-
ئاخىر زاماندىكى «شىمال پادىشاھى»كۈزىتىش مۇنارى. 2020 | ماي
-
-
19-تەتقىق ماقالىسى
ئاخىر زاماندىكى «شىمال پادىشاھى»
«زامان ئاخىرى بولغاندا جەنۇب پادىشاھى ئۇنىڭغا [شىمال پادىشاھىغا] ھۇجۇم قىلىدۇ».—دانىيال 11:40.
49-ناخشا يەھۋا — بىزنىڭ پاناھگاھىمىز
بۇ ماقالىدەa
1. مۇقەددەس كىتابتىكى پەيغەمبەرلىك سۆزلەردىن نېمىلەرنى بىلەلەيمىز؟
پات يېقىندا يەھۋا خۇدانىڭ خەلقى قانداق ۋەقەلەرگە دۇچ كېلىدۇ؟ بىز بۇ سوئالنىڭ جاۋابىنى بىلىمىز. مۇقەددەس كىتابتا خۇدانىڭ خەلقى زىيانكەشلىككە دۇچ كېلىدىغانلىقى توغرۇلۇق ئالدىن-ئالا يېزىلغان. مەسىلەن، دانىيال كىتابىنىڭ 11-بابىدىكى پەيغەمبەرلىك سۆزلەردىن ئەڭ كۈچلۈك ئىنسانىي ھۆكۈمەتلەرنىڭ نېمە قىلىدىغانلىقىنى بىلەلەيمىز. بۇ بابتا بىر-بىرىگە قارىمۇ-قارشى بولغان ئىككى كۈچلۈك ھۆكۈمەت، يەنى جەنۇب ۋە شىمال پادىشاھلىرىنىڭ تارىخى توغرۇلۇق يېزىلغان. بۇ پەيغەمبەرلىك سۆزىنىڭ تەڭدىن تولىسى ئەمەلگە ئېشىپ بولغان. شۇڭا، ئۇنىڭ قالغان قىسىملىرىمۇ ئەمەلگە ئاشۇرۇلىدىغانلىقىغا ئىشەنچىمىز كامىل.
2. يارىتىلىش 3:15 ۋە ۋەھىيلەر 11:7؛ 12:17-ئايەتلەردە يېزىلغاندەك، دانىيال يازغان پەيغەمبەرلىك سۆزلەرنى تەتقىق قىلغاندا، نېمىنى يادىمىزدا تۇتۇشىمىز كېرەك؟
2 دانىيال كىتابىنىڭ 11-بابىدىكى پەيغەمبەرلىك سۆزلەرنى چۈشىنىش ئۈچۈن، بىر نەرسىنى يادىمىزدا تۇتۇشىمىز لازىم: بۇ ئايەتلەردە پەقەت خۇدانىڭ خەلقىگە بىۋاسىتە تەسىر قىلغان ھۆكۈمرانلار ھەققىدە ئېيتىلىدۇ. خۇدانىڭ خەلقىنى دۇنيادىكى ئىنسانىيەت بىلەن سېلىشتۇرغاندا، سانى بەك ئاز بولسىمۇ، نېمە ئۈچۈن ئۇلار ھۆكۈمەتلەرنىڭ نىشانىغا ئايلانغان؟ سەۋەبى، شەيتان ۋە ئۇنىڭ تۈزۈلمىسىنىڭ ئاساسىي مەقسىتى — يەھۋا ۋە ئەيساغا خىزمەت قىلىدىغانلارنى بىتچىت قىلىشتۇر (يارىتىلىش 3:15 ۋە ۋەھىيلەر 11:7؛ 12:17-نى ئوقۇڭ). يادىمىزدا تۇتىدىغان يەنە بىر نەرسە — دانىيال كىتابىدىكى بېشارەت مۇقەددەس كىتابتىكى باشقىمۇ بېشارەتلەرگە ماس كېلىشى كېرەك. دانىيال يازغان پەيغەمبەرلىك سۆزلەرنى توغرا چۈشىنىش ئۈچۈن، ئۇنى يازمىلاردىكى باشقا ئايەتلەر بىلەن سېلىشتۇرۇش مۇھىم.
3. مۇشۇ ۋە كېيىنكى ماقالىدە نېمىنى كۆرۈپ چىقىمىز؟
3 بۇ ماقالىدە، دانىيال 11:25—39-ئايەتلەرنى كۆرۈپ چىقىمىز. 1870-يىلدىن 1991-يىلغىچە جەنۇب پادىشاھى ۋە شىمال پادىشاھىنىڭ كىم بولغانلىقىنى ۋە پەيغەمبەرلىك سۆزلەرنىڭ بۇ قىسىمىغا مۇناسىۋەتلىك چۈشەنچىمىزنى نېمە ئۈچۈن ئۆزگەرتكەنلىكىمىزنى مۇھاكىمە قىلىمىز. كېيىنكى ماقالىدە، دانىيال 11:40—12:1-ئايەتلەرنى ۋە بۇ پەيغەمبەرلىك سۆزلەرنىڭ 1990-يىلدىن باشلاپ، ئارماگېدون ئۇرۇشىغىچە قانداق ئەمەلگە ئاشىدىغانلىقىنى كۆرۈپ چىقىمىز. مۇشۇ ئىككى ماقالىنى ئوقۇغىنىڭىزدا، «ئاخىر زاماندىكى رىقابەتچى پادىشاھلار» دېگەن رامكىنى كۆرسىڭىز بولىدۇ. ئاۋۋال بۇ پەيغەمبەرلىك سۆزلىرىدىكى ئىككى ھۆكۈمران كىمنى بىلدۈرىدىغانلىقىنى كۆرۈپ باقايلى.
«جەنۇب پادىشاھى» ۋە «شىمال پادىشاھى»نى قانداق ئېنىقلاشقا بولىدۇ؟
4. جەنۇب ۋە شىمال پادىشاھلىرىنى ئېنىقلاشقا قانداق ئۈچ نەرسە ياردەم بېرىدۇ؟
4 ئىسرائىلنىڭ جەنۇب ۋە شىمال تەرىپىدە ھۆكۈمرانلىق قىلغان قەدىمقى پادىشاھلار «جەنۇب پادىشاھى» ۋە «شىمال پادىشاھى» دەپ ئاتالغان. نېمە ئۈچۈن شۇنداق ئېيتالايمىز؟ دانىيال پەيغەمبەرگە خەۋەرنى يەتكۈزگەن پەرىشتىنىڭ نېمە دېگەنلىكىگە دىققەت ئاغدۇرايلى. ئۇ مۇنداق دەيدۇ: «مەن ئاخىرقى كۈنلەردە سېنىڭ خەلقىڭنىڭ [خۇدا خەلقىنىڭ] بېشىغا كېلىدىغان ئىشلارنى چۈشەندۈرگىلى كەلدىم. چۈنكى، بۇ غايىبانە كۆرۈنۈش كەلگۈسىدىكى كۈنلەر توغرىسىدىدۇر» (دانىيال 10:14). مىلادى 33-يىلى، ئەللىكىنچى كۈن بايرىمىغىچە ئىسرائىل خەلقى خۇدانىڭ خەلقى بولغان. ئەمما، بۇ يىلدىن كېيىن، يەھۋا ئەمدى ئۇنىڭ خەلقى ئەيسانىڭ ئەگەشكۈچىلىرى بولىدىغانلىقىنى ئېنىق كۆرسەتكەن. شۇ سەۋەبتىن، دانىيال كىتابىنىڭ 11-بابىدىكى پەيغەمبەرلىك سۆزلەرنىڭ تەڭدىن تولىسى ئىسرائىل خەلقىگە ئەمەس، ئەيسانىڭ ئەگەشكۈچىلىرىگە قارىتا ئېيتىلغان (ئەلچى. 2:1—4؛ رىملىقلار 9:6—8؛ گالاتىيا. 6:15، 16). تارىخقا نەزەر سالساق، جەنۇب ۋە شىمال پادىشاھلىرى ئۆزگىرىپ تۇرسىمۇ، ئۇلارنىڭ بىرنەچچە ئوخشاش تەرەپلىرى بولغان. بىرىنچىدىن، شۇ پادىشاھلار خۇدا خەلقىگە ھۇجۇم قىلىپ، ئۇلارنى ئەزگەن. ئىككىنچىدىن، خۇدا خەلقىگە قانداق مۇئامىلە قىلغانلىقى بىلەن يەھۋا خۇدانى ئۆچ كۆرىدىغانلىقىنى ئېنىق كۆرسەتكەن. ئۈچىنچىدىن، ئىككى پادىشاھ ھاكىمىيەت ئۈچۈن بىر-بىرى بىلەن كۈرەش قىلغان.
5. مىلادى 100—1870-يىللار ئارلىقىدىكى ھۆكۈمەتلەر ياكى پادىشاھلار جەنۇب ۋە شىمال پادىشاھلىرى بولغانمۇ؟ چۈشەندۈرۈپ بېرىڭ.
