Мән даналар билән жүрүшниң зор пайдисини көрдүм

ҖӘНУБИЙ ДАКОТИДИКИ (АҚШ) Брукингс шәһириниң бир әтигәндә болған қара соғ техиғичә есимда. Мән пат арида қәһритан соғ күнләрниң башлинидиғанлиғини сәздим. Биз бирнәччә адәм болуп, соғ қорада, соғ суға толған чоң бир туңниң йенида титрәп турдуқ. Буниң сәвәвини чүшәндүрүш үчүн, авал өз һаятим тоғрилиқ қисқичә ейтип берәй.

АИЛӘМ

Мән 1936-жилниң 7-март күни туғулдум. Төрт балиниң кәнҗиси болдум. Биз Җәнубий Дакотиниң шәрқидики бир фермида яшидуқ. Аилимиз деханчилиқ билән шуғуллансиму, бу һаятимизниң әң муһим қисми әмәс еди. Ата-анам 1934-жили чөмдүрүлүш мәрасимидин өтүп, Йәһва гувачилири болди. Улар һаятини Йәһваға беғишлап, Худаниң ирадисини орунлашни биринчи орунға қойди. Дадам Кларинс вә кейинирәк униң Альфред исимлиқ акиси Конди шәһириниң (Җәнубий Дакота штати) кичик җамаитимиздә һәмкарлиқ хизмәтчи (һазир ақсақаллар кеңишиниң рәиси), сүпитидә хизмәт қилди.

Аилимиз үчүн җамаәт учришишлириға қатнишиш билән Муқәддәс китаптики әҗайип үмүт һәққидә өйму өй вәз қилиш адәткә айланған еди. Ата-анимизниң яхши үлгиси вә бәргән тәрбийиси Йәһва Худани яхши көрүшкә ярдәм бәрди. Һәдәм Дороти иккимиз 6 яшта җакалиғучи болдуқ. 1943-жили мән йеңидин пәйда болған Вәзичиләр мәктивигә йезилдим.

Чоң жиғилишлар һаятимизниң муһим бир қисми болған еди. 1949-жили Су-Фолс шәһиридә (Җәнубий Дакота штати) өткән вилайәтлик чоң жиғилишта Грант Сьютер бурадәрниң «Бу дунияниң ахири сиз ойлиғандинму йеқин!» намлиқ асасий нутуғи һазирғичә есимда. У Худаға беғишланған мәсиһийләрниң һәммиси һаятини Падишалиқ һәққидики хуш хәвәрни җакалашқа беғишлиши керәклигини тәкитлиди. Бу мени һаятимни Йәһваға беғишлашқа дәвәт қилди. Мән 1949-жилниң 12-ноябрь күни Брукингстики келәрки наһийилик чоң жиғилишта чөмдүрүлүш мәрасимидин өттүм. Әң бешида ейтқинимдәк, шу бир соғ қорада турушимниң сәвәвиму шу еди. Төртимиз полаттин ясалған чоң туңда чөмдүрүлүш мәрасимидин өтүшни күтүп турдуқ.

Андин кейин мән толуқ вақитлиқ хизмәтни башлашқа қарар қилдим. Бу хизмәтни 1952-жилниң 1-январь күни 15 йешимда башлидим. Муқәддәс китапта: «Даналар билән биллә жүргән дана болар»,— дәп йезилған. Мениң аиләмдә толуқ вақитлиқ хизмәт қилиш қараримни қоллиған даналар көп болди (Пәнд-нәсиһәтләр 13:20). Дадамниң 60 яштики акиси Джулиус билән пат-пат вәзгә чиқаттим. У мениңдин аллиқанчә чоң болсиму, иккимиз хизмәткә биллә чиқишни яхши көрәттуқ. Мән униң бай һаят тәҗрибисидин көп нәрсигә үгәндим. Көп вақит өтмәй һәдәм Доротиму толуқ вақитлиқ хизмәтни башлиди.

