34-تەتقىق ماقالىسى
مۇقەددەس كىتابتىكى بېشارەتلەرنى ئۆگىنىڭ
«دانالار چۈشىنىدۇ».—دانىيال 12:10.
37-ناخشا مۇقەددەس كىتاب — خۇدانىڭ ئىلھامى بىلەن يېزىلغان
بۇ ماقالىدەa
1. بېشارەتلەرنى تەتقىق قىلىشتىن زوق ئېلىشنى ئۆگىنىشىڭىزگە نېمە ياردەم بېرەلەيدۇ؟
بېن ئىسىملىك بىر ياش بۇرادەر: «مەن مۇقەددەس كىتابتىكى بېشارەتلەرنى تەتقىق قىلىشنى ياخشى كۆرۈمەن»،— دەيدۇ. سىزمۇ ياخشى كۆرەمسىز؟ ياكى بېشارەتلەرنى تەتقىق قىلىشنى قىيىن دەپ قارامسىز؟ بېشارەتلەرنى تەتقىق قىلىش زېرىكىشلىك ئىش دەپ ئويلىشىڭىز مۇمكىن. بىراق، يەھۋا ئۇلارنى نېمە ئۈچۈن ئۆزىنىڭ سۆزىگە يازدۇرغانلىقى توغرىسىدا كۆپرەك بىلسىڭىز، كۆز قارىشىڭىزنى ئۆزگەرتىشىڭىز مۇمكىن.
2. بۇ ماقالىدە نېمىلەرنى مۇلاھىزە قىلىمىز؟
2 بۇ ماقالىدە، بىز مۇقەددەس كىتابتىكى بېشارەتلەرنى نېمە ئۈچۈن ۋە قانداق تەتقىق قىلىپ ئۆگىنىشىمىز كېرەكلىكى ھەققىدە مۇلاھىزە قىلىمىز. ئاندىن كېيىن، دانىيال كىتابىدىكى ئىككى بېشارەتنى مۇھاكىمە قىلىپ، ئۇلارنى چۈشىنىش ھازىر بىزگە قانداق ياردەم بېرەلەيدىغانلىقىنى كۆرىمىز.
نېمە ئۈچۈن بېشارەتلەرنى تەتقىق قىلىپ ئۆگىنىشىمىز كېرەك؟
3. بېشارەتلەرنى چۈشەنمەكچى بولساق، نېمە قىلىشىمىز كېرەك؟
3 ئەگەر مۇقەددەس كىتابتىكى بېشارەتلەرنى چۈشەنمەكچى بولساق، ياردەم سورىشىمىز كېرەك. مەسىلەن، مۇنداق بىر ۋەزىيەتنى تەسەۋۋۇر قىلىڭ: سىز ناتونۇش جايغا ساياھەتكە باردىڭىز. ئەمما، ساياھەتكە بىللە بارغان دوستىڭىز ئۇ جاينى ۋە ھەر بىر يول قەيەرگە ئېلىپ بارىدىغانلىقىنى ئېنىق بىلىدۇ. سىز جەزمەن شۇنداق دوست بىلەن ساياھەتكە بارغىنىڭىز ئۈچۈن ئىنتايىن خۇشال بولىسىز. خۇددى مۇشۇنىڭغا ئوخشاش، يەھۋا بىزنىڭ قايسى زاماندا ياشاۋاتقانلىقىمىزنى ۋە ئالدىمىزدا نېمە ئىشلارنىڭ يۈز بېرىدىغانلىقىنى ئېنىق بىلىدۇ. شۇڭا، بېشارەتلەرنى چۈشىنىش ئۈچۈن، كەمتەرلىك بىلەن يەھۋادىن ياردەم سورىشىمىز كېرەك.—دانىيال 2:28؛ 2-پېتر. 1:19، 20.
