Анай-атайёс, юрттэ нылпиостылы «утиськон басьтонлы визь-нод» утчаны
«Тон пичи дырысеныд ик Священной Гожтэмез тодӥськод, со тыныд Иисус Христослы оскон пыр утиськон басьтонлы визь-нод сётыны быгатэ» (2 ТИМ. 3:15).
1, 2. Мар сюлэмшугъяськытыны быгатэ анай-атайёсты, куке соослэн нылпиоссы улонзэс Инмарлы сӥзьыны но пылатӥськыны малпало?
КОТЬКУД ар трос сюрс Библиез дышетӥсьёс асьсэлэсь улонзэс Иеговалы сӥзё но пылатӥсько. Соос пӧлын трос егитъёс, кудъёсыз Иеговалэн Адӟись-Ивортӥсьёсызлэн семьяосазы будӥзы но самой умой улон сюрес бырйизы (Пс. 1:1—3). Тӥляд но нылпиосты вань ке, тӥ ӵыдытэк витиськоды, луоз, со дырез, ку соос пылатӥськозы. (Ӵошатэ 3 Иоаннлэсь 4.)
2 Но тӥледыз мар ке но сюлэмшугъяськытэ, вылды. Оло нош, тӥ тодӥськоды христианъёсты, кудъёсыз егит дыръязы пылатӥськизы, нош собере малпаськыны кутскизы, улоно-а меда озьы, кызьы Инмар возьма. Нош куд-огъёсыз Иеговалэн Адӟись-Ивортӥсьёсыз луэмысь ик дугдӥзы. Соин сэрен тӥ сюлмаськыны быгатоды, тӥляд но нылпиды, христиан мурт луыса, сыӵе ик малпанъёслы уз сётскы-а но зэмлыкез яратонэз уз сӥя-а шуыса. Со но озьы ик улыны уз кутскы-а, кызьы улӥзы Ефесысь христианъёс, кудъёсыз сярысь Иисус вераз: «Кутсконаз кыӵе тынад яратонэд вал, нош табере со тынад сӥяз»? (Усьт. 2:4). Мар карыны луоз, озьы медаз луы шуыса? Кызьы нылпилы утиськон басьтыны юрттоно? (1 Пётр 2:2). Та юанъёслы валэктонъёс шедьтомы, Тимофейлэсь примерзэ эскерыса.
«ТОН... СВЯЩЕННОЙ ГОЖТЭМЕЗ ТОДӤСЬКОД»
3. а) Кызьы Тимофей христиан мурт луиз но кызьы тодэмез со вылын шӧдӥськиз? б) Малы Тимофейлэсь саклыксэ висъяз Павел дышетон пумысен?
3 Иисус Христос сярысь Тимофей тодыны кутскиз, луоз, а. э. 47-тӥ арын, куке Павел нырысетӥзэ Листрае лыктӥз. Соку Тимофей туж егит на вал, вылды, озьы ке но со тодэмзэ улоназ кутэ ни вал. Кык ар ортчыса, со Павелэн ӵош тодытыса ветлыны кутскиз. Нош со бере 16 ар пала ортчыса, Павел гожтӥз Тимофейлы: «Уть сое, мар тыныд оскемын [«малы тон оскид», ВД], малы тон дышетэмын. Тон тодӥськод уго аслэсьтыд дышетӥсьтэ. Тон пичи дырысеныд ик Священной Гожтэмез [Еврей Гожтэмъёсты] тодӥськод, со тыныд Иисус Христослы оскон пыр утиськон басьтонлы визь-нод сётыны быгатэ» (2 Тим. 3:14, 15). Учке ай, Павел вера: 1) Священной Гожтэмез тодон сярысь, 2) оскон сярысь но 3) Иисус Христослы оскон пыр утиськон басьтонлы визь-нод утчан сярысь.
4. Кыӵе пособиосты тӥледлы кельше уже кутыны, нылпиостэс Библилы дышетыкуды? (Учке статья кутсконысь туспуктэмез.)
