15-بۆلەك
بىر پەيغەمبەرنىڭ كەلگۈسى توغرىسىدىكى غايىبانە كۆرۈنۈشلەرنى كۆرۈشى
دانىيال پەيغەمبەرنىڭ، خۇدا پادىشاھلىقى ۋە مەسىھنىڭ كېلىشى توغرىسىدا بېشارەت بېرىشى؛ بابىلوننىڭ ئىشغال قىلىنىشى
دانىيال يېرۇسالېم ۋەيران قىلىنىشتىن ئىلگىرى بابىلونغا ئەسىر قىلىنىپ ئېلىپ كېتىلگەن، خۇداغا بولغان ساداقىتى ئالاھىدە بىر ياش ئىدى. ئۇ ۋە بەزى باشقا يەھۇدىيلار جەڭدە مەغلۇپ بولغان جەنۇبىي پادىشاھلىقتىن ئەسىرلىككە تۇتۇپ كېتىلگەن ئىدى. بىراق، ئەسىرلىككە تۇتۇپ كەتكۈچىلەر ئۇلارغا بەزى ئەركىنلىكلەرنى بەردى. دانىيال ئەسىر بولۇپ ياشىغان ئۇزۇن يىللار داۋامىدا، ئۇ خۇدا تەرىپىدىن كۆپ بەرىكەتلەشكە ئېرىشتى. ھەتتا، شىر ئۆڭكۈرىدە ئۆلۈمدىن قېچىپ قۇتۇلدى ۋە خۇدادىن كەلگەن يىراق كەلگۈسى توغرىسىدىكى غايىبانە كۆرۈنۈشلەرنى كۆردى. دانىيال پەيغەمبەرنىڭ ئەڭ مۇھىم بېشارەتلىرى ئاساسلىقى مەسىھ ۋە ئۇنىڭ ھۆكۈمرانلىقىغا مەركەزلەشكەن ئىدى.
دانىيال پەيغەمبەرنىڭ، مەسىھنىڭ قاچان مەيدانغا كېلىشىدىن خەۋەردار بولۇشى. يېرۇسالېمنىڭ شەھەر تاملىرىنى قايتا قوپۇرۇش بۇيرۇقى چۈشكەندىن باشلاپ، 69 يىل ھەپتىسى ئۆتكەندىن كېيىن، خۇدانىڭ خەلقى كۈتۈپ كەلگەن مەسىھنىڭ مەيدانغا كېلىدىغانلىقى دانىيال پەيغەمبەرگە ئاشكارا قىلىنغان ئىدى. ئادەتتە، بىر ھەپتە يەتتە كۈن بولغاندەك، بىر يىل ھەپتىسى يەتتە يىل بولغان. دانىيال ئۆلۈپ نۇرغۇن يىللار ئۆتكەندىن كېيىن، يەنى مىلادىدىن ئىلگىرىكى 455-يىلى ئاشۇ بۇيرۇق چۈشۈرۈلگەن. شۇ ۋاقىتتىن باشلاپ، 483 يىل يەنى 69 «ھەپتە» ئۆتۈپ، مىلادى 29-يىلدا ئاخىرلاشقان. ئاشۇ يىلى نېمە ئىش يۈز بەرگەنلىكى توغرىسىدا، كېيىنرەك مۇشۇ كىتابچىدا كۆرۈپ ئۆتىمىز. دانىيال پەيغەمبەر يەنە گۇناھنىڭ يۇيۇلۇشى ئۈچۈن مەسىھنىڭ ‹يوقىتىلىشى› يەنى ئۆلتۈرۈلىشى ھەققىدە بېشارەت ئېيتقان ئىدى.—دانىيال 9:24–26.
