«Һаятимиз вә хизмитимиз. Иш дәптири» үчүн мәлумат мәнбәлири
1—7 март
ХУДА СӨЗИДИКИ ҒӘЗНӘ | САНЛАР 7, 8
«Исраил лагеридин немини үгинимиз?»
it «Җамаәт»
Җамаәт
Исраилда җавапкарлиқни өз бойниға алған әр кишиләр хәлиқниң вәкиллири болған (Әзр 10:14). Мәсилән, Муқәддәс чедир ясалғандин кейин, «башчилар һәдийәлирини қурбангаһниң алдиға әкәлди» (Сн 7:1—11). Нәһәмияниң күнлиридә әмәлдарлар, лавийлар вә роһанийлар өз мөһүрлирини бесип, вәдә бәргән (Нәһ 9:38—10:27). Исраил хәлқи чөл-баяванда болғанда, «жиғинларға чақирилидиған җәмийәтниң башлиқлири, мәшһур адәмләр» болған. Уларниң арисидики 250 әр киши Қораһ, Датан вә Абирамға қошулуп, Муса билән Һарунға қарши чиққан (Сн 16:1—3). Худаниң көрсәтмисигә қулақ селип, Муса 70 ақсақални тәйинлигән. Улар Мусаға ярдәм берип, «хәлиқниң еғирчилиғини тартқан» (Сн 11:16, 17, 24, 25). Лавийлар 4:15тә «җәмийәт ақсақаллири» тилға елинған. Буниңдин көргинимиздәк, ақсақаллар, сотчилар вә башлиқлар хәлиқниң вәкиллири болған (Сн 1:4, 16; Йшу 23:2; 24:1).
it «Рубен»
Рубен
Исраил қараргаһида Рубен қәбилиси Муқәддәс чедирниң җәнубий тәрипидә турған. Уларниң икки тәрипидә Шимон билән Гад қәбилиси турған. Хәлиқ йолға чиққанда, бу үч қәбилә Рубен қәбилисиниң йетәкчилиги астида Йәһуда, Иссакар вә Зәбулун қәбилилириниң кәйнидин маңатти (Сн 2:10—16; 10:14—20). Муқәддәс чедир ясалған күниму қәбилиләр шундақ тәртип билән қурбанлиқларни елип кәлгән (Сн 7:1, 2, 10—47).
w04 1/8 25-б., 1-абз.
Санлар китавидики пайдилиқ ой-пикирләр
8:25, 26: Қанун бойичә, лавийларниң йеши тошқанда, улар хизмитини тохтитатти. Шундақ қилип, яшанған лавийларға һөрмәт көрситиләтти вә уларниң вәзипилири башқа лайиқ кишиләргә тапшурулатти. Шундақ болсиму, яшанған лавийлар өз ихтияри билән яш лавийларға ярдәм берәләтти. Бүгүнки күндә һәммиси, йешиға қаримастин вәз қилалайду, амма бу қанундики принциптин көп нәрсиләргә үгинәләймиз. Яшанған қериндашларниң саламәтлиги начарлишип, қандақту бир вәзипиләрни атқуралмиса, қолидин кәлгиничә хизмәт қилалайду.
Роһий гөһәрләрни издәйли
it «Тунҗа»
Тунҗа
Исраилдики тунҗа оғуллар кейин өз жутиниң башлиқлири болғачқа, улар пүтүн хәлиқниң вәкиллири болған. Йәһва Худа Исраил хәлқини Өзиниң «тунҗиси» дәп атиған. Йәһва Худаниң Ибраһим билән қурған келишими асасида Исраил хәлқи Худаниң хәлқи һәм «тунҗиси» болған (Чқ 4:22). Йәһва Худа Мисирда һәммә тунҗиларниң һаятини сақлап қалғанлиқтин, «Исраил оғуллириниң арисида... вә һайванларниң арисида әр тунҗини [Йәһва] үчүн муқәддәс» қилишни буйриған (Чқ 13:2). Шуңа, тунҗа оғуллар Худаға мәнсүп болған.
8—14 март
ХУДА СӨЗИДИКИ ҒӘЗНӘ | САНЛАР 9, 10
«Йәһва Худа Өз хәлқини қандақ башқуриду?»