5 مىلادى ئىككىنچى ئەسىردە، خۇدا خىزمەتچىلىرى جامائەتلىرىدە ساختا مەسىھ ئەگەشكۈچىلىرى پەيدا بولۇشقا باشلىغانىدى. ئۇلار خۇدا سۆزىدىكى تەلىملەرنى يوشۇرۇپ، ساختا دىننىڭ تەلىملىرىنى ئۆگىتىشنى باشلىغان. شۇ ۋاقىتتىن تارتىپ، 19-ئەسىرنىڭ ئاخىرىغىچە يەر يۈزىدە خۇدانىڭ تەشكىل قىلىنغان خەلقى بولمىغان. ياۋايى چۆپلەر، يەنى ساختا مەسىھىيلەر، كۆپىيىپ كەتكەنلىكتىن، خۇدانىڭ ھەقىقىي خىزمەتچىلىرىنى ئېنىقلاش قىيىن بولغان (مەتتا 13:36—43). بۇ توغرۇلۇق بىلىش نېمە ئۈچۈن بەك مۇھىم؟ مىلادى 100—1870-يىللار ئارلىقىدىكى ھۆكۈمەتلەر ياكى پادىشاھلار جەنۇب ۋە شىمال پادىشاھلىرى بولۇشى مۇمكىن ئەمەسلىكىنى ئېنىق بىلىمىز. نېمە ئۈچۈن؟ چۈنكى، شۇ چاغدا يەر يۈزىدە خۇدانىڭ تەشكىل قىلىنغان خەلقى بولمىغاچقا، پادىشاھلار ئۇلارغا ھۇجۇم قىلالمىغانb. ئەمما، 1870-يىلدىن كېيىن، جەنۇب ۋە شىمال پادىشاھلىرى قايتا پەيدا بولۇشى كېرەك ئىدى. بۇنى نەدىن بىلىمىز؟
6. خۇدا خەلقى قايتىدىن بىر توپ سۈپىتىدە قاچان تەشكىللىنىشكە باشلىغان؟ چۈشەندۈرۈپ بېرىڭ.
6 1870-يىلدىن تارتىپ، خۇدانىڭ خەلقى تەشكىل قىلىنىشقا باشلىغان. شۇ يىلى چارلىز تېيىز راسسېل ۋە ئۇنىڭ ياردەمچىلىرى مۇقەددەس كىتابنى تەتقىق قىلىش گۇرۇپپىسىنى ئۇيۇشتۇرغان. راسسېل بۇرادەر ۋە ئۇنىڭ دوستلىرى ئالدىن-ئالا ئېيتىلغان «ئەلچى» بولغان ۋە مەسىھنىڭ پادىشاھلىقى تېخى كەلمىگەندە «يول تەييارلىغان» (مالاك. 3:1). شۇنداق قىلىپ، خۇدا خەلقىنىڭ كىم ئىكەنلىكى قايتىدىن روشەن بولغان! شۇ چاغدا خۇدا خىزمەتچىلىرىگە قاتتىق تەسىر قىلغان كۈچلۈك دۆلەتلەر بولغانمۇ؟ كېلىڭلار، كۆرۈپ چىقايلى.
جەنۇب پادىشاھى كىم؟
7. بىرىنچى دۇنيا ئۇرۇشىغىچە كىم جەنۇب پادىشاھى بولغان؟
7 1870-يىللىرى برىتانىيە باشقا دۆلەتلەرگە قارىغاندا كۆپرەك جايلارنى باشقۇرغان ۋە دۇنيادىكى ئەڭ كۈچلۈك ئەسكىرى كۈچكە ئىگە بولغان. دانىيالنىڭ پەيغەمبەرلىك سۆزلىرىدە، بۇ ئىمپېرىيە كىچىك مۈڭگۈز بىلەن سېلىشتۇرۇلغان. ئۇ باشقا ئۈچ مۈڭگۈزنى، يەنى فرانسىيە، ئىسپانىيە ۋە گوللاندىيىنى ئۆزىگە بويسۇندۇرغان (دانىيال 7:7، 8). شۇنداق قىلىپ، بىرىنچى دۇنيا ئۇرۇشىغىچە برىتانىيە جەنۇب پادىشاھى بولغان. دەل شۇ ۋاقىتتا، ئامېرىكا قوشما شتاتلىرى دۇنيادىكى ئەڭ باي دۆلەتكە ئايلىنىپ، برىتانىيە بىلەن يېقىن ھەمكارلىشىشقا باشلىغان.
8. ئاخىر زاماندا كىم جەنۇب پادىشاھى بولۇپ كەلمەكتە؟
8 بىرىنچى دۇنيا ئۇرۇشى ۋاقتىدا، برىتانىيە بىلەن ئامېرىكا قوشما شتاتلىرى بىرلىشىپ، بەكمۇ كۈچلۈك ھەربىي ئىتتىپاق قۇرغان. شۇ چاغدا برىتانىيە ۋە قوشما شتاتلار ئانگلو-ئامېرىكا دۇنيا كۈچى يەنى ئىمپېرىيىسىگە ئايلانغان. دانىيال كىتابىدا يېزىلغاندەك، بۇ پادىشاھ «زور بىر قوشۇن»نى توپلىغان (دانىيال 11:25). ئاخىر زامان دەپ ئاتىلىدىغان كۈنلەر داۋام قىلىۋاتقاندا ئانگلو-ئامېرىكا ئىمپېرىيىسى جەنۇب پادىشاھى بولۇپ كەلمەكتەc. ئۇنداقتا، شىمال پادىشاھى كىم بولغان؟
شىمال پادىشاھى كىم؟
9. شىمال پادىشاھى قاچان قايتا پەيدا بولغان ۋە دانىيال 11:25-ئايەتتىكى سۆزلەر قانداق ئەمەلگە ئاشقان؟
9 1871-يىلى راسسېل ۋە ئۇنىڭ ھەمراھلىرى مۇقەددەس كىتابنى تەتقىق قىلىش گۇرۇپپىسىنى ئۇيۇشتۇرغاندىن كېيىن، شىمال پادىشاھى قايتىدىن پەيدا بولغان. شۇ يىلى گېرمانىيە ئىمپېرىيىسىنىڭ ئاساسى سېلىنغان. بۇنىڭغا ئوتتو فون بىسمارك چوڭ ھەسسە قوشقان. بۇ ئىمپېرىيىنىڭ دەسلەپكى ئىمپېراتورى پروسىيە پادىشاھى ۋىلھېلىم I بولغان. ئۇ بىسماركنى بىرىنچى باش ۋەزىرى قىلىپ تەيىنلىگەنd. گېرمانىيە نەچچە ئون يىللار ئۆتكەندىن كېيىن، ئافرىقا ۋە تىنچ ئوكياندىكى دۆلەتلەرنى باشقۇرۇپ، مۇستەملىكە قىلغۇچى دۆلەتكە ئايلانغان. شۇنداق قىلىپ، گېرمانىيە برىتانىيىدىن كۈچلۈكرەك بولۇشقا تىرىشقان (دانىيال 11:25-نى ئوقۇڭ). گېرمانىيە ئىمپېرىيىسى ئەڭ كۈچلۈك ھەربىي قوشۇنلارنى ۋە ئىككىنچى چوڭ دېڭىز ئارمىيىسىنى قۇرغان. گېرمانىيە بۇ كۈچنى بىرىنچى دۇنيا ئۇرۇشىدا دۈشمەنلىرىگە قارشى ئىشلەتكەن.
10. دانىيال 11:25، 26-ئايەتلەردىكى سۆزلەر قانداق ئەمەلگە ئاشقان؟
10 دانىيال ئۆز پەيغەمبەرلىك سۆزىدە گېرمانىيە ئىمپېرىيىسى ۋە ئۇنىڭ ھەربىي كۈچى بىلەن نېمە بولىدىغانلىقىنى يازغان. بېشارەتتە «شىمال پادىشاھى پۇت تىرەپ تۇرالمايدۇ»،— دەپ يېزىلغان. نېمە ئۈچۈن؟ چۈنكى، «بەزىلەر ئۇنىڭغا يوشۇرۇن سۈيقەست قىلىدۇ. ئۇنىڭ داستىخىنىدىن ئېسىل تائاملارنى يېگەنلەر ئۇنى يىقىتىدۇ» (دانىيال 11:25، 26). دانىيالنىڭ زامانىدا، پادىشاھنىڭ داستىخىنىدىن تاماق يېگەنلەر ئارىسىدا «پادىشاھنىڭ ئالدىدا خىزمەتكە» قويۇلغان كىشىلەرمۇ بار ئىدى (دانىيال 1:5). دېمەك، بۇ بېشارەتتە، گېرمانىيە ئىمپېرىيىسىدىكى يۇقىرى مەنسەپلىك كىشىلەر، يەنى ئىمپېراتورنىڭ گېنېراللىرى ۋە ھەربىي مەسلىھەتچىلىرى توغرۇلۇق ئېيتقان. كېيىن، ئۇلارنىڭ تەسىرىدىن ئىمپېراتور ئۆز ھوقۇقىدىن ئايرىلىپ، گېرمانىيىدە يېڭى ھۆكۈمەت پەيدا بولغانe. شۇنداقلا، پەيغەمبەرلىك سۆزلەردە شىمال پادىشاھىنىڭ جەنۇب پادىشاھىغا قارشى ئۇرۇشىنىڭ نەتىجىسى يېزىلغان: «ئۇنىڭ قوشۇنى سۈپۈرۈلۈپ تاشلىنىدۇ، نۇرغۇنلىغان كىشىلەر ئۆلتۈرۈلىدۇ» (دانىيال 11:26). ئالدىن-ئالا ئېيتىلغاندەك، بىرىنچى دۇنيا ئۇرۇشىدا گېرمانىيە ئەسكەرلىرى سۈپۈرۈلۈپ تاشلىنىپ، نۇرغۇنلىغان ئادەملەر ئۆلتۈرۈلگەن. بۇنىڭدىن بۇرۇن تارىختا شۇنچە كۆپ قان تۆكۈلگەن ئۇرۇش بولۇپ باقمىغانىدى.
