چۆمۈلدۈرۈلۈش مۇراسىمىدىن ئۆتۈش — مەسىھ ئەگەشكۈچىلىرى ئۈچۈن شەرت
«ھازىرمۇ سۇغا چۆمدۈرۈش... سىلەرنى... قۇتقۇزىدۇ» (پېترۇسنىڭ 1-خېتى 3:21).
1، 2. ئا) بالىلىرى چۆمۈلدۈرۈلۈش مۇراسىمىدىن ئۆتۈشنى خالىغاندا، بەزى ئاتا-ئانىلار ئۆزىنى قانداق ھېس قىلىدۇ؟ ئە) نېمە ئۈچۈن چۆمدۈرۈلمەكچى بولغانلاردىن يەھۋاغا ئۆزىڭىزنى بېغىشلىدىڭىزمۇ دەپ سورايدۇ؟ (ماقالىنىڭ بېشىدىكى رەسىمگە قاراڭ.)
مارىيا ئىسىملىك قىزنىڭ ئاتا-ئانىسى ئۇنىڭ چۆمۈلدۈرۈلۈش مۇراسىمىدىن ئۆتمەكچى بولۇۋاتقانلار بىلەن بىرگە ئورنىدىن تۇرغانلىقىنى كۆردى. نۇتۇق ئېيتقۇچى ئىككى سوئالنى سورىغاندا، مارىيا ئۈنلۈك ئاۋازدا ئېنىق جاۋاب بەردى ھەمدە ئۇ چۆمۈلدۈرۈلۈش مۇراسىمىدىن ئۆتتى.
2 ئاتا-ئانىسى ھاياتىنى يەھۋاغا بېغىشلاپ، چۆمۈلدۈرۈلۈشتىن ئۆتكەن قىزى مارىيادىن بەكمۇ پەخىرلەندى. ئەمما، ئىلگىرى ئاپىسى ئازىراق ئەنسىرىگەن ئىدى. ئۇ: «قىزىم چۆمۈلدۈرۈلۈشتىن ئۆتۈش ئۈچۈن تېخى كىچىك ئەمەسمۇ؟ ئۇ يەھۋاغا ئۆزىنى بېغىشلاشنىڭ قانچىلىك مۇھىم قارار ئىكەنلىكىنى چۈشىنەمدۇ؟ بەلكىم، يەنە بىراز ۋاقىت كۈتكىنى توغرىمۇ؟»— دەپ ئويلانغانىدى. بالىلىرى چۆمۈلدۈرۈلۈش مۇراسىمىدىن ئۆتۈشنى خالىغاندا، كۆپلىگەن مېھرىبان ئاتا-ئانىلاردا مۇنداق سوئاللار پەيدا بولىدۇ (ۋەز 5:5). سەۋەبى، يەھۋاغا ئۆزىنى بېغىشلاپ، چۆمۈلدۈرۈلۈشتىن ئۆتۈش — ئىنساننىڭ ھاياتىدىكى ئەڭ مۇھىم قارار. («يەھۋا خۇداغا ئۆزىڭىزنى بېغىشلىدىڭىزمۇ؟» ناملىق رامكىغا قاراڭ.)
