвыл ик Христослэн улӟыса султонэз сярысь вераз». Библиын верамын ӧвӧл, кин ке та веранэн соглаш ӧй вал шуыса.

12. Кызьы быдэсмиз Псалтирь 15:10 но кызьы со улӟытонлы осконмес юнматэ?

¹² Аслэсьтыз верамзэ юнматон понна, Пётр Давидлэсь кылъёссэ вераз, кудъёсыз гожтэмын Псалтирьын 109:1. (Лыдӟы Апостолъёслэсь ужъёссэс 2:33—36.) Гожтэмъёсысь кылбуръёсты лыдӟыса но соосты валэктыса, Пётр трос адямиосты оскытӥз, Иисус «Кузё-Инмар но, Христос но» луэ шуыса но со вылын Псалтирь 15:10 быдэсмиз шуыса, куке со улӟытыса султытэмын вал. Берлогес Павел но озьы ик оскытӥз Писидияысь Антиохия карысь еврейёсты. Павеллэн кылъёсыз соослэн сюлмазы мур пыӵазы, соин ик соослэн тросгес тодэмзы потӥз. (Лыдӟы Апостолъёслэсь ужъёссэс 13:32—37, 42.) Милемыз но со оскытэ, Библиысь улӟытыса султытон сярысь азьпалзэ ивортонъёслы оскыны луэ шуыса, соос трос дауръёс ортчыса гинэ быдэсмизы ке но.

КУ УЛӞЫТЫСА СУЛТЫТОН КУТСКОЗ?

13. Улӟытыса султытон сярысь кыӵе юанъёсмы милям кылдыны быгато?

¹³ Ми тодӥськомы, улӟытыса султытон сярысь азьпалзэ ивортонъёс, трос дауръёс ортчыса, быдэсмыны быгато шуыса. Со милемыз туж буйгатэ. Но милям юанъёсмы кылдыны быгато: «Вера-а со, кулэм эшъёсынымы но ӵыжы-выжыосынымы ми кема ум пумиське на шуыса? Ку меда луоз кема возьмам улӟытыса султытон?» Иисус апостолъёсызлы вераз, соослы сётэмын ӧвӧл шуыса «дырез, срокез тодыны, кудъёссэ Атае[з] Аслаз киулаз кутыса возе» (Ап. уж. 1:6, 7; Иоанн 16:12). Но солэн кылъёсыз уг возьмато, ми номыре но ум тодӥське шуыса со сярысь, ку улӟытыса султытон кутскоз.

14. Маин пӧртэм вал Иисуслэн улӟемез азьвыл улӟытыса султытонъёслэсь?

¹⁴ Тужгес но кулэ луись улӟытыса султытон, кудӥз куке но вал,— со Иисус Христосэз улӟытыса султытон. Со ӧй улӟысал ке, нокудмылэн но осконмы ӧй луысал выльысь адӟыны кулэм матысь адямиосмес. Со адямиос, кудъёсыз Иисуслэсь азьло улӟизы, кылсярысь, соос, кинъёсты Илия но Елисей улӟытӥзы, берлогес нош ик кулӥзы. Нош Иисус улӟемез бере «уг ни кулы», но «Со вылын кулонлэн кужымез ӧвӧл ини». Со инмын «пумтэм вапумъёс» улэ (Рим. 6:9; Усьт. 1:5, 18; Кол. 1:18; 1 Пётр 3:18).

15. Малы Павел Иисусэз «Со нырысетӥез» шуыса вераз?

¹⁵ Иисус нырысетӥез, кин инмын улыны улӟытэмын вал. Со улӟытон тужгес но кулэез луэ (Ап. уж. 26:23). Иисус сяна, вал на мукетъёсыз но, кинъёс духовной мугорын, инмын улон понна, улӟытэмын луыны кулэ вал. Аслаз оскымон апостолъёсызлы Иисус вераз, соос соин ӵош инмын кивалтозы шуыса (Лука 22:28—30). Но нырысь, со кузьымез басьтон понна, соослы кулоно вал, собере, Иисус выллем, духовной мугорын улӟоно. Коринфъёслы нырысетӥ гожтэтаз апостол Павел гожтӥз: «Христос кулэмысь улӟыса султӥз, кулэмъёс пӧлысь Со нырысетӥез, Кин улӟыса султӥз». Собере Павел валэктӥз, мукетъёсыз но луозы шуыса, кинъёс инмын улон понна улӟозы. Со ватсаз: «Нырысь ик Христос улӟыса султӥз, собере, Христос лыктэм бере [«Христос эксэй луыса кивалтыку», ВД], Солэн адямиосыз но улӟыса султозы» (1 Кор. 15:20, 23).

16. Мар юрттэ валаны, ку инмын улон понна улӟытон кутскиз?

¹⁶ Павеллэн кылъёсыз валаны юртто, ку кутскиз, вылды, инмын улон понна улӟытон. Со луыны кулэ вал, Иисус эксэй луыса кивалтыку. Иеговалэн Адӟись-Ивортӥсьёсыз кемалась ини Библияя верало, Иисус 1914-тӥ арын эксэй луыса кивалтыны кутскиз но та дырозь кивалтэ на шуыса, озьы ик, та лек дунне ӝоген быроз шуыса.