11. دانىيال 11:27، 28-ئايەتلەرگە ماس، جەنۇب پادىشاھى بىلەن شىمال پادىشاھى نېمە قىلغان؟
11 دانىيال 11:27، 28-ئايەتلەردە، بىرىنچى دۇنيا ئۇرۇشىدىن بۇرۇن نېمە يۈز بېرىدىغانلىقى تەسۋىرلەنگەن. بۇ ئايەتلەردە، شىمال پادىشاھى بىلەن جەنۇب پادىشاھى «بىر داستىخاندا ئولتۇرۇپ، . . . بىر-بىرىگە يالغان سۆزلەيدۇ»،— دەپ يېزىلغان. شۇنداقلا، شىمال پادىشاھى «ناھايىتى كۆپ غەنىمەتلەر» توپلايدىغانلىقى ئېيتىلغان. بۇ دەل شۇنداق بولغان. گېرمانىيە بىلەن برىتانىيە ئۆزئارا ئىناق ئۆتۈشنى ۋەدە قىلىشقان بولسىمۇ، 1914-يىلى ئۇرۇش باشلانغاندا، ئۇلارنىڭ يالغان سۆزلىگەنلىكى ئاشكارا بولغان. 1914-يىلغىچە گېرمانىيە بەك باي بولۇپ، ئىقتىسادى تەرەپتىن دۇنيادىكى ئىككىنچى چوڭ دۆلەتكە ئايلانغان. شۇنداق قىلىپ دانىيال 11:29 ۋە 30-ئايەتنىڭ بىرىنچى قىسمىدىكى سۆزلەر ئەمەلگە ئېشىپ، گېرمانىيە جەنۇب پادىشاھى بىلەن جەڭ قىلغان، لېكىن مەغلۇپ بولغان.
پادىشاھلار خۇدا خەلقىگە قارشى چىقىدۇ
12. بىرىنچى دۇنيا ئۇرۇشىدا جەنۇب ۋە شىمال پادىشاھلىرى نېمە قىلغان؟
12 1914-يىلدىن باشلاپ، ئىككى پادىشاھ بىر-بىرىگە ۋە خۇدا خەلقىگە تېخىمۇ قاتتىق قارشى تۇرۇشقا باشلىغان. مەسىلەن، 1-دۇنيا ئۇرۇشىدا گېرمانىيە ھۆكۈمىتىمۇ، برىتانىيە ھۆكۈمىتىمۇ ئۇرۇشقا قاتنىشىش ۋە ئادەم ئۆلتۈرۈشنى رەت قىلغان خۇدا خىزمەتچىلىرىگە زىيانكەشلىك قىلغان. قوشما شتاتلاردا بولسا، ۋەز ئىشىغا يېتەكچىلىك قىلغانلار تۈرمىگە تاشلانغان. شۇنداق قىلىپ، ۋەھىيلەر 11:7—10-ئايەتلەردىكى پەيغەمبەرلىك سۆزلىرى ئەمەلگە ئاشقان.
13. 1930-يىللىرى ۋە ئىككىنچى دۇنيا ئۇرۇشى ۋاقتىدا شىمال پادىشاھى نېمە قىلغان؟
13 1933-يىلدىن كېيىن، بولۇپمۇ ئىككىنچى دۇنيا ئۇرۇشى ۋاقتىدا، شىمال پادىشاھى خۇدا خەلقىگە رەھىم-شەپقەتسىزلىك بىلەن ھۇجۇم قىلغان. گېرمانىيىدە ناتسىستلار پارتىيىسى ھۆكۈمرانلىق قىلىپ، گىتلېر ۋە ئۇنىڭ تەرەپدارلىرى خۇدا خەلقىنىڭ پائالىيىتىنى مەنئىي قىلغان. شىمال پادىشاھى يەھۋانىڭ خىزمەتچىلىرىدىن تەخمىنەن 1500 كىشىنى ئۆلتۈرۈپ، نەچچە مىڭلىغانلىرىنى دەھشەتلىك جازا لاگېرلىرىغا تاشلىغان. بۇ توغرىلىقمۇ دانىيال كىتابىدا يېزىلغان. شىمال پادىشاھى ۋەز پائالىيىتىنى مەنئىي قىلىپ، «مۇقەددەس ئىبادەتخانىنى بۇلغاپ»، «قۇربانلىق سۇنۇش ئادىتىنى» ئەمەلدىن قالدۇرغان (دانىيال 11:30، 31). گىتلېر ھەتتا گېرمانىيىدىكى بارلىق خۇدا خىزمەتچىلىرىنىڭ بىرىنى قويماي يوق قىلىۋېتىشنى ۋەدە قىلغان.
يېڭى شىمال پادىشاھى
14. ئىككىنچى دۇنيا ئۇرۇشىدىن كېيىن كىم شىمال پادىشاھى بولغان؟ چۈشەندۈرۈپ بېرىڭ.
14 ئىككىنچى دۇنيا ئۇرۇشىدىن كېيىن، سوۋېت ئىتتىپاقى كوممۇنىست ھاكىمىيىتى شىمال پادىشاھىغا ئايلانغان. ئۇ بۇرۇن گېرمانىيىگە مەنسۇپ بولغان نۇرغۇن رايونلارنى باشقۇرۇشقا باشلىغان. گېرمانىيىدىكى ھاكىم مۇتلەقچى ناتسىست ھۆكۈمىتىگە ئوخشاش، سوۋېت ئىتتىپاقى ھۆكۈمىتى ھەم ھۆكۈمەتكە ئەمەس، بەلكى ھەق خۇداغا ئىبادەت قىلىشنى ئۆز ھاياتىدا بىرىنچى ئورۇنغا قويغانلارنىڭ ھەممىسىگە رەھىمسىزلارچە زىيانكەشلىك قىلغان.
15. ئىككىنچى دۇنيا ئۇرۇشى ئاخىرلاشقاندىن كېيىن، شىمال پادىشاھى قانداق يول تۇتقان؟
15 ئىككىنچى دۇنيا ئۇرۇشى ئاخىرلاشقاندىن كېيىن ئۇزۇن ئۆتمەي، يېڭى شىمال پادىشاھى — سوۋېت ئىتتىپاقى ۋە ئۇنىڭ ئىتتىپاقداشلىرى — خۇدا خەلقىگە ھۇجۇم قىلغان. ۋەھىيلەر 12:15—17-ئايەتلەردە، خۇدا خەلقىگە ھۇجۇم قىلىش «دەريا» بىلەن سېلىشتۇرۇلغان. بۇ پەيغەمبەرلىك سۆزلەرگە ئاساسەن، يەھۋا خۇدانىڭ مىڭلىغان خىزمەتچىلىرى سىبىرىيىگە سۈرگۈن قىلىنغان ئىدى. ئەمەلىيەتتە، ئاخىر زامان مەزگىلىدە، شىمال پادىشاھى خۇدانىڭ خەلقىگە بارغانسېرى كۆپلەپ زىيانكەشلىك قىلىپ كېلىۋاتقان بولسىمۇ، ئۇلارنىڭ ئىشىنى ھېچقاچان توختىتالمايدۇf.
16. سوۋېت ئىتتىپاقى دانىيال 11:37—39-ئايەتلەردىكى پەيغەمبەرلىك سۆزلەرنى قانداق ئەمەلگە ئاشۇرغان؟
16 دانىيال 11:37—39-نى ئوقۇڭ. بۇ پەيغەمبەرلىك سۆزلەرگە ئاساسەن، شىمال پادىشاھى قانداق «ئاتا-بوۋىلىرى چوقۇنغان كەلگەن ئىلاھلارغا ھۆرمەت قىلمايدۇ». سوۋېت ئىتتىپاقى دىنلارنىڭ ھەممىسىنى ۋەيران قىلماقچى بولۇپ، ئەنئەنىۋى دىنىي تەشكىلاتلارنىڭ كۈچىنى يوق قىلىشقا تىرىشقان. بۇ مەقسىتىگە يېتىش ئۈچۈن، سوۋېت ئىتتىپاقى 1918-يىلنىڭ بېشىدا، مەكتەپلەردە ئاتېئىزم، يەنى خۇدا يوق دېگەن تەلىمنى ئۆگىتىشنى قارار قىلغان. ئۇنداقتا، قانداق قىلىپ شىمال پادىشاھى ‹قورغانلارنىڭ ئىلاھىنى ئۇلۇغلىغان›؟ سوۋېت ئىتتىپاقى كۈچلۈك ھەربىي قوشۇن قۇرۇش ئۈچۈن بەكمۇ كۆپ پۇل خەجلىگەن ۋە ئۆز ھاكىميىتىنى كۈچەيتىش ئۈچۈن يادرو قورال-ياراقلىرىنى ئىشلەپ چىقارغان. نەتىجىدە، شىمال پادىشاھىمۇ، جەنۇب پادىشاھىمۇ مىلياردلىغان ئىنسانلارنى ھالاك قىلالايدىغان ناھايىتى كۈچلۈك قورال-ياراقلارنى توپلىغان!
ئىككى پادىشاھنىڭ ھەمكارلىشىشى
17. ۋەيرانچىلىق ئېلىپ كېلىدىغان يىرگىنچلىك بىر نەرسە› دېگىنىمىز نېمە؟
17 گەرچە شىمال پادىشاھى ۋە جەنۇب پادىشاھى ئۇزاق ۋاقىتتىن بېرى بىر-بىرى بىلەن قارشىلاشقان بولسىمۇ، مۇھىم بىر مەسىلىدە ھەمكارلاشقان ئىدى، يەنى ئۇلار «ۋەيرانچىلىق ئېلىپ كېلىدىغان يىرگىنچلىك بىر نەرسىنى تىكلەپ» تۇرغۇزغان (دانىيال 11:31). بۇ «يىرگىنچلىك» نەرسە — بىرلەشكەن دۆلەتلەر تەشكىلاتى.