3، 4. ئا) چۆمۈلدۈرۈلۈش مۇراسىمىدىن ئۆتۈشنىڭ بەك مۇھىم ئىكەنلىكىنى ئەلچى پېترۇس قانداق كۆرسەتتى؟ ئە) نېمە ئۈچۈن ئەلچى پېترۇس چۆمۈلدۈرۈلۈشتىن ئۆتۈشنى نۇھنىڭ كېمە ياسىشى بىلەن سېلىشتۇرغان؟
3 ئەلچى پېترۇس چۆمۈلدۈرۈلۈشتىن ئۆتۈشنى نۇھنىڭ كېمە ياسىشى بىلەن سېلىشتۇرغان. ئۇ مۇنداق دېگەن: «شۇنىڭغا ئوخشاش، ھازىرمۇ سۇغا چۆمۈلدۈرۈش... سىلەرنى... قۇتقۇزىدۇ» (پېترۇسنىڭ 1-خېتى 3:20، 21نى ئوقۇڭ). كېمە — نۇھ خۇدانىڭ ئىرادىسىنى ئورۇنداشنى چىن يۈرەكتىن خالايدىغانلىقىنىڭ ئىسپاتى بولغان. نۇھ يەھۋانىڭ تاپشۇرۇقىنى ئىشەنچلىك ئورۇندىغان. مۇستەھكەم ئېتىقادى تۈپەيلىدىن يەھۋا نۇھ ۋە ئۇنىڭ ئائىلىسىنى ئامان قالدۇردى. ئۇنداقتا، ئەلچى پېترۇس نېمە دېمەكچى بولغانىدى؟
4 ئادەملەر كېمىگە قاراپ، نۇھنىڭ خۇداغا ئىشىنىدىغانلىقىنى ئېنىق كۆرگەن. شۇنىڭغا ئوخشاش، ئادەملەر بىرسىنىڭ چۆمۈلدۈرۈلۈشتىن ئۆتمەكچى بولغانلىقىنى كۆرگەندە، ئۇ ئەيسانىڭ تۆلەم قۇربانلىقىغا ۋە ئۇنىڭ تىرىلگەنلىكىگە ئىشىنىپ، ھاياتىنى خۇداغا بېغىشلىغانلىقىنى چۈشىنىدۇ. نۇھقا ئوخشاش، چۆمۈلدۈرۈلۈش مۇراسىمىدىن ئۆتكەنلەر خۇداغا ئىتائەت قىلىدۇ ۋە ئۇنىڭ تاپشۇرغان ئىشلىرىنى ئورۇندايدۇ. نۇھنى توپان سۈيىدىن قۇتقۇزغىنىدەك، يەھۋا بۇ رەزىل دۇنيا ۋەيران قىلىنغاندا چۆمۈلدۈرۈلگەن سادىق خىزمەتچىلىرىنى ئامان قالدۇرىدۇ (ماركۇس 13:10؛ ۋەھىي 7:9، 10). بەك ئېنىقكى، يەھۋاغا ھاياتىمىزنى بېغىشلاپ، چۆمۈلدۈرۈلۈش مۇراسىمىدىن ئۆتۈش ناھايىتى مۇھىم. بۇنى كەينىگە سۈرۈۋەرسەك، مەڭگۈ ياشاش پۇرسىتىدىن ئايرىلىپ قېلىشىمىز مۇمكىن.
5. بۇ ماقالىدە قايسى سوئاللارغا قاراپ چىقىمىز؟
5 بىز چۆمۈلدۈرۈلۈشتىن ئۆتۈشنىڭ قانچىلىك مۇھىم ئىكەنلىكىنى بىلدۇق. ئەمدى كېيىنكى ئۈچ سوئالنىڭ جاۋابىنى قاراپ چىقايلى: مۇقەددەس كىتابتا چۆمۈلدۈرۈلۈش توغرىسىدا نېمە ئېيتىلغان؟ چۆمۈلدۈرۈلۈشتىن ئۆتۈشتىن ئاۋۋال قانداق قەدەم-باسقۇچلارنى بېسىش كېرەك؟ مۇقەددەس كىتابنى تەتقىق قىلغۇچىلارغا ياكى بالىلىرىمىزغا تەلىم بەرگەندە، نېمە ئۈچۈن چۆمۈلدۈرۈلۈشتىن ئۆتۈشنىڭ مۇھىملىقىنى ئېسىگە سېلىپ تۇرۇش لازىم؟