4 Анай-атайёс, тӥляд одно ик потэ, нылпиосты Библиез мед тодозы шуыса, кытчы пыро Еврей Гожтэмъёс но Христиан Грек Гожтэмъёс. Туж пичи нылпиослэн гинэ но йыразы кылё Библиысь учыръёс но адямиос сярысь мадёнъёс. Иеговалэн организациезлэн тыршемезлы луыса, анай-атайёслы трос пособиос поттӥсько, кудъёссэ уже кутыса, соос нылпиоссэс Библилы дышетыны быгато. Кыӵе пособиос тӥляд кылыныды поттэмын? Тодады возе: Библиез тодытэк, Иеговаен эшъяськыны уг луы.
УТЬ СОЕ, МАЛЫ ТОН ОСКИД
5. а) Мае возьматэ «юн оскон» шуыса верам? б) Кытысь ми тодӥськомы, Тимофей туж юн оске вал, Иисус сярысь ӟеч ивор зэм луэ шуыса?
5 Библиез тодыны туж кулэ. Нош огшоры тодыны гинэ, кыӵе адямиос но учыръёс сярысь вера Библия, тырмыт ӧвӧл. Тимофей тодэмезлы юн оске вал. Вашкала грек кылын «юн оскон» шуыса верам малы ке быдэсак оскемез возьматэ. Тимофей пичи дырысеныз ик Еврей Гожтэмъёсты тодэ вал. Берлогес со аслыз оскытонъёс шедьтӥз, Иисус — со Мессия шуыса. Тимофей туж юн оске вал, ӟеч ивор зэм луэ шуыса, соин ик со ужпум кутӥз пылатӥськыны но берлогес Павелэн ӵош тодытыса ветлӥз.
6. Кызьы анай-атайёс нылпизылы юрттыны быгато юн осконзэ будэтыны солы, мае со Инмарлэн Кылысьтыз тодӥз?
6 Кызьы нылпиослы юрттоно сыӵе ик оскон будэтыны, кыӵе осконэз вал Тимофейлэн? Нырысь ик, чидасесь луэ. Оскон соку ик уг буды, но со нылпиостылэн уз луы со понна гинэ, тӥ асьтэос солы оскиськоды шуыса. Нылпилэн юн осконэз мед луоз шуыса, солы аслэсьтыз визьзэ ужатоно. (Лыдӟы Римъёслы 12:1.) Анай-атайёс, тӥ ваньмызлэсь умой юрттыны быгатоды нылпидылы та удысын, тужгес но соку, куке со юанъёс сётъя. Ойдолэ эскеромы одӥг примерез.
7, 8. а) Кызьы одӥг вын-агай, аслэсьтыз нылзэ дышетыкуз, чиданзэ возьматэ? б) Тӥ малпамъя, кыӵе учыръёсы чидан тужгес но кулэ луэ?
7 Томас нимо вын-агайлэн 11 аресъем нылыз будэ. Со вера: «Куддыръя нылы юаны быгатэ: „Уг быгаты вал-а Иегова, эволюциез уже кутыса, ваньзэ кылдытыны?“ яке „Мар уродэз общественной ужъёсы пыриськонлэн, кылсярысь, быръёнъёсы ветлонлэн? Озьы улонэз умойгес карыны луэ ук!“ Куддыръя туж тыршоно луэ, юанъёсызлы пыр-поч валэктонъёс сётон понна, малы ке шуоно оскон мае ке одӥгзэ гинэ тодэмлэсь уг поты. Со понна трос пичиесь оскытонъёс кулэ».
