تىنچلىق ئۇنىڭغا قانداق ئېرىشەلەيمىز؟
بۇ قىيىنچىلىققا تولغان دۇنيادا تىنچلىققا ئېرىشىش ناھايىتى تەس. ھەتتا بىزدە تىنچلىق بولسىمۇ، تىنچلىقىمىز ئۇزۇنغا داۋاملاشمايدۇ. بىراق، مۇقەددەس كىتابتا ھەقىقىي ۋە مەڭگۈ داۋاملىشىدىغان تىنچلىققا ئېرىشىشكە نېمە ياردەم بېرىدىغانلىقى ھەققىدە يېزىلغان. باشقىلارنىڭمۇ تىنچلىققا ئېرىشىشىگە قانداق ياردەم بەرسەك بولىدۇ؟
تىنچلىققا ئېرىشىش ئۈچۈن نېمە قىلىشىمىز لازىم؟
ھەقىقىي تىنچلىققا ئىگە بولۇش ئۈچۈن ئۆزىمىزنى خەۋپ-خەتەرسىز ۋە ھىمايىگە ئېرىشكەندەك ھېس قىلىشىمىز مۇھىم. بىز ياخشى دوستلارغا مۇھتاج، بىراق ئەڭ مۇھىمى خۇدا بىلەن زىچ مۇناسىۋەتتە بولۇشىمىز كېرەك. ئۇنداقتا، بۇنىڭ ئۈچۈن نېمە قىلىشىمىز لازىم؟
يەھۋانىڭ قانۇنلىرى ۋە پرىنسىپلىرى بىز ئۈچۈن ھەردائىم پايدىلىق. شۇڭا، بىز ئۇلارغا ئەمەل قىلساق، يەھۋاغا تايانغانلىقىمىزنى ۋە ئۇنىڭ بىلەن دوست بولۇشنى خالايدىغانلىقىمىزنى كۆرسىتىمىز (يەرەمىيا 17:7، 8؛ ياقۇپ 2:22، 23). شۇ چاغدا، يەھۋا بىزگە يېقىنلىشىدۇ ۋە كۆڭۈل خاتىرجەملىكىنى ئاتا قىلىدۇ. يەشايا 32:17-ئايەتتە: «ھەقىقىي ئادالەتنىڭ نەتىجىسى تىنچلىق، ھەقىقىي ئادالەتنىڭ مېۋىسى بولسا تىنچ-خاتىرجەملىك ۋە بىخەتەرلىكتۇر»،— دەپ يېزىلغان. يەھۋاغا چىن يۈرەكتىن ئىتائەت قىلساق، ھەقىقىي تىنچلىققا ئېرىشىمىز.—يەشايا 48:18، 19.
غەم-ئەندىشىلەر خاتىرجەملىكىمىزنى بۇزىدۇ
يەھۋا بىزگە مەڭگۈ داۋام قىلىدىغان تىنچلىققا ئېرىشىشكە ياردەم بېرىدىغان قىممەتباھا سوۋغاتنى بەرگەن. بۇ سوغا — مۇقەددەس روھ.—ئەلچىلەر 9:31.
خۇدانىڭ مۇقەددەس روھى تىنچلىققا ئېرىشىشكە ياردەم بېرىدۇ
ئەلچى پاۋلۇس تىنچلىق «مۇقەددەس روھنىڭ مېۋىسى» ئىكەنلىكىنى ئېيتقان (گالاتىيالىقلار 5:22، 23). شۇڭا تىنچلىققا ئېرىشىشنى خالىساق، مۇقەددەس روھنىڭ بىزنى يېتەكلىشىگە يول بېرىشىمىز كېرەك. بۇنىڭ ئۈچۈن نېمە قىلالايمىز؟
بىرىنچى، خۇدا سۆزىنى ئوقۇشنى كۈندىلىك ئادىتىمىزگە ئايلاندۇرۇشىمىز لازىم (زەبۇر 1:2، 3). بىز ئوقۇغانلىرىمىز ھەققىدە چوڭقۇر مۇلاھىزە قىلغاندا، مۇقەددەس روھ يەھۋانىڭ ھەربىر ئىشقا قانداق كۆز قاراشتا بولىدىغانلىقىنى چۈشىنىشىمىزگە ياردەم بېرىدۇ. مەسىلەن، خۇدانىڭ تىنچلىقنى قانداق ساقلايدىغانلىقى ۋە نېمە ئۈچۈن تىنچلىق ئۇنىڭغا شۇنچە مۇھىم ئىكەنلىكىنى كۆرۈپ يېتەلەيمىز. مۇقەددەس كىتابتا يېزىلغانلارنى كۈندىلىك تۇرمۇشىمىزدا ئىشلەتسەك، تىنچ-خاتىرجەملىكىمىز ئۇزۇنغا داۋاملىشىدۇ.—پەندى-نەسىھەت 3:1، 2.