مۇقەددەس كىتابتا چۆمۈلدۈرۈلۈش توغرىسىدا نېمە ئېيتىلغان؟
6، 7. ئا) يەھيا قىلغان چۆمۈلدۈرۈلۈش مۇراسىمى نېمىنى بىلدۈرگەن؟ ئە) يەھيا قانداق ئىمتىيازغا ئىگە بولغان؟
6 مۇقەددەس كىتابتا، چۆمۈلدۈرگۈچى يەھيا— ئادەملەرنى چۆمۈلدۈرۈشتىن ئۆتكۈزگەن بىرىنچى ئادەم، ئىكەنلىكى تىلغان ئېلىنغان (مەتتا 3:1—6). نېمە ئۈچۈن ئادەملەر ئۇنىڭغا كېلىپ، چۆمۈلدۈرۈلۈش مۇراسىمىدىن ئۆتكەن؟ چۈنكى، شۇ ئادەملەر گۇناھلىرىغا توۋا قىلىپ، ئۆزلىرىنىڭ تەۋرات قانۇنىغا ئىتائەتسىزلىك قىلغانلىقىنى ئىقرار قىلغان. ئەمما، ئۇ ئەڭ مۇھىم بىر چۆمۈلدۈرۈلۈش مۇراسىمىنى قىلغانىدى. يەنى، يەھيا يەھۋا خۇدانىڭ مۇكەممەل ئوغلى ئەيسانى چۆمۈلدۈرۈش ئىمتىيازىغا ئىگە بولغان (مەتتا 3:13—17). ئەيسا مۇكەممەل بولغانلىقتىن، ئۇ توۋا قىلمىسىمۇ بولاتتى (پېترۇسنىڭ 1-خېتى 2:22). ئۇنداقتا، ئەيسا نېمە ئۈچۈن چۆمۈلدۈرۈلۈش مۇراسىمىدىن ئۆتكەن؟ ئۇ ھاياتىنى خۇدانىڭ ئىرادىسىنى ئورۇنداشقا بىغىشلىغانلىقىنى كۆرسەتمەكچى بولغانىدى (ئىبرانىيلارغا 10:7).
7 ئەيسا يەر يۈزىدە ۋەز قىلغاندا، شاگىرتلىرى ئادەملەرنى چۆمۈلدۈرۈلۈشتىن ئۆتكۈزۈشكە باشلىغان (يوھاننا 3:22؛ 4:1، 2). بۇ ئادەملەرمۇ تەۋرات قانۇنىغا قارشى گۇناھ قىلغانلىقىغا توۋا قىلغانلىقتىن، چۆمۈلدۈرۈلۈش مۇراسىمىدىن ئۆتكەن. بىراق، ئەيسا ئۆلۈپ قايتا تىرىلگەندىن كېيىن، ئۇنىڭ شاگىرتى بولۇشنى خالىغانلار باشقا بىر سەۋەب تۈپەيلى چۆمۈلدۈرۈلۈش مۇراسىمىدىن ئۆتكەنىدى.
8. ئا) ئەيسا تىرىلگەندىن كېيىن قانداق بۇيرۇق بەرگەن؟ ئە) نېمە ئۈچۈن مەسىھ ئەگەشكۈچىلىرى چۆمۈلدۈرۈلۈش مۇراسىمىدىن ئۆتۈشى كېرەك؟
