تەتقىق قىلىش ئۇسۇللىرى
تەتقىق قىلىپ ئوقۇغاندا، يېڭى نەرسىلەرنى ئۆگىنىشكە تىرىشىڭ
تەتقىق قىلىپ ئوقۇشتىن ئاۋۋال: «بۈگۈن نېمىنى ئۆگىنەلەيمەن؟» دەپ ئۆزىڭىزدىن سوراپ بېقىڭ. لېكىن ئېسىڭىزدە بولسۇنكى، يەھۋا سىزگە ئۆزىڭىزمۇ كۈتمىگەن يېڭى نەرسىلەرنى ئۆگىتىشنى خالىشى مۇمكىن. شۇڭا، ھەر دائىم يېڭى نەرسىلەرنى ئۆگىنىشكە تەييار بولۇڭ. يەھۋانىڭ بىزگە نېمىنى ئۆگەتمەكچى بولغانلىقىنى قانداق بىلەلەيمىز؟
دانالىق سوراپ دۇئادا قىلىڭ. تەتقىق قىلىپ ئوقۇغاندا، يەھۋا ھازىر سىزنىڭ نېمىنى ئۆگىنىشىڭىزنى خالايدىغانلىقىنى كۆرۈپ يېتىشىڭىز ئۈچۈن ياردەم سوراپ دۇئا قىلىڭ (ياقۇپ 1:5). پەقەت ئاللىقاچان ئۆگەنگەنلىرىڭىز بىلەن شۈكۈر-قانائەت قىلىپ قالماڭ.—پەند. نە 3:5، 6.
مۇقەددەس كىتابنىڭ ھاياتىڭىزغا تەسىر قىلالايدىغان زور كۈچى بار لىقىنى ئۇنتۇماڭ. «خۇدانىڭ سۆزى تىرىك» (ئىبرانىي. 4:12). مۇقەددەس كىتابنى ھەر قېتىم ئوقۇغىنىمىزدا، خۇدانىڭ تىرىك «سۆزى» بىزگە يېڭى نەرسىلەرنى ئۆگىتىپ، تۇرمۇشىمىزنىڭ ھەر ساھەسىدە بىزگە تەسىر قىلىشى مۇمكىن. لېكىن، بىز چوقۇم خۇدانىڭ بىزگە تەلىم بېرىشىگە مۇھتاج ئىكەنلىكىمىزنى چۈشەنگەندىلا، خۇدانىڭ سۆزى بىزگە تەسىر قىلىدۇ.
يەھۋا خۇدانىڭ داستىخىنىدىكى ھەربىر نازۇنېمەتلەرنى قەدىرلەڭ. يەھۋا ئىشەنچىمىزنى كۈچەيتىدىغان مول روھىي ئوزۇق بىلەن راسلىغان داستىخاننى كاتتا «زىياپەت» بىلەن سېلىشتۇرۇشقا بولىدۇ (يەشايا 25:6). شۇڭا، تاماق تاللىماي، يەنى سىز ياخشى كۆرمەيدىغان ماۋزۇلارنى تەتقىق قىلىپ ئۆگىنىشتىن ئۆزىڭىزنى قاچۇرماڭ. شۇنداق قىلسىڭىز، خۇدانىڭ ياخشىراق ئادەم بولۇشىڭىزغا ياردەم بېرىشىگە يول قويىسىز ۋە ئۇنىڭ سۆزىنى تەتقىق قىلىپ ئۆگىنىشتىن ھەقىقىي زوق ئالىسىز.