Егитъёс, асьтэлэн утиськонды понна тырше

1. Малы пылатӥськон — со туж кулэ луись вамыш? (Учке статья кутсконысь туспуктэмъёсты.)

КОТЬКУД ар трос сюрс адямиос пылатӥсько, кудъёсыз Библиез дышето. Соос пӧлын трос нылпиос но егитъёс. Куд-огъёсыз соос пӧлысь Иеговалэн Адӟись-Ивортӥсьёсызлэн семьяосазы будӥзы. Тон но соос пӧлын ке, тонэ ушъяны луоз. Пылатӥськон — со туж кулэ луись вамыш. Сотэк Иисуслэн дышетскисез луыны но утиськыны уг луы (Матф. 28:19, 20; 1 Пётр 3:21).

2. Малы кышкано ӧвӧл аслэсьтыд улондэ Инмарлы сӥзьыны?

² Пылатӥськемед бере тон азьын трос луонлыкъёс усьтӥськизы ке но, тодад возёно, табере тон Инмар азьын кыл кутӥськод шуыса. Мар понна? Пылатӥськон азяд тон «бен» шуид таӵе юанлы: «Ӧпкелид-а тон аслад сьӧлыкъёсыд сярысь, Иисус Христослэн курбонэзлы луыса, но сӥзиськид-а тон Иеговалы, солэсь эриксэ быдэсъян понна?». Пылатӥськеменыд тон ваньмыз азьын верад, улондэ Иеговалы сӥзид шуыса, яке солы кыл сётӥд, сое яратод но солэсь эриксэ быдэсъян улонад нырысетӥ интыын луоз шуыса. Тон туж кулэ вамыш лэсьтӥд. Жаляно-а со сярысь? Чик но ӧвӧл! Аслэсьтыд улондэ Иеговалэн кияз сётыны — со самой умой ужпум, кудзэ адями кутыны быгатэ. Нош адями Иеговалэсь уг кылзӥськы ке, со Шайтанлэн киулаз улэ! Шайтанлэн уг поты, тон мед утиськод шуыса. Со шумпотысал, тон, соин ӵош Иеговалы пумит султыса, пырак дауръёс ӵоже улыны оскондэ ыштысалыд ке.

3. Кызьы ми бакель каремын вал улонмес Иеговалы сӥземмы бере?

³ Нош табере малпа, кызьы тон бакель каремын вал, христиан мурт луэмед бере. Тон улондэ Иеговалы сӥзид, табере вераны быгатӥськод: «Уг кышка, Кузё-Инмар мон палан: адями мыным мар кароз?» (Пс. 117:6). Иегова палан луыны но тодыны, со, тон шоры учкыса, шумпотэ шуыса,— со туж бадӟым дан! Солэсь умоез номыр ӧвӧл.

АДЯМИ АЧИЗ КЫЛ КУТЭ

4, 5. а) Малы ми вераны быгатӥськомы, Иеговалы сӥзиськемез понна адями ачиз кыл кутэ шуыса? б) Кыӵе шуг-секытъёсын пумиськоно луо вань христианъёс, кӧня гинэ арес соослы медаз луы?

⁴ Тон — пылатӥськем христиан мурт, но тынад Иеговаен кусыпъёсыд коркась интернет кадь ӧвӧл, кудӥз понна анай-атаед коньдон тыризы, нош уже кутыны быгато ваньзы. Ачид сяна, нокин но тыныд утиськыны уз юртты, анай-атаеныд улӥськод ке но. Малы сое тодамы возёно? Малы ке шуоно ноку но уд тодӥськы, мар луоз азьланяз. Кылсярысь, тон пичи дыръяд пылатӥськид ке, егит дыръяд тон пумиськод, вылды, выль шуг-секытъёсын, кудъёсыз тынад ӧй вал на. Одӥг егит ныл со сярысь тазьы вераз: «Нокин но уз жаля, дыр, Адӟись-Ивортӥсь луиз шуыса, школаын вордскем нуналлы пыжем торт сиытэк кылиз ке. Нош кӧня ке ар ортчыса, куке пиез ныл доры яке нылэз пи доры кыскыны кутске, соку егит муртлы юн оскон кулэ ини, Иеговалэн сюресэз со самой умой улон сюрес шуыса».

⁵ Зэм, егитъёслы гинэ выль югдуръёслы дышоно ӧвӧл. Возьмамтэ шорысь осконзы эскериськыны быгатэ соослэн но, кинъёс быдэ вуыса пылатӥськизы. Шуг-секытъёс кузпалъяськонэн, тазалыкен яке ужен герӟаськемын луыны быгато. Котькудмылэн, кӧня гинэ арес милемлы медаз луы, кылдылозы югдуръёсмы, кудъёсаз Иеговалы оскымон луэммы эскериськоз (Иак. 1:12—14).

