18-دەرس
ئەيسانىڭ ھەقىقىي ئەگەشكۈچىلىرىنى قانداق ئېنىقلىيالايمىز؟
بۈگۈنكى كۈندە دۇنيادا ئۆزلىرىنى ئەيسانىڭ ئەگەشكۈچىلىرى دەپ ئاتايدىغان مىلياردلارچە ئىنسانلار بار. ئەمما، ئۇلارنىڭ ئىمان-ئېتىقادى پەرقلىق ۋە ئۇلار ئوخشاش ئۆلچەم-قائىدىلەر بىلەن ياشىمايدۇ. ئۇنداقتا، ئەيسانىڭ ھەقىقىي ئەگەشكۈچىلىرىنى قانداق ئېنىقلىيالايمىز؟
1. مەسىھ ئەگەشكۈچىلىرى كىم؟
مەسىھ ئەگەشكۈچىلىرى — ئەيسا مەسىھنىڭ شاگىرتلىرى ياكى ئۇنىڭ ئەگەشكەنلەر (ئەلچىلەر 11:26-نى ئوقۇڭ). ئۇلار ئەيسانىڭ شاگىرتلىرى ئىكەنلىكىنى قانداق كۆرسىتەلەيدۇ. ئەيسا شۇنداق دېگەن: «ئەگەر مېنىڭ تەلىمىم بويىچە ئىش كۆرسەڭلار، مېنىڭ ھەقىقىي شاگىرتلىرىم بولىسىلەر» (يۇھاننا 8:31). دېمەك، ئەيسانىڭ ھەقىقىي شاگىرتلىرى ئۇنىڭ تەلىملىرى بويىچە ئىش قىلىشى كېرەك. خۇددى ئەيسا مۇقەددەس يازمىلارغا ئاساسەن تەلىم بەرگەندەك، ئەيسانىڭ ھەقىقىي ئەگەشكۈچىلىرىنىڭ ئىمان-ئېتىقادىمۇ مۇقەددەس كىتابقا ئاساسلانغان بولىدۇ.—لۇقا 24:27.
2. ئەيسانىڭ ھەقىقىي ئەگەشكۈچىلىرى مېھىر-مۇھەببەتنى قانداق كۆرسىتىدۇ؟
ئەيسا ئۆز ئەگەشكۈچىلىرىگە: «خۇددى مەن سىلەرنى سۆيگەندەك، سىلەرمۇ بىر-بىرىڭلارنى سۆيگۈڭلار»، دېگەن (يۇھاننا 15:12). ئەيسا ئۆز ئەگەشكۈچىلىرىگە قانداق مېھىر-مۇھەببەت كۆرسەتكەن؟ ئۇ ئۇلار بىلەن بىرلىكتە ۋاقىت ئۆتكۈزگەن، ئۇلارغا ئىلھام ۋە ياردەم بەرگەن. ھەتتا، ئۆز ھاياتىنى ئۇلار ئۈچۈن پىدا قىلغان (1-يۇھاننا 3:16). شۇنىڭغا ئوخشاش، ئەيسانىڭ ھەقىقىي ئەگەشكۈچىلىرى مېھىر-مۇھەببەت ھەققىدە سۆزلەپلا قويمايدۇ، بەلكى ئۇلار بىر-بىرىگە بولغان مېھىر-مۇھەببىتىنى گەپ-سۆز ۋە ئىش-ھەرىكەتلىرىدە تەڭ كۆرسىتىدۇ.
3. مەسىھنىڭ ھەقىقىي ئەگەشكۈچىلىرى قايسى خىزمەتكە پۈتۈن دىققىتىنى قاراتقان؟
ئەيسا ئۆز ئەگەشكۈچىلىرىگە خۇدا پادىشاھلىقى ھەققىدىكى خۇش خەۋەرنى ئېيتىش خىزمىتىنى تاپشۇرغان (لۇقا 9:2). ئەيسانىڭ دەسلەپكى ئەگەشكۈچىلىرى پەقەت ئىبادەت قىلىدىغان جايلاردىلا ۋەز قىلىپ قالماي، ئاممىۋىي ئورۇنلاردا ۋە ئۆيدىن-ئۆيگە ئىشىك قېقىپ ۋەز قىلغان (ئەلچىلەر 5:42؛ 17:17-نى ئوقۇڭ). بۈگۈنكى كۈندە ئەيسانىڭ ھەقىقىي ئەگەشكۈچىلىرىمۇ قەيەردە ئادەم بولسا، شۇ يەرگە بېرىپ، مۇقەددەس كىتاب ھەقىقىتىنى يەتكۈزىدۇ. ئۇلار باشقىلارنى سۆيگەچ، ۋاقتىنى ۋە كۈچىنى سەرپ قىلىپ، باشقىلارغا مۇقەددەس كىتابتىكى خۇش خەۋەرنى يەتكۈزۈپ، كىشىلەرگە ئۈمىد ۋە تەسەللى بېرىدۇ.—ماركۇس 12:31.