مۇقەددەس كىتابتىكى بېشارەتلەرنى تەتقىق قىلىش كەلگۈسىدىكى ئىشلارغا تەييارلىق قىلىشىڭىزغا ياردەم بېرەلەيدۇ (4-ئابزاسقا قاراڭ)
4. نېمە ئۈچۈن يەھۋا ئۆز سۆزىدە بېشارەتلەرنى يازدۇرغان؟ (يەرەمىيا 29:11) (رەسىمگە ھەم قاراڭ)
4 كۆيۈمچان ئاتا-ئانىغا ئوخشاش، يەھۋا پەرزەنتلىرىنىڭ گۈزەل كېلەچىكى بولۇشىنى خالايدۇ (يەرەمىيا 29:11-نى ئوقۇڭ). ئەمما، ئىنسانىي ئاتا-ئانىغا ئوخشىمايدىغان يېرى، يەھۋا كېلەچىكىمىز توغرىسىدا ھەممە نەرسىدىن تولۇق خەۋەردار. مۇقەددەس يازمىلاردىكى بېشارەتلەر ئارقىلىق، ئۇ بىزگە كېلەچەكتە يۈز بېرىدىغان مۇھىم ئىش-ۋەقەلەرنى ئالدىن-ئالا بىلدۈرگەن (يەشايا 46:10). شۇڭا، مۇقەددەس كىتابتىكى بېشارەتلەر ئەرشتىكى ئاتىمىزدىن كەلگەن سوۋغات. ئەمما، شۇ ئالدىن ئېيتىلغان سۆزلەرنىڭ ھەقىقەتەن ئەمەلگە ئاشىدىغانلىقىغا قانداق جەزم قىلالايسىز؟
5. ياشلار ماكسنىڭ مىسالىدىن نېمىلەرنى ئۆگىنەلەيدۇ؟
5 مەكتەپتە، ياش قېرىنداشلىرىمىز پات-پات مۇقەددەس كىتابنى ئانچە ھۆرمەتلىمەيدىغان ياكى ئۇنىڭغا سەل قارايدىغان ئادەملەرنىڭ ئارىسىدا بولىدۇ. ئۇلارنىڭ گەپ-سۆزلىرى ۋە ئىش ھەرىكەتلىرى تۈپەيلى، ياش ئېتىقادداشلىرىمىزدا بەزى گۇمانلار پەيدا بولۇشى مۇمكىن. ماكس ئىسىملىك بىر بۇرادەرنىڭ مىسالىنى كۆرۈپ باقايلى. ئۇ مۇنداق دەيدۇ: «مەن مەكتەپتە ئوقۇغاندا، ئاتا-ئانامنىڭ ماڭا ھەقىقىي دىننى ئۆگىتىۋاتقانلىقىغا ۋە مۇقەددەس كىتابنىڭ خۇدادىن كەلگەنلىكىگە گۇمانلىنىشقا باشلىدىم». ئۇنىڭ ئاتا-ئانىسى نېمە قىلغان؟ ماكس مۇنداق دەيدۇ: «ئاتا-ئانام ئىنتايىن غەم قىلغان، بىراق ئۇلار ئۆزىنى بېسىۋېلىپ، تەمكىن ئىنكاس قايتۇرغان». ئاتا-ئانىسى ماكسنىڭ سوئاللىرىغا مۇقەددەس كىتابتىن جاۋاب بەرگەن ۋە ئۇ ئۆزىمۇ جاۋاب تېپىشقا تىرىشقان. ئۇ مۇنداق دەيدۇ: «مۇقەددەس كىتابتىكى بېشارەتلەرنى ئۆزۈم تەتقىق قىلىپ ئۆگەندىم. ئۆگەنگەنلىرىمنى باشقا ياشلار بىلەن مۇھاكىمە قىلدىم. نەتىجىدە، مۇقەددەس كىتابنىڭ خۇدا تەرىپىدىن ئىلھاملاندۇرۇلۇپ يېزىلغانلىقىغا كۆز يەتكۈزدۈم».
6. گۇمان قىلىشقا باشلىغان بولسىڭىز، نېمە قىلىشىڭىز كېرەك ۋە نېمە ئۈچۈن بۇ مۇھىم؟
6 ئەگەر ماكسقا ئوخشاش، سىزمۇ مۇقەددەس كىتابتا ھەقىقەت بارلىقىغا گۇمانلىنىشقا باشلىسىڭىز، ئۆزىڭىزنى گۇناھكار ھېس قىلماڭ. ئەمما، چاپسان ھەرىكەت قىلىشىڭىز زۆرۈر. گۇمان خۇددى داتقا ئوخشايدۇ. ئۇنىڭغا سەل قارىساق، ئۇ ئاستا-ئاستا قىممەتلىك نەرسىلەرنى ھالاك قىلالايدۇ. ئىمان-ئېتىقادىڭىزنى ۋەيران قىلىدىغان ھەرقانداق گۇماننى يوقىتىش ئۈچۈن، ئاۋۋال ئۆزىڭىزدىن: «مۇقەددەس كىتابتىكى كېلەچەك ھەققىدە يېزىلغانلارغا ئىشىنىمەنمۇ؟»— دەپ سوراڭ. ئەگەر ئىشەنمىسىڭىز، ئاللىقاچان ئەمەلگە ئاشقان بېشارەتلەرنى تەتقىق قىلىپ ئۆگىنىشىڭىز كېرەك. ئۇنى قانداق قىلالايدىغانلىقىڭىزنى كۆرۈپ باقايلى.