8 ئەيسا، مىلادى 33-يىلى تىرىلگەندىن كېيىن، 500دىن ئارتۇق ئادەمگە كۆرۈنگەن. بەلكىم، ئۇلارنىڭ ئىچىدە ئەرلەر، ئاياللار، ھەتتا بالىلارمۇ بولغان. شۇ ۋاقىتتا، ئەيسا بۇ سۆزلەرنى ئېيتقان: «شۇنىڭ ئۈچۈن، بېرىپ پۈتكۈل مىللەتلەرنى مېنىڭ شاگىرتلىرىم قىلىپ يېتىشتۈرۈڭلار. ئۇلارنى خۇدا ئاتا، ئۇنىڭ ئوغلى ۋە مۇقەددەس روھنىڭ نامى بىلەن چۆمۈلدۈرۈپ، مەن سىلەرگە بۇيرىغان بارلىق ئەمرلەرگە بويسۇنۇشنى ئۆگىتىڭلار» (مەتتا 28:19، 20؛ كورىنتلىقلارغا 1-خەت 15:6). ئەيسا ئۆز ئەگەشكۈچىلىرىگە شاگىرتلارنى يېتىشتۈرۈشنى بۇيرىغان. ئۇنىڭ شاگىرتى بولۇشنى، يەنى «بويۇنتۇرۇغىنى» ئېلىپ يۈرۈشنى خالىغان ئادەملەر چۆمۈلدۈرۈلۈش مۇراسىمىدىن ئۆتۈشى كېرەك (مەتتا 11:29، 30). خۇدانى خۇرسەن قىلىدىغان خىزمەت قىلماقچى بولغان ئادەم، ئۇنىڭ نىيىتى ئەيسا ئارقىلىق ئەمەلگە ئاشىدىغانلىقىنى ئېتىراپ قىلىشى لازىم. كېيىن، ئۇ خۇدانىڭ ماقۇللىقى بىلەن چۆمدۈرۈلۈش مۇراسىمىدىن ئۆتەلەيدۇ. ئەيسانىڭ بىرىنچى ئەسىردىكى ئەگەشكۈچىلىرى چۆمۈلدۈرۈلۈش مۇراسىمىدىن ئۆتۈشنىڭ مۇھىملىقىنى چۈشەنگەنلىكى مۇقەددەس كىتابتا ئېنىق كۆرۈنۈپ تۇرىدۇ. ئۇلار چۆمۈلدۈرۈلۈشتىن كېيىنىرەك ئۆتۈمىز دەپ، ئۇنى ئارقىغا سۈرمىگەنىدى (ئەلچىلەر 2:41؛ 9:18؛ 16:14، 15، 32، 33).
چۆمۈلدۈرۈلۈشتىن ئۆتۈشنى كەينىگە سۈرمەڭ
9، 10. ئىفىئوپىيىلىك كىشى بىلەن سائۇلنىڭ مىساللىرىدىن نېمىنى ئۆگىنەلەيمىز؟
9 ئەلچىلەر 8:35، 36نى ئوقۇڭ. بىر كۈنى يەھۇدىي دىنىنى قوبۇل قىلغان ئىفىئوپىيلىك كىشى يېرۇسالىمدىكى ئىبادەتخانىدىن چىقىپ، ئۆيىگە كېلىۋاتاتتى. يەھۋانىڭ پەرىشتىسى فىلىپنى بۇ كىشىگە «ئەيسا توغرىسىدا خۇش خەۋەرنى ئېيتىشقا» ئەۋەتكەن. شۇ چاغدا ئىفىئوپىيلىك كىشى نېمە قىلغان؟ ئۇ ئەيسانى رەب سۈپىتىدە تونۇشىنىڭ قانچىلىك مۇھىم ئىكەنلىكىنى چۈشىنىپ، يەھۋانىڭ مەسىھ ئەگەشكۈچىلىرىگە قويغان تەلەپلىرىنى ئورۇنداش ئۈچۈن كەينىگە سۈرمەي چۆمۈلدۈرۈلۇشتىن ئۆتكەنىدى.
