Мон троссэ кельтӥ, Иисус сьӧры мынон понна

КЫЗЬЫ мон сыӵе югдуре шеди? Вае мон тӥледлы верало. Мон вордӥськи 1929-тӥ арын 29-тӥ пӧсьтолэзе. Пичи дырме ортчытӥ Булакан ёросысь (Филиппины) пичи гинэ гуртын. Ми огшоры улӥмы, малы ке шуоно шаерамы коньдонэн секыт югдур вал. Пичи дыръям япон ожгарчиос Филиппины вылэ ожен урдскизы. Милям гуртмы кыдёкын вал, соин ик ожмаськонъёс ми вылын ӧжыт шӧдскизы. Нош радиомы, телевизормы но газетъёсмы ӧвӧлэн, иворъёсты ми, ымысь ыме вераса гинэ, тодылӥмы.

Семьяямы ми тямыс нылпиос вал, мон — кыкетӥез. Мыным тямыс арес тырмем бере песятае но песянае монэ доразы улыны басьтӥзы. Ми католикъёс вал, но песятае тросэныз тунсыкъяськиз. Со религиен герӟаськем пӧртэм публикациосты люказ, кудъёссэ солы эшъёсыз сёто вал. Тодӥсько на, кызьы со мыным тагал кылын брошюраосты возьматъяз, кудъёсыз зэмос луисьтэм религилэсь дышетонъёссэ шарае потто вал, озьы ик Библиез но возьматъяз. Мыным туж кельше вал Библиез лыдӟыны, тужгес но Евангелиосты. Соосты лыдӟыса, мынам Иисус кадь луэме потӥз (Иоанн 10:27).

ИИСУС СЬӦРЫ МЫНЫНЫ ДЫШЕТСКИСЬКО

Япон ожгарчиос Филиппиныысь 1945-тӥ арын кошкизы. Со дырегес ик атае но анае монэ берен доразы ӧтизы, песятае но соглаш вал. Мон соослэсь кылзӥськи.

1945-тӥ арын толсуре милям гуртамы Ангат карысь Иеговалэн Адӟись-Ивортӥсьёсыз тодытӥзы. Ми доры арлыдо вын-агай лыктӥз но вераз, мар Библия вера «берпум аръёс» сярысь (2 Тим. 3:1—5). Со ӧтиз милемыз артысь гуртэ Библиез дышетыны. Атаелэн но анаелэн мынэмзы ӧз поты, нош мон мынӥ. Отчы 20 пала адями люкаськиз. Куд-огъёсыз Библия сярысь юалляськизы.

Мон туж ик ӧй вала, мар сярысь отын вераськизы, соин ик кошкыны малпасько ни вал. Шӧдтэк шорысь ваньзы Эксэйлык кырӟанэз кырӟаны кутскизы. Со мыным туж кельшиз, но мон кылёно кариськи. Кырӟам но вӧсяськем бере ваньзэс ӧтизы вуоно пумиськонэ арня нуналэ Ангат каре.

Со пумиськон ортчиз Крус семья дорын. Куд-огъёсызлы, отчы вуон понна, тямыс иськем пала пыдын мыноно луиз. Соос доры ог 50 адями люкаськиз. Мон туж пайми, куке адӟи, пичи нылпиос но Библиысь мур юанъёслы валэктонъёс сётыны быгато шуыса. Кӧня ке пол пумиськонъёсы ветлэме бере Дамиан Сантос нимо арлыдо пионер монэ ас дораз кӧлыны ӧтиз. Ми соин быдэс уй кадь Библия сярысь вераськимы.

Со дыре тросэз Библиысь валтӥсь дышетонъёсты тодэмзы бере ик тодэмзэс уже кутыны дась вал. Кӧня ке пумиськонъёс ортчыса, вын-агайёс куд-огезлэсь Библиен тунсыкъяськисьёслэсь, озьы ик мынэсьтым но, юазы: «Пылатӥськемед потэ-а?» Мон шуи: «Потэ». Мынам Иисуслы ляльчи кадь ужаме-тыршеме потэ вал (Кол. 3:24). 1946-тӥ арын 15-тӥ тулыспалэ ми мынӥмы матысяз шур дуре, кытын мон но эшшо одӥг вын-агай пылатӥськимы.

