11-تەتقىق ماقالىسى
مۇقەددەس كىتابنى ئوقۇش قىيىنچىلىقلارغا بەرداشلىق بېرىشكە قانداق ياردەم بېرىدۇ؟
«سەۋر-تاقەت . . . مەنبەسى بولغان خۇدا».—رىملىقلار 15:5.
37-ناخشا مۇقەددەس كىتاب خۇدانىڭ ئىلھامى بىلەن يېزىلغان
بۇ ماقالىدەa
1. يەھۋانىڭ خەلقى قانداق قىيىنچىلىقلارغا دۇچ كېلىشى مۇمكىن؟
سىز قىيىنچىلىقلارنى باشتىن ئۆتكۈزۈۋاتامسىز؟ مۇمكىن سىزنى جامائەتتە بىرسى خاپا قىلىپ قويغاندۇ (ياقۇپ 3:2). بەلكىم سىنىپداشلىرىڭىز ياكى خىزمەتداشلىرىڭىز يەھۋاغا خىزمەت قىلىۋاتقانلىقىڭىز ئۈچۈن سىزنى زاڭلىق قىلىۋاتىدۇ (1-پېتر. 4:3، 4). ياكى بولمىسا، ئائىلە ئەزالىرىڭىز جامائەت يىغىلىشلىرىغا بېرىشىڭىزغا ياكى باشقىلارغا ئۆز ئېتىقادىڭىز ھەققىدە ئېيتىشىڭىزغا توسالغۇلۇق قىلىدىغاندۇ (مەتتا 10:35، 36). ئەگەر سىناق بەكمۇ ئېغىر بولسا، سىز يەھۋاغا خىزمەت قىلىشنى توختاتسام، بەلكىم ياخشى بولار، دەپ ئويلايدىغانسىز. لېكىن، مەيلى قانداق قىيىنچىلىققا دۇچ كەلمەڭ، يەھۋا ئۇنى باشتىن كەچۈرۈش ئۈچۈن سىزگە دانالىق ۋە كۈچ بېرىدىغانلىقىغا ئىشەنچىڭىز كامىل بولسۇن.
2. رىملىقلار 15:4-ئايەتكە ئاساسلانغاندا، مۇقەددەس كىتابنى ئوقۇش بىزگە قانداق تەسىر قىلىشى مۇمكىن؟
2 يەھۋا ئۆز سۆزىدە نامۇكەممەل ئادەملەرنىڭ قىيىنچىلىقلارنى قانداق يەڭگەنلىكى توغرۇلۇق تەپسىلىي ئېيتىپ بەرگەن. نېمە ئۈچۈن؟ چۈنكى، ئۇلاردىن ساۋاق ئالالايمىز. شۇڭا، يەھۋا ئەلچى پاۋلۇسنى شۇ توغرۇلۇق يېزىشقا دەۋەت قىلغان (رىملىقلار 15:4-نى ئوقۇڭ). ئاشۇ ئىش-ۋەقەلەر بىزگە تەسەللى ۋە ئۈمىد بېرىدۇ. بىراق، ئۇلارنىڭ كۆپرەك پايدىسى تېگىش ئۈچۈن مۇقەددەس كىتابنى پەقەت ئوقۇپلا قويماي، يەنە باشقىمۇ ئىشلارنى قىلىش كېرەك. يازمىلارنىڭ پىكىر قىلىش تەرزىمىزنى ئۆزگەرتىپ، يۈرەكلىرىمىزگە تەسىر قىلىشىغا يول قويۇشىمىز كېرەك. ئەگەر قانداقتۇ بىر قىيىنچىلىقنى ھەل قىلىش ئۈچۈن مەسلىھەتنى ئىزدىسەك، نېمە قىلساق بولىدۇ؟ بىز تۆت قەدەمنى بېسىشىمىز كېرەك: (1) دۇئا قىلىش، (2) تەسەۋۋۇر قىلىش، (3) چوڭقۇر ئويلىنىش ۋە (4) ئەمەلىيەتتە قوللىنىش. كېلىڭلار، ئەمدى ھەر بىرىنى ئالايىتەن كۆرۈپ چىقايلىb. كېيىن، مۇشۇ تۆت قەدەمنى بېسىپ، داۋۇت پادىشاھنىڭ ۋە ئەلچى پاۋلۇسنىڭ ھاياتىدا يۈز بەرگەن ۋەقەلەرنى تەتقىق قىلىپ ئۆگىنىمىز.