بېشارەتلەرنى قانداق تەتقىق قىلىش كېرەك؟
دانىيالغا ئوخشاش، يەھۋاغا بولغان ئىشەنچىمىزنى كۈچەيتىش ئۈچۈن، چوقۇم كەمتەرلىك، ئېھتىياتچانلىق ۋە توغرا نىيەت-مەقسەت بىلەن بېشارەتلەرنى ئۆگىنىشىمىز كېرەك (7-ئابزاسقا قاراڭ)
7. بېشارەتلەرنى ئۆگىنىشتە دانىيال بىزگە قانداق ئۈلگە قالدۇرغان؟ (دانىيال 12:10) (رەسىمگە ھەم قاراڭ)
7 بېشارەتلەرنى تەتقىق قىلىپ ئۆگىنىشتە دانىيال ئىنتايىن ياخشى ئۈلگە قالدۇرغان. ئۇ بېشارەتنى توغرا نىيەت-مەقسەت بىلەن ئۆگىنىشكە كىرىشكەن ۋە ھەقىقەتنى بىلىشنى خالىغانىدى. دانىيال يەنە كەمتەر كىشى بولۇپ، يەھۋانىڭ ئەخلاق ئۆلچەملىرى بىلەن ياشايدىغان كىشىلەرگە، ئۇنىڭ ئەقىل پاراسەت بېرىپ، بېشارەتلەرنى چۈشىنىشىگە ياردەم بېرىدىغانلىقىنى كۆرۈپ يەتكەن (دانىيال 2:27، 28؛ دانىيال 12:10-نى ئوقۇڭ). يەھۋانىڭ ياردىمىگە تايىنىش ئارقىلىق، ئۇ ئۆزىنىڭ كەمتەر كىشى ئىكەنلىكىنى كۆرسەتكەن (دانىيال 2:18). دانىيال يەنە ئەستايىدىل بولغان. ئۇ قولىدا بار مۇقەددەس يازمىلارنى تەتقىق قىلىپ ئۆگەنگەن (يەرەم. 25:11، 12؛ دانىيال 9:2). دانىيالنى قانداق ئۈلگە قىلالايسىز؟
8. نېمە ئۈچۈن بەزىلەر بېشارەتلەرنىڭ ئەمەلگە ئاشىدىغانلىقىغا ئىشەنمەيدۇ ۋە بىز نېمە قىلىشىمىز كېرەك؟
8 نىيەت-مەقسەتلىرىڭىزنى تەكشۈرۈڭ. مۇقەددەس كىتابتىكى بېشارەتلەرنى نېمە ئۈچۈن تەتقىق قىلىشنى خالايسىز؟ ھەقىقەتنى چۈشىنىش ئۈچۈنمۇ؟ ئەگەر شۇنداق بولسا، يەھۋا چوقۇم سىزگە ياردەم بېرىدۇ (يۇھاننا 4:23، 24؛ 14:16، 17). بەزى ئادەملەر بېشارەتلەرنى باشقا نىيەت-مەقسەت بىلەن تەتقىق قىلىدۇ. ئۇلارنىڭ مەقسىتى مۇقەددەس كىتاب خۇدادىن كەلمىگەن دېگەن كۆز قاراشلارنى ئىسپاتلاش. ئەگەر ئۇلار شۇ كۆز قاراشلارنى ئىسپاتلىسا، ئۇلار ئۆزلىرى ئۈچۈن نېمە توغرا، نېمە خاتا ئىكەنلىكىنى قارار قىلالايدۇ. ئەمما، بىز توغرا نىيەت-مەقسەتتە تەتقىق قىلىشىمىز لازىم. ئۇنىڭدىن باشقا، بېشارەتلەرنى چۈشىنىش ئۈچۈن مۇھىم بىر پەزىلەتنىڭ بولۇشى زۆرۈر.
9. بېشارەتلەرنى چۈشىنىش ئۈچۈن قانداق پەزىلەت كېرەك؟ چۈشەندۈرۈڭ.