ئىككىنچى، خۇدادىن مۇقەددەس روھنى سوراپ دۇئا قىلىشىمىز كېرەك (لۇقا 11:13). ئۆزىدىن ياردەم سورىغانلارغا يەھۋا مۇنداق ۋەدە بەرگەن: «ھەرقانداق ئوي-پىكىردىن ئۈستۈن تۇرىدىغان تەڭرىنىڭ تىنچلىقى يۈرەكلىرىڭلارنى ھەم ئەقىللىرىڭلارنى مەسىھ ئەيسادا ساقلايدۇ» (فىلىپىلىكلەر 4:6، 7). يەھۋا بىلەن زىچ مۇناسىۋەتتە بولساق ۋە ئۇنىڭ روھىغا تايانساق، ئۇ بىزنى ھەقىقىي تىنچ-خاتىرجەملىككە ئېرىشتۈرىدۇ.—رىملىقلار 15:13.
مۇقەددەس كىتاب كۆپلىگەن ئادەملەرگە ھاياتىنى ئۆزگەرتىشكە ياردەم بەرگەن. شۇڭا، ئۇلار ھازىر يەھۋا ۋە باشقىلار بىلەن تىنچلىققا ئىگە بولۇپ، كۆڭلى تىنچ-خاتىرجەملىككە ئېرىشتى. بۇ ئۆزگىرىشلەرنى ئۇلار قانداق قىلغان؟
ھەقىقىي تىنچلىققا ئېرىشكەن كىشىلەر
بەزى قېرىنداشلار ھەقىقەتكە كېلىشتىن بۇرۇن ئاسانلا دەرغەزەپكە تولۇپ، ھەتتا زوراۋانلىق قىلغان. بىراق، ئۇلار تىرىشىپ ئۆزلىرىنى ئۆزگەرتكەچكە، ھازىر مېھرىبان، سەۋر-تاقەتلىك ۋە تىنچلىقپەرۋەر ئادەملەرگە ئايلاندىa (ئىزاھاتقا قاراڭ) (پەندى-نەسىھەت 29:22). شۇنداق ئۆزگىرىشلەرنى قىلغان دېيۋىد ۋە رېيچېل ئىسىملىك قېرىنداشلارنىڭ مىساللىرىنى كۆرۈپ چىقايلى.
مۇقەددەس كىتاب قائىدە-پرىنسىپلىرىنى ئىشلەتكەندە ۋە مۇقەددەس روھنى سوراپ دۇئا قىلغاندا، تىنچلىققا ئېرىشەلەيمىز
دېيۋىد ھەقىقەتنى تونۇشتىن بۇرۇن، دائىم باشقىلارنى تەنقىد قىلغان ۋە ئائىلىسىدىكىلەرنى قوپال سۆزلەر بىلەن ھاقارەتلىگەن. ئەمما، ئۇ ئۆزگىرىشى كېرەكلىكىنى تونۇپ يەتكەن. ئۇ تىنچلىققا قانداق ئېرىشتى؟ دېيۋىد: «مەن مۇقەددەس كىتابتىكى پرىنسىپلارنى تۇرمۇشۇمدا ئىشلىتىشكە باشلىدىم. نەتىجىدە ئائىلەمدە بىر-بىرىمىزنى تېخىمۇ ھۆرمەتلەشكە باشلىدۇق»،— دەپ ئېيتتى.
رېيچېلنىڭ كېلىپ چىقىشى ئۇنىڭغا قاتتىق تەسىر قىلغان. ئۇ مۇنداق دەيدۇ: «ھازىرغىچە غەزەپلىنىشنى تاشلاش ئۈچۈن كۈرەش قىلىۋاتىمەن، سەۋەبى مەن كىچىكىمدىن دەرغەزەپكە تولغان ئائىلىدە چوڭ بولغاچقا، شۇنىڭغا ئادەتلەنگەن ئىدىم». رېيچېلنىڭ تىنچلىققا ئېرىشىشىگە نېمە ياردەم بەرگەن؟ يەھۋاغا تايىنىش ۋە دۇئا قىلىش.
