Милям улонамы Иегова котьку нырысетӥ интыын вал

Мон вордӥськи 1940-тӥ арын 19-тӥ куартолэзе Ливан шаерысь Амьюн карын. Кӧня ке аръёс ортчыса, милям семьямы Триполи каре улыны мынӥз. Монэ яратыса будэтӥзы. Милям семьямы юн но шудо вал, отын ваньзы Иеговаез яратӥзы. Мынам вал куинь апайёсы но одӥг агае, соос пӧлын мон самой пичиез. Анай-атае ужлы бадӟым саклык ноку но ӧз висъялэ. Тужгес но ми дунъямы Библия дышетонэз, христиан пумиськонъёсты но мукетъёслы Инмар сярысь вераны луонлыкез.

Милям кенешамы кӧня ке зырӟем христианъёс вал. Соос пӧлысь одӥгез вал Мишель Абуд, кудӥз ортчытӥз кенешын книга дышетонэз (азьвыл озьы нимаське вал одӥгез пумиськонмы). Со зэмлыкез тодӥз Нью-Йоркын. Та агайлы луыса 1920-тӥ аръёслэн кутсконазы Ливан шаерын но зэмлык сярысь тодыны кутскизы. Мынам тодам кылиз, макем гажаз но сюлмаськиз та агай Энн но Гуэн Бивер сузэръёс сярысь, кудъёсыз Галаад школаез йылпумъязы. Милям семьямы соосын туж эшъяськиз. Трос аръёс ортчыса, мон туж шумпотӥ пумитаны Энн сузэрез Огазеяськем Штатъёсын, нош берлогес мон адӟиськи Гуэн сузэрен, кудӥз Уилфред Гуч агайлы бызиз но соин ӵош Лондонысь Вефильын ужаз-тыршиз.

ТОДЫТӤСЬКОМЫ ЛИВАНЫН

Куке мон пичи на вал, Ливанын Иеговалэн Адӟись-Ивортӥсьёсыз туж ӧжыт вал. Озьы ке но ми туж шумпотыса Библиысь зэмлыкъёсты мукетъёслы верамы, куд-ог священникъёслэн пумит луэмзы шоры учкытэк. Куд-ог учыръёс тужгес но йырам кылизы.

Одӥг пол ми Сана апаеным кӧня ке этажъем коркан тодытӥмы. Шӧдтэк шорысь со этажын, кудаз ми адямиосын вераськимы, священник потӥз. Солы кин ке но вераз, дыр, милям лыктэммы сярысь. Со урод кылъёсын апайме ултӥяны кутскиз но сокем лекомиз, сое пагӟаысь донгыса лэзиз. Сана туж зол шуккиськиз. Кин ке но полициын ужасьёсты ӧтиз. Соос лыктӥзы но лякытэн сюлмаськизы, Саналы юрттэт сётэмын мед луоз шуыса. Нош священникез участоке нуизы но отын солэсь пистолетсэ шедьтӥзы. Полициын ужасьёслэн кузёзы юаз священниклэсь: «Тӥ адямиослы Инмар сярысь вераськоды яке соосты лек ужъёс лэсьтыны дышетӥськоды?»

Нош тани эшшо одӥг учыр, кудӥз мынам йырам кылиз. Милям кенешмы автобусэн тодытыны мынӥз одӥг каре, кудӥз туж кыдёкын интыяськемын вал. Ваньмыз туж умой вал, нош милям лыктэммы сярысь со интыысь священник тодӥз но милемлы пумит калыкез люказ. Адямиос ми вылэ изъёсын лэзьяны кутскизы. Одӥгез из атаелэн йыраз сюриз. Мынам али ке но син азям атаелэн виресь ымнырыз. Анае сое автобусэ нуиз, нош мукетъёсыз соос сьӧры мынӥзы. Мон ноку но уг вунэты, мар вераз анае, атаелэсь яразэ биньыкуз. Со шуиз: «Иегова, соосты простить кар! Соос уг валало, мар лэсьто».