Ми валаськомы вал, пылатӥськимы бере, табере милемлы ӟеч иворез вераса ветлоно шуыса, малы ке шуоно озьы ветлӥз Иисус. Со атаелы туж уг кельшы вал. Со вераз: «Ӟеч иворез вераса ветлыны тон туж егит на. Тонэ шуре зымытэмзы понна гинэ, тон ӟеч иворез верась ӧд луы». Мон валэктӥ солы, Инмарлэн потэ, ми Эксэйлык сярысь ӟеч иворез мед вераломы шуыса (Матф. 24:14). «Инмарлы сётэм кылме мон одно ик быдэсто»,— шуи мон атаелы. Тае вераме бере со вераз кылъёсты, кудъёсыз кутсконаз гожтэмын. Солэн мыным люкетэмез потэ вал ӟеч иворез вераны. Озьы мыным, Инмарлы ужан-тыршонын кутэм ужпумъёсме быдэстон понна, нырысьсэ малэсь ке но куштӥськоно луиз.

Монэ ас дораз пыртӥз Ангат карысь Крус семья. Соос пичи нылзылэсь, Норалэсь, но мынэсьтым мылкыдмес ӝутӥзы пионер луыны. Ми кыкмы ик пионер луимы 1947-тӥ арын 1-тӥ шуркынмонэ. Нора ӟеч иворез вераны мукет каре кошкиз, нош мон Ангатэ кыли.

ЭШШО МАЛЭСЬ КЕ НО КУШТӤСЬКЫНЫ ДАСЬ

Одӥг пол Ангат карысь площадьын Эрл Стьюарт, филиалысь вын-агай, речь вераз. Отын сое 500-лэсь тросгес адями кылзӥз. Со дырлы мон куинетӥ арзэ ини пионер луыса ужасько-тыршисько вал. Стьюарт вын-агай речьсэ англи кылын вераз, нош мон собере речезлэсь пуштроссэ тагал кылын верай. Мон сизьым классэз гинэ быдтӥ, но милям дышетӥсьёсмы ӵемысь англи кылын вераськылӥзы. Со сяна, милям Библия вылэ пыкиськем публикациосмы тагал кылын ӧжыт вал. Соин ик троссэ мон англи кылын лыдӟи, но со мыным кылме волятыны юрттӥз. Озьы мон англи кылэз умой тодӥ но Стьюарт агайлэсь речьсэ но мукет речьёсты берыктыны быгатӥ.

Одӥг нуналэ, куке мон Стьюарт агаез берыктӥ, со вераз кенешлы, миссионеръёс 1950-тӥ арын Нью-Йоркын (США) ортчись «Теократиялэн будэмез» конгрессэ мынозы шуыса. Соин ик филиал одӥгзэ яке кыксэ пионеръёсты со дырлы Вефиле юрттӥськыны ӧте. Ӧтем вын-агайёс пӧлын мон но вал. Мыным выльысь дышем интыысьтым кошконо луиз, табере — Вефильын ужан-тыршон понна.

1950-тӥ арын 19-тӥ инвожое мон Вефильын ужаны-тыршыны кутски. Соку Вефиль интыяськемын вал ӝужыт писпуосын котыртэм бадӟым вуж коркан, нош солэн музъемез гектар пала вал. Отын дасо мында вын-агайёс тыршизы. Ӵукна мон сиён пӧран интыын юрттӥськи, нош собере, укмыс час котырысен кутскыса, мисьтаськон интыын дӥськут гладить карылӥ. Нуназе бере но озьы ик ужай. Миссионеръёс калыккуспо конгрессысь берытскем бере но, мон Вефильын ужай на — журналъёсты пӧртэм интыосы келяны дасялляй, учки кинлы но кытчы журналъёс ыстоно но приёмнойын куноосты пумиталляй. Мар карыны куризы, сое ик лэсьтӥ.

ФИЛИППИНЫЫСЬ КОШКИСЬКО, ГАЛААД ШКОЛАЫН ДЫШЕТСКОН ПОННА

1952-тӥ арын монэ но Филиппиныысь эшшо куать вын-агайёсты Галаад школалэн 20-тӥ классаз дышетскыны ӧтизы. Огазеяськем Штатъёсын тросэз милемлы выль, паймымон кадь вал. Отын ваньмыз пӧртэм вал солэсь, малы мон дыши аслам гуртам.