it «Қараргаһ»
Қараргаһ
Қараргаһни бир йәрдин йәнә бир йәргә көчүргәндә (Санлар 33-бапта исраиллар тохтиған 40қа йеқин җай тилға елинған) исраилларниң интайин тәртиплик екәнлиги көрүнгән. Булут Муқәддәс чедирниң үстидә турғанда, хәлиқ орнидин қимирлиматти. Булут маңғанда, хәлиқму маңатти. «Йәһваниң буйруғи бойичә Исраил оғуллири йолға маңатти вә Йәһваниң буйруғи бойичә улар тохтатти» (Сн 9:15—23). Йәһва Худаниң буйруғи исраилларға икки күмүч карнайниң авази арқилиқ йәткүзүләтти (Сн 10:2, 5, 6). Үзүп-үзүп челинған карнайниң авази йолға чиқиш керәклигини билдүрәтти. Исраил хәлқи биринчи қетим б.м.и. 1512-жили, «иккинчи айниң жигирминчи күни» нәрсилирини жиғип йолға чиққан. Лавийлар хәлиқниң алдида келишим сандуғини елип маңған. Уларниң кәйнидә Йәһуда қәбилисиниң йетәкчилиги астидики үч қәбилә вә уларниң кәйнидә Иссакар вә Зәбулун қәбилилири маңған. Уларниң кәйнидә гирсонлуқлар вә мерарлиқлар келишим сандуғиниң өзлиригә тапшурулған бәзи қисимлирини елип маңған. Улардин кейин Рубен башлиған үч қәбилә меңип, уларниң кәйнидә Шимон вә Гад қәбилилири маңған. Андин кейин муқәддәс җайниң затлирини көтәргән Каавниң оғуллири маңди вә уларниң кәйнидә Әпраим қәбилиси башлиған Манассә вә Бинямин қәбилилири маңған еди. Әң ахирида Дан қәбилиси башлап маңған үч қәбилә болған еди. Дан қәбилисиниң кәйнидә Ашер вә Нафтали қәбилилири маңған еди. Шундақ қилип, әң бешида вә әң кәйнидә сани көп вә күчлүк қәбилиләр маңған (Сн 10:11—28).
w11 15/4 4-б.
Худаниң бәргән рәһбәрлигигә қулақ селиң
Худа бизгә йол-йоруқ көрситиватқанлиғиға миннәтдарлиғимизни қандақ көрситәләймиз? Әлчи Паул: «Араңларда өзлиригә рәһбәрлик алидиғанларға итаәтчан болуп, беқиниңлар»,— дәп ейтқан (Ибр. 13:17). Бу оңай әмәс. Өзүңизни Мусаниң вақтидики Исраил хәлқиниң орниға қоюп көрүң. Мана сиз бирнәччә вақит от яки булут түврүгиниң кәйнидин меңип, униң тохтиғанлиғини көрдиңиз дәйли. У шу йәрдә қанчә вақит, бир күнму, бир һәптиму яки бирнәччә айму туридиғанлиғи бәлгүсиз. Шуңа сиз чигип қойған нәрсилириңизниң һәммисини ачайму-ачмайму дәп ойлайсиз. Бешида әң керәк нәрсиләрнила алисиз. Бирнәччә күн өткәндин кейин чигип қойған нәрсилириңизни ечип-йепиштин һерип, бар нәрсиләрни чиқиришқа башлайсиз. Нәрсиләрниң һәммисини чиқирип болғанда, булут түврүгиниң көтириливатқанлиғини көрисиз. Андин, қайтидин һәммә җабдуқлириңизни жиғишқа тоғра келиду. Әлвәттә, бу қийин вә қолайсиз болған. Демәк, исраиллар һәрқачан дәррула меңишқа тәйяр болуши керәк еди (Сан. 9:17—22).
Худа бериватқан рәһбәрликкә биз қандақ қараймиз? Биз көрсәтмиләргә дәрру бойсунимизму? Болмиса, үгәнгән адитимиз бойичә һәрикәт қилип жүриверимизму? Мәсилән, Муқәддәс китап үгинишлирини өткүзүшкә, башқа тилда сөзләйдиған адәмләргә вәз қилишқа, аиләвий ибадәтни өткүзүшкә, Дохтурханилар билән алақилишиш комитети билән хизмәт қилиш вә конгресс вақтида тоғра жүрүш-турушқа мунасивәтлик әң ахирқи көрсәтмиләрни билимизму? Худаниң көрсәтмилирини қәдирләйдиғанлиғимизни уларни әмәлийәттә қоллиниш арқилиқ көрситимиз. Муһим қарар қилиш керәк болғанда, өз әқлимизгә әмәс, Йәһва Худаға вә Униң тәшкилатиниң көрсәтмилиригә тайинимиз. Һава гүлдүрлигәндә, бала ата-анисиниң қешиға жүгригәнгә охшаш, мошу дуниядики еғир қийинчилиқлар бешимизға чүшкәндә, бизму Йәһва Худаниң тәшкилатида пана издәймиз.