10 ئەمدى سائۇل دېگەن يەھۇدىي كىشىنىڭ ۋەقەسىنى قاراپ باقايلى. ئەمەلىيەتتە، ئىسرائىل خەلقى خۇداغا بېغىشلانغان خەلق بولغان. سائۇل يەھۇدىيلار تېخىغىچە خۇداغا توغرا ئىبادەت قىلىۋاتىدۇ دەپ ئويلاپ، ئەيسانىڭ شاگىرتلىرىغا زىيانكەشلىك قىلغان. بىراق، ئىسرائىل خەلقى ئىتائەتسىزلىك قىلغانلىقتىن، يەھۋا ئۇلارنى رەت قىلغان. شۇ ۋاقىتتا، سائۇل ئەيسانى ئۆلدى دەپ ئويلىغان. بىراق، بىر كۈنى تىرىلگەن ئەيسانىڭ ئۆزى ئاسماندىن سائۇلغا گەپ قىلغان. شۇ ۋاقىتتا سائۇل نېمە قىلغان؟ ئۇ ھانانىيا ئىسىملىك ئېتىقادچىنىڭ ياردىمىنى خۇشاللىق بىلەن قوبۇل قىلغان. مۇقەددەس كىتابتا: «ئورنىدىن تۇرۇپ، چۆمۈلدۈرۈلۈشتىن ئۆتتى»،— دەپ يېزىلغان (ئەلچىلەر 9:17، 18؛ گالاتىلىقلارغا 1:14). كېيىنرەك سائۇل ئەلچى پاۋلۇس دەپ تونۇلغانىدى. بايقىسىڭىز، ئۇ خۇدا ئۆز ئىرادىسىنى ئەيسا ئارقىلىق ئەمەلگە ئاشۇرىدىغانلىقىنى چۈشەنگەندە، كەينىگە سۈرمەي چۆمۈلدۈرۈلۈشتىن ئۆتكەن (ئەلچىلەر 22:12—16 ئوقۇڭ).
11. ئا) بۈگۈنكى كۈندە مۇقەددەس كىتابنى تەتقىق قىلغانلارنى چۆمۈلدۈرۈلۈشتىن ئۆتۈشكە نېمە دەۋەت قىلىدۇ؟ ئە) بىرسى چۆمۈلدۈرۈلگەندە، بىز قانداق ھېس-تۇيغۇدا بولىمىز؟
11 بۈگۈنكى كۈندىمۇ مۇقەددەس كىتابنى تەتقىق قىلىۋاتقانلار، ياش بولسۇن، ياشانغان بولسۇن، شۇنداق قىلماقتا. ئۇلار مۇقەددەس كىتابتا ئېيتىلغانلارنى ياخشى كۆرگەنلىكتىن ۋە ئىشەنگەنلىكتىن، ھاياتىنى يەھۋاغا بېغىشلاپ، چۆمدۈرۈلۈشتىن ئۆتۈۋاتىدۇ. چوڭ يىغىلىشلاردا چۆمۈلدۈرۈلۈشتىن ئۆتىدىغانلار ئۈچۈن نۇتۇق ئېيتىلىدىغان ۋاقىت كىشىنى بەكمۇ ھاياجانلاندۇرىدىغان ئالاھىدە بىر پەيت. مۇقەددەس كىتابنى تەتقىق قىلغۇچىلار ھەقىقەتنى قوبۇل قىلىپ چۆمۈلدۈرۈلۈش مۇراسىمىدىن ئۆتكەندە، يەھۋا گۇۋاھچىلىرى بەك خۇشال بولىشىدۇ. ئاتا-ئانىلارمۇ ئۆز بالىلىرىنى شۇلارنىڭ ئارىسىدا كۆرگەندە شاد-خۇراملىققا تولىدۇ. 2017-يىلدا 284000دىن ئارتۇق ئادەم چۆمۈلدۈرۈلۈشتىن ئۆتۈپ، ئۆز ھاياتىنى يەھۋاغا بېغىشلىغان (ئەلچىلەر 13:48). ئېنىقكى، ئۇلار چۆمۈلدۈرۈلۈشتىن ئۆتۈش مەسىھ ئەگەشكۈچىلىرى ئۈچۈن مۇھىم تەلەپ ئىكەنلىكىنى چۈشىنىدۇ. بىراق، ئۇلار چۆمۈلدۈرۈلۈشتىن ئۆتۈشتىن ئاۋۋال قانداق مۇھىم قەدەم-باسقۇچلارنى باسقان؟
