Анай-атайёс, юрттэ нылпидылы осконзэ юнматыны

1, 2. Мар кароно анай-атайёслы, куке нылпизы Инмар сярысь но Библия сярысь юанъёс сётъя?

ТРОСЭЗ соглаш луозы, дыр, нылпиез будэтон — со туж секыт уж шуыса. Дуно анай-атайёс, тӥ туж тыршиськоды, нылпиостылэн юн осконзы мед луоз шуыса (К. Зак. 6:6, 7). Дыр ортчыса, нылпи осконмы сярысь юанъёс сётъяны быгатэ, кылсярысь, малы Инмар куд-ог ужъёсты лэсьтыны уг лэзьы.

² Нылпиды юанъёс сётъя ке, эн малпалэ, со Инмарлы но Библилы уг оскы шуыса. Отын номыр уродэз ӧвӧл. Юанъёс сётъятэк, со осконзэ юнматыны уз быгаты (1 Кор. 13:11). Соин ик сюлмаськонэз ӧвӧл. Куке нылпиды юан сётэ, юрттэ солы малпаськыны, озьы ик Инмарлы но Библилы осконзэ юнматыны.

3. Мае ми эскеромы та статьяын?

³ Та статьяын ми эскеромы, кызьы анай-атайёс нылпизылы быгато юрттыны: 1) юн оскон будэтыны, 2) Инмарлэсь законъёссэ яратыны но 3) осконзэ утьыны. Озьы ик ми тодомы, малы умой, куке нылпиос юанъёс сётъяло, но кыӵе тунсыко амалъёс кутыны луэ, нылпиослы Библия сярысь вераськыны мозмыт медаз поты шуыса.

ЮРТТЭ НЫЛПИДЫЛЫ ЮН ОСКЫНЫ ИНМАРЛЫ НО БИБЛИЛЫ

4. Кыӵе юанъёсыз кылдыны быгато нылпилэн но малы?

⁴ Ми валаськомы, Инмарлы оскон анай-атайлэсь нылпилы уг выжы шуыса. Ми асьмеос но, нылпиосмы но Иеговалы осконэн ӧм вордӥське. Соин ик нылпилэн таӵе юанъёсыз кылдыны быгато: «Кытысь мон тодӥсько, Инмар вань шуыса? Луэ-а оскыны Библилы?» Та умой юанъёс, малы ке шуоно Библия ачиз но милесьтым мылкыдмес ӝутэ малпаськыны но ваньзэ эскерыны (Рим. 12:1; 1 Фес. 5:21). Кызьы нылпилы юрттыны луэ осконзэ юнматыны?

5. Мар карыны быгато анай-атайёс, нылпизы Библилы мед оскоз шуыса? (Римъёслы 12:2).

⁵ Дышетэ нылпидэс эскерон ортчытъяны. (Лыдӟе Римъёслы 12:2.) Нылпиды юанъёс сётъя ке, солы возьматэ, кызь валэктонъёс шедьтыны луэ, эскерон ортчытон понна тӥрлыкъёсмес кутыса. Кылсярысь, милям вань «Возьмаськон башнялэн публикациосызлэн индекссы» (ӟуч) но «Иеговалэн Адӟись-Ивортӥсьёсызлэн публикациоссыя эскерыны юрттэт» (ӟуч). Нылпиды «Публикациосъя эскерыны юрттэтысь» мед усьтоз «Библия» темаез, «Вдохновлена Богом» подзаголовокез. Отысь со шедьтоз трос малпанъёсты, кудъёсыз возьмато, Библия — адямиосын гожтэм умой книга гинэ ӧвӧл, нош со «Инмар кыл» шуыса (1 Фес. 2:13). Одӥгез сыӵе малпан — Библиын вераське Ассирияысь Ниневия кар сярысь. Азьвыл куд-ог тодосчиос верало вал, та кар ноку ӧй вал шуыса. Но 1850-тӥ аръёсы шедьтэмын вал Ниневиялэн куашкам бервылъёсыз. Со возьматӥз, Библия уг пӧяськы шуыса (Соф. 2:13—15). Ниневияен герӟаськемын куд-ог азьпалзэ ивортонъёс. Соос сярысь нылпиды тодыны быгатэ, 2021-тӥ арын шуркынмон понна поттэм «Возьмаськон башняысь», «Тодӥськоды-а тӥ?» рубрикаысь, статьяез лыдӟыса. Куке нылпиды ӵошатоз, мар гожтэмын публикациосамы но энциклопедиосын, со валалоз, Библилы оскыны луэ шуыса.

6. Кыӵе тунсыко амалъёсты кутыны быгато анай-атайёс, нылпизылэсь Библилы осконзэ юнматон понна? Вералэ пример. (Озьы ик учке суредэз.)