8 Томас умой тодэ: нылпиосты будэтон понна, чидан кулэ — сям, кудӥз вань христианъёслы туж кулэ луэ (Кол. 3:12). Со вала, куддыръя куд-ог юанъёс доры выльысь но выльысь берытсконо луэ шуыса. Нылызлэн осконэз юн мед луоз шуыса, дыр ортчыны кулэ. Озьы ик, соин ӵош Библиысь кылбуръёсты лыдӟоно но соос вылын малпаськоно. Томас вера: «Туж кулэ юанъёслы ми кышноеным нимысьтыз саклык висъяськомы, адӟон понна, нылмы зэмзэ ик оске шуыса солы, мае со тодэ, но со солы визьмо кадь потэ шуыса. Нош нылмы юанъёс сётъя ке, со туж умой! Со ӧй юалляськысал но номыр вератэк ваньмыныз соглаш кариськысал ке, соку мон сюлмаськысал».
9. Кызьы Инмарлэсь Кылзэ пиналлэн сюлэмаз пыӵатоно?
9 Анай-атайёслэн нылпиоссэс чидаса дышетэмзыя, нылпиоссылэн осконзы пичиен-пичиен «паськыт но кузь... мур но ӝужыт» луэ (Еф. 3:18, 19). Нылпиосын сыӵе юанъёсты эскероно, кудъёсыз арессылы тупало но кудъёссэ соос валаны быгатозы. Дыр ортчемъя соос юнгес оскозы, со, малы соос оско, зэм луэ шуыса, но мукетъёсыз азьын асьсэлэсь осконзэс утьыны быгатозы, озьы ик ӵош дышетскисьёссы азьын но (1 Пётр 3:15). Кылсярысь, нылпиосты Библияя валэктыны быгато-а, мар луэ адямиен кулэм бераз? Сыӵе валэктон соослы визьмо кадь потэ-а? Озьыен, пиналлэн сюлмаз Инмарлэсь Кылзэ пыӵатон понна, чидан кулэ. Со понна туж тыршоно ке но, со юнме ӧвӧл! (К. Зак. 6:6, 7).
10. Нылпиосты дышетыку, мар эшшо туж кулэ на?
10 Анай-атайёс, тӥляд примерды туж кулэ, нылпиосты осконзэс юнматыны мед быгатозы шуыса. Стефани нимо сузэрлэн куинь нылъёсыз. Со вера: «Нылъёсы пичи дыръя ик мон таӵе юанъёс вылын малпаськылӥ: „Верасько-а мон нылъёсылы, малы мон оскисько, Иегова вань шуыса, со милемыз яратэ шуыса но солэн сюресъёсыз шонересь шуыса? Адӟо-а мынам нылъёсы, мон Иеговаез зэмзэ ик яратӥсько шуыса?“ Мыным возьмано ӧвӧл, нылъёсылэн осконзы юн луоз шуыса, со дыре, куке аслам осконэ ляб».
УТИСЬКОН БАСЬТОНЛЫ ВИЗЬ-НОД
11, 12. Мар со сыӵе визь-нод но малы со арлыдын ӵош уг лыкты?
11 Озьыен, Тимофей: 1) тодэ вал Священной Гожтэмез но 2) юн оске вал, со зэм шуыса. Нош кызьы валано Павеллэсь кылъёссэ, Священной Гожтэм Тимофеез, утиськон басьтон понна, визьнодо карыны быгатэ шуыса?
12 «Гожтэмъёсты валан» энциклопедиын верамын: «...визь-нод тодон-валанэз быгатыса уже кутыны юрттэ, шуг-секытъёсты сэрттон-пертчон понна, кышкытлыкъёслэсь палэнскон понна, пуктэм ужпумъёсты быдэстон понна, нош озьы ик та удысъёсын мукетъёсызлы но юрттон понна. Визьнодо луон ӵемысь визьтэм луонлы ваче пумит пуктӥське...» Библия верамъя, визьтэм луон егит пилэн сюлэм бордаз думиськиз (Мад. 22:15). Озьыен, визьнодо луон, кудӥз визьтэм луонлы ваче пумит пуктэмын, адямилэсь быдэ вуэмзэ возьматэ. Адямилэсь духовноез ласянь быдэ вуэмзэ арлыдыз уг возьматы, нош возьматэ Иеговалэсь кышканэн улэмез но солэсь законъёссэ быдэсъяны мылкыд каремез. (Лыдӟы Псалтирез 110:10.)