9 كەمتەر بولۇڭ. يەھۋا كەمتەر كىشىلەرگە ياردەم بېرىدىغانلىقىنى ۋەدە قىلىدۇ (ياقۇپ 4:6). شۇڭا، مۇقەددەس كىتابتىكى بېشارەتلەرنى چۈشىنىش ئۈچۈن يەھۋاغا دۇئا قىلىپ، ئۇنىڭدىن ياردەم سورىشىمىز كېرەك. يەنە يەھۋا قوللىنىۋاتقان سادىق قۇلنىڭ ياردىمىگە مۇھتاج ئىكەنلىكىمىزنى ئېتىراپ قىلىشىمىز لازىم (لۇقا 12:42). يەھۋا — تەرتىپلىك خۇدادۇر. شۇڭا، ئۇ ئۆز سۆزىدىكى ھەقىقەتلەرنى چۈشىنىشىمىزگە ياردەم بېرىش ئۈچۈن، پەقەت سادىق قولنى قوللىنىدىغانلىقى ئەقىلگە مۇۋاپىق.—1-كورىنت. 14:33؛ ئەفەس. 4:4–6.
10. ئەستېرنىڭ مىسالىدىن نېمىلەرنى ئۆگىنسىز؟
10 ئەستايىدىل بولۇڭ. ئۆزىڭىزنى قىزىقتۇرغان بىر بېشارەتنى تاللاپ، شۇنى تەتقىق قىلىشنى باشلاڭ. ئەستېر ئىسىملىك قېرىنداش مەسىھنىڭ كېلىشى ھەققىدىكى بېشارەتلەرگە قىزىققان ئىدى. ئۇ مۇنداق دەيدۇ: «مەن 15 ياشقا كىرگەندە، ئاشۇ بېشارەتلەرنىڭ ئەيسا تۇغۇلۇشتىن ئىلگىرى يېزىلغانلىقىنى ئىسپاتلاش ئۈچۈن چوڭقۇر تەتقىق قىلىشنى باشلىدىم». ئەستېر ئۆلۈك دېڭىز ئورام يازمىلىرى ھەققىدە تەكشۈرۈپ تەتقىق قىلىپ، ئۆگەنگەنلىرىگە قايىل بولغاندىن كېيىن مۇنداق دېگەن: «ئۆلۈك دېڭىز ئورام يازمىلىرىنىڭ بەزىلىرى مەسىھ تۇغۇلۇشتىن ئىلگىرىكى دەۋرلەردە يېزىلغان. شۇڭا، ئۇلاردىكى بېشارەتلەر چوقۇم خۇدادىن كەلگەن. بەزى مەزمۇنلارنى چۈشىنىش ئۈچۈن بىرقانچە قېتىم قايتا-قايتا ئوقۇشۇمغا توغرا كەلدى». ئەمما، ئۇ ئۆزىنىڭ كۆرسەتكەن تىرىشچانلىقىدىن خۇشال بولغان. مۇقەددەس كىتابتىكى بىر قاتار بېشارەتلەرنى ئەستايىدىل تەتقىق قىلغاندىن كېيىن، ئۇ مۇنداق دېگەن: «مەن مۇقەددەس كىتابنىڭ ھەقىقەتەن توغرا ئىكەنلىكىگە ئۆزۈم ئېنىق كۆز يەتكۈزدۈم».
11. مۇقەددەس كىتابنىڭ توغرىلىقىغا ئۆزىمىزنى قايىل قىلىشنىڭ بىز ئۈچۈن قانداق پايدىسى بار؟
11 خۇدا سۆزىدىكى بەزى بېشارەتلەرنىڭ ئاللىقاچان ئەمەلگە ئاشقانلىقىنى كۆرگىنىمىزدە، يەھۋا ۋە ئۇنىڭ كۆرسەتمىلىرىگە بولغان ئىشەنچىمىز تېخىمۇ كۈچىيىدۇ. ئۇنىڭدىن باشقا، ھازىر قانداق سىناقلارغا دۇچ كېلىشىمىزدىن قەتئىينەزەر، بېشارەتلەر كېلەچەككە بولغان ئۈمىدىمىزنى ساقلىشىمىزغا ياردەم بېرىدۇ. دانىيال پەيغەمبەر يازغان بېشارەتلەردىن ھازىر ئەمەلگە ئېشىۋاتقان ئىككىسىنى قىسقىچە مۇھاكىمە قىلىپ باقايلى. ئۇلارنى چۈشىنىش دانا قارار چىقىرىشىمىزغا ياردەم بېرەلەيدۇ.