12. مۇقەددەس كىتابنى تەتقىق قىلغۇچىلار چۆمدۈرۈلۈشتىن ئۆتۈشتىن ئاۋۋال قانداق قەدەم-باسقۇچىلارنى بېسىشى كېرەك؟
12 چۆمۈلدۈرۈلۈشتىن ئاۋۋال، مۇقەددەس كىتابنى تەتقىق قىلغۇچىلار خۇدا ھەققىدىكى ھەقىقەتنى، ئۇنىڭ يەر يۈزى بىلەن ئىنسانىيەت ئۈچۈن نېمىنى ئىرادە قىلغانلىقىنى ۋە ئادەملەرنى قۇتقۇزۇش ئۈچۈن نېمە قىلغانلىقىنى بىلىشى كېرەك (تىموتىيغا 1-خەت 2:3—6). ئاندىن ئېتىقادىنى مۇستەھكەملىشى كېرەك. ئېتىقاد ئۇلارنى خۇدانىڭ قانۇنلىرىغا بويسۇنۇشقا ۋە خۇدا ئۆچ كۆرىدىغان نەرسىلەرنى قايتا قىلماسلىققا دەۋەت قىلىدۇ (ئەلچىلەر 3:19). بۇ ناھايىتى مۇھىم، چۈنكى يەھۋا ئۆچ كۆرىدىغان ئىشلارنى قىلىدىغان ئادەملەر ئۆزىنى بېغىشلىسا، ئۇ ئۇلارنى قوبۇل قىلمايدۇ (كورىنتلىقلارغا 1-خەت 6:9، 10). لېكىن، يەنە باشقا مۇھىم قەدەم-باسقۇچلار بار. ھاياتىنى يەھۋاغا بېغىشلىماقچى بولغان ئادەم جامائەت يىغىلىشلىرىغا قاتنىشىشى ۋە مۇنتىزىم ھالدا ۋەز قىلىپ، باشقىلارغا تەلىم بېرىشى كېرەك. بۇ — مەسىھنىڭ ئەگەشكۈچىسى بولۇشنى خالايدىغان ھەركىمگە قويۇلىدىغان تەلەپ (ئەلچىلەر 1:8). ئاۋۋال تەتقىق قىلغۇچى يۇقىرىدا تىلغا ئېلىنغانلارنىڭ ھەممىسىنى قىلىشى كېرەك. ئاندىن كېيىن، شەخسىي دۇئادا ھاياتىنى يەھۋاغا بېغىشلاپ، چۆمۈلدۈرۈلۈش مۇراسىمىدىن ئۆتەلەيدۇ.
تەتقىق قىلغۇچىلار قانداق مەقسەتنى كۆزلەش كېرەك؟
ئادەملەرگە تەلىم بەرگەندە، چۆمۈلدۈرۈلۈشنىڭ مۇھىملىقىنى چۈشىنىشكە ياردەم بېرىش پۇرسىتىنى ئىزدەمسىز؟ (13-ئابزايسقا قاراڭ)
13. باشقىلارغا تەلىم بەرگەندە، ئۇلارنىڭ ھەقىقىي مەسىھ ئەگەشكۈچىسى بولۇشى ئۈچۈن، چۆمۈلدۈرۈلۈشتىن ئۆتۈشى كېرەكلىكىنى نېمە ئۈچۈن ئۇنتۇماسلىقىمىز كېرەك؟
13 بالىلىرىمىزغا ۋە مۇقەددەس كىتابنى تەتقىق قىلىدىغان باشقا ئادەملەرگە بۇ مۇھىم قەدەم-باسقۇچلارنى بېسىشقا ياردەم بەرگەندە، بۇنى يادىمىزدا ساقلايلى: ئەيسانىڭ ھەقىقىي ئەگەشكۈچىسى بولۇشنى خالىغان ئادەم چوقۇم چۆمدۈرۈلۈشتىن ئۆتۈشى لازىم. بۇنى ئۇنتۇمىساق، مۇۋاپىق پەيتى بولغاندا، ئۆزىنى بېغىشلاش ۋە چۆمۈلدۈرۈلشتىن ئۆتۈشنىڭ مۇھىملىقى ھەققىدە ئېيتىشتىن تارتىنمايمىز. بىز بالىلىرىمىزنىڭ ۋە باشقا تەتقىق قىلغۇچىلارنىڭ روھىي جەھەتتىن ئۆسۈپ، چۆمۈلدۈرۈلۈشىنى خالايمىز!