1. دۇئا قىلىش
مۇقەددەس كىتابنى ئوقۇشتىن ئاۋۋال، يەھۋا خۇدادىن ئوقۇغانلىرىڭىزنى چۈشىنىپ، ئۆزىڭىز ئۈچۈن پايدىلىق مەسلىھەتلەرنى تېپىشىڭىزغا ياردەم بېرىشىنى سوراڭ (3-ئابزاسقا قاراڭ)
3. مۇقەددەس كىتابنى ئوقۇشتىن ئاۋۋال، سىز نېمە قىلىشىڭىز كېرەك ۋە نېمە ئۈچۈن؟
3 (1) دۇئا قىلىش. مۇقەددەس كىتابنى ئوقۇشتىن ئاۋۋال ئوقۇغانلىرىڭىزنىڭ پايدىسىنى كۆرۈش ئۈچۈن يەھۋادىن ياردەم سوراڭ. مەسىلەن، سىز قانداقتۇ بىر قىيىنچىلىقنى ھەل قىلىش ئۈچۈن مەسلىھەت ئىزدىسىڭىز، خۇدا سۆزىدىن سىزگە يول كۆرسىتىدىغان پرىنسىپلارنى تېپىش ئۈچۈن، ئۇنىڭدىن ياردەم سوراپ دۇئا قىلىڭ.—فىلىپى. 4:6، 7؛ ياقۇپ 1:5.
2. تەسەۋۋۇر قىلىش
مۇقەددەس كىتابتىكى شەخىسلەرنىڭ ئورنىغا ئۆزىڭىزنى قويۇپ تەسەۋۋۇر قىلىڭ (4-ئابزاسقا قاراڭ)
4. سىزگە مۇقەددەس كىتابتىكى ئىش-ۋەقەلەرنى جانلاندۇرۇش ئۈچۈن نېمە ياردەم بېرىدۇ؟
4 (2) تەسەۋۋۇر قىلىش. يەھۋا بىزگە ئاجايىپ تەسەۋۋۇر قىلىش قابىلىيىتىنى بەرگەن. مۇقەددەس كىتابتىكى ئىش-ۋەقەلەرنى جانلاندۇرۇش ئۈچۈن ئۇلارنى تەسەۋۋۇر قىلىپ كۆز ئالدىڭىزغا كەلتۈرۈڭ ۋە تىلغا ئېلىنغان شەخسنىڭ ئورنىغا ئۆزىڭىزنى قويۇڭ. ئۇ كۆرگەن نەرسىلەرنى كۆرۈشكە ۋە ئۇلارنىڭ ھېس-تۇيغۇلىرىنى ھېس قىلىشقا تىرىشىپ كۆرۈڭ.
3. مۇلاھىزە قىلىش
ئوقۇغانلىرىڭىزنى ئەمەلىيەتتە قانداق قوللىنىشقا بولىدىغانلىقى ھەققىدە كۆڭۈل قويۇپ ئويلىنىڭ (5-ئابزاسقا قاراڭ)
5. نېمە ھەققىدە ئويلىنىش كېرەك ۋە قانداق؟
5 (3) چوڭقۇر ئويلىنىش. چوڭقۇر ئويلىنىش دېگىنىمىز ئوقۇغانلىرىڭىز ۋە ئاشۇ مەلۇماتنى ئۆز ھاياتىڭىزدا قانداق ئەمەلىي قوللىنالايدىغانلىقىڭىز ھەققىدە ئېھتىياتچانلىق بىلەن ئويلىنىشنى بىلدۈرىدۇ. بۇ سىزنىڭ ئوي-پىكىرلەرنى بىر-بىرىگە باغلاپ، ئوقۇغانلىرىڭىزنى چوڭقۇرراق چۈشىنىشكە ياردەم بېرىدۇ. ئەگەر مۇقەددەس كىتابنى ئوقۇپ، ئەمما ئوقۇغانلار ئۈستىدە چوڭقۇر ئويلانمىساق، ئۈستەل ئۈستىدە دۆۋلەپ قويۇلغان سۈرەتنىڭ پارچىلىرىگە ئوخشاش بولىدۇ. ئەمما، ئەتراپلىق ۋە چوڭقۇر ئويلىنىش بولسا، شۇ سۈرەتنىڭ پارچىلىرىنى بىر-بىرلەپ ئۆزىنىڭ كېلىدىغان ئورۇنلىرىغا تىزىپ سۈرەتتىكى پۈتۈن مەنزىرىنى كۆرگەنگە ئوخشاش بولىدۇ. چوڭقۇر ئويلىنىشىڭىزغا ياردەم بېرىدىغان سوئاللارنى قويۇپ جاۋاب بېرىپ بېقىڭ: بۇ ۋەقەدىكى شەخس مەسىلىنى ھەل قىلىش ئۈچۈن نېمە قىلغان؟ يەھۋا ئۇنىڭغا قانداق ياردەم بەرگەن؟ قىيىنچىلىقلارغا بەرداشلىق بېرىشىم ئۈچۈن بۇ مىساللارنى ئۆزۈم ھاياتىمدا قانداق ئەمەلىي قوللانسام بولىدۇ؟
