14-دەرس
نېمە ئۈچۈن خۇدا تەشكىللەش ئېلىپ بارىدۇ؟
1. نېمە ئۈچۈن خۇدا قەدىمقى زاماندا ئىسرائىللارنى تەشكىللىگەن؟
خۇدا ئىبراھىم پەيغەمبەرنىڭ ئەۋلادلىرىنى بىر خەلق قىلىپ تەشكىللەپ، ئۇلارغا بىر قاتار قانۇنلارنى چۈشۈرگەن. ئۇ شۇ خەلقنى «ئىسرائىل»، دەپ ئاتىغان. پەقەت شۇ خەلقلا ھەقىقىي ئىبادەت يولىدا مېڭىپ، خۇدا سۆزىنى ھىمايە قىلغۇچىلار بولغان (زەبۇر 147:19، 20). شۇڭا پۈتكۈل ئەل خەلقىنىڭ ئىسرائىل خەلقى ئارقىلىق بەختكە ئېرىشەلىشى مۇمكىن بولغان.—يارىتىلىش 22:18-ئايەتنى ئوقۇڭ.
خۇدا ئۆزىنىڭ گۇۋاھچىلىرى بولۇشقا ئىسرائىللارنى تاللىغان. ئۇلارنىڭ قەدىمقى تارىخى، ئىنسانلار خۇدانىڭ قانۇنلىرىغا بويسۇنۇش ئارقىلىق قانداق پايدا-مەنپەئەت تاپالايدىغانلىقىنى كۆرسەتكەنىدى (تەكرار قانۇن 4:6). شۇ سەۋەب، باشقا خەلقلەر ئىسرائىل خەلقى ئارقىلىق ھەق خۇدانى تونۇيالايتتى.—يەشايا 43:10، 12-ئايەتلەرنى ئوقۇڭ.
2. نېمە ئۈچۈن ئەيسانىڭ ھەقىقىي ئەگەشكۈچىلىرى تەشكىللەنگەن؟
ئىسرائىل خەلقى كېيىنچە خۇدا بىلەن بولغان ياخشى مۇناسىۋەتنى يوقاتقان، شۇڭا يەھۋا شۇ خەلقىنىڭ ئورنىغا ئەيسانىڭ ئەگەشكۈچىلىرى جامائىتىنى تاللىغانىدى (مەتتا 21:43؛ 23:37، 38). ھازىر بولسا، ئىسرائىللار ئورنىغا تاللانغان شۇ ئەيسانىڭ ھەقىقىي ئەگەشكۈچىلىرى يەھۋا ھەققىدە باشقىلارغا گۇۋاھلىق بەرمەكتە.—ئەلچىلەر 15:14، 17-ئايەتلەرنى ئوقۇڭ.
ئەيسا مەسىھ ئۆز ئەگەشكۈچىلىرىنى بارلىق مىللەت خەلقىگە خۇشخەۋەر ئېيتىپ، شاگىرتلار يېتىشتۈرۈشكە تەشكىللىگەن (مەتتا 10:7، 11؛ 24:14؛ 28:19، 20). مانا ھازىر، بۇ رەزىل زاماننىڭ ئاخىرلىشىش پەيتىدە، خۇشخەۋەر ئېيتىش ئەڭ يۇقىرى پەللىگە چىقىۋاتىدۇ. ئىنسانىيەت تارىخىدا تۇنجى قېتىم، يەھۋا ھەر مىللەت خەلقى كىشىلىرىدىن بولغان مىليونلىغان ئېتىقادچىلارنى توغرا ئىبادەت ئارقىلىق ئىتتىپاقلاشتۇرماقتا (ۋەھىيلەر 7:9، 10). ئەيسانىڭ ھەقىقىي ئەگەشكۈچىلىرى بىر-بىرىگە ئىلھام ۋە ياردەم بېرىشكە تەشكىللەنگەن. دۇنيانىڭ جاي-جايلىرىدا، ئۇلار ئىبادەت يىغىلىشلىرىغا جەم بولغاندا مۇقەددەس كىتابتىكى ئوخشاش مەزمۇننى ئۆگىنىدۇ. — ئىبرانىيلار 10:24، 25-ئايەتلەرنى ئوقۇڭ.