تۆمۈر بىلەن سېغىز لاي ئارىلاشقان پۇت توغرۇلۇق تەتقىق قىلىڭ
12. تۆمۈر بىلەن لاينىڭ ئارىلاشمىسىدىن شەكىللەنگەن پۇت كىمگە ۋەكىللىك قىلىدۇ؟ (دانىيال 2:41–43)
12 دانىيال 2:41–43-نى ئوقۇڭ. دانىيال پەيغەمبەر پادىشاھ نېبۇقادنىسارغا ئۆرۈپ بەرگەن چۈشتە ھەيكەلنىڭ پۇتى تۆمۈر بىلەن سېغىز لاينىڭ ئارىلاشمىسىدىن شەكىللەنگەن ئىدى. دانىيال كىتابى ۋە ۋەھىي كىتابىدىكى باشقا بېشارەتلەر بىلەن بۇ بېشارەتنى سېلىشتۇرۇش ئارقىلىق، شۇ پۇت بۈگۈنكى كۈندە ھۆكۈمرانلىق قىلىۋاتقان ئانگلو-ئامېرىكا دۇنيا كۈچلىرىگە ۋەكىللىك قىلىدىغانلىقىنى كۆرەلەيمىز. دانىيال پەيغەمبەر بۇ دۇنيا كۈچى توغرۇلۇق شۇنداق دېگەن: «ھەم كۈچلۈك تەرىپى، ھەم ئاجىز تەرىپى بولىدۇ». نېمە ئۈچۈن ئاجىز تەرىپى بولىدۇ؟ سەۋەبى، لايغا ۋەكىللىك قىلىدىغان ئاددىي خەلق بۇ دۇنيا كۈچىنىڭ كۈچ-قۇدرىتىنى ئاجىزلاشتۇرىدۇ. شۇڭا، بۇ دۇنيا كۈچى تۆمۈرگە ئوخشاش پۈتۈنلەي كۈچلۈك بولالمايدۇ.b
13. بۇ بېشارەتنى چۈشىنىش قايسى مۇھىم ھەقىقەتلەرنى چۈشىنىشىمىزگە ياردەم بېرەلەيدۇ؟
13 دانىيال تەسۋىرلىگەن غايەت زور ھەيكەلدىن كۆپ نەرسىلەرنى ئۆگىنەلەيمىز. بىرىنچى، ئانگلو-ئامېرىكا دۇنيا كۈچى بىرىنچى ۋە ئىككىنچى دۇنيا ئۇرۇشلىرىدا بەزى جەھەتلەردىن ئۆزىنىڭ كۈچلۈك ئىكەنلىكىنى نامايان قىلىپ كەلگەن ئىدى. مەسىلەن، ئۇ غەلىبە قىلىشتا مۇھىم رول ئوينىغان. بىراق، بۇ دۇنيا كۈچىنىڭ قۇدرىتى ئاجىزلىشىپ كېتىۋاتىدۇ. چۈنكى، خەلق ئۈزلۈكسىز بىر-بىرى بىلەن زىددىيەتلىشىپ، ھەتتا دائىم ھۆكۈمەتلەرگە قارشى چىقىدۇ. شۇڭا، بۇ دۇنيا كۈچىنىڭ كۈچ-قۇدرىتى ئاجىزلاشقان ۋە بۇ ۋەزىيەت يەنىلا داۋاملاشماقتا. ئىككىنچى، خۇدا پادىشاھلىقى بارلىق ئىنسانىي ھۆكۈمەتلەرنى يوق قىلىشتىن بۇرۇن، بۇ ئىتتىپاق ئەڭ ئاخىرقى دۇنيا كۈچى بولۇپ تۇرىدۇ. گەرچە باشقا دۆلەتلەر بەزىدە ئانگلو-ئامېرىكا دۇنيا كۈچىگە قارشى جەڭ ئېلان قىلسىمۇ، ئەمما ئۇنىڭ ئورنىنى ئالالمايدۇ. چۈنكى، خۇدا پادىشاھلىقىغا ۋەكىللىك قىلىدىغان تاش ھەيكەلنىڭ پۇتىنى ۋەيران قىلىدىغانلىقىنى بىلىمىز.—دانىيال 2:34، 35، 44، 45.