6. а) Малы милям мугъёсмы ӧвӧл Иеговалы сӥзиськыкумы сётэм кылмылэсь куштӥськыны? б) Кыӵе оскон сёто милемлы Исаиялэн 12:2 но Филиппыослы 4:11, 12 кылъёс?

⁶ Мар юрттоз тыныд котькыӵе югдуръёсын Иеговалы оскымон кыльыны? Котьку тодад возь, Иеговалы сӥзиськыкуд сётэм кылыдлэсь куштӥськыны тынад нокыӵе мугъёсыд ӧвӧл шуыса. Малы ке шуоно тон Вылӥ Кивалтӥсьлы кылдэ сётӥд, номыр шоры учкытэк, солы ужалод-тыршод шуыса, тынад эшъёсыд но анай-атаед солы ужамысь-тыршемысь дугдӥзы ке но (Пс. 26:10). Кыӵе гинэ югдуре медад сюры, кур Иеговалэсь, со тыныд солы сётэм кылдэ быдэстыны кужым мед сётоз шуыса. (Лыдӟы Исаиялэсь 12:2; Филиппыослы 4:11, 12.)

7. Кызьы валано, аслад утиськонэд понна «кышкаса, куалекъяса» тыршоно шуыса?

⁷ Иеговалэн потэ, тӥ соин эшъёс мед луоды шуыса. Но туж тыршоно луэ, со кусыпъёсыз утён но утиськон понна. Филиппыослы 2:12 верамын, утиськон понна «кышкаса, куалекъяса» тыршоно шуыса. Со кылъёс возьмато, тыныд умой-умой малпано шуыса, кызьы Иеговаен кусыпъёстэ утёно, нокыӵе шуг-секытъёс шоры учкытэк. Туж кышкыт аслыд ортчыт трос оскиськыны, малы ке шуоно вал учыръёс, куке соос, кинъёс Инмарлы трос аръёс ӵоже ужазы-тыршизы, зэмлык бордысь палэнскизы. Кыӵе вамышъёс юрттозы тыныд аслад утиськонэд понна тыршыны?

БИБЛИЕЗ ДЫШЕТОН

8. Мар со сыӵе Библиез дышетон но малы со кулэ?

⁸ Иеговалэн эшез луон понна, милемлы сое кылзоно но соин вераськоно. Кызьы ми Иеговалэсь верамзэ кылзыны быгатӥськомы? Валтӥсь амал — со Библиез дышетон. Ми Библиез дышетӥськомы, куке Инмарлэсь Кылзэ но со вылэ пыкиськем публикациосты лыдӟиськомы, нош озьы ик лыдӟеммы вылын малпаськиськомы. Библиез дышетон школаысь учебникез лыдӟон но экзаменлы дасяськон кадь ӧвӧл. Дышетон со выль интыостӥ ветлон кадь луэ, куке тон мае ке выльзэ адӟиськод но тодӥськод. Дышетыса тон Иеговалэсь выль сямъёссэ тодӥськод. Солы луыса тон Инмарлы матэ кариськиськод, нош со тыныд матэ кариське (Иак. 4:8).

9. Мае тӥ уже кутӥськоды, куке Библиез дышетӥськоды?

⁹ Иеговалэн организациез туж троссэ сётэ, тон аслыд умой дышетскон программа лэсьтыны мед быгатод шуыса. Кылсярысь, тыныд юрттыны быгатоз «Как сделать чтение Библии занимательным?» статья, кудӥз печатламын вал 2009-тӥ арын оштолэзь понна поттэм «Сайкалэ!» журналын, «Вопросы молодежи» рубрикаын. Аслад утиськонэд понна тыршемед потэ ке, туж кулэ Библиез дышетыны но малпаськыны. (Лыдӟы Псалтирез 118:105.)

ВӦСЯСЬКОН

10. Малы пылатӥськем христианъёслы Иеговалы вӧсяськоно?

¹⁰ Куке ми Библиез дышетӥськомы, ми Иеговалэсь куаразэ кылӥськомы, нош куке вӧсяськиськомы, ми соин вераськиськомы. Христиан муртлы учконо ӧвӧл вӧсяськон шоры пайдатэм мар ке шоры кадь но малпано ӧвӧл, вӧсяськи ке, соку ик ваньмыз умой луоз шуыса. Вӧсяськон — со зэмос луонлык вазиськыны Кылдытӥсьмылы, кудӥзлэн потэ, тон соин мед вераськод шуыса. (Лыдӟы Филиппыослы 4:6.) Тон мар ке пумысен туж юн сюлмаськиськод ке, Библиысь таӵе визь-кенешлэсь кылзӥськы: «Сюлмаськонъёстэ Кузё-Инмар кие сёт» (Пс. 54:23). Оскиськод-а тон, со юрттэ шуыса? Трос миллион вын-агайёс но сузэр-апайёс ас вылазы сое шӧдӥзы. Та визь-кенеш соослы юрттӥз. Со тыныд но юрттоз!