3. يەھۋا گۇۋاھچىلىرى بۈگۈنكى كۈندە تەشكىللىنىشنى قانداق باشلىغان؟
كىچىك بىر گۇرۇپپا مۇقەددەس كىتابنى تەتقىق قىلغۇچىلار 1870-يىللىرىدا، ئۇزۇن مەزگىل يوقالغان مۇقەددەس كىتابتىكى ھەقىقەتلەرنى قايتا ئىزدەپ تېپىشنى باشلىغان. ئۇلار ئەيسا مەسىھنىڭ جامائەتنى خۇشخەۋەرنى ۋەز ئېيتىشقا تەشكىللىگەنلىكىنى بىلگەن، شۇڭا ئۇلار خەلقئارا پادىشاھلىق خۇشخەۋىرىنى يەتكۈزۈش پائالىيىتىنى باشلىغان. 1931-يىلىدا، ئۇلار ئۆزلىرى ئۈچۈن يەھۋا گۇۋاھچىلىرى، دېگەن ئىسىمنى قوللانغان. — ئەلچىلەر 1:8؛ 2:1، 4؛ 5:42-ئايەتلەرنى ئوقۇڭ.
4. يەھۋا گۇۋاھچىلىرى قانداق تەشكىللەنگەن؟
بىرىنچى ئەسىردە، ئەيسا مەسىھنى جامائەتنىڭ بېشى، دەپ ئېتىراپ قىلىدىغان مەركىزى يېتەكچى كېڭەش نۇرغۇن ئەل يۇرتلاردىكى ئېتىقادچىلار جامائەتچىلىكلىرىدىن خەۋەر ئالغان (ئەلچىلەر 16:4، 5). شۇنىڭغا ئوخشاش، بۈگۈنكى كۈندە ھەم تەجرىبىلىك ئاقساقاللاردىن تەشكىل تاپقان يېتەكچى كېڭەش دۇنيانىڭ ھەرقايسى جايلىرىدىكى يەھۋا گۇۋاھچىلىرى جامائەتچىلىكلىرىدىن خەۋەر ئالىدۇ. يېتەكچى كېڭەش مۇقەددەس كىتاب ئۆگىنىش ماتېرىياللىرىنى 600 دىن ئارتۇق تىلدا تەرجىمە قىلىش، بېسىپ چىقىرىش ۋە تارقىتىشقا مەسئۇل تارماق ئىش بېجىرىش ئورۇنلىرىغا يېتەكچىلىك قىلىدۇ. شۇنداق قىلىپ يېتەكچى كېڭەش مۇقەددەس كىتابقا ئاساسەن، دۇنيانىڭ جاي-جايلىرىدىكى 100000 دىن كۆپرەك جامائەتچىلىكلەرگە ئىلھام ۋە كۆرسەتمە بېرەلەيدۇ. ھەربىر جامائەتتە، لاياقەتلىك ئەر ئېتىقادچى ئاقساقاللار يەنى مەسئۇل يېتەكچىلەر بار. ئۇلار خۇدانىڭ پادىلىرىدىن مېھرىبانلىق بىلەن خەۋەر ئالىدۇ.—1-پېترۇس 5:2، 3-ئايەتلەرنى ئوقۇڭ.
يەھۋا گۇۋاھچىلىرى خۇشخەۋەرنى ۋەز ئېيتىش ۋە شاگىرتلارنى يېتىشتۈرۈشكە تەشكىللەنگەن. قەدىمقى زاماندىكى ئەلچىلەرگە ئوخشاش، بىزمۇ ئۆيمۇ-ئۆي ۋەز ئېيتىمىز (ئەلچىلەر 20:20). ھەمدە ھەقىقەتنى سۆيىدىغان ئىخلاسمەن كىشىلەرنى مۇقەددەس كىتاب ئۆگىنىشكە تەكلىپ قىلىمىز. ئەمما، بىز يەھۋا گۇۋاھچىلىرى پەقەتلا بىر توپ تەشكىللەنگەن ئېتىقادچىلار ئەمەس. بىز مېھرى-مۇھەببەتلىك خۇدانىڭ چوڭ ئائىلىسىنىڭ ئەزالىرىدۇرمىز. بىزلەر بىر-بىرىمىزگە كۆڭۈل بۆلىدىغان ئاكا-ئۇكا، ئاچا-سىڭىللار (2-سالونىكالىقلار 1:3). يەھۋانىڭ خەلقى خۇدانى خۇرسەن قىلىش ۋە باشقىلارغا ياردەم بېرىشكە تەشكىللەنگەچ، ئۇلار يەر يۈزىدىكى ئەڭ بەخت-سائادەتلىك ئائىلىدۇر.— زەبۇر 33:12؛ ئەلچىلەر 20:35-ئايەتلەرنى ئوقۇڭ.