Роһий гөһәрләрни издәйли
it «Учришиш»
Учришиш
Учришишниң муһимлиғи. Йәһва Худа өз хәлқини роһий җәһәттин мустәһкәмләш үчүн учришишларни уюштурған. Бу учришишларға қатнишиш қанчилик муһим болғанлиғи Өтүп кетиш һейтини һәр жили нишанлашқа мунасивәтлик көрсәтмиләрдин ениқ көрүниду. Әгәр әр киши пак болуп туруп вә узақ йолда болмиса, амма Өтүп кетиш һейтини нишанлимиса, у өлтүрүлүши керәк еди (Сн 9:9—14). Хизкия падиша Йәһуда вә Исраил турғунлирини Өтүп кетиш һейтини мәйрәмләш үчүн Йерусалимға чақирғанда мундақ дегән: «Исраиллар, [Йәһваға] йенип келиңлар,... ата-боваңларға охшаш бойнуңларни қаттиқ қилмаңлар. Пәрвәрдигарниң отлуқ ғәзивиниң силәрдин көтирилип кетиши үчүн, әнди силәр Пәрвәрдигарға беқиниңлар, У мәңгүгә Өзигә хас дәп атиған муқәддәсханиға келип, Худайиңлар болған Пәрвәрдигарниң хизмитидә болуңлар....Чүнки Худайиңлар болған Пәрвәрдигар шапаәтлик вә рәһимликтур, силәр Униң тәрипигә өтсәңлар, У силәрдин йүз өрүмәйду» (Т2я 30:6—9). Мошундақ учришишларға әтәй бармай қелиши адәмниң Худани ташлап кәткәнлигини көрсәткән. Гәрчә биз Өтүп кетиш һейтиға охшаш мәйрәмләрни нишанлимисақму, әлчи Паул етиқатдашларни учришишларни ташлимаслиққа үндигән: «Меһир-муһәббәткә вә яхши ишларға дәвәт қилиш үчүн, бир-биримизгә диққәтчан болайли. Бәзиләр адәтләнгәндәк, бизниң умумий учришишлиримизни қалдурмайли, әксичә бир-биримизни илһамландурайли, болупму шу күнниң йеқинлашқанлиғини байқиған екәнмиз, техиму шундақ қилайли» (Иб 10:24, 25).
15—21 март
ХУДА СӨЗИДИКИ ҒӘЗНӘ | САНЛАР 11, 12
«Немә үчүн наразилиқ роһидин нери болушимиз керәк?»
w01 15/6 17-б., 20-абз.
Унтуп қалидиған тиңшиғучилар болмаңлар
20 Мәсиһийләрниң көпинчиси җинсий әхлақсизлиққа берилиштин нери туриду. Лекин биз бойнимизда наразилиқ роһиниң пәйда болушиға йол қоймаслиғимиз керәк, сәвәви мошундақ һәрикәт Худаға яқмайду. Паул бизгә мундақ дәп әскәртти: «Уларниң бирмунчилиридәк Йәһвани синимайли, улар Уни синап, иланлардин һалак болди. Уларниң бәзилиридәк налә қилмаңлар, улар һалак қилғучи тәрипидин йоқ қилинди» (Коринтлиқларға 1-хәт 10:9, 10). Исраиллар Муса билән Һарунға, Йәһва Худаниң Өзигиму наразилиқ көрсәтти. Шундақла улар һәтта Худа мөҗүзәвий түрдә бәргән манниғиму наразилиқ билдүргән (Санлар 16:41; 21:5). Йәһва Худани уларниң әхлақсиз ишлири наразилиқ билдүргәнлигигә қариғанда, көпирәк хапа қилдиму? Яқ. Муқәддәс китапта исиянчиларниң нурғунлирини илан чеқип өлтүргәнлиги йезилған (Санлар 21:6). Буниң алдида исиян көтәргән 14700дин ошуқ адәм вапат болған (Санлар 16:49). Шуңа Йәһва Худаниң чидамлиғини синимай, Униң һәммә соғилирини қәдирләйли.
w06 15/7 15-б., 7-абз.
Наразилиқ билдүрүштин нери болуң
7 Исраилларниң нийити қандақ өзгирип кәткән! Йәһва Худа уларни Мисир қуллиғидин азат қилип, Қизил деңиздин өткүзгәндә, Исраил хәлқи бешида хошаллиқ билән Йәһвани мәдһийиләп нахша ейтқан (Чиқиш 15:1—21). Чөлдә улар қийинчилиқлар дуч кәлгәндә, қананлиқлардин қорқуп, миннәтдарлиқни әмәс, наразилиқни көрсәткән. Азатлиққа чиққини үчүн миннәтдар болушниң орниға, улар азап тартқанлиғи үчүн Худани әйиплигән. Уларниң наразилиғи Йәһва Худаниң ғәмхорлуғини қәдирлимигәнлигини көрсәткән. Шуңа Йәһва Худаниң ейтқан сөзлиригә һәйран қалмаймиз: «Қай ваққичә бу тәрса җәмийәт Маңа налә қилиду? Уларниң Маңа котулдаватқинини Мән аңлаймән» (Санлар 14:27; 21:5).