11. Малы котьку Иеговалы тау карыны кулэ?

¹¹ Вӧсяськон — со Иеговалэсь юрттэтсэ курыны луонлык гинэ ӧвӧл. Библиын верамын: «Ваньмыз понна тӥ тау карыса улэ» (Кол. 3:15). Куддыръя ми шуг-секытъёсмы пӧлы йырын валче выйиськомы но ум адӟиське, макем трос умоез милям вань. Аслыд ужпум пуктыны луоз котькуд нунал куинь ке но муг шедьтыны, мар понна Иеговалы тау карыны луоз, нош собере вӧсяськонын тау карыны солы. Абигейл, кудӥз 12 арескын пылатӥськиз, вера: «Мон малпамъя, быдэс Дуннеын нокинлы но, Иеговалы мында, тау карыны уг луы. Котькуд тупась учыре ми солы кузьымъёсыз понна тау карыны кулэ. Одӥг пол мон тунсыко юан кылӥ: ӵукна султыкумы ми ыштысалмы ке ваньзэ, мар понна Иеговалы тау ӧм каре, мармы гинэ милям кыльысал?»

АС ВЫЛАД ШӦДОН

12, 13. Кызьы тӥ ас вылады шӧдӥды Иеговалэсь ӟеч луэмзэ но малы туж кулэ малпаськыны со сярысь, кызьы Иегова тӥледлы юрттӥз?

¹² Вашкала дыръёсы Иегова трос пол юрттылӥз Давид эксэйлы шуг-секытъёссэ вормыны. Давид псалом гожтӥз, кудаз верамын вал: «Веръяса утчалэ но адӟоды макем ӟечлыко Кузё-Инмар! Шудо адями, кудӥз Со вылэ оскиське!» (Пс. 33:9). Та кылъёс возьмато, туж умой шуыса, куке тон мае ке ас вылад шӧдӥськод. Библиез, публикациосмес лыдӟыса но христиан пумиськонъёсы ветлыса, тон тодӥськод со сярысь, кызьы Инмар мукет адямиослы юрттылӥз солы оскымон кыльыны. Со туж мылкыдэз ӝутэ. Нош Иеговаен кусыпъёсыд мед юнмалозы шуыса, тыныд адӟыны кулэ, кызьы Иегова тыныд юрттэ. Вал-а тынад сыӵе учыръёсыд, куке тон ас вылад шӧдӥд, макем ӟеч Иегова?

¹³ Иеговалэсь одӥг ӟеч ужзэ вань христианъёс ас вылазы шӧдӥзы. Со котькудмылы аслэсьтыз ӟеч луэмзэ возьматӥз, куке асьмемыз ас дораз но Пиез доры матэ кариз. Иисус вераз: «Нокинлэн но Мон доры лыктэмез уз луы, Монэ ыстӥсь Атае сое Мон доры ӧз ке вайы» (Иоанн 6:44). Шӧдӥськод-а тон, та кылъёс тон сярысь но верамын шуыса? Оло нош, тон малпаськод: «Иегова анай-атайме ас дораз ӧтиз, монэ ӧз. Мон соослэсь адӟем гинэ кари». Нош аслэсьтыд улондэ Иеговалы сӥзьыса но пылатӥськыса, тон возьматӥд, тынад Иеговаен нимысьтыз, матысь кусыпъёсыд шуыса. Библия оскытэ милемыз: «Кин Инмарез яратэ, со адямиез Инмар тодэ» (1 Кор. 8:3). Котьку дунъя, тон Иеговалэн организацияз луыны быгатӥськод шуыса.

14, 15. Кызьы ӟеч иворез веран осконмес юнматыны быгатоз?

¹⁴ Кызьы эшшо тон Иеговалэсь ӟеч луэмзэ ас вылад шӧдыны быгатӥськод? Чакла, кызьы со тыныд юрттэ, куке тон аслад осконэд сярысь мукетъёсызлы вераськод — ужакуд-тыршыкуд яке школаын. Куд-огъёсызлы туж секыт ӵош дышетскисьёссылы ӟеч иворез вераны, малы ке шуоно ноку уд тодӥськы, мар соос вералозы. Куддыръя одӥг муртлы осконмы сярысь вераны секыт, нош мар веранэз ини со сярысь, куке трос адямиос азьын осконмы сярысь верано луэ. Кызьы меда кышканэз вормоно?

