ئوقۇرمەنلەرنىڭ سوئاللىرى
سالونىكالىقلارغا 2-خەت 3-باب 14-ئايەتتە كىمدۇر بىرىگە «دىققەت قىلىپ يۈرۈڭلار» دېگەن سۆزلەر يېزىلغان. بۇ جامائەتتىكى ئاقساقاللارغا ياكى ئېتىقادچىلارغا قارىتا ئېيتىلغان سۆزلەرمۇ؟
ئەلچى پاۋلۇس سالونىكا شەھىرىدىكى جامائەتكە خەت يازغاندا مۇنداق دېگەن: «ئەگەر كىمدۇر بىرى ئۇشبۇ خەتتىكى سۆزىمىزگە بويسۇنمىسا، ئۇنىڭغا دىققەت قىلىپ يۈرۈڭلار» (2-سالونىكا. 3:14). بۇرۇن بىز بۇ كۆرسەتمە ئاقساقاللارغا قارىتىپ ئېيتىلغان دېگەن ئىدۇق. ئۆتمۈشتە جامائەتتە ئەگەر كىمدۇر بىرى مۇقەددەس كىتابتىكى نەسىھەت سۆزلىرىگە داۋاملىق سەل قارىغان بولسا، ئاقساقاللار بىر نۇتۇق ئېيتىپ، جامائەتتىكى قېرىنداشلارنى ھوشيار بولۇشقا ئۈندەيتتى. ئاندىن كېيىن، قېرىنداشلار شۇ كىشى بىلەن باردى-كەلدى قىلىشنى توختىتاتتى.
ئەمما، چۈشەنچىمىزنى ئۆزگەرتىشىمىزنىڭ زۆرۈرلىكىنى تونۇپ يەتتۇق. ھازىر شۇنى چۈشىنىپ يەتتۇقكى، ئەلچى پاۋلۇسنىڭ كىمدۇر بىرىگە «دىققەت قىلىپ يۈرۈڭلار» دېگەن نەسىھەت سۆزى مەلۇم ۋەزىيەتلەردە قانداق قىلىشنى ئېتىقادچى قېرىنداشلارنىڭ ھەربىرى شەخسەن ئۆزى قارار قىلىشى كېرەكلىكىنى كۆرسەتكەن. شۇڭلاشقا، ئاقساقاللارنىڭ مەلۇم بىرىگە دىققەت قىلىپ يۈرۈڭلار دەپ نۇتۇق ئېيتىشنىڭ ھاجىتى قالمىدى. سالونىكالىقلار 2-خەت 3-باب 14-ئايەتتىكى سۆزلەرگە بولغان چۈشەنچىمىزنى نېمە ئۈچۈن ئۆزگەرتتۇق؟ ئەلچى پاۋلۇس قانداق ۋەزىيەتتە بۇ نەسىھەت سۆزىنى يازغانلىقىنى كۆرۈپ باقايلى.
ئەلچى پاۋلۇس جامائەتتە بەزى ئېتىقادچىلارنىڭ تەرتىپنى بۇزۇپ يۈرگەنلىكىنى بايقىغان. ئۇلار پاۋلۇسنىڭ خۇدا سۆزىگە ئاساسلىنىپ بەرگەن نەسىھىتىگە قۇلاق سالمىغان. پاۋلۇس ئىلگىرى بۇ جامائەتنى زىيارەت قىلىپ كەلگەن ۋاقىتتا، ئۇلارغا مۇنداق نەسىھەت بەرگەن: «ئەگەر كىمكى ئىشلەشنى خالىمىسا، تاماق ھەم يېمىسۇن». لېكىن، بەزىلەر ھەتتا ئىشلەپ جان بېقىش قولىدىن كەلسىمۇ، يەنىلا ئىشلەشنى رەت قىلغان. ئۇنىڭدىن باشقا، ئۇلار باشقىلارنىڭ ئىشلىرىغا ئارىلىشىپ يۈرگەن. ئۇنداقتا، مەسىھ ئەگەشكۈچىلىرى شۇنداق تەرتىپنى بۇزغان ئېتىقادچىلارغا قانداق مۇئامىلە قىلىشى كېرەك؟—2-سالونىكا. 3:6، 10–12.
ئەلچى پاۋلۇس: «ئۇنىڭغا دىققەت قىلىپ يۈرۈڭلار»،— دېگەن. گرېك تىلىدا قوللىنىلغان ئىبارە، شۇنداق ئادەمگە ئالاھىدە دىققەت قىلىپ، ئۇنىڭ يامان تەسىرىدىن پەخەس بولۇش كېرەكلىكىنى بىلدۈرىدۇ. ئەلچى پاۋلۇسنىڭ بۇ كۆرسەتمىسى پەقەت جامائەت ئاقساقاللىرىغا ئەمەس، بەلكى جامائەتنىڭ ھەربىر ئەزاسىغا قارىتىلغان (2-سالونىكا. 1:1؛ 3:6). شۇڭا، مەسىھ ئەگەشكۈچىلىرى كىمدۇر بىرىنىڭ مۇقەددەس كىتابتىكى نەسىھەت سۆزىگە قۇلاق سالمىغانلىقىنى بايقىغان بولسا، ئۇنىڭ بىلەن ‹ئارىلىشىش ياكى ئارىلاشماسلىقنى› ھەركىم ئۆزى شەخسەن قارار قىلىدۇ.