it «Җедәл»
Җедәл
Наразилиқ. Җедәл көңүлни ағритиду. Наразилиқ роһи көңүлни чүшириду вә жүрәкни ағритиду. Мисирдин чиқа-чиқмайла Исраил хәлқи Йәһва Худаға наразилиқ билдүрүп, У вәкиллири сүпитидә таллиған Муса вә Һарунни тәңқит қилған (Чқ 16:2, 7). Вақит өтүп, хәлиқниң наразилиғи Мусаниң җениға шунчилик паттики, һәтта у Худадин өлүм тиләшни башлиған (Сн 11:13—15). Наразилиқ көрсәткән адәм өлүп кетиши мүмкин еди. Исиянчиларниң Мусаға наразилиқ билдүргәнлигини Йәһва Худа Өзиниң рәһбәрлигигә шикайәт қилиш дәп қараштурған (Сн 14:26—30). Тәңқит қилип наразилиқ билдүргәнликтин, исраилларниң нурғунлири һаятидин мәһрум болған.
Роһий гөһәрләрни издәйли
it «Манна»
Манна
Чүшәндүрүш. Манна «аш көкиниң уруғидәк ақ» болған, түри болса, хушпурақлиқ бедә сеғизниңкидәк, момға охшаш болған вә шәкли мәрвайитқа охшап кетидиған сүзүк тамчилардәк созуқ мадда еди. Униң тәми болса, «һәсәл қошулған нан» яки «татлиқ нан зәйтун мейиға» охшаш болған. Уни қол түгминидин өткүзүп яки һаганчида соқуп, андин нан қилип пиширәтти (Чқ 16:23, 31; Сн 11:7, 8).
22—28 март
ХУДА СӨЗИДИКИ ҒӘЗНӘ | САНЛАР 13, 14
«Ишәнч бизни қандақ қилип батур қилиду?»
w06 1/10 17-б., 5, 6-абз.
Етиқат билән Худадин әйминиш батур болушқа ярдәм бериду
5 Икки пайлақчи Йәшуа билән Халеб Вәдә қилинған йәргә киргүси кәлгән. Улар қананлиқлар тоғрилиқ: «уларда һимайә йоқ, биз билән болса Йәһва Өзи бар: улардин қорқмаңлар»,— деди (Санлар 14:9). Уларниң шундақ дегинигә асас болғанму? Әлвәттә, чүнки уларму хәлиқ билән Йәһваниң қудритини Мисир билән униң худалириға он җаза әвәтип мәсхирә қилғанлиғини көргән еди. Андин кейин пирәвн билән униң әскәрлирини Қизил деңизда чөктүрүвәткәнлигини көрди (Зәбур 136:15). Ундақта, он пайлақчиға ишәнгән адәмләрниң қорқунучқа берилишигә һечбир асас болмиғанлиғи ениқ. Бу Йәһваниң жүригини ағритқан. У мундақ дегән: «Қай ваққичә бу хәлиқ Мени көзгә илмайду? Қай ваққичә униң арисида қилған барлиқ мөҗүзилиримни көрүп туруп, Маңа ишәнмәйду?» (Санлар 14:11).
6 Йәһва Худа мәсилиниң түп йилтизини көрсәткән еди: хәлиқниң ишәнчиси йетишмигән. Һәқиқәтән, ишәнч билән җәсурлуқ зич бағлиқ. Уларниң зич бағлиниши шунчә — әлчи Йоһан мәсиһий җамаәт билән роһий күрәш тоғрилиқ: «Мана, дунияни ғәлибә қилған ғалибийәт — у бизниң етиқатимиздур»,— дәп ейтқан (Йоһанниң 1-хети 5:4). Йәшуа билән Халебқа охшаш ишәнчиси болғанлиқтин, бүгүнму алтә миллиондин ошуқ Йәһва гувачиси, қери-яш, саламәтлиги мәһкәм яки аҗиз демәй, дуния йүзигә Падишалиқ тоғрилиқ хуш хәвәрни ейтип жүрмәктә. Һечбир дүшмән мошу күчлүк вә җәсур әскәрләрниң ағзиға тувақ япалмайду (Римлиқларға 8:31).
Роһий гөһәрләрни издәйли
it «Худа исраилларға бәргән зимин»
Худа исраилларға бәргән зимин
Худа Исраил хәлқигә бәргән йәр интайин яхши болған. Муса пайлақчиларни Вәдә қилинған зиминниң мевилирини елип келиңлар дәп әвәткән. Улар әнҗир, анар вә үзүм елип кәлгән. Үзүм ғолиниң йоғанлиғи шунчә — уни икки киши таяққа илип көтирип кәлгән еди. Ишәнчиси аҗиз болғанлиқтин, улар қорқунучқа берилип кәткән болсиму: «Һәқиқәтән униңда сүт билән һәсәл ақидекән»,— дәп ейтқан (Сн 13:23, 27).
29-март—4-апрель
ХУДА СӨЗИДИКИ ҒӘЗНӘ | САНЛАР 15, 16
«Һакавурлуқтин вә өзигила ишинип кетиштин пәхәс болуң»
w11 15/9 27-б., 12-абз.