НАҺИЙИЛИК НАЗАРӘТЧИЛӘРНИҢ ЯРДИМИ

Кичик вақтимда ата-анам өйүмизгә наһийилик назарәтчиләр билән аяллирини пат-пат тәклип қилатти. Мән үчүн Джесси вә Лин Кантвелларниң ярдими зор болди. Улар маңа ғәмхорлуқ қилип, дайим илһамландуратти вә йеқин әтраптики җамаәтләргә кәлгәндә, мени хизмәткә чақирип туратти. Бу һәқиқәтән хошаллиғим қин-қинимға патмайдиған бир вақит еди! Мән улардәк Йәһваниң хизмитидә алдираш болуп, пешқәдәм болушни халидим.

Кейинки наһийилик назарәтчимиз Бад Миллер болди. Аяли Джоан билән бизниң җамаәткә кәлгәндә, мән 18 яшта едим. Шу вақитта мән әскәргә чақириш комиссиясиниң алдиға беришим керәк еди. Улар маңа бир ишни тәғдим қилди, лекин мән уни Әйса бәргән сәясий бетәрәпликни сақлаш буйруққа қарши дәп һесаплидим. Мән Падишалиқ һәққидики хуш хәвәрни җакалашни халидим (Йоһан 15:19). Шуниң үчүн, мени диний хизмәтчи сүпитидә қараштурушқа мураҗиәт қилдим.

Миллер бурадәр мениң билән биллә комиссияниң алдиға баридиғанлиғини ейтқанда, бәк хошал болуп кәттим. У һечкимдин қорқмайдиған батур киши еди. Униңдин ташқири, Язмиларни наһайити яхши билгән. Йенимда шундақ адәмниң болғини маңа җасарәтлик болушқа ярдәм бәрди. Комиссия билән учрашқандин кейин, 1954-жили язниң ахирида мени диний хизмәтчи дәп етирап қилди. Бу Йәһваға көпирәк хизмәт қилишимға йол ачти.

Бираз вақиттин кейин мән Нью-Йорк шәһиридики Статен-Айлендтики Күзитиш мунари фермиси дәп аталған Бәйтәлдә хизмәт қилишқа тәклип қилиндим. У йәрдә тәхминән үч жил хизмәт қилдим. Бу жиллар давамида мән көплигән дана қериндашлар билән тонушуп, улар билән ишлигәнликтин, мениң билән көп әҗайип вақиә йүз бәрди.

БӘЙТӘЛДИКИ ХИЗМИТИМ

Статен-Айлендтики фермида WBBR радиостанцияси орунлашқан еди. Йәһва гувачилири бу станцияни 1924—1957 жиллири қолланған. Бәйтәл аилисиниң пәқәт 15—20 әзаси фермада ишләшкә тайинланған. Көплиримиз яш болуп, тәҗрибимизму аз болған. Амма биз билән Элдон Вудворт дегән йеши чоң майланған бурадәр хизмәт қилған. У биз үчүн худди дадимиздәк болуп, биз униңдин көп нәрсигә үгәндуқ. Бир-биримиз билән талишип қалғинимизда, Элдон бурадәр мундақ дәтти: «Қоллиниватқан адәмләрниң намукәммәллигигә қаримастин, Йәһваниң қандақ әҗайип ишларни қилидиғанлиғи бир мөҗүзә!»

Фредерик Френц бурадәрму биз билән болди вә һәммимизгә ярдәм бәрди. У Язмиларни бәш бармиғидәк яхши билгән дана адәм еди. У һәрбиримизгә шәхсий диққәт бөлгән. Харри Питерсон дегән бурадәр ашпәз болуп хизмәт қилған. Бизгә униң Папариропулос дегән һәқиқий фамилиясини ейтиштин уни Питерсон дәп аташ асанирақ болған. Уму майланғанларниң бири болуп, хизмәтни қизғин орунлатти. Питерсон бурадәр Бәйтәлдики хизмитини тазиму яхши көрсиму, вәз қилишни һечқачан етибарсиз қалдурмиди. Һәр айда у йүзлигән журнални тарқатти. Шуниң билән, у Муқәддәс китапниму пухта билип, көплигән соаллиримизға җавап бәргән.