چوڭقۇرراق قېزىڭ
ئەيسانىڭ ھەقىقىي ئەگەشكۈچىلىرى ۋە ئۆزىنى ئەيسانىڭ ئەگەشكۈچىلىرى دەپ ئاتىۋالغانلار ئارىسىدىكى پەرقنى قانداق كۆرەلەيمىز؟ تەكشۈرۈپ كۆرۈڭ.
4. ئۇلار مۇقەددەس كىتابتىكى ھەقىقەتلەرنى ئىزدەيدۇ
ھەزرىتى ئەيسانىڭ دەسلەپكى ئەگەشكۈچىلىرى خۇدانىڭ سۆزىنى قەدىرلىگەن
ئۆزىنى ئەيسانىڭ ئەگەشكۈچىلىرى دەپ ئاتىۋالغانلارنىڭ ھەممىسىلا مۇقەددەس كىتابتىكى ھەقىقەتنى مۇھىم دەپ قارىمايدۇ. فىلىمنى كۆرۈڭ، كېيىن تۆۋەندىكى سوئال ئۈستىدە ئويلىنىڭ.
ئۆزىنى ئەيسانىڭ ئەگەشكۈچىلىرى دەپ ئاتىۋالغانلار ئادەملەرنىڭ ئەيسا ھەققىدە بىلىم ئېلىشىغا قانداق توسقۇنلۇق قىلغان؟
ئەيسا مۇقەددەس كىتابتىكى ھەقىقەتلەرنى ئۆگەتكەن. يۇھاننا 18:37-نى ئوقۇڭ، كېيىن تۆۋەندىكى سوئالغا جاۋاب بېرىڭ:
ئەيسانى سۆزىگە ئاساسلىنىپ، ھەقىقەتنى چىن تۇتقان ئەيسانىڭ ئەگەشكۈچىلىرىنى قانداق ئېنىقلىيالايمىز؟
5. ئۇلار مۇقەددەس كىتاب ھەقىقەتلىرىنى جاكارلايدۇ
ھەزرىتى ئەيسانىڭ دەسلەپكى ئەگەشكۈچىلىرى باشقىلارغا ۋەز ئېيتقان
ئەيسا ئاسمانغا كۆتۈرۈلۈشتىن ئاۋۋال ئەگەشكۈچىلىرىگە بىر ئىشنى تاپشۇرغان ۋە بۇ ئىش ھازىرمۇ داۋاملىشىۋاتىدۇ. مەتتا 28:19، 20 ۋە ئەلچىلەر 1:8-نى ئوقۇڭ، كېيىن تۆۋەندىكى سوئالغا جاۋاب بېرىڭ:
ۋەز خىزمىتى قانداق كۆلەمدە داۋاملىشىۋاتىدۇ؟
6. ئۇلار ئۆگەتكەنلىرىگە ماس ياشايدۇ
توم ئىسىملىك بىر كىشىنىڭ مىسالىنى كۆرۈپ باقايلى. ئۇ ئەيسانىڭ ھەقىقىي ئەگەشكۈچىلىرىنى تاپقانلىقىغا قانداق ئىشەنگەن؟ فىلىمنى كۆرۈڭ، كېيىن تۆۋەندىكى سوئاللار ئۈستىدە ئويلىنىڭ.