¹⁵ Нырысь малпа, малы тон малпаськод, тынад осконэд зэм луэ шуыса. Дыр шедьты малпаськыны со сярысь, малы тон оскиськод, мар тонэ оскытэ, со зэм луэ шуыса, но кызьы тон сое мукетъёсызлы валэктыны быгатод. Тон юн оскиськод но тодӥськод ке, мар сярысь вераны, тынад ӟырдыт мылкыдыд луоз Иегова сярысь кинлы ке вераны (Иер. 20:8, 9).

16. Мар кароно, кышканэз вормон понна, кудӥз люкетэ мукетъёсыныз осконмы сярысь вераськыны?

¹⁶ Умой-умой дасяськид ке но, тыныд капчи уз луы, дыр, кинэн ке но осконэд сярысь вераськыны. 18 аресъем нылаш, кудӥз 13 арескысен пылатӥськиз, вера: «Мон тодӥсько, малы мон оскисько, но куддыръя мыным секыт луэ малпанъёсме вераны». Мар со каре, шуг-секытсэ вормон понна? «Мон асме кышкатэк возьыны тыршисько,— шуэ со.— Ӵош дышетскисьёсы кышкатэк верало ук асьсэлэн ужъёссы сярысь. Соку малы мон уг быгатӥськы?! Соин ик вераськон куспын мон, кылсярысь, тазьы шуисько: „Алигес мон адямиосын Библия сярысь вераськи...“ — собере верасько монэн луэм учырез. Веранэ Библиен герӟаськемын ӧвӧл ке но, тросэзлы тунсыко, кызьы мон адямиосын Библиез дышетӥсько. Куддыръя соос асьсэос юаллясько со сярысь. Макем ӵемгес мон озьы карисько, сокем умойгес мынам пӧрме. Сыӵе вераськонъёс бере мон котьку шумпотӥсько!»

17. Мар эшшо юрттоз на мукетъёсыныз осконмы сярысь вераськыны?

¹⁷ Тон гажаськод ке соосты, кинъёсын вераськиськод, но тунсыкъяськиськод ке соосын, соос тонэ умоен кылзозы, луоз. «Адямиосын вераськыкум, мон Библия сярысь вераны кышкасько вал,— шуэ 17 аресъем Оливия, кудӥз пичи дыръяз ик пылатӥськиз.— Мон малпасько вал, монэ фанатикен лыдъялозы шуыса». Нош собере со шоры со мукет паласен учкиз. Кышканэзлы сётскон интые, со малпаськиз: «Тросэз егитъёс Иеговалэн Адӟись-Ивортӥсьёсыз сярысь номыр но уг тодо. Милемын сяна, соос Адӟись-Ивортӥсьёс пӧлысь нокинэн тодмо ӧвӧл ни. Соин ик, кызьы ми асьмеды возимы, озьы ик соос но ми шоры учкозы. Нош осконмы сярысь вераськон потыку, ми кышкаськомы, возьдаськиськомы но вераськонлэсь пегӟиськомы ке? Яке сюлмаськыны но мае ке валантэм вераны кутскиськомы ке? Соос малпаны быгатозы, ми осконмылэсь возьдаськиськомы шуыса. Асьмеды кышкаса воземенымы сэрен, милемлы уродэн но вераны быгатозы. Нош ми капчиен но кышкатэк вераськомы ке осконмы сярысь озьы ик, кызьы вераськиськомы мукетыз сярысь, милемыз гажалозы, луоз».

АСЬТЭЛЭН УТИСЬКОНДЫ ПОННА ТЫРШЕ!

18. Мар пыре утиськон понна тыршон пӧлы?

¹⁸ Кызьы ми адӟимы, ми Инмар азьын кыл кутӥськомы. Котькудӥз христиан мурт утиськонэз понна тыршыны кулэ. Кылсярысь, со понна кулэ Библиез лыдӟыны но со вылын малпаськыны, Иеговалы вӧсяськыны но тау карыны ваньмыз понна, мар со каре котькудмылы. Ваньмыз со юрттоз тыныд оскыны, Иегова тынад Эшед шуыса, но юрттоз тыныд мукетъёсызлы осконэд сярысь кышкатэк вераны. (Лыдӟы Псалтирез 72:28.)

19. Малы утиськон понна тыршонын кужымез жаляно ӧвӧл?

¹⁹ Иисус вераз: «Кин Мон сьӧры мыныны малпа, аслэсьтыд ачид куштӥськы, киростэ басьты но Мон сьӧры мын» (Матф. 16:24). Христиан мурт луон понна, Инмарлы сӥзиськоно но пылатӥськоно. Со трос бакель каронъёс вайись сюреслэн кутсконэз гинэ. Нош азьланяз со сюрес выль дуннеын пырак улонэ вуттоз, кудзэ Инмар сӥзиз. Соин ик утиськонэд понна тыршемысь эн дугды!