14. نېمە ئۈچۈن بىز ھېچكىمنى چۆمۈلدۈرۈلۈشتىن ئۆتۈشكە مەجبۇرلىمايمىز؟
14 ئەلۋەتتە، ھېچكىم بالىسىنى ياكى تەتقىق قىلغۇچىنى چۆمۈلدۈرۈلۈشتىن ئۆتۈشكە مەجبۇرلىماسلىقى كېرەك. سەۋەبى، يەھۋا خۇدا ھېچكىمنى ئۆزىگە خىزمەت قىلىشقا مەجبۇرلىمايدۇ (يوھاننانىڭ 1-خېتى 4:8). باشقىلارغا تەلىم بەرگەندە، ئۇلارغا يەھۋا بىلەن شەخسىي مۇناسىۋەتنى كۈچەيتىشنىڭ قانچىلىك مۇھىم ئىكەنلىكىنى چۈشىنىشكە ياردەم بېرىشىمىز زۆرۈر. ئەگەر مۇقەددەس كىتابنى تەتقىق قىلغۇچى خۇدا توغرىسىدا ھەقىقەتنى بىلگىنى ئۈچۈن چىن يۈرەكتىن مىننەتدار بولسا ۋە ھەقىقىي ئېتىقادچىلارغا قويۇلىدىغان تەلەپلەرنىڭ ھەممىسىنى ئورۇنداشنى خالىسا، چۆمۈلدۈرۈلۈشتىن ئۆتۈش ئارزۇسى پەيدا بولىدۇ (كورىنتلىقلارغا 2-خەت 5:14، 15).
15، 16. ئا) چۆمدۈرۈلۈشتىن ئۆتۈش ئۈچۈن، ئادەمنىڭ يېشى بەلگۈلگەن ياشتا بولۇشى شەرتمۇ؟ چۈشەندۈرۈپ بېرىڭ. ئە) ئەگەر بىر كىشى باشقا دىندا چۆمۈلدۈرۈلۈشتىن ئۆتسىمۇ، نېمە ئۈچۈن يەھۋا گۇۋاھچىسى بولۇش ئۈچۈن چوقۇم چۆمۈلدۈرۈلۈشتىن ئۆتۈشى كېرەك؟
15 چۆمۈلدۈرۈلۈشتىن ئۆتۈش ئۈچۈن، چوقۇم يېشى بەلگىلەنگەن ياشتا بولۇشى شەرت ئەمەس. ھەركىم ھەر تۈرلۈك بولغانلىقتىن، بەزىلەر باشقىلارغا قارىغاندا روھىي جەھەتتىن چاپسانراق ئۆسىدۇ. نۇرغۇن ئادەملەر ياش چېغىدا چۆمۈلدۈرۈلۈپ، چوڭ بولغاندىمۇ يەھۋاغا سادىق بولۇپ قالىدۇ. يەنە بەزىلەر چوڭراق ياشقا كەلگەندە مۇقەددەس كىتابتىكى ھەقىقەتنى بىلىپ، چۆمدۈرۈلۈشتىن ئۆتىدۇ. ئۇلارنىڭ ئارىسىدا ھەتتا 100 ياشتىن ئاشقانلارمۇ بار!