Кылсярысь, сиён дасян понна, мисьтаськон понна но мукетсэ карон понна, милемлы дышетсконо луиз пӧртэм арбериосты уже кутыны, кудъёссэ милям ноку но адӟеммы но ӧй вал. Со сяна, татын куазь но чылкак мукет вал. Одӥг ӵукна мон ураме потӥ, нош отын — ваньмыз тӧдь-тӧдь! Озьы мон нырысьсэ лымыез адӟи, со туж чебер вал. Нош собере мон валай: со кезьыт но вылэм на, туж кезьыт!

Но со валтӥсез ӧй вал. Валтӥсез вал Галаад школаын дышетскон. Мыным туж кельше вал отын дышетскыны. Дышетӥсьёс туж быгатыса дышетӥзы, но ми валамы, кызьы мур эскерон ортчытъяно. Веранэз ӧвӧл, Галаадын дышетскон мыным Инмарен кусыпъёсме юнматыны юрттӥз.

Дышетскеме бере монэ огдырлы нимысьтыз пионер луыса ужаны-тыршыны ыстӥзы Бронксэ, Нью-Йорк карлэн ёросаз. 1953-тӥ арын пӧсьтолэзе мон ветлӥ «Выль дуннелэн обществоез» конгрессэ, кудӥз ортчиз Бронксын. Конгресс бере монэ берен Филиппиные ыстӥзы.

ӞЕЧ ЛУ, КАРЫСЬ УМОЙ УЛОН!

Филиалысь вын-агайёс веразы мыным: «Тон ёросэз чаклась луод». Озьы мынам выль луонлыке кылдӥз Иисуслэн пытьыетӥз мыныны, кудӥз, Иеговалэсь ыжъёссэ дышетон понна, трос пӧртэм каръёсы вуылӥз (1 Пётр 2:21). Мынам ёросэ вал Филиппиныысь самой бадӟым Лусон шормуӵлэн шор люкетэз. Отчы пыро вал Булакан, Нуэва-Эсиха, Тарлак но Самбалес ёросъёс. Куд-ог каръёсы вуон понна, мыным Сьерра-Мадре изо гурезьёстӥ мыноно луылӥз. Автобусъёс отчы ӧз ветлэ, соин ик мон куриськылӥ коръёс нуллӥсь машинаосы коръёс вылын мыныны. Ӵем дыръя монэ басьто вал, но озьы ветлыны капчи ик ӧй вал.

Со дыре отысь тросэз кенешъёс вылесь но пичиесь вал. Вын-агайёс туж тау каризы мыным, куке мон юрттылӥ соослы кенешлэсь пумиськонъёссэ но тодытон ужез радъяны.

Берлогес монэ мукет ёросэ ыстӥзы, кудаз пыре вал Биколь шормуӵ но со котырысь пичи шормуӵъёс. Отын трос пичи группаос вал. Соосты кылдытыны юрттӥзы нимысьтыз пионеръёс, кудъёсыз нырысетӥзэ со интыын ӟеч иворез веразы. Одӥгаз юртын одӥг гинэ туалетсы вал — гу, кудӥз вамен кык коръёс куштэмын. Мон со коръёс вылэ султӥ но, соос гуэ усизы, нош коръёс сьӧры мон но лобӟи! Собере мон туж кема асме сузяны выри.

Со шормуӵын улыкум, мон ӵем малпаськыны кутски Нора сярысь, кудӥныз ми огдыре пионер луимы. Со дырлы со Думагете карын нимысьтыз пионер луыса ужа-тырше вал ини. Мон со доры адӟиськыны ветлӥ. Собере кӧня ке дыр ӵоже ми ог-огмылы гожтэтъёс гожъямы. Но 1956-тӥ арын ми кузпалъяськимы. Сюанмы бере нырысетӥ арняяз ик ми Рапу-Рапу шормуӵысь кенешез юнматыны мынӥмы. Отын милемлы трос пыдын ветлоно луиз, озьы ик гурезьёстӥ но. Ми Нораен туж шумпотыса юрттӥмы кыдёкын улӥсь вын-агайёсмылы.