18. بىرلەشكەن دۆلەتلەر تەشكىلاتى نېمە ئۈچۈن «يىرگىنچلىك» نەرسىدەك تەسۋىرلەنگەن؟
18 بىرلەشكەن دۆلەتلەر تەشكىلاتى نېمە ئۈچۈن «يىرگىنچلىك» نەرسىدەك تەسۋىرلەنگەن؟ سەۋەبى، ئۇ پەقەت خۇدا پادىشاھلىقى ئەمەلگە ئاشۇرالايدىغان نەرسىنى، يەنى پۈتۈن دۇنيادا ئىناق-ئىتتىپاقلىقنى ئورنىتىشقا ئۇرۇنىۋاتىدۇ. پەيغەمبەرلىك سۆزلەردە، يەنە يىرگىنچلىك بىر نەرسە «ۋەيرانچىلىق ئېلىپ كېلىدىغان»لىقى تىلغا ئېلىنغان. چۈنكى، بىرلەشكەن دۆلەتلەر تەشكىلاتى بارلىق ساختا دىنلارنى يوق قىلىشتا ئاساسىي رولنى ئوينايدىغان بولىدۇ.—«ئاخىر زاماندىكى رىقابەتچى پادىشاھلار» ناملىق جەدۋەلگە قاراڭ.
بۇنى نېمە ئۈچۈن بىلىشىمىز كېرەك؟
19، 20. (1) ئىككى پادىشاھ توغرۇلۇق بىلىش نېمە ئۈچۈن بەك مۇھىم؟ (2) كېيىنكى ماقالىدىن قايسى سوئالنىڭ جاۋابىنى تاپىمىز؟
19 ئىككى پادىشاھ توغرۇلۇق بىلىش بىز ئۈچۈن بەك مۇھىم. چۈنكى، بۇ دانىيال پەيغەمبەرنىڭ شىمال ۋە جەنۇب پادىشاھلىرى توغرۇلۇق ئېيتقانلىرى 1870-يىلدىن باشلاپ 1991-يىلغىچە ئەمەلگە ئاشقانلىقىنى ئىسپاتلايدۇ. شۇ سەۋەبتىن، بۇ پەيغەمبەرلىك سۆزلەرنىڭ قالغان قىسىمى ھەم چوقۇم ئەمەلگە ئاشىدىغانلىقىغا ئىشەنچىمىز كامىل.
20 سوۋېت ئىتتىپاقى 1991-يىلى غۇلاپ چۈشكەن. ئۇنداقتا، بۈگۈنكى كۈندە شىمال پادىشاھى كىم؟ بۇ سوئالنىڭ جاۋابىنى كېيىنكى ماقالىدىن تاپالايمىز.
24-ناخشا كۆزۈڭ بولسۇن مۇكاپاتتا
a دانىيال پەيغەمبەر يازغان «جەنۇب پادىشاھى» ۋە «شىمال پادىشاھى» توغرۇلۇق پەيغەمبەرلىك سۆزلەر تېخىغىچە ئەمەلگە ئېشىۋاتقانلىقىنى كۆرۈۋاتىمىز. نېمە ئۈچۈن شۇنداق دەپ ئېيتالايمىز؟ نېمە سەۋەبتىن بۇ بېشارەتنى چۈشىنىشىمىز مۇھىم؟
b بۇ يەردە كەلتۈرۈلگەن سەۋەبنى ئەستە تۇتساق، رىم ئىمپېراتورى ئاۋرېلىئان (ب.م. 270—275) «شىمال پادىشاھى» ھەمدە زېنوبىيا خانىش (ب.م. 267—272) «جەنۇب پادىشاھى» بولغان دەپ ئېيتىش مەنتىقىگە ئۇيغۇن بولمايتتى. «دانىيالنىڭ پەيغەمبەرلىك سۆزىگە كۆڭۈل قويۇڭلار» (باشقا تىلدا) كىتابىنىڭ 13، 14-بابلىرىدا، يېڭى چۈشەنچىمىز يېزىلغان.
c «مۇقەددەس كىتابتا ئانگلو-ئامېرىكا دۇنيا كۈچى، يەنى ئىمپېرىيىسى ھەققىدە نېمە يېزىلغان؟» ناملىق رامكىغا قاراڭ.
d 1890-يىلى، ئىمپېراتور ۋىلھېلىم II بىسماركنى ھوقۇقىدىن ئېلىپ تاشلىغان.
e ئۇلار ھۆكۈمەتنى چاپسان غۇلىتىۋېتىش ئۈچۈن كۆپ ئىشلارنى قىلغان. مەسىلەن، ئۇلار ئىمپېراتورنى قوللاشنى توختىتىپ، ئۇرۇشقا مۇناسىۋەتلىك مەخپىي مەلۇماتلارنى باشقىلارغا ئاشكارا قىلغان ۋە ئىمپېراتورنى ھوقۇقىدىن ۋاز كېچىشكە مەجبۇر قىلغان.
f دانىيال 11:34-ئايەتتە يېزىلغاندەك، شىمال پادىشاھى بەزىدە ئاز ۋاقىتقا خۇدا خەلقىگە زىيانكەشلىك قىلىشنى توختاتقان. مەسىلەن، 1991-يىلى سوۋېت ئىتتىپاقى غۇلاپ چۈشكەندە شۇنداق بولغان.
-
-
بۈگۈنكى كۈندە «شىمال پادىشاھى» كىم؟كۈزىتىش مۇنارى. 2020 | ماي
-
-
20-تەتقىق ماقالىسى
بۈگۈنكى كۈندە «شىمال پادىشاھى» كىم؟
«شۇ چاغدا ئۇنىڭ ئەجىلى توشىدۇ ۋە ھېچكىم ئۇنىڭغا ياردەم بەرمەيدۇ».—دانىيال 11:45.
43-ناخشا ھوشىيار، مەھكەم ۋە قەيسەر بول!
بۇ ماقالىدەa
1، 2. بۇ ماقالىدە نېمىنى كۆرۈپ چىقىمىز؟
بىز ئاخىر زاماننىڭ ئاخىرقى كۈنلىرىدە ياشاۋاتىمىز ۋە بۇنىڭ دەلىل-ئىسپاتلىرى ناھايىتى كۆپ. پات يېقىندا يەھۋا ۋە ئەيسا مەسىھ ساماۋى پادىشاھلىققا قارشى چىققان ھەممە ھۆكۈمەتلەرنى يوق قىلىدۇ. بۇ ۋەقە يۈز بېرىشتىن ئاۋۋال شىمال ۋە جەنۇب پادىشاھلىرى ئۆزئارا بىر-بىرىگە ۋە خۇدا خەلقىگە قارشى دۈشمەنلىشىشنى داۋاملاشتۇرىدۇ.
2 بۇ ماقالىدە دانىيال 11:40—12:1-دىكى پەيغەمبەرلىك سۆزلەرنى كۆرۈپ چىقىمىز. بىز شىمال پادىشاھىنىڭ ھازىر كىم ئىكەنلىكىنى ۋە قانداق ۋەقەلەر يۈز بېرىشىدىن قەتئىينەزەر نېمە ئۈچۈن خاتىرجەملىكنى ساقلاپ، يەھۋا خۇداغا تايىنىشىمىز كېرەكلىكىنى كۆرىمىز.
يېڭى شىمال پادىشاھى
3، 4. بۈگۈنكى كۈندە شىمال پادىشاھى كىم؟ چۈشەندۈرۈپ بېرىڭ.
3 1991-يىلى سوۋېت ئىتتىپاقى غۇلىغاندىن كېيىن، بۇرۇن ئۇنىڭ ھۆكۈمرانلىقى ئاستىدا بولغان خۇدانىڭ خىزمەتچىلىرى بىر مەزگىل ئەركىنلىككە ئىگە بولغان ئىدى. دانىيال بۇ ئەركىنلىكنى ‹ئازغىنە ياردەم› دەپ تەسۋىرلىگەن (دانىيال 11:34). نەتىجىدە، ئۇلار ئەركىن-ئازادە ۋەز قىلالىغان. كۆپ ئۆتمەي سوۋېت ئىتتىپاقىنى تەشكىل قىلغان دۆلەتلەردە ۋەز ئېيتقۇچىلارنىڭ سانى بىرقانچە يۈز مىڭغا كۆپەيگەن. بىراق، يىللار ئۆتۈپ، روسىيە ۋە ئۇنىڭ ئىتتىپاقداشلىرى بىرلىشىپ شىمال پادىشاھىغا ئايلانغان. ئالدىنقى ماقالىدە ئۆگەنگىنىمىزدەك، بىر ھۆكۈمەت شىمالىي ياكى جەنۇب پادىشاھىنىڭ رولىنى ئويناش ئۈچۈن ئۈچ نەرسىنى قىلىشى، يەنى (1) خۇدانىڭ خەلقىگە بىۋاسىتە تەسىر قىلىشى، (2) ئىش-ھەرىكەتلىرى بىلەن يەھۋانىڭ ۋە ئۇنىڭ خەلقىنىڭ دۈشمىنى ئىكەنلىكىنى كۆرسىتىشى ۋە (3) ئۆزئارا بىر-بىرىگە قارشى چىقىشى كېرەك.
4 روسىيە ۋە ئۇنىڭ ئىتتىپاقداشلىرى شىمال پادىشاھى ئىكەنلىكىنى ئىسپاتلايدىغان سەۋەبلەرگە دىققەت ئاغدۇرايلى. (1) ئۇلار ۋەز ئىشىنى مەنئىي قىلىش ئارقىلىق خۇدا خەلقىگە ھۇجۇم قىلغان. (2) بۇ ئىش-ھەرىكەتلىرى بىلەن ئۇلار خۇدا ۋە ئۇنىڭ خەلقىنى ئۆچ كۆرىدىغانلىقىنى كۆرسەتكەن. (3) روسىيە ۋە ئۇنىڭ ئىتتىپاقداشلىرى برىتانىيە ۋە قوشما شتاتلاردىن شەكىللەنگەن جەنۇب پادىشاھىدىن كۈچلۈكرەك بولۇشقا تىرىشىۋاتىدۇ. ھازىر روسىيە ۋە ئىتتىپاقداشلىرىنىڭ قانداق ئىش-ھەرىكەتلىرى ئۇلارنىڭ شىمال پادىشاھى ئىكەنلىكىنى ئىسپاتلايدىغانلىقىنى كۆرەيلى.
