11-دەرس
مۇقەددەس كىتاب پرىنسىپلىرىدىن قانداق مەنپەئەتكە ئېرىشەلەيمىز؟
1. نېمە ئۈچۈن بىز يولباشچىلىققا مۇھتاج؟
مۇققەددەس كىتابنىڭ پرىنسىپلىرى بېخەتەرلىك قائىدىلىرىنى ئورۇنلاشقا دەۋەت قىلىدۇ (زەبۇر 36:9).
ياراتقۇچىمىز بىزدىن كۆپ ئەقىل-پاراسەتلىكتۇر. ئۇ خۇددى مېھرىبان بىر ئاتىغا ئوخشاش، بىزگە كۆڭۈل بۆلىدۇ. ئۇ بىز ئىنسانلارنىڭ ئۇنىڭغا تايانماي، ئۆز خاھىشىمىز بويىچە ياشىشىمىزنى مەقسەت قىلمىغان (يەرەمىيا 10:23). شۇڭا، گويا كىچىك بالا ئاتا-ئانىسىنىڭ يولباشچىلىقىغا مۇھتاج بولغاندەك، بىز ھەممىمىز خۇدانىڭ يولباشچىلىقىغا مۇھتاجدۇرمىز (يەشايا 48:17، 18). مۇقەددەس كىتاب قائىدە-پرىنسىپلىرى دەل خۇدادىن كەلگەن يولباشچىلىقتۇر. ئۇ بىز ئۈچۈن قىممەتلىك سوۋغات.— 2-تىموتىي 3:16-ئايەتنى ئوقۇڭ.
يەھۋانىڭ قانۇن ۋە قائىدە-پرىنسىپلىرى بىزگە بۈگۈنكى كۈندە تۇرمۇش كەچۈرۈشنىڭ ئەڭ ياخشى يولىنى ئۆگىتىىدۇ ۋە كەلگۈسىدە قانداق قىلىپ مەڭگۈلۈك ھاياتلىق مۇكاپاتىغا ئېرىشەلەيدىغانلىقىمىزنى كۆرسىتىدۇ. خۇدا بىزنى ياراتقان ئىكەن، ناھايىتى تەبئىيكى ئۇنىڭ يولباشچىلىقىغا بويسۇنۇش ۋە مىننەتدارلىق بىلدۈرۈشىمىز لازىم.— زەبۇر 19:7، 11؛ ۋەھىيلەر 4:11-ئايەتلەرنى ئوقۇڭ.
2. مۇقەددەس كىتاب قائىدە-پرىنسىپلىرى دېگەن نېمە؟
مۇقەددەس كىتاب قائىدە-پرىنسىپلىرى بولسا ئاساسىي ھەقىقەتلەردۇر. ئەمما، قانۇنلار ئادەتتە مۇئەييەن شارائىتلار ئۈچۈن ئىشلىتىلىدۇ (تەكرار قانۇن 22:8). ئالاھىدە بىر ئەھۋالدا مەلۇم قائىدە-پرىنسىپنى قانداق قىلىپ ئەمەلىي ئىشلىتىشنى چۈشىنىش ئۈچۈن چوقۇم پەم-پاراسەت، يەنى تەپەككۇر قىلىش ئىقتىدارىمىزنى ئىشلىتىشىمىز لازىم (پەندى-نەسىھەت 2:10–12). مەسىلەن، مۇقەددەس كىتاب ھاياتلىق خۇدادىن كەلگەن بىر سوۋغات، دەپ ئۆگىتىدۇ. شۇ ئاساسىي پرىنسىپ خىزمەت ئورنىدا، ئۆيدە ۋە سەپەرگە چىققاندا بىزگە يولباشچى بولۇپ، بىزنى بىخەتەرلىك تەدبىرى قوللىنىشقا يېتەكلەيدۇ.— زەبۇر 100:3-ئايەتنى ئوقۇڭ.
3. قايسى ئىككى قائىدە-پرىنسىپ ئەڭ مۇھىم؟
ئەيسا پەيغەمبەر ئىككى پرىنسىپنىڭ بەكمۇ مۇھىم ئىكەنلىكىنى تىلغا ئالغان. بىرىنچىسى، ئىنسان ھاياتىنىڭ مەقسىتى بولسا خۇدانى تونۇش، ئۇنى سۆيۈش ۋە ساداقەتمەنلىك بىلەن ئۇنىڭغا خىزمەت قىلىش ئىكەنلىكىنى ئاشكارا قىلغان. ھەربىر قارارنى چىقارغاندا بۇ بىرىنچى پرىنسىپنى ئويلاپ كۆرۈشىمىز لازىم (پەندى-نەسىھەت 3:6). كىم بۇ پرىنسىپ بويىچە ياشىسا، خۇدا بىلەن يېقىن دوست بولۇپ، ھەقىقىي بەخت-سائادەت ۋە مەڭگۈلۈك ھاياتلىققا ئېرىشىدۇ.— مەتتا 22:36–38-ئايەتلەرنى ئوقۇڭ.