بۇ شۇنداق كىشىگە خۇددى جامائەتتىن چىقىرىلغان بىرىگە مۇئامىلە قىلغاندەك مۇئامىلە قىلىش كېرەكلىكىنى بىلدۈرەمدۇ؟ ياق، چۈنكى ئەلچى پاۋلۇس سۆزىنى داۋاملاشتۇرۇپ مۇنداق دېگەن: «قېرىنداش سۈپىتىدە نەسىھەت قىلىڭلار». دېمەك، جامائەتتە قېرىنداشلار شۇنداق بىرى بىلەن بىرلىكتە ئىبادەت يىغىلىشى ۋە ۋەز خىزمەتكە قاتنىشىدۇ، لېكىن ئۇنىڭ بىلەن ئارىلىشىپ باردى-كەلدى قىلىش ياكى كۆڭۈل كۆتۈرىدىغان ئولتۇرۇشلاردا جەم بولۇشتىن ئۆزىنى تارتىشنى قارار قىلىشى مۇمكىن. نېمە ئۈچۈن؟ ئەلچى پاۋلۇس: «ئۇنىڭ بىلەن ئارىلاشماڭلار، ئۇ نومۇستا قالسۇن»،— دېگەن. ئەگەر قېرىنداشلار تەرتىپنى بۇزغان كىشى باردى-كەلدى قىلماسلىقنى قارار قىلسا، بەلكىم ئۆزىنىڭ قىلغانلىرىدىن نومۇس ھېس قىلىپ، ئۆز يولىدىن يېنىپ ئۆزگەرتىشى مۇمكىن.—2-سالونىكا. 3:14، 15.
بۈگۈنكى كۈندە مەسىھ ئەگەشكۈچىلىرى پاۋلۇسنىڭ نەسىھەت سۆزىگە قانداق قۇلاق سالالايدۇ؟ بىرىنچى، ئەگەر بىز كىمدۇر بىرىگە «دىققەت قىلىپ» يۈرۈش كېرەكلىكىنى ھېس قىلساق، ئۇنىڭ ھەقىقەتەن ئەلچى پاۋلۇس ئېيتقاندەك «تەرتىپنى بۇزۇۋاتقان» بىرى ئىكەنلىكىگە كۆز يەتكۈزۈشىمىز كېرەك. ئەلچى پاۋلۇس بۇ يەردە ۋىجدانى ياكى شەخسەن بىرىنى ياقتۇرماسلىق سەۋەبىدىن پەرقلىق قارار چىقىرىدىغان كىشىلەر توغرۇلۇق سۆز قىلمىغان. ئۇ كۆڭلىمىزنى ئاغرىتقان ياكى بىزنى خاپا قىلغان كىشىلەر توغرۇلۇق ھەم سۆز قىلمىغان. ئۇ ئەمەلىيەتتە خۇدانىڭ سۆزىدىكى كۆرسەتمىلەرنى ئېنىق بىلىپ تۇرۇپ، ئۇنىڭغا قۇلاق سالمىغان كىشىلەر توغرۇلۇق سۆز قىلغان.
بۈگۈنكى كۈندە ئەگەر بىر قېرىنداشنىڭ داۋاملىق مۇقەددەس كىتابتىكى نەسىھەت سۆزىگە بويسۇنمايۋاتقانلىقىنى بايقىساقa، ئۇنىڭ بىلەن ئارىلىشىپ باردى-كەلدى قىلىش-قىلماسلىقنى ياكى كۆڭۈل كۆتۈرىدىغان ئولتۇرۇشلاردا جەم بولۇش-بولماسلىقنى ھەربىرىمىز شەخسەن ئۆزىمىز قارار قىلىمىز. بىز قارارنى ئۆزىمىز شەخسەن چىقارغاچقا، ئۆز ئۆيىمىزدىكى ئۇرۇق-تۇغقانلىرىمىزدىن سىرت، باشقىلار كىشىلەر بىلەن بۇ ئىشنى مۇھاكىمە قىلمايمىز. ئۇنىڭدىن باشقا، بىز شۇنداق كىشى بىلەن جامائەت ئىبادەت يىغىلىشلىرى ۋە ۋەز خىزمەتتە داۋاملىق بىللە بولىمىز. ئەگەر ئۆز كۆز قارىشى ۋە ئىش-ھەرىكىتىنى ئۆزگەرتكەندە، ئۇنىڭ بىلەن قايتا باردى-كەلدى قىلىپ ئارىلىشىپ ئۆتىمىز.
a مەسىلەن، بەزى مەسىھ ئەگەشكۈچىسى جېنىنى بېقىش ئۆزىنىڭ قولىدىن كەلسىمۇ، ئىشلەشنى رەت قىلىشى، ئېتىقادچى بولمىغان بىرى بىلەن ئۇچرىشىشقا چىقىپ مۇھەببەتلىشىپ يۈرۈشى، جامائەتتە بۆلۈنۈش پەيدا قىلىدىغان گەپ-سۆزلەرنى ياكى غەيۋەت-شىكايەتلەرنى تارقىتىشى مۇمكىن (1-كورىنت. 7:39؛ 2-كورىنت. 6:14؛ 2-سالونىكا. 3:11، 12؛ 1-تىموت. 5:13). داۋاملىق شۇنداق ئىشلارنى قىلغۇچىلارنىڭ ھەممىسى «تەرتىپنى بۇزۇۋاتقان» كىشىلەردۇر.