Тодам вайисько на эшшо одӥг учырез, куке ми ӵыжы-выжыосмы доры ветлӥмы. Ми лыктӥмы песятае доры, нош со дорын куноын епископ вал. Со тодӥз, мынам анае но атае Иеговалэн Адӟись-Ивортӥсьёсыз шуыса. Со дыре мыным куать арес гинэ вал, нош солэн монэ возьытэ уськытэмез потӥз но юаз: «Вера ай, малы тон али но пылатӥськемын ӧвӧл на?» Мон верай, мон пичи на шуыса но пылатӥськон понна мыным тросгес Библия сярысь тодоно но осконме юнматоно шуыса. Мынам вераме солы ӧз кельшы, соин ик песятаелы со вераз, мон соин гажаса ӧй вераськы шуыса.

Но таӵе учыръёс ӧжыт вал. Огъя вераса, Ливанын улӥсьёс лякытэсь но куно карисесь. Соин ик милям трос вал Библия сярысь умой вераськонъёсмы, озьы ик ми Библия дышетонъёс трос ортчытъямы.

МУКЕТ ШАЕРЕ КОШКИСЬКОМЫ

Куке мон школаын дышетскисько на вал, Ливанэ лыктӥз Венесуэлаысь егит агай. Со милям кенешмылэн пумиськонъёсаз ветлӥз но отын Вафа апаеным тодматскиз. Собере соос кузпалъяськизы но Венесуэлае улыны кошкизы. Вафа милесьтым туж мӧзме вал но аслаз гожтэтъёсаз атайме куриз, ми быдэс семьяен Венесуэлае мед лыктомы шуыса. Дыр ортчыса, атае соглаш луиз но, ми ужпум кутӥмы со шаере мыныны.

1953-тӥ арын ми Венесуэлае лыктӥмы но улыны интыяськимы Каракас каре, президентлэн дворецез вӧзы. Соку мон быдэ вуэмын ӧй вал на. Котьку но, куке ми вӧзтӥ президентлэн дуно машинаез ортчылӥз, мон ымме усьтыса сылӥ. Нош мынам анаелы но атаелы капчи ӧй вал дышыны выль шаерын улыны. Татын ваньмыз мукет вал: кыл, сям-йылолъёс, сиён-юон, куазь. Нош куке соос дышыны кутскизы, милям семьямы шудтэм учырен пумиськиз.

КУРЕКТОНЭН ПУМИСЬКИСЬКОМЫ

Шӧдтэк шорысь атаелэн тазалыкез лябӟиз. Ми талы туж паймимы. Кӧня мон тодӥсько, со ноку но ӧз висьылы. Нош эмъясьёс веразы, солэн рак шуыса. Атаелы операция лэсьтӥзы, но жаляса верано луэ, та солы ӧз юртты. Арня ортчыса, со кулӥз.

Вераны но уг луы, макем бадӟым куректонэн пумиськиз милям семьямы. Мыным соку 13 арес гинэ вал. Ми ноку но ӧм малпалэ, атаймы кулоз шуыса. Милемлы потӥз, ми ноку но шудо ум луэ ни шуыса. Кӧня ке но дыр ӵоже анаелы туж секыт вал, атаймы ӧвӧл ини шуыса. Озьы ке но ми валамы: азьлань мыноно. Иеговалэн юрттэменыз, ми быгатӥмы та куректон пыр потыны. 16 арес дыръям мон школаме йылпумъяй но мынам туж потэ вал семьяелы юрттэме.

Дыр ортчыса, Сана апае бызиз Рубен Араухо агайлы, кудӥз Галаад школаез йылпумъямез бере берытскиз Венесуэлае. Собере соос Нью-Йорке улыны кошкизы. Нош куке мынам семьяе ужпум кутӥз, мыным университетын дышетскыны кулэ шуыса, мон дышетскыны мынӥ Нью-Йорке. Со умой вал, малы ке шуоно мон улыны быгатӥ Сана но Рубен дорын. Соос туж юрттӥзы мыным Иеговаен кусыпъёсме юнматыны. Озьы ик со кенешын, кудаз мон ветлӥ, трос юн осконэн вын-агайёс вал. Мыным шуд усиз тодматскыны Милтон Хеншель но Фредерик Френц агайёсын, кудъёсыз Бруклинысь Вефильын ужазы-тыршизы.