پادىشاھلار بىر-بىرىگە قارشى چىقماقتا
5. دانىيال 11:40—43-ئايەتلەردە قايسى ۋاقىت توغرۇلۇق ئېيتىلغان ۋە شۇ ۋاقىتتا نېمە يۈز بېرىدۇ؟
5 دانىيال 11:40—43-نى ئوقۇڭ. بۇ پەيغەمبەرلىك سۆزلەردە زاماننىڭ ئاخىرى توغرۇلۇق ئېيتىلغان. بۇ ئۈزۈندىدە شىمال ۋە جەنۇب پادىشاھلىرى ئۆزئارا رىقابەتلىشىدىغانلىقىغا دىققەت ئاغدۇرۇلغان. دانىيال پەيغەمبەر ئېيتقاندەك، زاماننىڭ ئاخىرىدا جەنۇب ۋە شىمال پادىشاھلىرى بىر-بىرىگە «ھۇجۇم قىلىدۇ».—دانىيال 11:40.
6. ئىككى پادىشاھ بىر-بىرىگە قانداق «ھۇجۇم قىلىۋاتىدۇ»؟
6 شىمالىي ۋە جەنۇب پادىشاھى دۇنيادىكى ئەڭ كۈچلۈك ھۆكۈمەت بولۇش ئۈچۈن بىر-بىرى بىلەن كۈرەش قىلماقتا. مەسىلەن، ئىككىنچى دۇنيا ئۇرۇشىدىن كېيىن سوۋېت ئىتتىپاقى ۋە ئۇنىڭ ئىتتىپاقداشلىرى ياۋرۇپادىكى كۆپلىگەن دۆلەتلەرگە تەسىر قىلىشنى باشلىغان. شۇڭا، شىمال پادىشاھىغا قارشى تۇرۇش ئۈچۈن جەنۇب پادىشاھى باشقا دۆلەتلەر بىلەن خەلقئارا ھەربىي ئىتتىپاق قۇرۇش ئۈچۈن بىر ئەھدە تۈزگەن. بۇ شىمالىي ئاتلانتىك ئەھدى تەشكىلاتى دەپ ئاتالغان. شىمال ۋە جەنۇب پادىشاھلىرى بىر-بىرى بىلەن رىقابەتلىشىپ، ھەربىي كۈچلىرىنى كۈچەيتىش ئۈچۈن بەك كۆپ پۇل سەرپ قىلىشنى داۋاملاشتۇرىۋاتىدۇ. شۇنداقلا ئۇلار ئافرىقا، ئاسىيا ۋە لاتىن ئامېرىكىسىدىكى ئۇرۇشلاردا بىر-بىرىنىڭ دۈشمەنلىرىنى قوللاپ-قۇۋۋەتلەش ئارقىلىق بىر-بىرىگە قارشى كۈرەش قىلغان. مۇشۇ يېقىنقى يىللاردا، روسىيە ۋە ئۇنىڭ ئىتتىپاقداشلىرى ناھايىتى كۈچىيىپ، پۈتۈن دۇنياغا قاتتىق تەسىر قىلماقتا. ئۇلار بىر-بىرى بىلەن كومپيۇتېر تور ئۇرۇشى قىلماقتا. پادىشاھلار كومپيۇتېر پروگراممىلىرىدىن پايدىلىنىپ، ئۆز دۆلەتلىرىنىڭ ئىقتىسادى ۋە سىياسىي تۈزۈملىرىگە زىيان يەتكۈزدى، دەپ بىر-بىرىنى ئەيىبلەيدۇ. دانىيال پەيغەمبەر ئالدىن-ئالا يازغاندەك، شىمال پادىشاھى خۇدانىڭ خەلقىگە ھۇجۇم قىلىشنى داۋاملاشتۇرىۋاتىدۇ.—دانىيال 11:41.
شىمال پادىشاھى «گۈزەل زېمىنغا بېسىپ كىرىدۇ»
7. «ئەڭ گۈزەل زېمىن» دېگەن نېمە؟
7 دانىيال 11:41-ئايەتتە، شىمال پادىشاھى «گۈزەل زېمىنغا بېسىپ كىرىدۇ» دەپ يېزىلغان. بۇ قانداق زېمىن؟ قەدىمدە ئىسرائىل «ئەڭ گۈزەل زېمىن» بولۇپ ھېسابلانغان (ھەزەك. 20:6). بۇ زېمىن نېمە ئۈچۈن گۈزەل دەپ ئاتالغان؟ چۈنكى، بۇ يەردە خەلقلەر يەھۋا خۇداغا ئىبادەت قىلغان. بىراق، مىلادى 33-يىلى ئەللىكىنچى كۈن بايرىمىدىن تارتىپ، بۇ «گۈزەل زېمىن» قانداقتۇ بىر ئۇدۇل مەنىدىكى جاينى بىلدۈرمەيدۇ. چۈنكى، خۇدانىڭ خەلقى دۇنيانىڭ جاي-جايلىرىغا تارقالغان. بۈگۈنكى كۈندە، «گۈزەل زېمىن» — خۇدا خەلقى ھەق خۇدا يەھۋاغا قىلىدىغان ئىبادەتنى، شۇ جۈملىدىن جامائەت يىغىلىشلىرى بىلەن ۋەز ئىشىغا قاتنىشىشنى بىلدۈرىدۇ.
8. شىمال پادىشاھى «گۈزەل زېمىنغا» قانداق ھۇجۇم قىلغان؟
8 ئاخىر زامان باشلانغاندىن بۇيان، شىمال پادىشاھى «گۈزەل زېمىنغا» قايتا-قايتا ھۇجۇم قىلغان. مەسىلەن، ناتسىست گېرمانىيىسى، بولۇپمۇ ئىككىنچى دۇنيا ئۇرۇشى مەزگىلىدە شىمال پادىشاھى بولغاندا، خۇدا خەلقىگە زىيانكەشلىك قىلىپ، نۇرغۇنلىرىنى ئۆلتۈرۈلگەن. ئىككىنچى دۇنيا ئۇرۇشىدىن كېيىن، سوۋېت ئىتتىپاقى شىمال پادىشاھىغا ئايلانغاندا، ئۇمۇ «گۈزەل زېمىنغا» بېسىپ كىرىپ، خۇدا خەلقىگە ھۇجۇم قىلغان ۋە ئۇلارنى سۈرگۈن قىلغان.
9. يېقىنقى يىللاردا روسىيە ۋە ئۇنىڭ ئىتتىپاقداشلىرى «گۈزەل زېمىنغا» قانداق بېسىپ كىرگەن؟
9 يىقىنقى يىللاردا روسىيە ۋە ئۇنىڭ ئىتتىپاقداشلىرىمۇ «گۈزەل زېمىنغا» بېسىپ كىرگەن. قانداق قىلىپ؟ 2017-يىلى روسىيە ھۆكۈمىتى خۇدا خەلقىنىڭ پائالىيىتىنى مەنئىي قىلىپ، بەزى ئېتىقادداشلىرىمىزنى تۈرمىگە تاشلىغان. يەنە ماتېرىياللىرىمىزنى، شۇ جۈملىدىن مۇقەددەس كىتابنىڭ «يېڭى دۇنيا تەرجىمىسى»نى مەنئىي قىلغان. بۇنىڭدىن باشقا، روسىيەدىكى بەيتەلنى، ئىبادەت زاللىرى ۋە چوڭ يىغىلىش سارايلىرىنى تارتىۋالغان. بۇ ۋەقەلەردىن كېيىن، 2018-يىلى يېتەكچى كېڭەش روسىيە ۋە ئۇنىڭ ئىتتىپاقداشلىرىنىڭ شىمال پادىشاھى ئىكەنلىكىنى ئېلان قىلغان. لېكىن، خۇدانىڭ خەلقى مەيلى قانچىلىك ئېغىر زىيانكەشلىككە دۇچ كەلسىمۇ، ھۆكۈمەتكە قارشى چىقمايدۇ ياكى ئۇنى غۇلىتىشقا تىرىشمايدۇ. ئەكسىنچە، ئۇلار مۇقەددەس كىتابتىكى نەسىھەتكە قۇلاق سېلىپ، «بارلىق مەرتىۋىلىك ئەمەلدارلار ئۈچۈن»، بولۇپمۇ ئەركىن-ئازادە ئىبادەت قىلىشقا تەسىر قىلىدىغان قارارنى چىقىرىۋاتقاندا، دۇئا قىلىدۇ.—1-تىموت. 2:1، 2.
شىمال پادىشاھى جەنۇب پادىشاھىنى يېڭىۋالامدۇ؟
10. شىمال پادىشاھى جەنۇب پادىشاھىنى مەغلۇپ قىلامدۇ؟ چۈشەندۈرۈپ بېرىڭ.
10 دانىيال 11:40—45-ئايەتلەردىكى پەيغەمبەرلىك سۆزى ئاساسلىقى شىمال پادىشاھى توغرۇلۇق ئېيتىلغان. بۇ ئۇنىڭ جەنۇب پادىشاھى ئۈستىدىن غەلىبە قىلىدىغانلىقىنى بىلدۈرەمدۇ؟ ياق. سەۋەبى، يەھۋا بىلەن ئەيسا مەسىھ ئارماگېدون ئۇرۇشىدا بارلىق ھۆكۈمەتلەرنى يوق قىلغاندا، جەنۇب پادىشاھى تېخى مەۋجۇت بولۇپ تۇرىدۇ (ۋەھىي. 19:20). نېمە ئۈچۈن بۇنىڭغا ئىشەنچىمىز كامىل؟ كېلىڭلار، دانىيال ۋە ۋەھىي كىتابلىرىدىكى بېشارەتلەرگە دىققەت ئاغدۇرايلى.