ДАНИШМӘН АЯЛ ҚЕРИНДАШЛАРДИН ҮГИНИШИМ

Фермида биз көктатлар билән мевиләрни жиғип, уларни банкиларға қачилаттуқ. Һәр жили Бәйтәл аилиси үчүн тәхминән 45000 банкини япаттуқ. Мән Этта Хут дегән бәк дана қериндаш билән хизмәт қилдим. У мевә вә көктатларни йепишқа арналған рецептларни ойлап тапқан. Бизгә ярдәм бериш үчүн йәрлик аял қериндашлар келидиған болди вә Этта уларниң ишини орунлаштурушқа ярдәмләшкән. Этта қериндаш бәк уста болсиму, фермидики назарәтчи бурадәрләргә һәрдайим һөрмәт көрсәткән. У һәммимиз үчүн үлгә болған.

Энджела Романо исимлиқ қериндаш ярдәм беридиғанларниң бири еди. У һәқиқәтни тонуғанда, Этта униңға ярдәм бәргән екән. Энджи иккимиз 1958-жилниң апрель ейида той қилип, 58 жил давамида Йәһваға биллә хизмәт қилиштин һузурлиниватимиз. Жиллар давамида Энджиниң Йәһваға болған садақәтмәнлиги бизниң некамизни мустәһкәмләп кәлди. У дана болғанлиқтин, қандақ қийинчилиққа дучар болмайли, мән униңға пүтүнләй тайиналаймән.

МИССИОНЕРЛИҚ ХИЗМӘТ ВӘ СӘЙЯР НАЗАРӘТЧИ ВӘЗИПИСИ

1957-жили Статен-Айлендтики WBBR радиостанцияси сетилғанда, мән Бруклиндики Бәйтәлдә қисқа вақит хизмәт қилдим. Андин кейин Энджиға өйлинип, Бәйтәлдин кәттим. Үч жил җәриянида биз Статен-Айлендта пешқәдәм сүпитидә хизмәт қилдуқ. Мән һәтта бираз вақит бойи WPOW дәп аталған радиостанциясиниң йеңи ғоҗайинлириға ишлидим.

Аялим иккимиз еһтияҗ көпирәк болған һәрқандақ җайда хизмәт қилалишимиз үчүн, аддий һаят кәчүрүшкә тириштуқ. Нәтиҗидә, биз 1961-жилниң бешида Небраска штатиниң Фолс Ситида мәхсус пешқәдәм сүпитидә хизмәт қилишқа тәклип қилиндуқ. Бирақ биз у йәргә йетипла, бизгә Саут-Лансингта (Нью-Йорк) өтидиған бир айлиқ Падишалиқ хизмәт мәктивигә тәклипнамә кәлди. Мәктәп бизгә бәк яқти вә биз оқуштин кейин Небраскаға қайтимиз дәп ойлидуқ. Шуңа йеңи тайинлинишимизни алғанда, бәк һәйран қалдуқ. Биз миссионер сүпитидә Камбоджиға тайинландуқ. Шәрқий җәнуп Азияниң бу гөзәл дөлитидә биз өзүмиз үчүн йеңи нәрсиләрни көрдуқ, аңлидуқ вә һәтта тетип бақтуқ. Биз шу җайда Падишалиқ һәққидики хуш хәвәрни җакалашқа тәшна болдуқ.

Лекин Камбоджидики сәясий әһвал өзгирип, бизгә Җәнубий Вьетнамға беришқа тоғра кәлди. Әпсуски, икки жилдин кейин саламәтлигим начарлишип, биз Қошма Штатларға қайтишқа мәҗбур болдуқ. Сақийиш үчүн бираз вақит керәк болди вә кейинирәк мән қайтидин толуқ вақитлиқ хизмәтни башлидим.