14. تۆمۈر ۋە لاينىڭ ئارىلاشمىسىدىن شەكىللەنگەن پۇت توغرىسىدىكى بېشارەتنى چۈشىنىش، دانا قارارلارنى چىقىرىشىمىزغا قانداق ياردەم بېرەلەيدۇ؟
14 دانىيال كىتابىدىكى تۆمۈر بىلەن سېغىز لاينىڭ ئارىلاشمىسىدىن شەكىللەنگەن پۇت توغرىسىدىكى بېشارەتلەرنىڭ توغرىلىقىغا ئىشىنەمسىز؟ ئەگەر شۇنداق بولسا، بۇ ھايات كەچۈرۈش تەرزىڭىزگە تەسىر كۆرسىتىدۇ. سىز بۇ رەزىل دۇنيانىڭ يوق قىلىنىدىغانلىقى بىلگەچكە، دىققىتىڭىزنى كۆپ پۇل تېپىشقا ياكى ماددىي نەرسىلەرنى توپلاشقا قاراتمايسىز (لۇقا 12:16–21؛ 1-يۇھاننا 2:15–17). بۇ بېشارەتنى چۈشىنىش ۋەز ئېيتىش ۋە تەلىم-تەربىيە خىزمىتىنىڭ مۇھىملىقىنى كۆرۈپ يېتىشىڭىزگە ياردەم بېرىدۇ (مەتتا 6:33؛ 28:18–20). بۇ بېشارەتنى تەتقىق قىلغاندىن كېيىن، ئۆزىڭىزدىن شۇنداق سوئال سوراپ كۆرۈڭ: «چىقارغان قارارلىرىم خۇدا پادىشاھلىقى پات-يېقىندا بارلىق ئىنسانىي ھاكىمىيەتلەرنى پۈتۈنلەي يوق قىلىدىغانلىقىغا ئىشىنىدىغانلىقىمنى كۆرسىتەمدۇ؟»
شىمال پادىشاھى ۋە جەنۇب پادىشاھى سىزگە قانداق تەسىر قىلىدۇ؟
15. بۈگۈنكى كۈندە شىمال ۋە جەنۇب پادىشاھلىرى كىملەر؟ (دانىيال 11:40)
15 دانىيال 11:40-نى ئوقۇڭ. دانىيال كىتابى 11-بابتا ئىككى پادىشاھلىق تىلغا ئېلىنغان. ئۇلار ئەڭ قۇدرەتلىك دۇنيا كۈچى ئورنىغا ئۆتۈش ئۈچۈن كۈرەش قىلىۋاتقان سىياسىي كۈچلەر. مۇقەددەس كىتابتىكى بۇ بېشارەت بىلەن باشقا بېشارەتلەرنى سېلىشتۇرۇش ئارقىلىق، شىمال پادىشاھى روسىيە ۋە ئۇنىڭ ئىتتىپاقداشلىرى، جەنۇب پادىشاھى ئانگلو-ئامېرىكا دۇنيا كۈچى دەپ بىلىۋالىمىز.c
شىمال پادىشاھى بىلەن جەنۇب پادىشاھى توغرىسىدىكى بېشارەتلەرنىڭ ئەمەلگە ئېشىشىنى چۈشەنسەك، ئىمان-ئېتىقادىمىزنى كۈچەيتىپ، ئارتۇق غەم-ئەندىشە قىلمايمىز (16–18-ئابزاسلارغا قاراڭ)
16. شىمال پادىشاھى ھۆكۈمرانلىق قىلىۋاتقان جايلاردا قېرىنداشلىرىمىز قانداق سىناقلارغا دۇچ كېلىۋاتىدۇ؟
16 شىمال پادىشاھى ھۆكۈمرانلىق قىلىدىغان جايلاردا خۇدا خەلقى بۇ پادىشاھنىڭ بىۋاسىتە زىيانكەشلىككە ئۇچراۋاتىدۇ. بەزى ئېتىقادداشلار ئېتىقادى سەۋەبلىك ئۇرۇپ سوقۇلىۋاتىدۇ ياكى تۈرمىگە تاشلىنىۋاتىدۇ. بىراق، بۇ ئىشلار قېرىنداشلىرىمىزنى قورقۇتۇشنىڭ ئورنىغا، ئىمان-ئېتىقادىنى تېخىمۇ كۈچەيتمەكتە. نېمە ئۈچۈن؟ چۈنكى، قېرىنداشلىرىمىز دانىيال پەيغەمبەرنىڭ خۇدا خەلقىنىڭ زىيانكەشلىككە ئۇچرىشى ھەققىدىكى بېشارەتلىك سۆزلىرىنىڭ ئەمەلگە ئېشىۋاتقانلىقىنى چۈشىنىدۇd (دانىيال 11:41). بۇنى بىلىش، يەھۋاغا بولغان ساداقەتمەنلىكىمىزنى ۋە ئۇ چوقۇم ئۈمىدىمىزنى ئەمەلگە ئاشۇرىدىغانلىقىغا بولغان ئىشەنچىمىزنى تېخىمۇ كۈچەيتىدۇ.