دېيۋىد ۋە رېيچېل مۇقەددەس كىتابتىكى قائىدە-پرىنسىپلارنى ئىشلىتىپ ۋە مۇقەددەس روھنىڭ ياردىمىگە تايىنىپ، تىنچلىققا ئېرىشكەن ئادەملەرنىڭ ئارىسىدىكى پەقەت ئىككىسىلا خالاس. دەرغەزەپكە تولغان ئادەملەر ئارىسىدا ياشىساقمۇ، بىز كۆڭۈل خاتىرجەملىكىگە ئېرىشەلەيمىز. يەنە بىز ئائىلە ۋە جامائەت ئەزالىرى بىلەن ئىناق-ئىتتىپاق بولالايمىز. يەھۋا بىزنى كۆپچىلىك بىلەن ئىناق ئۆتۈشكە ئۈندەيدۇ (رىملىقلار 12:18). تىنچ مۇناسىۋەتنى قانداق ساقلاشقا بولىدۇ؟ بىز باشقىلار بىلەن نېمە ئۈچۈن تىنچ-ئىناق مۇناسىۋەتتە بولۇشىمىز كېرەك؟
باشقىلار بىلەن تىنچلىقتا بولۇشقا تىرىشىڭ
خۇدا پادىشاھلىقى ھەققىدە ۋەز قىلغاندا، ئادەملەرنىڭ تىنچلىققا ئېرىشىشىگە ياردەم بېرىمىز (يەشايا 9:6، 7؛ مەتتا 24:14). كۆپلىگەن ئادەملەر بۇ خەۋەرگە قۇلاق سېلىپ، ئۇنى قوبۇل قىلغان. نەتىجىدە ئۇلار بۇ دۇنيادا بولۇۋاتقان قىيىنچىلىقلار تۈپەيلى غەزەپلەنمەيدۇ ۋە ياردەمسىز قالغاندەك ھېس قىلمايدۇ. ئەكسىچە، ئۇلار ھازىر كېلەچەككە زور ئۈمىد بىلەن قارايدۇ ۋە بۇ ئۇلارنى «تىنچ-ئامانلىقنى ئىزدەشكە» دەۋەت قىلىدۇ.—زەبۇر 34:14.
لېكىن، بەزى ئادەملەر بۇ خەۋەرنى بىرىنچى قېتىم ئاڭلىغاندا ئۇنى ئانچە ياقتۇرۇپ كەتمەيدۇ (يۇھاننا 3:19). مەيلى ئادەملەر قانداق ئىنكاس قايتۇرسۇن، خۇدا مۇقەددەس روھنى بىز ئۈچۈن ياردەمگە ئەۋەتكەچكە، بىز تىنچ-خاتىرجەملىكنى ساقلاپ، ھۆرمەت بىلەن باشقىلارغا خۇش خەۋەرنى ئېيتىمىز. شۇنداق قىلىپ، بىز ئەيسانىڭ نەسىھىتىگە ماس ھەرىكەت قىلىمىز. ئۇ: «ئۆيگە كىرگەندە، ئۆي ئىچىدىكىلەرگە ئامانلىق تىلەڭلار. ئەگەر ئاشۇ ئۆي-ماكان لايىق بولسا، سىلەر ئۇنىڭغا تىلىگەن تېچلىق-ئامانلىق ئۇنىڭغا كەلسۇن، ئەكسىچە لايىق بولمىسا، تىلىگەن ئامانلىقىڭلار سىلەرگە قايتسۇن»،— دېگەن (مەتتا 10:11—13). بۇ نەسىھەتكە قۇلاق سالساق، باشقىلار نېمە ئېيتسۇن ياكى نېمە قىلسۇن، تىنچلىقنى ساقلاپ، شۇ ئادەملەرگە كېيىنرەك يەنە خۇش خەۋەرنى ئېيتىشقا پۇرسەت قالدۇرىمىز.