Йәһва Худа сизни биләмду?
12 Исраил хәлқи Вәдә қилинған зиминға кетиватқанда, Қораһ Йәһваниң хәлиққә бериватқан рәһбәрлигигә гуман қилишқа башлиған. Кейинирәк униңға җәмийәтниң башлиқлиридин 250 адәм қошулуп, әһвални өзгәрткүси кәлгән. Қораһ вә униң тәрәпдарлири Йәһва Худа билән мунасивәтлири яхши болған дәп ишәнгән. Улар Мусаға: «Йетиду! Пүткүл җәмийәт, барлиғи муқәддәстур вә уларниң арисида Йәһва»,— дәп аччиқлинип ейтқан (Сан. 16:1—3). Бу тәкәббур кишиләр өзлиригә қанчилик ишәнчлик болған дәңа! (Санлар 16:5ни оқуң). Әтиси Қораһ вә униңға қошулғанларниң һәммиси өлүп кәткән еди (Сан. 16:31—35).
w11 15/9 27-б., 11-абз.
Йәһва Худа сизни биләмду?
11 Қораһниң Йәһва Худаниң қарарлириға вә Униң һөкүмранлиғиға болған көзқариши Муса пәйғәмбәрниң көзқаришидин пәриқләнгән. Уларниң көзқариши Йәһва Худа билән болған мунасивитигә тәсир қилған. Қораһ Каав қәбилисидин чиққан лавий болған вә көп шәрәплик вәзипиләргә егә болған. Мәсилән, Йәһва хәлқини Қизил деңиздин өткүзгәнлигини өз көзи билән көргән болуши мүмкин. Қораһ Йәһва Худа Синай теғида итаәтсиз исраилларға һөкүм чиқарғанда, Худа тәрәптә туруп, Муқәддәс чедирни көчүрүшкә ярдәм бәргән еди (Чиқ. 32:26—29; Сан. 3:30, 31). Қораһ жиллар давамида Йәһваға садиқ хизмәт қилған вә хәлиқниң алдида чоң абройға егә болған.
Роһий гөһәрләрни издәйли
w98 1/9 20-б., 1, 2-абз.
Муһим ишларни таллаң
Йәһва Шаббат яки Дәм елиш күни өз иши билән шуғулланған кишиниң һәрикитини еғир гуна дәп һесаплиған. Муқәддәс китапта йезилғандәк, Йәһва Мусаға: «Бу киши өлтүрүлиши керәк»,— деди (Санлар 15:35). Немә үчүн шундақ кишиниң һәрикити Йәһвани ғәзәпләндүргән?
Исраилларға отун жиғиш, тамақ етиш, кийим тикиш вә күндилик турмуш ишлирини қилиш үчүн һәптисидә алтә күн берилгән еди. Йәттинчи күни улар Худаға ибадәт қилишқа бағлиқ ишлар билән шуғуллиниши керәк еди. Отун жиғишниң өзи гуна болмиған, бирақ буни қачан қилғанлиғи муһим болған. Бүгүнки күндә Худа хизмәтчилириниң Тәврат қанунини орунлиши шәрт әмәс. Бирақ буниңдин биз муһим савақ алимиз: муһим ишларни һаятимизда биринчи орунға қоюшимиз керәк (Филипиликләргә 1:10).
5—11 апрель
ХУДА СӨЗИДИКИ ҒӘЗНӘ | САНЛАР 17—19
«Мән... сениң мирасиң»
w11 15/9 13-б., 9-абз.
Йәһва Худа сизниң мирасиңизму?
9 Мирасқа егә болмиған лавийлар тоғрилиқ ойлап бақайли. Уларниң асасий вәзиписи Йәһваға хизмәт қилиш болған, шуңа улар Йәһва керәклик нәрсиниң һәммиси билән тәминләйдиғанлиғиға ишиниши керәк еди, чүнки Йәһва уларға: «Мән Өзәм сениң мирасиң вә несивиң»,— дегән (Сан. 18:20). Биз роһанийлар вә лавийларға охшаш, ибадәтханида хизмәт қилмисақму, уларға охшаш Йәһваға тайинип, У еһтияҗлиримизни қанаәтләндүриду дәп ишинишимиз керәк. Мошу дунияниң ахири йеқинлашқансири, һаятимиз еғир болиду, шуңа Йәһва бизгә ғәмхорлуқ қилалайдиғанлиғиға ишәнчимиз мәһкәм болуши керәк (Вәһ. 13:17).
w11 15/9 7-б., 4-абз.