13. Кызьы егитъёс возьматыны быгато, соослэн утиськон басьтонлы визь-нодзы вань шуыса?
13 Егитъёс, кудъёсыз духовноез ласянь быдэ вуизы, уг тупало вож нуныослы, кудъёссэ тулкымъёс вылын азьлань-берлань нуллэ (Еф. 4:14). Соос асьсэ мыл потонъёссыя гинэ уг уло но огъёзъёссылэн зӥбемзылы уг сётско. Сыӵе егит пиос но нылъёс, кудъёсызлэн «улон-вылон пыр басьтэм визьзы-шӧдонзы ӟечез но, уродэз но висъяны» дышетэмын, азинлыко луо (Евр. 5:14). Визьмо ужъёссы, кудъёссэ соос лэсьто соку но, куке соосты анай-атайзы но, мукет быдэ вуэмъёс но уг адӟо, яркыт возьмато, соос духовноез ласянь быдэ вуон пала юн вамышъяло шуыса (Флп. 2:12). Со ик вань утиськон басьтон понна кулэ луись визь-нод. (Лыдӟы Мадёнъёсты 24:14.) Анай-атайёс, кызьы тӥ юрттыны быгатӥськоды нылпиостылы сыӵе визь-нод басьтыны? Нырысь ик, валэктэ нылпиостылы, кыӵе возетъёсъя тӥ улӥськоды. Кылъёсыныды но ужъёсыныды возьматэ, тӥ Библиысь эсэпъёсты туж дунъяськоды шуыса (Рим. 2:21—23).
Нылпилэсь осконзэ ӝамдэ куспын будэтыны уг луы (Учке 14—18-тӥ абзацъёсты.)
14, 15. а) Кыӵе юанъёс вылын малпаськоно пылатӥськыны мылкыд карись егитъёслы? б) Кызьы тӥ юрттыны быгатӥськоды пиналдылы малпаськыны, малы Инмарлэн законъёсызъя улон пайда вае?
14 Мар шонер, нош мар шонертэм луэ шуыса нылпиослы вераны гинэ тырмыт ӧвӧл. Соослы малпаськыны юрттоно, кылсярысь, таӵе юанъёс вылын: «Малы Библия куддыръя уг лэзьы сое, мар туж тунсыко кадь потэ? Малы мон оскисько, Библиысь возетъёсъя улон мыным котьку пайда вае шуыса?» (Ис. 48:17, 18).
15 Пиналды пылатӥськыны мылкыд каре ке, тани мар сярысь соин малпаськоно на: мар со малпа со пумысен, пылатӥськемез бере солы Инмар азьын кыл кутоно луоз шуыса? Кыӵе пайда ваёз солы пылатӥськемез но кыӵе шуг-секытъёс кылдыны быгатозы? Малы со тросгес пайда ваёз? (Марк 10:29, 30). Та юанъёс вылын пылатӥськемезлэсь азьло малпаськыны кулэ. Тӥ пиналдылы юрттӥськоды ке мур малпаськыны, малы Инмарлэсь кылзӥськон пайда вае но кытчы вуттэ кылзӥськытэк улон, соку со ачиз валалоз, Библиысь возетъёсъя улон котьку пайда вае шуыса (К. Зак. 30:19, 20).
ПЫЛАТӤСЬКЕМЗЫ БЕРЕ ЕГИТЪЁСЛЭН ШУГ-СЕКЫТЪЁССЫ КЫЛДО КЕ
16. Мае тодазы возёно христиан луись анай-атайёслы, пылатӥськем пиналзылэн осконэз лябӟыны кутскиз ке?