ئىككىنچى قائىدە-پرىنسىپ، بىزنى باشقىلار بىلەن تىنچ-ئىناق مۇناسىۋەتتە بولۇشقا يېتەكلىيەلەيدۇ (1-كورىنتلىقلار 13:4–7). مۇشۇ ئىككىنچى پرىنسىپنى ئەمەلىي ئىشلىتىشنى خالىساق، خۇدانىڭ باشقىلارغا مۇئامىلە قىلىش ئۇسۇلىنى ئۈلگە قىلىشىمىز لازىم.— مەتتا 7:12؛ 22:39، 40-ئايەتلەرنى ئوقۇڭ.
4. مۇقەددەس كىتاب قائىدە-پرىنسىپلىرى قانداق قىلىپ بىزگە پايدا-مەنپەئەت ئېلىپ كېلىدۇ؟
مۇقەددەس كىتاب قائىدە-پرىنسىپلىرى مېھىر-مۇھەببەت ئاساسىدا ئائىلىنى ئىناق-ئىتتىپاق قىلىشنى ئۆگىتىدۇ (كولوسىلىقلار 3:12–14). مۇقەددەس كىتاب يەنە، نىكاھتا باغلىنىش ۋاقىتلىق ئەمەس، ئەكسىنچە ئۈزۈلمەس بولسۇن، دېگەن يولباشچى پرىنسىپنى ئۆگىتىش ئارقىلىق ئائىلىنى قوغدايدۇ.— يارىتىلىش 2:24-ئايەتنى ئوقۇڭ.
مۇقەددەس كىتاب قائىدە-پرىنسىپلىرى بويىچە تۇرمۇش كەچۈرۈش، بىزنىڭ ماددىي مۇھتاجلىقىمىزنى قامداش ۋە كۆڭۈل خاتىرجەملىكىگە ئېرىشىشىمىز ئۈچۈن ياردەم بېرىدۇ. مەسىلەن، خوجايىنلار ھەمىشە مۇقەددەس كىتابتىكى سەمىمىيلىك ۋە تىرىشچانلىق پرىنسىپلىرى بويىچە ياشايدىغانلارنى خىزمەتكە قوبۇل قىلىشنى خالايدۇ (پەندى-نەسىھەت 10:4، 26؛ ئىبرانىيلار 13:18). مۇقەددەس كىتاب يەنە ئىگە بولغان زۆرۈر لازىمەتلىكلەر بىلەن قانائەت ھاسىل قىلىش ۋە خۇدا بىلەن بولغان مۇناسىۋەتنى ماددىي نەرسىلەردىن ئەزىز كۆرۈشنى ئۆگىتىدۇ.— مەتتا 6:24، 25، 33؛ 1-تىموتىي 6:8–10-ئايەتلەرنى ئوقۇڭ.
مۇقەددەس كىتاب قائىدە-پرىنسىپلىرىنى ئەمەلىي ئىشلىتىش بىزنىڭ تەن-ساغلاملىقىمىزنى قوغدايدۇ (پەندى-نەسىھەت 14:30؛ 22:24، 25). مەسىلەن، خۇدانىڭ ھاراقكەشلىككە قارشى بولغان قانۇنىغا قۇلاق سېلىش، بىزنى ئېغىر كېسەللىكلەر ۋە ھادىسىلەردىن قوغدايدۇ (پەندى-نەسىھەت 23:20). ئەمما، يەھۋا مۇۋاپىق مىقداردا شاراب ئىچىشنى ئەيىبلىمەيدۇ (زەبۇر 104:15؛ 1-كورىنتلىقلار 6:10). خۇدانىڭ قانۇنلىرى بىزگە پەقەت ئىش-ھەرىكەتلىرىمىزنىلا ئەمەس، يەنە ئوي-خىياللىرىمىزنى ھەم قوغداشنى ئۆگىتىش ئارقىلىق بىزگە پايدا-مەنپەئەت ئېلىپ كېلىدۇ (زەبۇر 119:97–100). لېكىن، خۇداغا ھەقىقىي ئىبادەت قىلغۇچىلار پەقەت ئۆزىنىڭ پايدا-مەنپەئەتى ئۈچۈنلا خۇدانىڭ قانۇن-ئۆلچەملىرىنى ھۆرمەتلەپلا قالماستىن. ئۇلار يەھۋانى ئۇلۇغلاش ئۈچۈن شۇنداق قىلىدۇ.— مەتتا 5:14–16-ئايەتلەرنى ئوقۇڭ.