17. جەنۇب پادىشاھى ھۆكۈمرانلىق قىلىۋاتقان جايلاردا قېرىنداشلىرىمىز قانداق سىناقلارغا دۇچ كېلىۋاتىدۇ؟
17 ئۆتمۈشتە جەنۇب پادىشاھى ھەم يەھۋانىڭ خەلقىگە بىۋاسىتە ھۇجۇم قىلغان. مەسىلەن، 20-ئەسىرنىڭ ئالدىنقى يېرىمىدا نۇرغۇن قېرىنداشلار بىتەرەپلىكنى ساقلىغىنى ئۈچۈن تۈرمىگە تاشلانغان ۋە بەزى گۇۋاھچىلارنىڭ بالىلىرى شۇ سەۋەبتىن مەكتەپتىن قوغلانغان. بىراق، يېقىنقى نەچچە ئون يىلدا جەنۇب پادىشاھىنىڭ ھۆكۈمرانلىقى ئاستىدىكى يەھۋا گۇۋاھچىلىرى باشقىچە سىناقلارغا دۇچ كېلىۋاتىدۇ. مەسىلەن، سايلام تەشۋىقاتى ئېلىپ بېرىلىۋاتقان مەزگىلدە، مەسىھ ئەگەشكۈچىسى بىر پارتىيىنى ياكى بىر نامزاتنى باشقىلارغا قارىغاندا ياخشىراق دېگەن ئوي-پىكىر ياكى ھېس-تۇيغۇدا بولۇشى مۇمكىن. بىراق، شۇنى ئۇنتۇماسلىقىمىز كېرەككى، پەقەت ئىش-ھەرىكەتلىرىمىزدىلا ئەمەس، بەلكى ئوي-پىكىرلىرىمىز ۋە ھېس-تۇيغۇلىرىمىزدا ھەم بىتەرەپلىكنى ساقلىشىمىز مۇھىم.—يۇھاننا 15:18، 19؛ 18:36.
18. شىمال پادىشاھى بىلەن ئۇنىڭ دۈشمىنى ئوتتۇرىسىدىكى توقۇنۇشقا قانداق ئىنكاس قايتۇرىمىز؟ (رەسىمگە ھەم قاراڭ)
18 مۇقەددەس كىتابتىكى بېشارەتلەرگە ئىشەنمەيدىغان كىشىلەر جەنۇب پادىشاھى بىلەن شىمال پادىشاھى توقۇنۇشقانلىقىنى كۆرگەندە، ئۇلار ئىنتايىن ئەنسىرەپ كېتىشى مۇمكىن (دانىيال 11:40). ھەر ئىككى پادىشاھلىقىنىڭ يەر يۈزىدىكى بارلىق مەۋجۇداتلارنى يوق قىلالايدىغان يادرو قوراللىرى بار. ئەمما، يەھۋا ئۇلارنىڭ بۇنداق قىلىشىغا يول قويمايدىغانلىقىنى بىلىمىز (يەشايا 45:18). شۇڭا، شىمال پادىشاھى بىلەن جەنۇب پادىشاھى ئوتتۇرىسىدىكى دۈشمەنلىشىش بىزنى غەم-ئەندىشىگە سېلىشنىڭ ئورنىغا، ئىمان-ئېتىقادىمىزنى كۈچەيتىدۇ. بۇ مۇشۇ رەزىل دۇنيانىڭ پات-ئارىدا يوق قىلىدىغانلىقىنى ئېنىق ئىسپاتلايدۇ.