16 مۇقەددەس كىتابنى تەتقىق قىلىپ يۈرگەن بىر ئايال ئىلگىرى بىرنەچچە دىندا بولۇپ، چۆمۈلدۈرۈلۈش مۇراسىملىرىدىن ئۆتكەن ئىكەن. شۇ سەۋەبتىن، ئۇ ئۆزى بىلەن تەتقىق قىلغان ئېتىقادچىدىن قايتىدىن چۆمۈلدۈرۈلۈشنىڭ ھاجىتى بار-يوقلىقىنى سورىغان. سوئالغا جاۋاب بېرىش ئۈچۈن، قېرىندىشىمىز بىرنەچچە ئايەتنى كۆرسەتكەن. ھېلىقى ئايال 80 ياشقا كىرىپ قالغان بولسىمۇ، مۇقەددەس كىتابتىكى تەلەپلەرنى چۈشەنگەندە، چۆمدۈرۈلۈش مۇراسىمىدىن ئۆتكەن. بۇ ۋەقەدىن نېمىنى ئۆگىنەلەيمىز؟ يەھۋانىڭ ئىرادىسى ھەققىدىكى ھەقىقەتنى بىلسەكلا، ئۇ بىزنىڭ چۆمۈلدۈرۈلۈشىمىزنى قوبۇل قىلىدۇ. شۇڭا، ئەگەر بىرى باشقا دىندا چۆمۈلدۈرۈلگەن بولسىمۇ، يەھۋا گۇۋاھچىسى بولۇش ئۈچۈن چوقۇم چۆمۈلدۈرۈلۈشتىن ئۆتۈشى كېرەك (ئەلچىلەر 19:3—5نى ئوقۇڭ).
17. چۆمدۈرۈلۈش مەراسىمىدىن ئۆتىدىغان كۈنى ئادەم نېمە ھەققىدە ئويلىنىشى كېرەك؟
17 چۆمۈلدۈرۈلۈشتىن ئۆتىدىغان كۈن — خۇشاللىققا چۆمىدىغان بىر كۈن. شۇنداقلا بۇ — ئۆزىنى بېغىشلاش ۋە چۆمۈلدۈرۈلۈشنىڭ مەنىسى ھەققىدە پۇختا ئويلىنىدىغان ۋاقىت. ھەقىقىي ئېتىقادچىلارغا قويۇلىدىغان ھەممە تەلەپنى ئورۇنداش ئۈچۈن كۆپ كۈچ چىقىرىش كېرەك. ئەيسانىڭ شاگىرتلىرى «ئۆزلىرى ئۈچۈن ئەمەس، بەلكى ئۇلارنى دەپ ئۆلگەن ۋە ئۆلۈمدىن تىرىلگەن ئەيسا مەسىھ ئۈچۈن ياشىشى» لازىم. (كورىنتلىقلارغا 2-خەت 5:15؛ مەتتا 16:24).
18. كېيىنكى ماقالىدە قايسى سوئاللارنى مۇھاكىمە قىلىمىز؟
18 بۇ ماقالىدە كۆرگىنىمىزدەك، ھەقىقىي مەسىھ ئەگشكۈچىسى بولۇش ناھايىتى مۇھىم قارار. ماقالىنىڭ بېشىدا تىلغا ئېلىنغان مارىيانىڭ ئاپىسىمۇ مۇشۇ سەۋەبتىن ئازىراق ئەنسىرىگەن. ئاتا-ئانا بولسىڭىز، سىزمۇ مۇنداق ئويلىغانسىز: «بالام چۆمۈلدۈرۈلۈشتىن ئۆتۈشكە ھەقىقەتەن تەييارمۇ؟ ئۆزىنى يەھۋاغا بېغىشلاش ئۈچۈن ئۇنى ياخشى تونۇپ-بىلەمدۇ؟ چۆمۈلدۈرۈلۈشتىن ئاۋۋال بالام ياخشى بىلىم ئېلىپ، ياخشى ئىشقا كىرىشى كېرەكمۇ؟ چۆمۈلدۈرۈلۈشتىن ئۆتكەندىن كېيىن بالام ئېغىر گۇناھ قىلىپ قويسىچۇ؟» مۇشۇ سوئاللارنى كېيىنكى ماقالىدە مۇھاكىمە قىلىپ، ئاتا-ئانىلار چۆمۈلدۈرۈلۈش مۇراسىمىغا قارىتا قانداق توغرا كۆزقاراشتا بولالايدىغانلىقىنى بىلىمىز.