Йәһва мениң мирасим
4 Йәһва лавийларниң мираси болған, демәк йәрни мираслиққа елишниң орниға, уларға алаһидә вә шәрәплик хизмәт тапшурулған еди. Уларниң мираси «Йәһваниң роһанийлиғи» болған (Йәшуа 18:7). Санлар 18:20ниң алдидики вә кәйнидики айәтләрдин лавийларниң кәмбәғәл болмиғанлиғини көримиз (Санлар 18:20, 19, 21, 24ни оқуң). Лавийлар хизмити үчүн мирасниң орниға исраиллар әкәлгән ондин бир үлүшни алған. Хәлиқ мелиниң вә жиққан һосулиниң 10 процентини лавийларға бәргән (Сан. 18:25—29). Шундақла хәлиқ әкәлгән «муқәддәс қурбанлиқлар» роһанийларға бериләтти. Шу сәвәптин, һәммә роһанийлар вә лавийлар Йәһва уларға ғәмхорлуқ қилидиғанлиғиға ишинәләтти.
Роһий гөһәрләрни издәйли
g02 8/6 14-б., 2-абз.
Туз — муһим озуқлуқ
Туз турақлиқни билдүриду. Шу сәвәптин әбәдий келишим туз келишими дәпму аталған (Санлар 18:19). Келишим түзгәндә, икки тәрәп адәттә туз қошулған тамақни йәтти. Тәврат қануниға мас, қурбанлиқни әкелиштин авал униңға туз қошуш керәк болған. Чүнки туз бузулуштин вә чириштин сақлашниң символи болған еди.
12—18 апрель
ХУДА СӨЗИДИКИ ҒӘЗНӘ | САНЛАР 20, 21
«Бесим астида мулайимлиқни сақлаң»
w19.02 12-б., 19-абз.
Кәмтәрликни издәп, Йәһваниң көңлини хуш қилиң
19 Хаталиқ өткүзүштин қачимиз. Мусаниң мисалини йәнә бир қетим есимизгә алайли. Он жиллар җәриянида у кәмтәр болуп, Йәһваниң жүригини хошал қилған. Бирақ чөл-баявандики қириқ жиллиқ сәпәрниң ахирида у кәмтәрликни көрситәлмәй қалди. Шу чағда униң һәдиси Мәрийәм җан үзүп, Қадешта йәрләнгән (өз вақтида у Мусаниң һаятини сақлап қалған болуши мүмкин). Исраиллиқлар қайтидин шараитлириға наразилиқ билдүрүп, исиян көтәргән. Бу қетим улар су йоқ дәп ғуңишип, Муса билән җедәлләшкән. Улар Йәһваниң Муса арқилиқ қилған көплигән мөҗүзилирини вә Мусаниң узун жиллар хәлиққә җан пидалиқ билән қилған хизмитини унтуп кәткән. Хәлиқ пәқәт суниң йоқ болғиниға әмәс, Мусаниң өзигиму наразилиқ билдүргән. Чүнки уларниң уссиғанлиғиға Муса әйиплик болған дәп саниған (Сан. 20:1—5, 9—11).
w19.02 13-б., 20-абз.
Кәмтәрликни издәп, Йәһваниң көңлини хуш қилиң
20 Шу чағда Муса кәмтәрлик көрсәтмәй, қаттиқ ғәзәпләнгән. Йәһва буйриғандәк қорам ташқа сөзләшниң орниға, Муса хәлиққә қопал сөзләп, мөҗүзини мән қилимән дегән. Андин кейин у қорам ташни икки қетим урғанда, униңдин су етилип чиқти. Тәкәббурлуқ вә ғәзәпкә берилгәнликтин, Муса чоң хаталиқ өткүзгән (Зәб. 106:32, 33). Бир дәқиқигә кәмтәрлигидин айрилғанлиғи үчүн Муса Вәдә қилинған зәмингә кирәлмәй қалған (Сан. 20:12).
21 Бу вақиәдин бирнәччә муһим савақ алимиз. Биринчидин, биз кәмтәрликни көрситиш үчүн һәрқачан күч чиқиришимиз керәк. Әгәр пәхәс болмисақ, тәкәббурлуқ бизни әхмиқанә сөзләшкә яки ахмақлиқ билән һәрикәт қилишқа дәвәт қилиши мүмкин. Иккинчидин, бесимға дуч кәлгәндә, кәмтәр болуп қелиш оңай әмәс. Шуңа һәтта қийин вәзийәттиму кәмтәрлик көрситишкә тиришишимиз муһим.
w09 1/9 19-б., 5-абз.
Адаләтни чиң тутидиған сотчи
Биринчидин, Худа Муса пәйғәмбәргә хәлиқни «исиянчилар» дәп аташ бу яқта турсун, һәтта уларға сөзләшниму буйримиған. Иккинчидин, Муса билән Һарун Йәһваға шан-шәрәп кәлтүрмигән. Йәһва Худа уларға: «Силәр... Мениң муқәддәслигимни намайән қилмидиңлар»,— дегән (12-айәт). Мусаниң «силәр үчүн мошу қия таштин биз су чиқирип беришимиз керәкму» дегән сөзлири, бу мөҗүзини Худа әмәс, Һарун иккиси қилғандәк көрсәткән еди. Үчинчидин, Худаниң бу һөкүми бурун қилған қарарлири билән мас болған. Худа исиян көтәргән әвлатни, шундақла Муса билән Һарунниму Қананға киргүзмигән (Санлар 14:22, 23). Төртинчидин, Муса билән Һарун Исраил хәлқиниң йетәкчилири болған. Худа кимләргә көп җавапкарлиқ бәрсә, шулардин көпирәк тәләп қилиду (Луқа 12:48).