ئارماگېدون ئۇرۇشىدا خۇدا پادىشاھلىقىنى تەسۋىرلەيدىغان چوڭ بىر تاش ئىنسانىي ھۆكۈمەتلەرنى بىلدۈرىدىغان ھەيكەلنى ۋەيران قىلىدۇ (11-ئابزاسىغا قاراڭ)
11. دانىيال 2:43—45-ئايەتتىكى پەيغەمبەرلىك سۆزلەر نېمىنى بىلدۈرىدۇ؟ (مۇقاۋىدىكى رەسىمگە قاراڭ)
11 دانىيال 2:43—45-نى ئوقۇڭ. دانىيال پەيغەمبەر خۇدا خەلقىگە تەسىر قىلىدىغان ھەرتۈرلۈك ھۆكۈمەتلەرنى تەسۋىرلىگەن. شۇ ھۆكۈمەتلەر يوغان ھەيكەلنىڭ ئوخشاش بولمىغان قىسىمى ئارقىلىق تەسۋىرلەنگەن. ئاخىرقى ھۆكۈمەت ھەيكەلنىڭ تۆمۈر ۋە سېغىز لايدىن ياسالغان پۇتلىرى سۈپىتىدە تەسىرلەنگەن. بۇ — ئانگلو-ئامېرىكا دۇنيا ئىمپېرىيىسى. بۇ پەيغەمبەرلىك سۆزلەردىن كۆرگىنىمىزدەك، ئانگلو-ئامېرىكا دۇنيا ئىمپېرىيىسى يەنىلا ھۆكۈمرانلىق قىلىۋاتقاندا، خۇدا پادىشاھلىقى بارلىق ئىنسانىي ھۆكۈمەتلەرنى ۋەيران قىلىدۇ.
12. مەخلۇقنىڭ يەتتىنچى بېشى نېمىنى بىلدۈرىدۇ ۋە بۇ نېمە ئۈچۈن دىققەتكە سازاۋەر؟
12 ئەلچى يۇھاننامۇ خۇدا خەلقىنىڭ ئۈستىدىن ھۆكۈمرانلىق قىلىدىغان دۇنيا كۈچلىرىنى تىلغا ئالغان. يۇھاننا بۇ ھۆكۈمەتلەرنى يەتتە بېشى بار مەخلۇقتەك تەسۋىرلىگەن. مەخلۇقنىڭ يەتتىنچى بېشى ئانگلو-ئامېرىكا دۇنيا ئىمپېرىيىسىنى بىلدۈرىدۇ. بۇ دىققەتكە سازاۋەر، چۈنكى ۋەھىي كىتابىدا مەخلۇقنىڭ يەنە باشقا باشلىرى ئۆسۈپ چىقىدىغانلىقى توغرۇلۇق يېزىلمىغان. دېمەك، مەخلۇقنىڭ يەتتىنچى بېشى يەنىلا ھۆكۈمرانلىق يۈرگۈزۈۋاتقاندا، ئەيسا ۋە ئۇنىڭ ئاسماندىكى قوشۇنى بىرلىكتە مەخلۇقنىڭ يەتتىنچى بېشى ۋە ئۇنىڭ ئۆزىنى پۈتۈنلەي يوق قىلىدۇb.—ۋەھىي. 13:1، 2؛ 17:13، 14.
شىمال پادىشاھى پات ئارىدا نېمە قىلىدۇ؟
13، 14. يەجۈج بىلەن مەجۈج دېگەن كىم ۋە ئۇ خۇدا خەلقىگە نېمە ئۈچۈن ھۇجۇم قىلىدۇ؟
13 ھەزەكىيال پەيغەمبەر شىمال ۋە جەنۇب پادىشاھلىرى يوق بولۇشتىن ئاۋۋال، قانداق ۋەقەلەر يۈز بېرىشى مۇمكىن ئىكەنلىكىنى يازغان. ھەزەكىيال 38:10—23؛ دانىيال 2:43—45؛ 11:44—12:1 ۋە ۋەھىيلەر 16:13—16، 21-ئايەتلەرنىڭ ھەممىسىدە بىر ۋەقە توغرۇلۇق ئېيتىلغان بولسا، ئۇنداقتا تۆۋەندىكى ۋەقەلەر يۈز بېرىدۇ، دەپ ئېيتالايمىز.
14 دەھشەتلىك چوڭ بالايىئاپەت باشلىنىپ كۆپ ئۆتمەي، «يەرنىڭ پادىشاھلىرى» يىغىلىپ، دۆلەتلەر ئىتتىپاقىنى قۇرىدۇ (ۋەھىي. 16:13، 14؛ 19:19). مۇقەددەس يازمىلاردا، بۇ ئىتتىپاق «ماگوگ زېمىنىدىكى . . . گوگ» ياكى «يەجۈج بىلەن مەجۈج»، دەپ ئاتالغان (ھەزەكىيال 38:2). دۆلەتلەر ئىتتىپاقى خۇدا خەلقىنى تامامەن يوق قىلىش ئۈچۈن ھۇجۇم قىلىدۇ. ئۇلارنىڭ بۇنى قىلىشىغا نېمە سەۋەب بولىدۇ؟ ئەلچى يۇھاننا شۇ مەزگىل ھەققىدە ئېيتقاندا، خۇدانىڭ دۈشمەنلىرى ئۈستىگە يوغان مۆلدۈر ياققانلىقىنى كۆرگەن. بۇ سىمۋوللۇق مۆلدۈر خۇدانىڭ خەلقى جاكارلايدىغان بەك ئېغىر ھۆكۈم خەۋىرىنى بىلدۈرۈشى مۇمكىن. بەلكىم، گوگنىڭ خۇدا خەلقىنى ھالاك قىلىش ئۈچۈن ھۇجۇم قىلىشىغا دەل شۇ خەۋەر سەۋەب بولىدۇ.—ۋەھىي. 16:21.
15، 16. (1) دانىيال 11:44، 45-ئايەتلەردە، قانداق ۋەقەلەر تەسۋىرلەنگەن بولۇشى مۇمكىن؟ (2) شىمال پادىشاھى ۋە يەجۈج بىلەن مەجۈجنى بىلدۈرىدىغان باشقا ھۆكۈمەتلەرگە نېمە بولىدۇ؟
15 دانىيال 11:44، 45-ئايەتلەردە (ئوقۇڭ) يېزىلغان سۆزلەرمۇ ھۆكۈم خەۋىرى ۋە خۇدانىڭ دۈشمەنلىرى قىلىدىغان ئاخىرقى ھۇجۇمنى بىلدۈرۈشى مۇمكىن. دانىيال پەيغەمبەر «شەرق ۋە شىمالدىن كەلگەن» خەۋەرلەر شىمال پادىشاھىنىڭ چىشىغا تېگىدىغانلىقىنى ۋە «تېخىمۇ دەرغەزەپ» بولىدىغانلىقىنى ئېيتقان. شىمال پادىشاھى «نۇرغۇن كىشىنى قىرغىنچىلىق قىلىپ ئۆلتۈرىمەن دەپ جەڭ قوزغايدۇ». بۇ ئايەتتىكى «نۇرغۇن» دېگەن سۆز يەھۋا خۇدانىڭ خەلقىنى بىلدۈرۈشى مۇمكىنc. بەلكىم، دانىيال بۇ يەردە خۇدانىڭ خىزمەتچىلىرىگە قىلىنىدىغان ئاخىرقى ھۇجۇمنى تەسۋىرلىگەن.
16 شىمال پادىشاھى بىلەن باشقا ھۆكۈمەتلەرنىڭ بۇ ھۇجۇمى ھەممىگە قادىر خۇدانىڭ غەزىپىنى قوزغايدۇ. شۇ چاغدا ئارماگېدون ئۇرۇشى باشلىنىدۇ (ۋەھىي. 16:14، 16). شىمال پادىشاھى ۋە يەجۈج بىلەن مەجۈجنى بىلدۈرىدىغان باشقا ھۆكۈمەتلەر يوق قىلىنىدۇ ۋە «ھېچكىم ئۇنىڭغا ياردەم بەرمەيدۇ».—دانىيال 11:45.
ئارماگېدون ئۇرۇشىدا ئەيسا مەسىھ ۋە ئۇنىڭ ئاسماندىكى قوشۇنى شەيتاننىڭ رەزىل دۇنياسىنى يوق قىلىپ، خۇدانىڭ خەلقىنى ئازاد قىلىدۇ (17-ئابزاسقا قاراڭ)
17. دانىيال 12:1-ئايەتتە، ئۇلۇغ ئەمىر دەپ ئاتالغان مىكائىل، ئۇ كىم؟ ھازىر ئۇ نېمە قىلماقتا ۋە كېلەچەكتە نېمە قىلىدۇ؟
17 دانىيال 12:1-نى ئوقۇڭ. بۇ ئايەتتىن شىمال پادىشاھى ۋە ئۇنىڭ ئىتتىپاقداشلىرى قانداق يوق قىلىنىدىغانلىقى ۋە بىزنىڭ قانداق قۇتقۇزۇلىدىغانلىقىمىز توغرۇلۇق كۆپرەك بىلەلەيمىز. ئايەتتىكى سۆزلەر نېمىنى بىلدۈرىدۇ؟ مىكائىل — ھازىر ھۆكۈمرانلىق قىلىۋاتقان پادىشاھىمىز مەسىھ ئەيسانىڭ باشقا ئىسىمى. 1914-يىلى ئاسماندا خۇدا پادىشاھلىقى ئورنىتىلغاندىن بېرى، ئۇ خۇدا خىزمەتچىلىرىنى قوغدىماقتا. پات ئارىدا ئۇ ئارماگېدون ئۇرۇشىدا «مەيدانغا چىقىدۇ»، يەنى دۈشمەنلىرىنى يوق قىلىدۇ. بۇ ئۇرۇش دانىيال ئېيتىپ كەتكەن تارىختا ھېچقاچان بولمىغان بالايىئاپەتلىك مەزگىلنىڭ يۇقىرى پەللىسىدىكى ئاخىرقى ۋەقە بولىدۇ. ۋەھىي كىتابىدىكى يۇھاننا يازغان بۇ ئۇرۇش ۋە ئۇنىڭ ئالدىدىكى بىر مەزگىل ۋاقىت «دەھشەتلىك چوڭ بالايىئاپەت» دەپ ئاتالغان.—ۋەھىي. 6:2؛ 7:14.