مەسىھنىڭ ئاسماندا پادىشاھ بولۇشى. دانىيال پەيغەمبەر، ئاسماندىكى ئاجايىپ بىر غايىبانە كۆرۈنۈشتە، خۇدانىڭ تەختىگە يېقىنلاشقان «ئىبن ئادەمگە [ئىنسان ئوغلىغا] ئوخشاش بىر كىمەرسە [كىشى]» دەپ تىلغا ئېلىنغان مەسىھنى كۆرگەن ئىدى. يەھۋا مەسىھكە «سەلتەنەت، جالال [ئۇلۇغلۇق] ۋە پادىشاھلىق» بەرگەن ئىدى. ئاشۇ پادىشاھلىق مەڭگۈ مەۋجۇت بولىدۇ. دانىيال پەيغەمبەر، مەسىھنىڭ پادىشاھلىقى توغرىسىدا باشقا بىر ئاجايىپ تەپسىلاتلارنى، يەنى پادىشاھ بىلەن ‹ھەقتائالا [يۇقىرى مەرتىۋىلىك ئاللا] نىڭ مۇقەددەسلىرى› دەپ تىلغا ئېلىنغان بىر توپ كىشىلەرنىڭ بىرلىكتە ھۆكۈمرانلىق قىلىدىغانلىقىنى كۆرۈپ يەتكەن ئىدى.—دانىيال 7:13، 14، 27.
پادىشاھلىقنىڭ بۇ دۇنيادىكى بارچە ھۆكۈمەتلەرنى يوق قىلىشى. خۇدا دانىيال پەيغەمبەرگە، بابىلون پادىشاھى نېبۇقادنىسارنىڭ كۆڭلىنى بىئارام قىلغان بىر چۈشكە تەبىر بېرىش قابىلىيىتىنى بەرگەن ئىدى. پادىشاھ چۈشىدە بېشى ئالتۇن، كۆكرەك ۋە بىلەكلىرى كۈمۈش، قۇرساق ۋە يوتىلىرى مىس، پاچاقلىرى تۆمۈر، پۇتلىرى تۆمۈر ۋە لاينىڭ ئارىلاشمىسى بولغان بىر ھەيكەلنى ۋە تاغدىن دومىلاپ چۈشكەن بىر تاشنىڭ ئاشۇ ھەيكەلنىڭ ئاسان سۇنىدىغان پۇتىغا سوقۇلۇپ، ئۇنى كۇكۇم تالقان قىلىۋەتكەنلىكىنى كۆرگەن. دانىيال پەيغەمبەر ھەيكەلنىڭ ھەرقايسى بۆلەكلىرى، ئالتۇن باش بولغان بابىلوندىن باشلانغان دۇنيا كۈچلىرىنىڭ ئالمىشىشىغا سىموۋول قىلىنغان دەپ چۈشەندۈرگەن ئىدى. دانىيال يەنە بۇ رەزىل دۇنيانىڭ ئەڭ ئاخىرقى كۈچلىرى ھۆكۈمرانلىق يۈرگۈزگەن دەۋردە، خۇدا پادىشاھلىقىنىڭ ھەرىكەتكە كېلىدىغانلىقىنى ئالدىن كۆرۈپ يەتكەن ئىدى. ئۇ پادىشاھلىق بۇ دۇنيادىكى بارچە ھۆكۈمەتلەرنى يوق قىلاتتى. شۇنىڭدىن كېيىن، ئۇ پادىشاھلىق مەڭگۈ ھاكىمىيەت يۈرگۈزەتتى.—دانىيال 2-باب.
دانىيال پەيغەمبەر ناھايىتى قېرىپ كەتكەن بولسىمۇ، ئۇ بابىلوننىڭ ئىشغال قىلىنغانلىقىنى ئۆز كۆزى بىلەن كۆرگىچە ھايات ياشىغان ئىدى. دەل پەيغەمبەرلەر بېشارەت بەرگەندەك، پادىشاھ كۇرس بابىلون شەھىرنى ئىشغال قىلدى. ئۇزۇن ئۆتمەي، دەل بېشارەتتە ئېيتىلغاندەك ئۇلارنىڭ يۇرتى 70 يىل قاقاس-چۆل تاشلىۋېتىلگەندىن كېيىن، يەھۇدىيلار ئەسىرلىكتىن ئازاد قىلىندى. ساداقەتمەن ۋالىيلار، روھانىيلار ۋە پەيغەمبەرلەرنىڭ يول باشچىلىقى ئاستىدا، يەھۇدىيلار ئەڭ ئاخىردا يېرۇسالېمنى قايتا بىنا قىلىپ، يەھۋانىڭ ئىبادەتخانىسىنى قايتا ياسىغان ئىدى. ئۇنداقتا، ئاشۇ 483 يىل ئۆتۈپ كەتكەندىن كېيىن، نېمە ئىش يۈز بەردى؟
—دانىيال كىتابىغا ئاساسەن.