16 Мар кароно, пиды яке нылды пылатӥськиз, но дыр ортчыса осконэз лябӟыны кутскиз ке? Кылсярысь, тӥ шӧдӥськоды, быдэ вуымтэ пиналды Шайтанлэн дуннеысьтыз маин ке но тунсыкъяське шуыса, яке со сокем уг оскы ни, Библиысь возетъёсъя улон пайда вае шуыса (Пс. 72:1—3, 12, 13). Анай-атайёс, тодады возе: со, кызьы тӥ асьтэды возёды та учырын, юрттоз пиналдылы зэмлыкын юн сылыны яке палэнтоз сое зэмлыкысь. Кӧня гинэ арес нылпидылы медаз луы, солы тушмон эн луэ. Нылпиосты мед тодозы, тӥ соосты яратӥськоды но тӥляд соослы юрттэмды потэ шуыса.
17, 18. Кызьы анай-атайёс юрттыны быгато пиналзылы, кудӥзлэн осконэз лябӟиз?
17 Пинал пылатӥськиз ке, со возьматэ, пылатӥськемезлэсь азьло со улонзэ Инмарлы сӥзиз шуыса. Со Иеговалы кылзэ сётӥз, сое яратоз но солэсь эриксэ быдэсъян солэн улоназ нырысетӥ интыын луоз шуыса. (Лыдӟы Марклэсь 12:30.) Иегова понна сыӵе кыл сётонъёс туж дуно луо, нокин но соосты малпатэк сётыны кулэ ӧвӧл (Екк. 5:3, 4). Пиналдылы со сярысь тупась дыре лякытэн тодаз вайытэ. Нош нырысь эскере сое, мае сётэ Иеговалэн организациез, анай-атайёслы юрттон понна. Озьы тӥ дась луоды вераськыны со сярысь, мар понна кыл куто пылатӥськем христианъёс Иегова азьын но кыӵе бакель каронъёс басьто соос, кинъёс солы улонзэс сӥзё.
18 Туж умой визь-кенешъёс сётэмын «Тынад юанъёсыдлы валэктонъёс» книгалэн 1-тӥ томаз (ӟуч). Со книгалэн пумаз, «Анай-атайёслэн юанъёссы» ватсэтын, гожтэмын: «Дыртыса йылпумъянъёс эн лэсьтэ, нылпиды зэмлыклэсь куштӥське шуыса. Ужпум мукетыз бордын луыны быгатэ». Оло нош, сое огъёзъёсыз зӥбо яке солы мӧзмыт. Яке, со ассэ мукет егит христианъёсын ӵошатэ но шӧдэ, соос сьӧры ноку уйиськыны уз быгаты шуыса. Озьы ик отын верамын: «Соглаш луоды, дыр, со выллем мугъёс Библиысь зэмлыкен герӟаськемын ӧвӧл шуыса. Соос герӟаськемын югдуръёсын, кудъёсыз люкето солы та дыре зэмлыкъя улыны». Со сяна, книгаын сётэмын пайдаё визь-кенешъёс, кызьы анай-атайёс юрттыны быгато пиналзылы, кудӥзлэн осконэз лябӟиз.
19. Кызьы анай-атайёс юрттыны быгатозы нылпиоссылы утиськон басьтонлы визь-нод утчаны?
19 «Кузё-Инмарлэн дышетонэз, валэктон-визьманъёсыз вылэ пыкиськыса», нылпиосты будэтон — со огдыре бадӟым дан но, кыл кутон но (Еф. 6:4). Кызьы ми адӟимы, кулэ тыршыны, нылпиос, Библиез тодэм сяна, мед оскозы, басьтэм тодон-валанзы зэм луэ шуыса. Сыӵе оскон соослэсь мылкыдзэс ӝутоз Иеговалы сӥзиськыны но вань сюлмысьтызы солы ужаны-тыршыны. Анай-атайёс, нылпиостэс будэтыкуды, киосты медаз лэзиське! Иегова но солэн святой духез мед юрттозы пиналдылы утиськон басьтонлы визь-нод утчаны!