⁶ Уже кутэ тунсыко амалъёсты, нылпидылэсь Библилы осконзэ юнматон понна. Анай-атайёс, тырше нылпиеныды Библия сярысь но Инмар сярысь вераськыны. Кылсярысь, вераськыны луэ, музее, ботанической садэ яке Иеговалэн Адӟись-Ивортӥсьёсызлэн филиалъёсысьтызы выставкаосы ветлыса. Музейтӥ ветлыса яке музейлэн сайтаз пырыса, нылпилэсь саклыксэ висъялэ кыӵе ке арберилы яке учырлы но солы валэктэ, кызьы со Библиен герӟаськемын. Соку нылпи адӟоз, солы, мар гожтэмын Библиын, оскыны луэ шуыса. Тодэ-а нылпиды Моав из сярысь? Та из вылын, кудӥзлы 3 000 ар ини, Инмарлэн нимыз гожтэмын. Сое возё Парижысь Лувр музейын. Нош копизэ адӟыны луэ Уорвикысь (Огазеяськем Штатъёс) Иеговалэн Адӟись-Ивортӥсьёсызлэн валтӥсь кивалтонниязы, «Библия но Инмарлэн нимыз» выставкаын. Со из вылын вераське, Меса, Моавлэн эксэез, Израильлы пумит ӝутскиз шуыса. Та сярысь ик вераське Библиын но (4 Экс. 3:4, 5). Куке нылпиды ас синмыныз адӟоз, Библиын гожтэм учыръёс зэм но вал шуыса, солэн осконэз юнмалоз. (Ӵошатэ 2 Паралипоменонэз 9:6.)

7, 8. а) Малы дышетскыны луэ, инкуазьысь чебересь пужыос шоры учкыса? Вералэ пример. (Озьы ик учке суредъёсты.) б) Кыӵе юанъёс нылпидылы юрттыны быгато Кылдытӥсьлы осконзэ юнматыны?

⁷ Нылпиеныды малпаське Иеговалэн паймымон кылдытэмъёсыз сярысь. Парктӥ ветлыкуды яке бакчаын ужакуды, нылпидылэсь саклыксэ висъялэ инкуазьысь чебересь пужыослы. Юрттэ солы валаны, пужыос асьсэос ӧз кылдэ, соосты кин ке но кылдытӥз шуыса. Кылсярысь, нылпилэсь саклыксэ висъялэ улиткалэн коркаезлы, шундыберганлы, будосъёслэн куаръёссылы но галактикаослы. Соос шоры учкыса, тӥ валалоды, соослэн одӥг кадь пужызы вань шуыса. Тодосчиос трос аръёс ини сыӵе пужыосты эскероa.

⁸ Школаын дышетскыкуз, нылпиды тодоз, инкуазьын мукет но пужыос пумиськыло шуыса. Кылсярысь, лымы пырыос шоры учкыса, адӟыны луэ пужыез, кудӥз фрактал нимаське. Сыӵе пужыез мукет кылдытэмъёсысь но адӟыны луэ. Кин сое кылдытӥз? Таӵе мур юан вылын малпаськыса, нылпиды валалоз, вылды, ваньзэ Инмар кылдытӥз шуыса (Евр. 3:4). Бадӟымгес будэмез бере тӥ нылпидылэсь юаны быгатӥськоды: «Ваньзэ Инмар кылдытӥз бере, шудо луон понна, ми солэсь кылзӥськыны кулэ-а?» Собере тӥ солы валэктыны быгатӥськоды, талы милемыз Инмар Библия пыр дышетэ шуыса.

NASA, ESA, and the Hubble Heritage (STScl/AURA)-ESA/Hubble Collaboration

ЮРТТЭ НЫЛПИДЫЛЫ ИНМАРЛЭСЬ ЗАКОНЪЁССЭ ЯРАТЫНЫ

9. Кыӵе мугъёсын нылпи юаны быгатэ, малы Библия куд-ог ужъёсты лэсьтыны уг лэзьы?

⁹ Куддыръя нылпиды юаны быгатэ, малы Библия куд-ог ужъёсты лэсьтыны уг лэзьы. Тырше валаны, малы со сыӵе юан сётэ. Со уг оскы солы, малы дышетэ Библия? Яке со уг тоды, кызьы мукетъёсызлы валэктыны сое, малы со оске? Кызьы гинэ медам луы, нылпиды сыӵе юан сётэ ке, умой луоз соин ӵош эскерыны «Пумтэм вапумъёс ӵоже шумпотыса улэ!» книгаезb.

10. Мар карыны луэ, нылпилы Иеговаен эшъяськыны юрттон понна?

