Рут билән Наоми

РУТ китави, у Муқәддәс Китап өз ичигә алған китапчиларниң биридур. Униңда исраилларға һакимлар йетәкчилик қилған заманларда яшап өткән бир аилә тоғрисидики һекайә хатириләнгән. Рут исимлик яш аял моаблиқ болуп, Худаниң хәлқи исраиллардин әмәс еди. Лекин, Рут һәқ Худа Йәһвани тонуғандин кейин, уни чин дилидин сөйүп ибадәт қилишқа башлиди. Рутниң Йәһвани тонушиға, яшта чоңийип қалған Наоми исимлик аял ярдәм бәргән еди.

Исраилларниң зиминида йемәклик тепиш тәс бир күнләр кәлди. Шуңа, Наоми өз хәлқи исраиллар яшиған жуттин айрилип, ери вә икки оғли билән моаблиқларниң жутиға көчүп барған еди. Бир күни Наоминиң ери өлүп кәтти. Кейин, Наоминиң икки оғли, Рут вә Орпа исимлик моаблиқ қизлар билән той қилди. Амма, 10 жилчә вақит өткәндин кейин, Наоминиң икки оғлиму өлүп кәтти. Наоми вә у икки қизлар қанчилик қайғу-һәсрәт чәккәнду, һә! Әнди Наоми қандақму қилар?

Бир күни, Наоми өз хәлқи исраилларниң жутиға қайтиш үчүн узун сәпәргә атланди. Рут вә Орпа Наоми билән биллә яшашни яхши көрәтти. Шуңа, уларму униң билән биргә маңди. Бирақ, улар бир аз йол жүргәндин кейин, Наоми қизларға қарап: “Өйүңларға қайтип, анаңлар билән биллә туруңлар”, деди.

Наоми қизларни сөйүп хошлашти. Улар жиғлашқа башлиди. Чүнки, улар Наомини бәкму яхши көрәтти. Улар: “Яқ! Биз хәлқиңизниң қешиға сиз билән биргә баримиз”, деди. Амма, Наоми җавап берип: “Қизлирим, силәр чоқум қайтишиңлар керәк. Өз өйүңларда болсаңлар, силәргә яхширақ!”, деди. Шуниң билән, Орпа өйигә қарап кетип қалди. Амма, Рут қайтмиди.

Наоми униңға қарап: “Орпа кәтти. Сәнму униң билән биргә өйгә қайт”, деди. Амма, Рут җавап берип: “Мени сени ташлап кетишкә зорлимиғин! Мән сән билән барай. Сән қәйәргә барсаң, мәнму шу йәргә баримән, сән нәдә турсаң, мәнму шу йәрдә туримән. Сениң хәлқиң, мениң хәлқим, сениң Худайиң, мениңму Худайим. Нәдә өлсәң, мән шу йәрдә өлимән, қәбриң нәдә болса, мениңму шу җайда болиду”, деди. Рут бу сөзләрни қилғандин кейин, Наоми уни өйигә қайтип кетишкә йәнә зорлимиди.

Ахири, бу икки аял исраиллар жутиға қайтип келип, бу йәрдә яшаш үчүн маканлашти. Рут дәрһал етизлиқларда ишләшкә киришип кәтти. Чүнки, бу арпа жиғидиған ома вақти еди. Боаз исимлик бир киши өз етизлиғида униң арпа жиғишиға рухсәт қилди. Ким Боазниң аписи, биләмсиз? У һелиқи Ериха шәһиридики Раһаб.

Бир күни, Боаз Рутқа: “Мән сән тоғрисидики барлиқ ишларни аңлидим, сән Наомиға шунчилик көйүнүп кәпсән. Мән сениң ата-анаңдин, өз жутуңдин айрилип, саңа пүтүнләй натонуш хәлиқниң арисида яшаш үчүн кәлгәнлигиңни билимән. Йәһва саңа яхшилиқ қилғай!”, деди.

Рут җавап берип: “Ғоҗам, маңа көп меһриванлиқ көрсәттиңиз. Сөзлириңиз маңа тәсәлла берип, көңлүм көтирилип қалди”, деди. Боаз Рутни бәкму яхши көрәтти. Узун өтмәй, улар той қилди. Наоми бәк хошал болғанду, һә! Амма, Рут билән Боаз, Обид исимлиқ тунҗа оғулға егә болғанда, Наоми техиму бәк хошал болуп кәтти. Кейин, Обид Давутниң бовиси болди. Кейинирәк биз Давут тоғрисида үгинимиз.