Роһий гөһәрләрни издәйли
w14 15/6 26-б., 12-абз.
Биз адәмләрниң аҗизлиғиға Йәһва Худадәк қараймизму?
12 Мошу вәзийәтниң һәрбиридә Йәһва Худа Һарунни бирдин җазалиши мүмкин еди. Лекин Худа Һарунниң яман адәм әмәслигини вә һәммә әйип униңда әмәс екәнлигини көргән. Қаримаққа, Һарун бәзи вәзийәтләрдә көпчиликниң тәсиригә яки бесимиға берилип, натоғра ишларни қилип қойған. Қандақла болмисун, униңға хаталиқлирини көрсәткәндә, у буни бирдин етирап қилип, Худаниң чиқарған һөкүмини қобул қилған (Чиқ. 32:26; Сан. 12:11; 20:23—27). Йәһва Худа Һарунниң ишәнчисигә вә товва қилғанлиғиға диққәт бөлгән. Әсирләр өтүп, Һарун вә униң әвлади Йәһва Худадин әйминидиған адәмләр дәп тонулған (Зәб. 115:10—12; 135:19, 20).
19—25 апрель
ХУДА СӨЗИДИКИ ҒӘЗНӘ | САНЛАР 22—24
«Йәһва Худа қарғишни бәрикәткә айландурди»
bt 7-бап, 5-абз.
«Әйса тоғрилиқ хуш хәвәрни» җакалаймиз
5 Дүшмәнләр биринчи әсирдиму, бизниң күнлиримиздиму Худаниң хәлқигә бесим көрсәткини билән, вәз ишини тохтиталмиди. Худа хизмәтчилириниң бир җайдин йәнә бир җайға яки бир түрмидин башқа түрмигә көчүрүлүши Падишалиқ тоғрилиқ хуш хәвәрни тарқитишқа техиму көп пурсәт яратқан. Мәсилән, Иккинчи дуния уруши вақтида Йәһва гувачилири нацист лагерьлирида яхши гувалиқ берәлигән. Йәһва гувачилири билән тонушуп қалған бир йәһудий киши мундақ дегән: «Йәһва гувачилири болған мәһбусларниң җасарити мени уларниң етиқади Муқәддәс китапқа асасланғанлиғиға ишәндүрди вә нәтиҗидә мәнму Йәһва гувачиси болдум».
it «Ахмақлиқ»
Ахмақлиқ
Йәһва Худаға қарши чиқиш — әқилсизлик. Моабниң падишаси Балақтин пул елиш үчүн Балаам дегән ялған пәйғәмбәр исраилларға қарита қарғиш ейтиши ахмақлиқ болған. Әлчи Паул Балаам тоғрилиқ мундақ язған: «Балаам қилған җинайити үчүн әйипләнди. Тилсиз ешәк адәм авази билән сөзләп, пәйғәмбәргә әқилсиз иш қилишқа йол қоймиди». Бу йәрдики «әқилсиз» дегән парафрони́а дәп тәрҗимә қилинған грек сөзи удул мәнада «әқилниң йенида болуш» дегәнни билдүриду (П2х 2:15, 16; Сн 22:26—31).
Роһий гөһәрләрни издәйли
w04 1/8 27-б., 2-абз.
Санлар китавидики пайдилиқ ой-пикирләр
22:20—22: Немә үчүн Йәһва Худа Балаамға ғәзәпләнгән? Йәһва Худа Балаам пәйғәмбәргә исраилларни қарғима дәп ейтқан еди (Санлар 22:12). Бирақ у исраилларни қарғаш мәхсити билән Балақниң адәмлири билән барған. Балаам Моаб падишаси Балақниң көңлидин чиқиш вә униңдин мукапат елишни халиған (Петрусниң 2-хети 2:15, 16; Йәһуда 11). Һәтта Йәһва Худа уни Исраил хәлқини қарғашниң орниға бәрикәтләшкә мәҗбурлиған чағдиму, Балаам Исраил әр кишилирини езиқтуруш үчүн Баалға сәҗдә қилған моаблиқ аялларни әвәтишни тәғдим қилған (Санлар 31:15, 16). Шуңа Балаамниң тоймаслиғи яки ачкөзлиги Йәһваниң ғәзивини қозғиған.