¹⁰ Юрттэ нылпидылы Иеговаен эшъяськыны. Нылпиеныды Библиез дышетыкуды, тырше соин вераськыны но валаны солэсь зэмос шӧдонъёссэ но малпанъёссэ. Тӥледлы юрттозы «Пумтэм вапумъёс ӵоже шумпотыса улэ!» книгаысь юанъёс но примеръёс (Мад. 20:5). Кылсярысь, 8-тӥ урокын Иегова ӵошатӥське умой эшен, кудӥз дырыз дыръя юрттыны дась. 1 Иоаннлэсь 5:3 эскерыкуды, тӥ юаны быгатӥськоды: «Иегова — самой умой эшмы бере, кызьы милемлы учконо солэн визь-кенешъёсыз шоры?» Та огшоры юан нылпидылы валаны юрттоз, Иегова милемыз яратэ шуыса, соин ик милемлы законъёс сётэ (Ис. 48:17, 18).

11. Мар кароно, нылпидылэн Библиысь возетъёсъя улэмез мед потоз шуыса? (Мадёнъёс 2:10, 11).

¹¹ Малпаське, кызьы Библиысь возетъёс улонэз умой пала вошто. Библиез яке нуналлы кылбурез ӵош лыдӟыкуды, тодады вае, кызьы юрттӥзы ини Библиысь возетъёс тӥляд семьядылы. Кылсярысь, малпаське, малы умой луоз котьку пӧяськытэк улыны но ужась луыны (Евр. 13:18). Озьы ик нылпидылэсь саклыксэ висъялэ, Библиысь возетъёсъя улыса, ми шудогес луиськомы но тазалыкмес юнматӥськомы шуыса (Мад. 14:29, 30). Куке нылпиды адӟоз, Библиысь возетъёс улонэз умой пала вошто шуыса, солэн соосъя улэмез потоз. (Лыдӟе Мадёнъёсты 2:10, 11.)

12. Кызьы Стив агай кышноеныз ӵош пизылы валаны юртто, кыӵе пайда ваё Библиысь возетъёс?

¹² Стив агай кышноеныз ӵош Франциын улэ. Тани кызьы соос юртто 16-аресъем И́тан пизылы валаны, Иегова, милемыз яратыса, законъёс сётэ шуыса. «Кылсярысь, ми солэсь юаськомы: „Малы Иегова милемлы таӵе закон сётӥз? Кызьы со возьматэ, Иегова тонэ яратэ шуыса? Мар луоз, тон солэсь ӧд кылзӥськы ке?“» Таӵе вераськонъёс Итанлы валаны юрттӥзы, Иеговалы котьку оскыны луэ шуыса, малы ке шуоно со уродэзлы уз дышеты. Стив ватса: «Милям потэ, Итан мед валалоз, Инмарлэн визь-кенешъёсыз, адямиослэн визь-кенешъёссы сярысь, трослы визьмогес шуыса».

13. Кызьы анай-атайёс нылпиоссэс дышетыны быгато Библиысь возетъёсъя улыны? Вералэ пример.

¹³ Дышетэ нылпидэс Библиысь возетъёсъя улыны. Шуом, школаын нылпидэс косӥзы лыдӟыны книгаез, кудаз вераське лекесь, азыса-калгыса улӥсь адямиос сярысь. Нош книгалэн авторез соосты умой адямиосын лыдъя. Нылпиды мед малпаськоз, мар шӧдэ Иегова, куке адямиос асьсэды возё со книгаысь адямиос сямен (Мад. 22:24, 25; 1 Кор. 15:33; Флп. 4:8). Соку, дышетӥсез яке ӵош дышетскисьёсыз юазы ке, мар нылпиды малпа со книга сярысь, со валэктыны быгатоз, малы со оске но малы со ужпум кутӥз Иеговалэсь кылзӥськыса улыны.

ДЫШЕТЭ НЫЛПИДЭС ОСКОНЗЭ УТЬЫНЫ

14. Кыӵе учыръёс егитъёсты кышкатыны быгато но малы?

¹⁴ Куддыръя егит агайёслы но сузэръёслы осконзы сярысь мукетъёсызлы вераны кышкыт. Кылсярысь, куке классын эволюция сярысь дышето, соослы ваньмыз азьын секыт луэ вераны, малы соос солы уг оско. Малы? Тросэз дышетӥсьёс верало, эволюцилы быдэсак оскыны луэ шуыса. Анай-атайёс, кызьы тӥ нылпидылэсь осконзэ юнматыны быгатӥськоды, Библия шонерезлы гинэ дышетэ шуыса?

15. Мар юрттоз егитъёслы валаны, со, малы соос оско, зэмлык шуыса?

¹⁵ Юрттэ нылпидылы валаны, со, малы со оске, зэмлык шуыса. Нылпидылы возьдаськоно ӧвӧл, со улонлэн кылдэмез сярысь зэмлыкез тодэ шуыса (2 Тим. 1:8). Тодосчиос пӧлын но трос сыӵеосыз, кудъёсыз уг оско, улон ас понназ кылдӥз шуыса. Соос валало, вань улэп макеосты кин ке но кылдытыны кулэ вал шуыса. Соин ик соос эволюцилы уг оско. Мар юрттоз нылпидылы осконзэ юнматыны но кышкасьтэм луыны? Кылсярысь, мед со тодоз, мар оскытэ мукет агайёсты но сузэръёсты, Кылдытӥсь зэм но вань шуысаc.