بېشارەتلەرگە داۋاملىق دىققەت قىلىڭ
19. مۇقەددەس كىتابتىكى بېشارەتلەر ھەققىدە چوقۇم نېمىنى ئېتىراپ قىلىشىمىز كېرەك؟
19 بىز مۇقەددەس كىتابتىكى بەزى بېشارەتلەرنىڭ قانداق ئەمەلگە ئاشىدىغانلىقىنى بىلمەيمىز. ھەتتا دانىيال پەيغەمبەرمۇ ئۆزىنىڭ يازغانلىرىنىڭ ھەممىسىنىڭ مەنىسىنى چۈشەنمىگەن (دانىيال 12:8، 9). ئەمما، بىر بېشارەتنىڭ قانداق ئەمەلگە ئاشقانلىقىنى تولۇق چۈشەنمىسەك، ئۇنىڭ ئەمەلگە ئاشمايدىغانلىقىنى بىلدۈرمەيدۇ. يەھۋانىڭ خۇددى ئىلگىرىكىگە ئوخشاش، مۇۋاپىق ۋاقىت-سائەتتە بېشارەتلەرنى چۈشىنىشىمىزگە ياردەم بېرىدىغانلىقىغا ئىشىنەلەيمىز.—ئاموس 3:7.
20. ھاياجانغا سالىدىغان قايسى بېشارەتلەر پات-ئارىدا ئەمەلگە ئاشىدۇ ۋە نېمە قىلىشىمىز كېرەك؟
20 پات-ئارىدا تىنچلىق ۋە بىخەتەرلىك ئېلان قىلىنىدۇ (1-سالونىكا. 5:3). ئاندىن دۇنيادىكى سىياسىي كۈچلەر يالغان دىنغا ھۇجۇم قىلىپ، ئۇلارنى پۈتۈنلەي يوق قىلىدۇ (ۋەھىي. 17:16، 17). ئاندىن كېيىن، ئۇلار خۇدانىڭ خەلقىگە ھۇجۇم قىلىدۇ (ھەزەك. 38:18، 19). مۇشۇ ئىشلار ئەڭ ئاخىرقى جەڭ ئارماگېدون ئۇرۇشىغا يول ئاچىدۇ (ۋەھىي. 16:14، 16). شۇنىڭغا ئىشىنىمىزكى، بۇ ئىشلار پات-ئارىدا يۈز بېرىدۇ. ئەمما، شۇلار يۈز بېرىشتىن ئاۋۋال، مۇقەددەس كىتابتىكى بېشارەتلەرگە داۋاملىق دىققەت قىلىپ، باشقىلارنىڭمۇ شۇنداق دىققەتچان بولۇشىغا ياردەم بېرەيلى. شۇنداق قىلىش ئارقىلىق ئاسماندىكى مېھىر-شەپقەتلىك ئاتىمىزغا بولغان مىننەتدارلىقىمىزنى بىلدۈرەلەيمىز.
43-ناخشا ھوشيار تۇر، چىڭ تۇر ۋە قەيسەر بول!
a دۇنيانىڭ ۋەزىيىتى قانچىلىك ناچارلىشىپ كېتىۋاتقان بولسىمۇ، مۇقەددەس كىتابتىكى بېشارەتلەرنى ئۆگىنىش ئارقىلىق بىزنى گۈزەل كېلەچەك كۈتۈپ تۇرغانلىقىغا ئىشىنەلەيمىز. بېشارەتلەرنى نېمە ئۈچۈن ئۆگىنىشىمىز كېرەكلىكىنىڭ بەزى سەۋەبلىرى توغرۇلۇق مۇھاكىمە قىلىمىز. يەنە دانىيال پەيغەمبەر يېزىپ قالدۇرغان ئىككى بېشارەتنى قىسقىچە مۇھاكىمە قىلىپ، ئۇلارنى چۈشىنىشنىڭ بىز ئۈچۈن قانداق پايدىسى بارلىقىنى كۆرىمىز.
b «كۈزىتىش مۇنارى» 2012-يىل، 15-ئىيۇن سانى، «يەھۋا ‹يېقىندا نېمە بولىدىغانلىقىنى› ئېچىپ بېرىدۇ» ناملىق ماقالىنىڭ 7–9-ئابزاسلىرىغا قاراڭ.
c «كۈزىتىش مۇنارى» 2020-يىل، ماي سانى، «بۈگۈنكى كۈندە ‹شىمال پادىشاھى› كىم؟» ناملىق ماقالىدىكى 3، 4-ئابزاسلىرىغا قاراڭ.
d «كۈزىتىش مۇنارى» 2020-يىل، ماي سانىدىكى «بۈگۈنكى كۈندە ‹شىمال پادىشاھى› كىم؟» ناملىق ماقالىدىكى 7–9 ئابزاسلىرىغا قاراڭ.