Дышетсконэлэн нырысетӥ арезлэн пумаз мон малпаськыны кутски, шонер быръён лэсьтӥ-а шуыса. «Возьмаськон башняын» трос вераськиз христианъёс сярысь, кудъёсыз ас азязы кулэ луись ужпумъёс пуктӥзы. Мон туж юн малпаськи та статьяос вылын. Со сяна, мон адӟи, кыӵе шудоесь милям кенешамы пионеръёс но Вефильын ужасьёс. Мынам но соос кадь ик луэме потӥз. Нош со дырлы мон пылатӥськемын ӧй вал на. Соку мон валай, макем кулэ аслэсьтым улонме Иеговалы сӥзьыны. Мон озьы ик лэсьтӥ: 1957-тӥ арын 30-тӥ южтолэзе пылатӥськи.

КУЛЭ ЛУИСЬ УЖПУМЪЁС

Пылатӥськем берам мон малпаськыны кутски кема малпам ужпуме сярысь — вань дырме сётыса ужан-тыршон сярысь. Мыным туж кельше вал та малпан. Нош пионер луыса ужаны-тыршыны но университетын дышетскыны туж секыт луысал. Соин ик мон ужпум кутӥ дышетсконме кельтыны, Венесуэлае берытскыны но пионер луыса ужаны-тыршыны. Та сярысь мон семьяелы верай. Ог-огмылы гожтэтъёс гожъяса, ми трос вераськимы кутэм ужпуме сярысь.

Но тани 1957-тӥ арын инвожо толэзе мон Каракасэ берытски. Мон адӟи, семьяе куанер улӥз шуыса. Соослы юрттыны кулэ вал. Ӵапак соку мыным ӵектӥзы банкын быдэс нунал ужаны. Нош мынам туж потэ вал пионер луыса ужаме-тыршеме! Со понна ик мон Венесуэлае берытски ук. Соин ик мон ужпум кутӥ банкын но ужаны, пионер луыса но ужаны-тыршыны. Со кыстӥськиз кӧня ке аръёс ӵоже. Та ужъёслы мынам вань дыры кошкиз, озьы ке но мон туж шудо вал!

Мон эшшо но шудогес луи, куке ӟеч сямо Сильвия сузэрез пумитай, кудӥз туж яратэ вал Иеговаез. Аслаз анай-атаеныз ӵош со Германиысь Венесуэлае улыны лыктӥз. Ми Сильвиен кузпалъяськимы. Милям вордӥськизы кык пиналъёсмы: Мишель пимы (озьы ик ми сое Мик шуыса нимаськомы) но Самира нылмы. Озьы ик мон анайме утялтыны кутски, соин ик со ми доры улыны лыктӥз. Семьяе сярысь сюлмаськон понна, мыным пионер луыса ужан-тыршонме кельтоно луиз. Озьы ке но мынам котьку но мылкыды вал пионер луыса ужаны-тыршыны. Куддыръя ми Сильвиен шумпотыса юрттӥсь пионеръёс луыса ужамы-тыршимы, кылсярысь, отпускмы дыръя.

ЭШШО ОДӤГ КУЛЭ ЛУИСЬ ВАМЫШ

Учыр, кудӥз сярысь мон кутсконаз верай, луиз соку, куке нылпиосмы школаын дышетско на вал. Вераны кулэ, милям коньдонмы котьмалы тырме вал. Банкын ужасьёс монэ гажазы, нош мынам потэ вал, соос мон шоры Иеговалэн ужась-тыршисез шоры кадь мед учкозы шуыса. Та сярысь мон ялан малпаськи. Соин ик ми кышноеным пуксимы но коньдонмы сярысь малпаськимы. Пунэм тыронъёсмы милям ӧй вал. Банкысь кошкыкум, мыным трос коньдон сётысалзы. Ми улонмес огшорыгес карысалмы ке, та коньдон милемлы кемалы тырмысал.