بىز ھەردائىم تىنچلىقنى ساقلاشقا تىرىشىمىز، ھەتتا پائالىيىتىمىزگە قارشى بولغان ھۆكۈمەت ئەمەلدارلىرى بىلەن سۆزلەشكەندە، ئۇلارنى ھۆرمەتلەيمىز. مەسىلەن، ئافرىقىدىكى بىر دۆلەتتە ھۆكۈمەت ئىبادەت ئۆيىنى سېلىشقا رۇخسەت بەرمىگەن. قېرىنداشلىرىمىز بۇ قىيىنچىلىقنى تىنچ يول بىلەن ھەل قىلىش كېرەكلىكىنى بىلگەن. بىر قېرىنداش ئافرىقىدىكى مۇشۇ دۆلەتتە بۇرۇن مىسسىئونېر بولۇپ خىزمەت قىلغانىدى. قېرىنداشلار ئۇنى شۇ دۆلەتنىڭ لوندوندىكى ئەلچىخانىسىغا ئەۋەتكەن ئىدى. قېرىندىشىمىز ئەلچىگە يەھۋا گۇۋاھچىلىرى ئۆز پائالىيەتلىرىنى كىشىلەر ئارىسىدا تىنچلىقنى راۋاجلاندۇرۇش ئۈچۈن قىلىۋاتقانلىقىنى چۈشەندۈرگەن.
بۇ قېرىنداش مۇنداق دەيدۇ: «قوبۇلخانىغا كىرگەندە، شۇ يەردە ئولتۇرغان ئايالنىڭ كىيىمىگە قاراپ، ئۇنىڭ قايسى قەبىلىدىن ئىكەنلىكىنى بىلدىم. مەن ئۇلارنىڭ تىلىنى ئۆگەنگەن. شۇڭا، مەن ئۇنىڭغا ئانا تىلىدا سالام بەردىم. ئۇ ھەيران بولۇپ: ‹سىز نېمە مەقسەتتە كەلدىڭىز؟›— دەپ سورىدى. مەن ئۇنىڭغا سىلىق-سىپايىلىك بىلەن، ئەلچى بىلەن كۆرۈشۈشكە كەلگەنلىكىمنى ئېيتتىم. بۇ ئايال ئەلچىگە تېلېفون قىلدى. ئەلچى مېنىڭ ئالدىمغا چىقىپ، ئۆز ئانا تىلىدا سالام بەردى. شۇنىڭدىن كېيىن، يەھۋا گۇۋاھچىلىرىنىڭ تىنچلىقنى ئالغا سۈرىدىغان پائالىيەتلىرى ھەققىدە كۆپرەك مەلۇمات بەردىم. ئۇ مېنى دىققەت بىلەن تىڭشىدى».
قېرىندىشىمىز بىلەن سۆھبەتلەشكەندىن كېيىن، ئەلچى پائالىيەتلىرىمىز ھەققىدە سەلبىي كۆز قارىشىنى ئۆزگەرتكەن. كۆپ ئۆتمەي شۇ دۆلەتتىكى ھۆكۈمەت ئۆز قارارىنى ئۆزگەرتىپ، ئىبادەت ئۆيلىرىنى سېلىشقا رۇخسەت قىلدى. قېرىنداشلار شاد-خۇراملىققا چۆمدى! ھەقىقەتەن، باشقىلارغا ھۆرمەت كۆرسەتسەك، تىنچلىقنى ساقلاشقا ئۆز ھەسسىمىزنى قوشالايمىز.
تىنچلىقتىن مەڭگۈ ھۇزۇرلىنىمىز
بۈگۈنكى كۈندە يەھۋانىڭ خەلقى تىنچ-خاتىرجەملىكتە ئۇنىڭغا ئىبادەت قىلىپ، روھىي جەننەتتىن ھۇزۇرلىنىۋاتىدۇ. بۇ تىنچلىققا ھەسسىمىزنى قوشۇش ئۈچۈن، ھەرقايسىمىز تىنچ-خاتىرجەم ھايات كەچۈرۈشكە تىرىشىشىمىز كېرەك. شۇندىلا، خۇدانى خۇرسەن قىلالايمىز ۋە كەلگۈسى يېڭى دۇنيادا ئۇ بىزنى مەڭگۈلۈك تىنچ-خاتىرجەملىككە ئېرىشتۈرىدۇ.—2-پېترۇس 3:13، 14.
a «مۇقەددەس روھنىڭ مېۋىسى» دېگەن ماۋزۇدىكى بىر قاتار ماقالىلەرنىڭ كېيىنكىسىدە مېھرىبانلىقنى مۇھاكىمە قىلىمىز.