ВЫЛЬЫСЬ ВЕФИЛЕ

Ми ньыль ар пала пӧртэм кенешъёсты юнматыса ужамы-тыршимы, нош собере милемыз филиалэ ӧтизы. 1960-тӥ арын толшорысен кутскыса ми али ке но татын ужаськомы-тыршиськомы на. Та дыр куспын мон тросэзлы дышетски вын-агайёслэсь, кудъёсыз вань кужымзэс поныса тыршо. Норалы Вефильлэн пӧртэм отделъёсаз ужаны-тыршыны шуд усиз.

Вефильын мон адӟи, кызьы Филиппиныысь вын-агайёслэн но сузэр-апайёслэн Иеговаен кусыпъёссы юнмало. Куке мон, кузпалъяськымтэ егит пи, нырысетӥзэ татчы лыктӥ, быдэс шаерын ог 10 000 ивортӥсьёс гинэ вал. Нош али татын 200 000-лэсь тросгес Адӟись-Ивортӥсьёс, но тодытон ужез нуыны юртто 435 Вефильын тыршисьёс.

Адӟись-Ивортӥсьёслэн лыдзы будэмъя, Вефильлы азьло инты ӧз тырмы ни. Соку Кивалтӥсь кенеш куриз милемыз музъем утчаны, отчы филиал бадӟымесьгес выль юртъёс пуктыны мед быгатоз шуыса. Типографиысь ужез радъясен ӵош ми бускельёслэсь юалляськыса ветлӥмы: уг вуза-а кин ке но музъемзэ. Тросэз бускельёсмы Китайысь лыктэмын вал, но соослэн музъемзэс вузамзы уг поты вал. Нош одӥгез соос пӧлысь вераз милемлы: «Китаецъёс уг вузало. Ми басьтӥськомы».

Шӧдтэк шорысь милемлы одӥгез бускельмы вазиськиз. Со Огазеяськем Штатъёсы мыныны медэ вал но милемлы аслэсьтыз музъемзэ басьтыны ӵектӥз. Со, мар луиз азьланяз, осконтэм кадь вал. Эшшо одӥгез бускельмы музъемзэ вузано кариськиз. Со озьы ик мукет бускельёслэсь но мылкыдзэс ӝутӥз музъемзэс вузаны. Со пиосмурт гинэ но, кудӥз вераз вал, китаецъёс номыре уг вузало шуыса, музъемзэ вузаз. Ӝоген филиаллэн музъемез куинь поллэсь бадӟымгес луиз! Мон оскисько: Иеговалэн потэ вал, ваньмыз ӵапак озьы мед луоз шуыса.

Кемалась ортчем 1950-тӥ арын Вефильын мон самой егитэз вал. Нош али ми кышноеным татын самой арлыдоосыз. Мон одӥг но уг жаляськы, котьку но Иисус сьӧры мынӥ шуыса, кытчы гинэ со монэ медам ыстысал. Атае но анае монэ дорысь уллязы, но, Иеговалы луыса, мынам бадӟым семьяе вань, кудаз пыро огъя оскись вын-агайёс но сузэр-апайёс. Мон юн оскисько, Иегова ми сярысь котьку сюлмаськоз шуыса, кытын гинэ ми солы медам ужалэ-тырше. Ми Нораен Иеговалы вань ӟеч ужъёсыз понна туж тау кариськомы но мукетъёсызлэсь но мылкыдзэс ӝутӥськомы Иеговаез эскерыны (Мал. 3:10).

Одӥг пол Иисус, Матфей Левий нимо выт бичасьлы вазиськыса, шуиз: «Мон сьӧры мын». Мар кариз Матфей? Библиын верамын: «Со маиз вань, ваньзэ кельтӥз, султӥз но Со сьӧры кошкиз» (Лука 5:27, 28). Мынам трос учыръёсы вал, куке мыным но озьы ик кароно луиз. Но мон ваньзэс сюлмысь ӧтисько озьы ик карыны. Со сюрес, кудаз тӥледыз трос бакель каронъёс возьмало!