ئىسىمىڭىز «ھاياتلىق دەپتىرىگە» يېزىلامدۇ؟
18. نېمە ئۈچۈن كېلەچەكتە يۈز بېرىدىغان ۋەقەلەردىن قورقماسلىقىمىز كېرەك؟
18 بىز كېلەچەكتە يۈز بېرىدىغان ۋەقەلەرگە ئىشەنچ بىلەن يۈزلىنىشىمىز لازىم. چۈنكى، دانىيال، يۇھاننا ھەر ئىككىسى ئۆتمۈشتە ھېچقاچان بولۇپ باقمىغان دەھشەتلىك چوڭ بالايىئاپەت ۋاقىتتا، يەھۋا خۇدا بىلەن ئەيسا مەسىھكە خىزمەت قىلىدىغانلارنىڭ ھەممىسى ئامان قالىدىغانلىقىنى ئېيتقان. دانىيال پەيغەمبەر پەقەت ئىسىملىرى «ھاياتلىق دەپتىرىگە» يېزىلغانلار قۇتقۇزۇلىدىغانلىقىنى ئېيتقان (دانىيال 12:1). بىزنىڭ ئىسىمىمىز شۇ دەپتەرگە يېزىلىشى ئۈچۈن نېمە قىلىشىمىز كېرەك؟ بىز خۇدانىڭ قوزىسى ئەيساغا ئىشىنىدىغانلىقىمىزنى ئىسپاتلىشىمىز كېرەك (يۇھاننا 1:29). ئۆزۈمىزنى خۇداغا بېغىشلاپ، چۆمۈلدۈرۈلۈش مۇراسىمىدىن ئۆتۈشىمىز زۆرۈر (1-پېتر. 3:21). شۇنداقلا قولىمىزدىن كەلگىنىچە، باشقىلارنىڭ يەھۋا توغرۇلۇق بىلىم ئېلىشىغا ياردەم بېرىپ، خۇدا پادىشاھلىقىنى قوللاپ-قۇۋۋەتلەيدىغانلىقىمىزنى چوقۇم كۆرسىتىشىمىز لازىم.
19. ھازىر نېمە قىلىشىمىز كېرەك ۋە نېمە ئۈچۈن؟
19 ھازىر يەھۋاغا ۋە ساداقەتمەن خىزمەتچىلەردىن تەشكىللەنگەن ئۇنىڭ تەشكىلاتىغا بولغان ئىشەنچىمىزنى كۈچەيتىدىغان ۋە خۇدا پادىشاھلىقىنى قوللاپ-قۇۋۋەتلەيدىغان ۋاقىت. شۇنداق قىلىدىغان بولساق، خۇدا پادىشاھلىقى شىمال ۋە جەنۇب پادىشاھلىرىنى يەر يۈزىدىن يوق قىلغان چاغدا، بىز ئامان قالىمىز.
46-ناخشا يەھۋا — پادىشاھىمىز!
a بۈگۈنكى كۈندە «شىمال پادىشاھى» كىم ۋە ئۇ قانداق ۋەيران قىلىنىدۇ؟ بۇ سوئاللارنىڭ جاۋابى ئېتىقادىمىزنى مۇستەھكەملەيدۇ ۋە پات ئارىدا بولىدىغان سىناقلارغا تەييار بولۇشىمىزغا ياردەم بېرىدۇ.
b دانىيال 2: 36—45 ۋە ۋەھىيلەر 13:1، 2-ئايەتلەردىكى پەيغەمبەرلىك سۆزلەر توغرۇلۇق كۆپرەك بىلىش ئۈچۈن، «كۈزىتىش مۇنارى» (باشقا تىلدا) 2012-يىل، 15-ئىيۇن سانىدىكى 7—19-بەتلىرىگە قاراڭ.
c كۆپرەك مەلۇمات ئېلىش ئۈچۈن «كۈزىتىش مۇنارى» 2015-يىل، 15-ماي سانىدىكى 29، 30-بەتلەرگە قاراڭ.
-
-
ئاخىر زاماندىكى رىقابەتچى پادىشاھلاركۈزىتىش مۇنارى. 2020 | ماي
-
-
ئاخىر زاماندىكى رىقابەتچى پادىشاھلار
بۇ جەدۋەلدىكى بەزى پەيغەمبەرلىك سۆزلەر ئوخشاش بىر ۋاقىتتا يۈز بەرگەن ۋەقەلەرنى تەسۋىرلەيدۇ. بۇ بېشارەتلەرنىڭ ھەممىسى بىزنىڭ ئاخىر زاماندا ياشاۋاتقانلقىمىزنى ئىسپاتلايدۇ.—دانىيال 12:4.
ئايەت(لەر): ۋەھىي. 11:7؛ 12:13، 17؛ 13:1—8، 12
پەيغەمبەرلىك سۆزلەر: «يىرتقۇچ ھايۋان» ياكى مەخلۇق ئەسىرلەر داۋامىدا يەر يۈزىدە ھۆكۈمرانلىق قىلىدۇ. ئاخىر زاماندا ئۇنىڭ يەتتىنچى بېشى يارىلىنىدۇ. كېيىنرەك، بۇ باشنىڭ يارىسى ساقىيىپ، «يەردە ياشىغۇچىلارنىڭ ھەممىسى» مەخلۇقنىڭ كەينىدىن ئەگىشىدۇ. شەيتان بۇ مەخلۇق ئارقىلىق ئايالنىڭ «قالغان ئەۋلادىغا» قارشى جەڭ قىلىدۇ.
ئەمەلگە ئېشىشى: توپان سۈيىدىن كېيىن، يەھۋا خۇداغا قارشى چىققان ھۆكۈمەتلەر ئىنسانلارنى باشقۇرۇشنى باشلىغان. نۇرغۇن ئەسىرلەر ئۆتۈپ، بىرىنچى دۇنيا ئۇرۇشى ۋاقتىدا، برىتانىيە ئىمپېرىيىسىنىڭ كۈچى ئاجىزلىشىپ كەتكەن. قوشما شتاتلار بىلەن بىرلەشكەندىن كېيىن بولسا، برىتانىيە قايتىدىن كۈچلۈك بولغان. شەيتان بولۇپمۇ ئاخىر زاماندا خۇدا خەلقىگە ھۇجۇم قىلىش ئۈچۈن پۈتۈن سىياسىي تۈزۈلمىنى ئىشلەتمەكتە.
ئايەت(لەر): دانىيال 11:25—45
پەيغەمبەرلىك سۆزلەر: شىمالىي ۋە جەنۇبىي پادىشاھلار رىقابەتلىشىدۇ.
ئەمەلگە ئېشىشى: گېرمانىيە ۋە ئانگلو-ئامېرىكا بىر-بىرى بىلەن قارشىلىشىدۇ. 1945-يىلى سوۋېت ئىتتىپاقى ۋە ئۇنىڭ ئىتتىپاقداشلىرى شىمالىي پادىشاھ بولغان. 1991-يىلى سوۋېت ئىتتىپاقى غۇلاپ چۈشكەن. ۋاقىت ئۆتۈپ روسىيە ۋە ئۇنىڭ ئىتتىپاقداشلىرى شىمالىي پادىشاھ بولغان.
ئايەت(لەر): يەشايا 61:1؛ مالاك. 3:1؛ لۇقا 4:18
پەيغەمبەرلىك سۆزلەر: مەسىھنىڭ پادىشاھلىقى كەلمەي تۇرۇپ «يول تەييارلاش» ئۈچۈن، يەھۋا «ئەلچىنى» ئەۋەتىدۇ. بۇ بىر توپ مۆمىنلەرگە خۇش خەۋەرنى ئېيتىشنى باشلايدۇ.
ئەمەلگە ئېشىشى: 1870-يىللاردىن تارتىپ، چارلىز راسسېل ۋە ھەمراھلىرى مۇقەددەس كىتابتىكى ھەقىقەتلەرنى چۈشىنىش ئۈچۈن، خۇدا سۆزىنى قىزغىنلىق بىلەن تەتقىق قىلغان. 1880-يىللىرى ئۇلار خۇدا خىزمەتچىلىرى ۋەز قىلىشى لازىم ئىكەنلىكىگە دىققەت ئاغدۇرۇشقا باشلىغان. ئۇلار «1000 ۋەز ئېيتقۇچى كېرەك» ۋە «ۋەز ئېيتىشقا مەسىھ قىلىنغانلار» ناملىق ماقالىلەرنى بېسىپ چىقارغان.