16. Кызьы анай-атайёс нылпизэс дышетыны быгато мукетъёсызлы валэктыны, малы со Кылдытӥсьлы оске? (1 Пётр 3:15). (Озьы ик учке суредэз.)

¹⁶ Дышетэ нылпидэс мукетъёсызлы валэктыны, малы со Кылдытӥсьлы оске. (Лыдӟе 1 Пётрлэсь 3:15.) Эскере соин ӵош jw.org сайтысь «Вопросы молодёжи. Сотворение или эволюция?» серияысь статьяосты. Собере нылпиды мед быръёз сыӵе малпанэз, кудӥз солы тужгес но оскымон потэ, но, сое кутыса, тӥледлы мед валэктоз, малы со Кылдытӥсьлы оске. Та солы юрттоз ӵош дышетскисьёсыныз вераськыны. Нылпидылы тодаз вайытэ, нокинэн споръяськоно ӧвӧл шуыса. Нош кинлэн ке Инмар сярысь тросгес тодэмез потӥз ке, ваньзэ огшоры но валамон валэктоно. Шуом, нылпидылэн ӵош дышетскисез вера: «Мон оскисько солы гинэ, мае адӟисько. Нош Инмарез мон ноку ӧй адӟы». Соку солы тазьы вераны луэ: «Шуом, тон бадӟым нюлэстӥ мынӥськод. Нюлэс шорысь колодчаез адӟиськод. Малпалод-а тон, колодча ас понназ кылдӥз шуыса? Котыраз адямиос ӧвӧл ке но, валамон, сое кин ке но пуктӥз шуыса. Сое ик вераны луэ музъеммы сярысь но. Сое кин ке но кылдытыны кулэ вал».

17. Кызьы анай-атайёс нылпизэс дышетыны быгато мукетъёсыныз Библия сярысь вераськыны? Вералэ пример.

¹⁷ Дышетэ нылпидэс мукетъёсыныз Библия сярысь вераськыны (Рим. 10:10). Мукетъёсыныз Библия сярысь вераськон — со крезьгуро инструментэн шудыны дышетскон кадь. Ми кутскиськомы огшоры крезьгуръёсты шудыны, нош дышетскеммыя секытгес крезьгуръёс борды басьтӥськиськомы. Ӵапак озьы ик, куке егит агай яке сузэр мукетъёсыныз Библия сярысь вераськыны дышетске, со огшоры амалысен кутскыны быгатэ. Кылсярысь, ӵош дышетскисьлы таӵе юан сётыны луэ: «Тон тодӥськод вал-а, инженеръёс, мае ке кылдытыкузы, инкуазьлэсь адӟем каро шуыса? Учкемед потэ ке, мынам тыныд со сярысь видеоролик возьматэме луэ». «Кызьы со кылдӥз?» рубрикаысь видеороликез возьматэм бере юаны луэ: «Ӵем дыръя адямиос данъяло тодосчиосты кылдытэмъёссы понна, кудъёссэ соос, инкуазьлэсь адӟем карыса, лэсьтӥзы. Соку кинэ данъяно инкуазез кылдытэм понна?» Оло нош, собере ӵош дышетскисьлэн Иегова сярысь тросгес тодэмез потоз.

АЗЬЛАНЯЗ НО ЮРТТЭ НЫЛПИДЫЛЫ ОСКОНЗЭ ЮНМАТЫНЫ

18. Кызьы анай-атайёс нылпизылы юрттыны быгато Инмарлы осконзэ юнматыны?

¹⁸ Та дуннеысь тросэз адямиос Иеговалы уг оско (2 Пётр 3:3). Соин ик, дуно анай-атайёс, нылпиеныды Библиез дышетыкуды, солэсь мылкыдзэ ӝутэ эскерыны сыӵе юанъёсты, кудъёсыз солы юрттозы эшшо но зол яратыны Инмарез но солэсь курон-косонъёссэ. Солэсь саклыксэ висъялэ Иеговалэн паймымон кылдытэмъёсызлы. Юрттэ солы тодматскыны Библиысь азьпалзэ ивортонъёсын, кудъёсыз быдэсмизы ини. Нош самой валтӥсез — соин ӵош но со понна вӧсяське. Анай-атайёс, юн оске: Иегова дунъя ваньзэ, мае тӥ лэсьтӥськоды, нылпидылы осконзэ юнматыны юрттон понна. Со тӥледыз одно ик бакель кароз! (2 Пар. 15:7).