26-апрель—2-май
ХУДА СӨЗИДИКИ ҒӘЗНӘ | САНЛАР 25, 26
«Бир адәмниң көпчиликкә әкәлгән пайдиси»
lv 9-бап, 1, 2-абз.
Җинсий әхлақсизлиқтин қечиңлар
БЕЛИҚЧИ өзи яқтуридиған җайға келип, белиқ тутушқа башлиди. У белиқниң қайси түрини тутушни халайдиғанлиғини ениқ билиду. У йәмчүкни илип, қармақ ташлайду. Бир пәйттә қармақниң сепи егилишкә башлиди вә белиқчи қармаққа илинған белиқни тартип чиқиривалди. У йәмчүкни тоғра таллавалғанлиғиға рази.
2 Б.м. и. 1473-жили Билам дегән адәм Вәдә қилинған зәминниң чегарисидики Моаб түзләңлиридә җайлашқан Худаниң хәлқигә қарши қандақ қувлуқ-шумлуқни ишлитиш тоғрисида узақ ойланди. Билам өзини Йәһваниң пәйғәмбири дәп атап жүргән, лекин әмәлийәттә у бар-йоқи Исраил хәлқини қарғаш үчүн ялланған ачкөз адәм болған. Бу ишқа Пәрвәрдигарниң өзи арилашқанлиқтин, у ойини әмәлгә ашуралмай, әксичә, Исраил хәлқигә бәрикәт бәрди. Билам, мукапатқа еришиш үчүн, Алланиң өзи Исраил хәлқигә ләнәт оқусун дәп, уларни еғир гуна қилишқа аздурушни көңлигә пүккән. Нийитигә йетиш үчүн Билам моаблиқ яш аялларни «йәмчүк» сүпитидә қоллинип, исраиллиқларни қармаққа илиндүрмәкчи болған (Санлар 22:1—7; 31:15, 16; Вәһий 2:14).
lv 9-бап, 4-абз.
Җинсий әхлақсизлиқтин қечиңлар
4 Мошу паҗиә немә сәвәптин йүз бәрди? Нурғун адәмләр өз көңүллирини қаттиқ қилған: өзлирини Мисирдин елип чиқип, чөл-баяванда тамақ билән тәминләп, Вәдә қилинған зәмингә аман-есән елип кәлгән Пәрвәрдигар Йәһвадин үз өрүшкән (Ибранийларға 3:12). Әлчи Паул бу һәққидә мулаһизә қилип: «Уларниң бәзилиридәк паһишивазлиққа берилмәңлар: улар паһишивазлиқ қилип — бир күндә 23000 киши өлтүрүлди»,— дәп язған (Коринтлиқларға 1-хәт 10:8).
Роһий гөһәрләрни издәйли
it «Чегара»
Чегара
Исраил қәбилилиригә зиминни мираслиққа бериш икки нәрсигә чәк ташлашниң нәтиҗисигә вә қәбилидики адәмләрниң саниға бағлинишлиқ болған охшайду. Бәлким, чәк ташлиғанда, бирәр қәбилиниң мираслиқ зимини қайси тәрәптә, мәсилән шималда, җәнупта, ғәриптә, шәриқтә, түзләңдә яки тағлиқ районда болидиғанлиғини тәхминән көрсәткән. Чәк ташлиғанда исраиллар бу қарарниң Йәһва Худадин кәлгәнлигини чүшәнгәнликтин, қәбилиләрниң арисида көрәлмәслик вә җедәлләр болмиған (П.н 16:33). Буниңдин башқа, чәк ташлаш арқилиқ Йәһва Худа һәрбир қәбилиниң мираслиқ зимини Яқуп пәйғәмбәр өлүминиң алдида ейтқан Яритилиш 49:1—33тә йезилған пәйғәмбәрлик сөзләргә мас болушиға ғәмхорлуқ қилалиған.
Чәк ташлиғандин кейин, қәбилиниң мираслиқ зимини қәйәрдә болидиғанлиғи ениқланғанда, қәбилидики адәмләрниң саниға қарап, зимининиң көлими бәлгүләнгән. «Уларниң йерини чәк ташлап, қәбилилириңларға бөлүп бериңлар: ким көпсанлиқ болса, уларға йоғанирақ мирасни бериңлар, ким азсанлиқ болса, уларға кичигирәк йәрни бериңлар. Кимгә қәйәрдә чәк чиқса, шу йәрдә униң мираси болиду. Ата-бовиларниң қәбилилиригә йәрни бөлүп бериңлар» (Сн 33:54). Гәрчә чәк ташланғанда һәрбир қәбилиниң мираси қәйәрдә болидиғанлиғини өзгәртишкә болмиған болсиму, мираслиқ зимининиң көлимини өзгәртишкә болған. Мәсилән, Йәһуда қәбилисиниң зимини бәк чоң болғини ениқланғанда, буни өзгәртип, мираслиқ зимининиң бәзи қисимлири Шимон қәбилисигә берилгән (Йшу 19:9).