تومنىڭ دىنلاردىن ئۈمىد ئۈزۈشىگە نېمە ئىشلار سەۋەب بولغان؟
ئۇ ئۆزىنىڭ ھەقىقەتنى تاپقانلىقىغا نېمە ئۈچۈن ئىشەنگەن؟
قۇرۇق گەپ-سۆز قىلماي، ئەمەلىي ئىش-ھەرىكەت قىلغان ئەۋزەل. مەتتا 7:21-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
ئۇنىڭغا ئىشەنگىنىمىزنى ئېغىزىدىلا ئېيتىپ قويىمىزمۇ ياكى ئەمەلىي ئىش-ھەرىكىتىمىزدە كۆرسىتىمىزمۇ؟ ئەيسا ئۈچۈن قايسىسى بەكرەك مۇھىم؟
7. ئۇلار بىر-بىرىگە مېھىر-مۇھەببەت كۆرسىتىدۇ
ھەزرىتى ئەيسانىڭ دەسلەپكى ئەگەشكۈچىلىرى بىر-بىرىنى سۆيگەن
ئەيسانىڭ ھەقىقىي ئەگەشكۈچىلىرى خەتەرگە قارىماي، ئۆزىنىڭ قېرىنداشلىرىنى قوغدامدۇ؟ فىلىمنى كۆرۈڭ، كېيىن تۆۋەندىكى سوئاللار ئۈستىدە ئويلىنىڭ.
نېمە ئۈچۈن لويىد قېرىندىشى يوھانسوننى قوغداش ئۈچۈن ھاياتىنى خەتەرگە تەۋەككۈل قىلغان؟
سىزنىڭچە، ئۇ ئەيسانىڭ ھەقىقىي ئەگەشكۈچىسىمۇ؟
يۇھاننا 13:34، 35-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
ئەيسانىڭ ھەقىقىي ئەگەشكۈچىلىرى باشقا مىللەت ياكى ئىرقتىكى كىشىلەرگە قانداق مۇئامىلە قىلىدۇ؟
ئەيسانىڭ ھەقىقىي ئەگەشكۈچىلىرى مېھىر-مۇھەببىتىنى ئۇرۇش مەزگىلىدە قانداق كۆرسىتىدۇ؟
بەزىلەر مۇنداق دەيدۇ: «خرىستىئانلار نۇرغۇن يىرگىنچلىك ئىشلارنى قىلىدۇ. ئۇلارنىڭ دىنى قانداقمۇ توغرا بولسۇن».
ئەيسانىڭ ھەقىقىي ئەگەشكۈچىلىرىنى قانداق ئېنىقلاشقا بولىدىغانلىقىنى باشقىلارغا كۆرستىش ئۈچۈن قايسى ئايەتنى قوللانسىڭىز بولىدۇ؟
خۇلاسە
ئەيسانىڭ ھەقىقىي ئەگەشكۈچىلىرى مۇقەددەس كىتابقا ماس ياشايدۇ، شەخسىيەتچىلىك قىلماي مېھىر-مۇھەببەت كۆرسىتىدۇ ۋە مۇقەددەس كىتاب ھەقىقىتىنى باشقىلارغا ۋەز قىلىدۇ.
تەكرارلاش
ئەيسانىڭ ھەقىقىي ئەگەشكۈچىلىرىنىڭ ئىمان-ئېتىقادى نېمىگە ئاساسلانغان؟
مەسىھنىڭ ھەقىقىي ئەگەشكۈچىلىرى قانداق پەزىلەتنى كۆرسىتىشى كېرەك؟
مەسىھنىڭ ھەقىقىي ئەگەشكۈچىلىرى پۈتۈن دىققىتىنى قايسى خىزمەتكە قارىتىدۇ؟
ئىزدىنىپ كۆرۈڭ
ئەيسانى ئۈلگە قىلىپ، ئۇنىڭ تەلىملىرىگە ماس ياشاش ئۈچۈن تىرىشىۋاتقان بىر توپ كىشىلەر ھەققىدە كۆپرەك بىلىۋېلىڭ.
ئىلگىرى دىنىي خىزمەت قىلغان بىر ئايالنىڭ ھەقىقىي روھىي ئائىلىسىنى قانداق تاپقانلىقىنى بىلىۋېلىڭ.
ئەيسانىڭ ھەقىقىي ئەگەشكۈچىلىرىنىڭ بالايىئاپەتلەرگە ئۇچرىغان قېرىنداشلىرىغا قانداق مېھىر-مۇھەببەت كۆرسىتىدىغانلىقىنى بىلىۋېلىڭ.
«بالايىئاپەتلەردە ئېتىقادداشلىرىمىزغا ياردەم بېرىش — ئۈزۈندە» (57:3)
ئەيسانىڭ دەسلەپكى ئەگەشكۈچىلىرى بىلەن، بۈگۈنكى كۈندىكى ئەيسانىڭ ھەقىقىي ئەگەشكۈچىلىرى ئارىسىدا قانداق ئوخشاش ئالاھىدىلىكلەر بارلىقىنى كۆرۈپ بېقىڭ.