1965-жилниң март ейида биз сәйяр хизмәтни башлидуқ. Энджи вә мән 33 жил давамида наһийилик вә вилайәтлик хизмәтни атқуруш билән чоң жиғилишларда ярдәм бериштин һузурландуқ. Мән бу хизмәтни бәк яқтурдум, сәвәви чоң жиғилишлар мән үчүн дайим алаһидә болған. Бираз жил бойи биз Нью-Йорк вә униң өп-чөрисидики җамаәтләргә йолуқтуқ вә чоң жиғилишларниң көпи Янки стадионида (мәйданида) өткүзүлгән.

БӘЙТӘЛГӘ ВӘ ТЕОКРАТИЯЛИК МӘКТӘПЛӘРГӘ ҚАЙТИШ

Энджи иккимиз жиллар бойи толуқ вақитлиқ хизмәттә һәр түрлүк йеңи вә асан әмәс тапшуруқларни алдуқ. Мәсилән, 1995-жили мән Хизмәт маһаритини ашуруш мәктивиниң муәллими болушқа тәклип қилиндим. Үч жилдин кейин бизни Бәйтәлгә чақирди. 40 жилдин кейин мәхсус толуқ вақитлиқ хизмитимни башлиған йәргә қайтишқа шундақ хошал болдум! Авал мән бираз вақит Хизмәт бөлүмидә ишләп, көп теократиялик мәктәпләрдә муәллим болдум. 2007-жили Рәһбәрлик кеңәш Бәйтәлдики һәммә мәктәпләрниң өткүзүлүшигә ғәмхорлуқ қилидиған Теократиялик мәктәпләр бөлүмини уюштурди. Бирнәччә жил давамида мән мошу бөлүмниң назарәтчиси болуш имтиязиға егә болдум.

Ахирқи жиллири тәлим бериш саһасида көп өзгиришләр йүз бәрди. 2008-жили Җамаәт ақсақаллириға арналған мәктәп пәйда болди. Дәсләпки икки жилда Паттерсон вә Бруклиндики Бәйтәлдә бу мәктәптә 12000 ақсақал тәлим алди. Һазир бу мәктәп башқиму көп җайларда өткүзүлиду. Хизмәт маһаритини ашуруш мәктиви болса, 2010-жили Бойдақ бурадәрләргә арналған Муқәддәс китап мәктиви дәп атилидиған болди, шуниң билән Мәсиһий әр-аялларға арналған Муқәддәс китап мәктиви дегән йеңи мәктәп пәйда болди.

2014-жилниң сентябрь ейида жуқуридики икки мәктәп бирләштүрүлүп, Падишалиқ вәзчилиригә арналған мәктәп уюштурулди. Бу мәктәптә әр-аялларму, бойдақ әр вә аял қериндашларму оқалайду. Әнди шу мәктәпниң өз дөлитидә өткүзүлидиғанлиғини аңлиған қериндашларниң жүрәклири хошаллиққа толған. Һазир теократиялик мәктәпләрдә оқуш үчүн кәң йол ечилғанлиғини көрүш шунчилик әҗайип! Мундақ тәлим елиш үчүн һаятида көп өзгиришләрни қилған көплигән қериндашлар билән тонушқинимға бәк хурсәнмән.

Шу бир соғ қорада чөмдүрүлүштин өткән вақиттин тартип һазирқи һаятим һәққидә ойлансам, һәқиқәт йолида маңа ярдәм бәргән көп дана кишиләр үчүн Йәһваға миннәтдармән. Улар маңа Йәһвани яхширақ тонуп, униңға техиму убдан хизмәт қилишқа ярдәм бәрди. Бәзилири мениңдин кичик, башқилири чоң болған. Шундақла көплириниң мәдәнийити мениңкидин пәриқләнгән. Амма уларниң иш-һәрикәтлири вә көзқаришидин Йәһваға болған чоңқур меһир-муһәббити ениқ көрүнгән. Тәшкилатта үлгә көрситидиған дана достларниң болуши үчүн Йәһва Худаға миң бир тәшәккүр!