Та вамышез лэсьтыны капчи ӧй вал. Нош мынам дуно кышное но анае монэн быдэсак соглаш луизы. Мон нош ик пионер луыса ужаны-тыршыны кутски. Талы мон туж шумпотӥ! Мон малпай, мыным номыр но уз люкеты шуыса. Но малпамтэ шорысь семьяямы югдурмы воштӥськиз.

ШУМПОТОН КУЗЬЫМ!

Ми тодӥмы, Сильвия пияно шуыса. Та ми понна малпамтэ шорысь вал, но ми та иворлы туж шумпотӥмы. Но кылдӥз юан: мар кароно пионер луыса ужан-тыршонэным? Ми нылпимы вордӥськонлы дасяськыны кутскимы, нош мон ялан малпаськи: быгато-а мон кема возьмам малпанме быдэстыны?

Югдурмес ӵош эскерыса, ми семьяеным ужпум кутӥмы, мон пионер луыса ужаны-тыршыны быгато шуыса. Габриель вордӥськиз 1985-тӥ арын оштолэзе. Озьы ке но мон банкысь кошки но со аре ик инвожо толэзе нош ик пионер луыса ужаны-тыршыны кутски. Кӧня ке дыр ортчыса, монэ филиаллэн комитетаз ужаны-тыршыны ӧтизы. Нош Вефиль Каракаслэсь 80 иськемлы кыдёкынгес интыяськемын вал. Отчы мыным арняяз кык пол яке куинь пол ветлыны кулэ вал.

НОШ ИК УЛОН ИНТЫМЕС ВОШТӤСЬКОМЫ

Филиал интыяськемын вал Ла-Виктория карын. Соин ик Вефильлы матынгес улон понна, ми та каре улыны интыяськимы. Ми пӧлысь котькудӥзлы воштӥськонъёс лэсьтоно вал. Мон туж данъяськисько семьяеным но тау карисько соослы. Баха апае соглаш луиз анае сярысь сюлмаськыны. Со дырлы Мик кышнояськемын вал ини. Нош Самира но Габриель милемын уло на вал. Соин ик, Ла-Викторие мынон понна, соослы эшъёссэс кельтоно луиз. Нош мынам дуно Сильвия кышноелы дышоно луиз пичи карын огшоры улонлы. Коркамы но туж ик бадӟым ӧй вал. Озьыен, котькудмылы бадӟымесь воштӥськонъёс лэсьтоно луиз.

Собере нош ик ваньмыз воштӥськиз. Габриель кышнояськиз, Самира нимаз улыны кутскиз. Нош 2007-тӥ арын милемыз Сильвиен Вефиле ӧтизы. Отын ми али но ужаськомы-тыршиськомы. Милям бадӟымез Мик пимы — тӧро. Со пионер луыса ужа-тырше Моника кышноеныз ӵош. Габриель но тӧро. Со улэ Италиын Амбра кышноеныз. Нош Самирамы пионер луыса ужа-тырше, озьы ик, палэнын улыса, Вефильлы юрттӥське.

НОМЫР СЯРЫСЬ НО УГ ЖАЛЯСЬКЫ

Зэм, мынам улонам трос секыт югдуръёс вал. Нош мон номыр сярысь но уг жаляськы. Мон быгатысал ке выльысь улыны, мон номыре но ӧй воштысал. Мон дунъясько вань ужъёсты, кудъёссэ мон быдэсъяй Иеговалэн организацияз. Та аръёс ӵоже мон валай, макем кулэ Инмарен матысь кусыпъёс возьыны. Кыӵе гинэ ужпумъёс кутоно медаз луы — бадӟымесь яке пичиесь,— Иегова милемлы номырин ӵошатонтэм каньыллык сётыны быгатэ (Флп. 4:6, 7). Милемлы Сильвиен кельше Вефильын ужаны-тыршыны. Ортчем улонмы шоры учкыса, ми валаськомы, Иегова кутэм ужпумъёсмес быдэстыны юрттӥз шуыса, малы ке шуоно со котьку но милям улонамы нырысетӥ интыын вал.