ئايەت(لەر): مەتتا 13:24—30، 36—43
پەيغەمبەرلىك سۆزلەر: بىر كىشى ئېتىزغا بۇغداي ئۇرۇقىنى چاچىدۇ. كېيىن دۈشمىنى كېلىپ، بۇغداينىڭ ئارىسىغا ياۋايى ئوت-چۆپ ئۇرۇقىنى چېچىپ كېتىدۇ. ياۋايى ئوت ئۆسۈپ بۇغداينى بېسىۋالىدۇ. لېكىن، ھوسۇل يىغىش ۋاقتىدا ئوت-چۆپ بۇغدايدىن ئايرىۋېتىلىدۇ.
ئەمەلگە ئېشىشى: 1870-يىلدىن تارتىپ ھەقىقىي مەسىھىيلەر بىلەن ساختا مەسىھىيلەرنىڭ پەرقى ئېنىق كۆرۈنۈشكە باشلىغان. ئاخىر زاماندا خۇدانىڭ ھەقىقىي خىزمەتچىلىرى يىغىلىپ، ساختا مەسىھىيلەردىن ئايرىلغان.
ئايەت(لەر): دانىيال 2:31—33، 41—43
پەيغەمبەرلىك سۆزلەر: ھەرخىل مېتاللاردىن ياسالغان ھەيكەلنىڭ تۆمۈر ۋە سېغىز لايدىن ياسالغان پۇتى.
ئەمەلگە ئېشىشى: سېغىز لاي ئانگلو-ئامېرىكا دۇنيا كۈچى، يەنى ئىمپېرىيىسىنىڭ قول ئاستىدىكى بۇ ھۆكۈمەتكە قارشى چىققۇچىلار ۋە مەسىھىيلەرنىڭ ئاددىي خەلقنى بىلدۈرىدۇ. شۇ ئادەملەر بۇ ئىمپېرىيىنىڭ تۆمۈردەك كۈچلۈك بولۇشىغا توسالغۇلۇق قىلىپ، ئۇنى ئاجىزلاشتۇرىدۇ.
ئايەت(لەر): مەتتا 13:30؛ 24:14، 45؛ 28:19، 20
پەيغەمبەرلىك سۆزلەر: «بۇغداي» «ئامبارلارغا» يىغىلىدۇ، «ئۆيدىكىلىرىنىڭ ئۈستىدىن» «سادىق ھەم ئەقىل-پاراسەتلىك قۇل» تەيىنلىنىدۇ. «پادىشاھلىق ھەققىدىكى خۇش خەۋەر پۈتكۈل يەر يۈزى بويىچە» ۋەز قىلىنىشقا باشلايدۇ.
ئەمەلگە ئېشىشى: 1919-يىلى خۇدا خەلقى ئۈستىدىن «سادىق ھەم ئەقىل-پاراسەتلىك قۇل» تەيىنلەنگەن. شۇ ۋاقىتتىن باشلاپ، مۇقەددەس كىتابنى تەتقىق قىلغۇچىلار كەڭ كۆلەمدە ۋەز ئىشىنى داۋاملاشتۇرماقتا. بۈگۈنكى كۈندە، يەھۋا گۇۋاھچىلىرى 200دىن كۆپرەك دۆلەتلەردە ۋەز قىلىپ، مۇقەددەس كىتابقا ئاساسلانغان ماتېرىياللارنى 1000دىن ئوشۇق تىللاردا نەشىر قىلماقتا.
ئايەت(لەر): دانىيال 12:11؛ ۋەھىي. 13:11، 14، 15
پەيغەمبەرلىك سۆزلەر: ئىككى مۈڭگۈزلۈك مەخلۇق يەتتە بېشى بار مەخلۇقنىڭ ھەيكىلىنى تىكلەشكە تەسىر قىلىپ، شۇ ھەيكەلگە «ھاياتلىق نەپەس» بېرىدۇ.
ئەمەلگە ئېشىشى: ئانگلو-ئامېرىكا دۇنيا كۈچى خەلقئارا ئىتتىپاقنى قۇرۇشقا ئاساس سالىدۇ. بۇ تەشكىلاتنى باشقا خەلقلەرمۇ قوللايدۇ. نەتىجىدە، شىمالىي پادىشاھمۇ پەقەت 1926—1933-يىللار ئارىلىقىدا بۇ ئىتتىپاقنىڭ ئەزاسى بولغان. پۈتۈن دۇنيادا ئىناق-ئىتتىپاقلىقنى پەقەت خۇدا پادىشاھلىقى ئورنىتالايدۇ، لېكىن ئادەملەر بۇنى خەلقئارا ئىتتىپاق قىلالايدۇ، دەپ ئىشەنگەن. ئادەملەر ب د ت بۇنى ئەمەلگە ئاشۇرالايدۇ، دەپ ئويلايدۇ.
ئايەت(لەر): دانىيال 8:23، 24
پەيغەمبەرلىك سۆزلەر:ياۋۇز بىر پادىشاھ كۆپ ۋەيرانچىلىق ئېلىپ كېلىدۇ.
ئەمەلگە ئېشىشى: ئانگلو-ئامېرىكا ئىمپېرىيىسى كۆپ زىيان يەتكۈزگەن. مەسىلەن، ئىككىنچى دۇنيا ئۇرۇشىدا قوشما شتاتلار دۈشمەنلىرىگە قارشى ئىككى ئاتوم بومبىسىنى تاشلىغاندا، نۇرغۇنلىغان ئادەملەر ئۆلۈپ، چوڭ ۋەيرانچىلىق ئېلىپ كەلگەن.
ئايەت(لەر): دانىيال 11:31؛ ۋەھىي. 17:3، 7—11
پەيغەمبەرلىك سۆزلەر: ئون مۈڭگۈزى بار «توق قىزىل» مەخلۇق ھاڭدىن چىقىپ، سەككىزىنچى پادىشاھ بولغان. دانىيال كىتابىدا بۇ پادىشاھ «ۋەيران قىلغۇچى يىرگىنىچلىك نومۇسسىزلىق» دەپ ئاتالغان.
ئەمەلگە ئېشىشى: خەلقئارا ئىتتىپاق ئىككىنچى دۇنيا ئۇرۇشى ۋاقتىدا پائالىيەتسىز بولغان. ئۇرۇشتىن كېيىن، ب د ت ئۇنىڭ «ئورنىغا» چىققان. خەلقئارا ئىتتىپاققا ئوخشاش، ب د ت خۇدا پادىشاھلىقى ئەمەلگە ئاشۇرىدىغان ئىشلارنى قىلىمەن دەيدۇ. ب د ت دىنلارغا ھۇجۇم قىلىدۇ.
ئايەت(لەر): 1-سالونىكا. 5:3؛ ۋەھىي. 17:16
پەيغەمبەرلىك سۆزلەر: دۆلەت رەھبەرلىرى «تىنچلىق ۋە بېخەتەرلىك»، دەپ ئېلان قىلىدۇ. «ئون مۈڭگۈز» ۋە «مەخلۇق» «پاھىشىگە» ھۇجۇم قىلىپ، ئۇنى ۋەيران قىلىدۇ. بۇنىڭدىن كېيىن ھەممە ھۆكۈمەتلەر يوق قىلىنىدۇ.
ئەمەلگە ئېشىشى: دۆلەت رەھبەرلىرى تىنچلىق ۋە بېخەتەرلىكنى ئورناتتۇق، دەپ ئېلان قىلىشى مۇمكىن. ئاندىن ب د ت تەشىكل قىلغان دۆلەتلەر ساختا دىنىي تەشكىلاتلارنى يوق قىلىدۇ. بۇ دەھشەتلىك بالايىئاپەتنىڭ باشلىنىشى بولىدۇ. دەھشەتلىك بالايىئاپەت شەيتاننىڭ پۈتۈن دۇنياسى ئارماگېدون ئۇرۇشىدا يوق قىلىنغاندا ئاخىرلىشىدۇ.
ئايەت(لەر): ھەزەكەرىيا 38:11، 14—17؛ مەتتا 24:31
پەيغەمبەرلىك سۆزلەر: گوگ (يەجۈج بىلەن مەجۈج) خۇدا خەلقىنىڭ زېمىنىغا ھۇجۇم قىلىدۇ. كېيىن پەرىشتىلەر «تاللىغانلىرىنى» يىغىدۇ.
ئەمەلگە ئېشىشى: شىمالىي پادىشاھ باشقا ھۆكۈمەتلەر بىلەن بىرلىشىپ، خۇدا خەلقىگە ھۇجۇم قىلىدۇ. شۇ ھۇجۇم باشلانغاندىن كېيىن، يەردە قالغان مەسىھ قىلىنغانلار ئاسماندا جەم بولىدۇ.
ئايەت(لەر): ھەزەكەرىيا 38:18—23؛ دانىيال 2:34، 35، 44، 45؛ ۋەھىي. 6:2؛ 16:14، 16؛ 17:14؛ 19:20
پەيغەمبەرلىك سۆزلەر: «ئاق ئاتتا» ئولتارغان «چەۋەنداز» گوگ ۋە ئۇنىڭ قوشۇنلىرىغا قارشى جەڭ قىلىپ، «غەلبە قازىنىدۇ». «يىرتقۇچ ھايۋان»، يەنى مەخلۇق، «گۈڭگۈرت كۆيۈۋاتقان ئوت كۆلىگە» تاشلىنىدۇ ۋە چوڭ بىر تاش ھەيكەلنى ۋەيران قىلىدۇ.
ئەمەلگە ئېشىشى: خۇدا پادىشاھلىقىنىڭ پادىشاھى ئەيسا مەسىھ، يەھۋانىڭ خەلقىنى قۇتقۇزۇش ئۈچۈن كېلىدۇ. ئەيسا، 144000 كىشى ۋە پەرىشتىلەر خۇدا خەلقىگە ھۇجۇم قىلىدىغان دۆلەتلەر بىرلىكىنى يوق قىلىدۇ. بۇ شەيتان دۇنياسىنىڭ ئاخىرى بولىدۇ.
-