Дась-а тӥ «музъем басьтыны»?

ДАСЬ МУЗЪЕМЕЗ УТЯЛТЫНЫ

Иеговалэн музъемез тырмытыны но сое утялтыны курон-косонэз возьматэ вал, дыр ортчыса, музъем рай луоз шуыса (Ул.-выл. 1:28). Та курон-косонэз быдэсъялозы соос, кинъёс музъемез басьтозы. Но музъем соку ик рай уз луы, малы ке шуоно Едем сад ӧвӧл ини. Нырысь соослы тыршоно луоз музъемез чылкытатыны. Уж туж трос луоз!

Та милемлы тодамы вайытэ ужез, кудзэ быдэстыны кулэ вал израиль калыклы, куке со Вавилонысь берытскиз. Соослэн музъемазы 70 ар ӵоже нокин но ӧз улы. Но Исаия вераз, Иеговалэн юрттэменыз соослэн музъемзы азьло кадь ик чебер луоз шуыса. Азьпалзэ ивортонын верамын вал: «[Иегова] луоё кыръёссэ райлы укшась интылы пӧрмытоз, кыр музъемзэ... садэзлы укшась музъем кароз» (Ис. 51:3). Израиль калык ваньзэ быдэстыны быгатӥз. Ӵапак озьы ик Иеговалэн юрттэменыз соос, кинъёс «музъем басьтозы», сое чебер райлы пӧрмытозы. Тӥ но али ик ини возьматыны быгатӥськоды, та уже пыриськыны юн мылкыдды вань шуыса.

Кылсярысь, тӥ быгатӥськоды чылкыт возьыны коркадэс но корка котырдэс, бускельёсты озьы уг лэсьто ке но. Со сяна, тӥляд луонлыкты вань Эксэйлык юртъёсты но Конгрессъёсты ортчытон юртъёсты утялтон но эскерон-тупатъян ужъёсы пыриськыны. Луэ ке, заявление гожтэ, инкуазь шимучыре сюремъёслы юрттон понна. Соку тӥ возьматоды, шуг-секытэн пумиськем агайёслы но сузэръёслы юрттыны дась шуыса. Юалэ асьтэлэсь: «Быгатӥсько-а мон дышетскыны выль ужъёсты быдэсъяны, кудъёссэ выль дуннеын но быдэсъяно луоз?»

ДАСЬ УЛӞЫТЭМЪЁС СЯРЫСЬ СЮЛМАСЬКЫНЫ

Куке Иисус Иаирлэсь нылзэ улӟытӥз, со косӥз ныллы сиён сётыны (Марк 5:42, 43). Зэм но, 12 аресъем нылпиез сюдыны секыт ӧй вал. Но малпаське, кӧня лэсьтоно луоз, куке Иисус аслэсьтыз кылсётонзэ быдэстоз но «ваньмыз шайгуосын кыллисьёс Инмар Пилэсь куаразэ кылозы» но улӟозы (Иоанн 5:28, 29). Библия пыр-поч уг вера ке но, валамон, улӟытэмъёслы сиён-юон, дӥськут но улон инты кулэ луоз шуыса. Быгатӥськоды-а тӥ али ик ини возьматыны, тӥляд соослы юрттэмды туж потэ шуыса? Тани малпаськон понна куд-ог юанъёс.

Куке тӥляд кенешады ёросэз чаклась лыктэ, ӧтиськоды-а тӥ сое ӵош сиськыны? Куке Вефильын ужась аслэсьтыз ужан-тыршонзэ йылпумъя но сое тӥляд кенешады ысто яке ёросэз чаклась аслэсьтыз ужан-тыршонзэ йылпумъя, быгатӥськоды-а тӥ юрттыны соослы улон инты шедьтыны? Нош куке тӥ палан улосысь яке нимысьтыз конгресс ортчоз, быгатӥськоды-а тӥ дасяськон ужъёсы пыриськыны яке куноосты пумитаны?

ДАСЬ УЛӞЫТЭМЪЁСТЫ ДЫШЕТЫНЫ

Апостолъёслэсь ужъёссэс 24:15 лыдӟыса, ми валаськомы, трос миллиард адямиос улӟозы шуыса. Тросэзлэн соос пӧлысь Иегова сярысь тодыны луонлыксы ӧй вал, нош выль дуннеын луозa. Соосты дышетозы Инмарлы оскымон, быгатӥсь ужась-тыршисьёс (Ис. 11:9). Шарлотта, кудӥз тодытӥз Европаын, Лымшор Америкаын но Африкаын, туж возьма, ку со та уже пыриськоз. Со шумпотыса вера: «Мынам туж потэ улӟытэмъёсты дышетэме. Куке мон вашкала дыръя улэм адямиос сярысь лыдӟисько, мон ӵем малпасько: „Та адями Иегова сярысь тодысал ке, солэн улонэз чылкак мукет сямен мынысал“. Мынам туж потэ улӟытэмъёслы вераме Инмар сярысь но со сярысь, кыӵе умой улон соосты возьма, соос Инмарлы ужазы-тыршизы ке».

Иеговалэн оскымон ужась-тыршисьёсызлы но, кудъёсыз Иисус дырозь улӥзы, трос тодон-валан басьтоно луоз. Пуктэ син азяды, кызьы тӥ Данииллы валэктоды азьпалзэ ивортонъёсты, кудъёссэ со гожтӥз, но ӧз вала. Та дано уж трос шумпотон ваёз! (Дан. 12:8). Нош потэ-а Руфьлы но Ноеминьлы валэктэмды, кызьы соослэн выжыысьтызы Мессия потӥз? Ми туж шумпотомы быдэс дунне вылын ортчытӥськись дышетон программае пыриськыны, куке та лек дунне милемлы уз люкеты ни!

Нош кызьы ми али ик ини возьматыны быгатӥськомы, та дышетон программае пыриськеммы потэ шуыса? Кылсярысь, тыршоно адямиосты эшшо но умойгес дышетыны но ялан тодытыны (Матф. 24:14). Арлыдды яке мукет шуг-секытъёсты шоры учкытэк тыршемды возьматоз, тӥляд улӟытэмъёсты дышетыны юн мылкыдды вань шуыса.

Озьыен, потэ-а тӥляд «музъем басьтэмды»? Возьмаськоды-а тӥ со дырез, куке музъемез утялтоды, улӟытэмъёс сярысь сюлмаськоды но соосты дышетоды? Тӥляд сыӵе мылкыдды вань ке, соку тырше пыриськыны ужъёсы, кудъёссэ быдэсъялоды выль дуннеын!