15-دەرس
ئاقساقاللار جامائەت ئۈچۈن قانداق خىزمەت قىلىدۇ؟
فىنلاندىيە
تەلىم بېرىش
پادىدىن خەۋەر ئېلىش
تەشكىلاتىمىزدا مۇئاش ئالىدىغان دىنىي ئۇستازلار يوق. ئەكسىنچە، بىرىنچى ئەسىردىكى مەسىھ ئەگەشكۈچىلىرى جامائىتىگە ئوخشاش، بۈگۈنكى كۈندە تەلەپكە لايىق بولغان يېتەكچىلەر ‹خۇدانىڭ جامائەتچىلىكىنى بېقىشقا› تەيىنلەنگەن (ئەلچىلەر 20:28). شۇ ئاقساقاللار ئىمان-ئېتىقادتا پىشىپ يېتىلگەن ئەر ئېتىقادچىلاردۇر. ئۇلار «مەجبۇرەن ئەمەس، بەلكى . . . رازىمەنلىك بىلەن قىلىڭلار؛ پۇل تېپىش ئۈچۈن ئەمەس، قىزغىنلىق بىلەن قىلىڭلار» دېگەن نەسىھەتكە قۇلاق سېلىپ، كۆيۈمچان پادىچىلاردەك جامائەتنى باقىدۇ ۋە يېتەكلەيدۇ (1-پېترۇس 5:1–3). ئۇلار بىز ئۈچۈن قانداق خىزمەت قىلىدۇ؟
ئۇلار بىزگە كۆڭۈل بۆلىدۇ ۋە بىزنى ھىمايە قىلىدۇ. ئاقساقاللار جامائەتنى روھىي جەھەتتىن يېتەكلەيدۇ ۋە ھىمايە قىلىپ ياردەم بېرىدۇ. خۇدانىڭ ئۇلارغا ئىشىنىپ بۇ مۇھىم خىزمەتنى تاپشۇرغانلىقىنى بىلىدۇ. شۇڭا، ئاقساقاللار خۇدانىڭ خەلقىگە ھۆكۈمرانلىق قىلمايدۇ، ئەكسىچە ئۇلارنىڭ بەخت-سائادەت ۋە خۇشاللىق تېپىشىغا ياردەم بېرىدۇ (2-كورىنتلىقلار 1:24). خۇددى بىر پادىچى ئېھتىيات بىلەن ھەربىر قويىدىن خەۋەر ئالغىنىدەك، ئاقساقاللار جامائەتتىكى ھەربىر ئېتىقادچىنى ئوبدان بىلىش ئۈچۈن تىرىشىدۇ. — پەندى-نەسىھەت 27:23.
ئۇلار بىزگە خۇدانىڭ ئىرادىسىنى قانداق ئورۇنداشنى ئۆگىتىدۇ. ئاقساقاللار ھەر ھەپتىسى جامائەت يىغىلىشلىرىدا ئىمان-ئېتىقادىمىزنى مۇستەھكەملەش ئۈچۈن تەلىم بېرىدۇ (ئەلچىلەر 15:32). شۇ جان كۆيدۈرەر ئەر قېرىنداشلار خۇش خەۋەر يەتكۈزۈشكە باشچىلىق قىلىپ، ۋەز خىزمىتىدە ھەر جەھەتتىن تەربىيىلىنىشىمىز ئۈچۈن بىز بىلەن بىرگە خىزمەت قىلىدۇ.
ئۇلار بىزگە ئىلھام بېرىدۇ. ئاقساقاللار روھىي ئېھتىياجلىرىمىزدىن خەۋەر ئېلىش ئۈچۈن بىزنى ئۆيىمىزدە ياكى پادىشاھلىق زالىدا يوقلاپ، مۇقەددەس كىتابقا ئاساسەن بىزگە تەسەللىي ۋە ياردەم بېرىدۇ. — ياقۇپ 5:14، 15.
كۆپلىگەن ئاقساقاللارنىڭ جامائەتتىكى خىزمەتتىن باشقا، تۇرمۇشىنى قامدايدىغان خىزمىتى ۋە ئائىلە مەسئۇلىيەتلىرى بار. شۇلارمۇ ئۇلارنىڭ ۋاقىت چىقىرىشىنى ۋە ئېتىبار بېرىشنى تەلەپ قىلىدۇ. شۇ جاپاكەش قېرىنداشلىرىمىز ھەقىقەتەن چوڭقۇر ھۆرمىتىمىزگە سازاۋەر. — 1-سالونىكالىقلار 5:12، 13.
جامائەتتە ئاقساقاللار نېمە ئىش قىلىدۇ؟
ئاقساقاللار ھەربىرىمىزدىن قانداق خەۋەر ئالىدۇ؟