17, 18. Мар луоз куд-ог зырӟем христианъёсын, Христос эксэй луыса кивалтыку?

¹⁷ Тани мар Библиын верамын на инмын улон понна улӟытон сярысь: «Кулэмъёс пумысен мынам тӥледыз тодытытэк кельтэме уг поты [...] Уго асьмеос Иисуслэн кулэмезлы но улӟыса султэмезлы оскиськомы бере, соку... кулон умме усемъёсты но Инмар Соин ӵош ваёз шуыса оскыны кулэ. ...Асьмеос, улэпъёс, Кузё-Инмарлэн лыктонэз дырозь [«Кузё-Инмарлэн эксэй луонэз дырозь», ВД] улоно муртъёс, кулэмъёслэн азьпалазы ум потэ. Уго косон куара потоз но... Ачиз Кузё-Инмар Инмысь васькоз. Соку нырысь ик Христослы оскыса кулэмъёс кулэмысь улӟыса султозы. Табере асьмеос но, улэп кылемъёс, соосын валче омырысен Кузё-Инмарез пумитан понна пилемъёс вылын ӝутэмын луомы. Собере вань вапумъёс ӵоже Кузё-Инмарен огазьын уломы» (1 Фес. 4:13—17).

¹⁸ Зырӟем христианъёсты инмын улон понна улӟытон кутскыны кулэ вал, Христос эксэй луыса кивалтыны кутскем бере кӧня ке дыр ортчыса. Бадӟым куректон дыръя музъем вылын улӥсь зырӟем христианъёс «пилемъёс вылын ӝутэмын» луозы. Павел гожтӥз, соос, кинъёс «ӝутэмын» луозы, кулон уммен уз изе шуыса, яке кулэм беразы соослы улӟытон дырез кема возьмано уз луы шуыса. Соос «туж ӝог, син куспын ик, берпуметӥ гумы куара потэм бере ик» воштӥськозы (1 Кор. 15:51, 52; Матф. 24:31).

19. Кыӵе самой умой улӟытыса султытон дырез ми возьмаськомы?

¹⁹ Туннэ нуналэ тросэз христианъёс святой духен зырӟемын ӧвӧл, но соос Христосэн ӵош инмын кивалтыны быръемъёс уг луо. Соос возьмало «Кузё-Инмарлэн нуналыз» дыръя та лек дуннелэсь быремзэ. Ми ум тодӥське, ку со луоз, но ваньмыз вера, со туж ӝог вуоз ини шуыса (1 Фес. 5:1—3). Собере мукетыз улӟытыса султытон кутскоз — улӟозы соос, кинъёс рай музъем вылын улозы. Библиын со самой умой улӟытыса султытон шуыса нимамын, малы ке шуоно соос, кинъёс азьвыл улӟизы, берлогес нош ик кулӥзы, нош самой умой улӟытыса султытон дыръя улӟытэмъёслэн осконзы луоз тырбыдэс луыны но ноку кулытэк улыны (Евр. 11:35).

20. Малы оскыны луоз, улӟытыса султытон радызъя ортчоз шуыса?

²⁰ Библия верамъя, котькуд зырӟем христиан мурт аслаз дыраз улӟе (1 Кор. 15:23). Оскыны быгатӥськомы, музъем вылын улон понна улӟытэмъёс но радызъя улӟытэмын луозы шуыса. Ми ӵыдытэк витиськомы со дырез. Нош соос, кинъёс кемалась ӧз кулэ на, Христос сюрс ар ӵоже кивалтыны кутскем бере ик улӟозы-а, малы ке шуоно бадӟым куректон пыр потэмъёс соосты туж возьмалозы? Яке Иегова нырысь улӟытоз вашкала дыръёсысь оскымон ужась-тыршисьёссэ, кудъёсыз умой кивалтыны быгато вал, соос Инмарлэн калыкеныз мед кивалтозы шуыса? Кызьы но кытын Иегова улӟытоз соосты, кинъёс ноку но солы ӧз ужалэ-тырше? Та выллем юанъёс туж трос кылдозы, вылды. Нош кулэ-а соос сярысь ортчыт трос малпаськыны? Ӧжыт возьмано, но ми сое ваньзэ ас синмынымы адӟомы. Зэм но, милемлы туж тунсыко луоз адӟыны, кызьы Иегова ваньзэ сое лэсьтоз.

21. Малы тӥ оскиськоды?

²¹ Али милемлы Иеговалы осконмес юнматоно. Иисус пыр со вераз, кулэмъёс, кудъёссэ со тодаз возе, выльысь улозы шуыса (Иоанн 5:28, 29; 11:23). Иегова кулэмъёсты улӟытыны быгатэ шуыса возьматон понна, Иисус вераз, Инмарлэн син азяз Авраам, Исаак но Иаков улэпесь шуыса (Лука 20:37, 38). Озьыен, милям трос мугъёсмы вань соглаш луыны Павелэн, кудӥз вераз: «Инмарлы оскисько: Со... кулэмысь улӟытыса султытоз» (Ап. уж. 24:15).