4. ئەمەلىيەتتە قوللىنىش
ئالغان بىلىمنى ئەمەلىيەتتە قوللىنىپ، ياخشىراق قارارلارنى چىقىرىمىز، تىنچ-خاتىرجەملىككە ئېرىشىمىز ھەم ئىشەنچىمىزنى مۇستەھكەملەيمىز (6-ئابزاسقا قاراڭ)
6. نېمە ئۈچۈن بىز ئۆگەنگەنلىرىمىزنى ئەمەلىيەتتە قوللىنىشىمىز كېرەك؟
6 (4) ئەمەلىيەتتە قوللىنىش. ئەيسا مەسىھ مۇنداق دېگەن: ئۆگەنگەنلىرىمىزنى ئەمەلىيەتتە قوللانمىساق، ئۆيىنى قۇمنىڭ ئۈستىگە سالغان ئادەمگە ئوخشاش بولىدۇ. ئۇ ئادەم كۆپ تەر تۆكۈپ ئىشلەيدۇ. بىراق، ھەممىسى بىكار بولىدۇ. نېمە ئۈچۈن؟ چۈنكى، يامغۇر ۋە كەلكۈن ھۇجۇمىغا ئۇچرىغاندا، ئۇنىڭ ئۆيى ئۆرۈلۈپ كېتىدۇ (مەتتا 7:24—27). شۇنىڭغا ئوخشاش، ئەگەر بىز دۇئا قىلساق، تەسەۋۋۇر قىلساق ۋە چوڭقۇر ئويلىساق، بىراق ئۆگەنگەنلىرىمىزنى ئەمەلىيەتتە قوللانمىساق، كۈچىمىزنى بىكار ئۇپراتقاندەك بولىمىز. شۇ سەۋەبتىن، قىيىنچىلىقلار ياكى زىيانكەشلىككە دۇچ كېلىپ، ئىمان-ئېتىقادىمىز سىنالغاندا، ئاجىز كېلىپ قالىمىز. لېكىن، ئۆگەنگەنلىرىمىزنى ئەمەلىيەتتە قوللانساق، بىز ياخشىراق قارارلارنى چىقىرىمىز ۋە ئىناق-ئىتتىپاقلىققا ئېرىشىمىز ھەم ئىشەنچىمىزنى مۇستەھكەملەيمىز (يەشايا 48:17، 18). بىز ھازىر مۇھاكىمە قىلغان تۆت قەدەمنى قوللىنىپ، پادىشاھ داۋۇتنىڭ ھاياتىدىكى ۋەقەلەردىن نېمىنى ئۆگىنەلەيدىغانلىقىمىزنى كۆرۈپ چىقىمىز.
داۋۇت پادىشاھنىڭ مىسالىدىن نېمىنى ئۆگىنەلەيمىز؟
7. ھازىر بىز قانداق ۋەقەنى كۆرۈپ چىقىمىز؟
7 دوستىڭىز ياكى ئائىلىڭىزدىكى بىرى كۆڭلىڭىزنى ئاغرىتتىمۇ؟ شۇنداق بولسا، داۋۇت پادىشاھنىڭ ئوغلى ئابشالوم ھەققىدىكى ۋەقە سىزگە ياردەم بېرىدۇ. ئۇ ئۆز دادىسىغا خائىنلىق قىلىپ، ئۇنىڭدىن پادىشاھلىقنى تارتىۋېلىشقا ھەرىكەت قىلغان.—2-سام. 15:5—14، 31؛ 18:6—14.
8. يەھۋانىڭ ياردىمىگە ئېرىشىش ئۈچۈن نېمە قىلسىڭىز بولىدۇ؟
8 (1) دۇئا قىلىش. مۇشۇ ۋەقەنى ئەستە تۇتۇپ، باشقىلارنىڭ سىزگە قىلغان رەھىمسىز مۇئامىلىسى ھەققىدە خۇداغا ئېيتىپ بېرىڭ (زەبۇر 6:6—9). ئۇنىڭغا ھېس-تۇيغۇلىرىڭىزنى ئېنىق ئېيتىڭ. كېيىن، يەھۋادىن مۇشۇ قىيىن مەسىلىنى بىر تەرەپ قىلىشقا يول كۆرسىتىدىغان پرىنسىپلارنى تېپىشىڭىزغا ياردەم بېرىشنى سوراڭ.
9. داۋۇت بىلەن ئابشالوم ئارىسىدا قانداق ئىش يۈز بەرگەن؟
9 (2) تەسەۋۋۇر قىلىش. مۇشۇ ۋەقەلەر توغرۇلۇق ئويلىنىڭ ۋە بۇ داۋۇت پادىشاھقا قانداق تەسىر قىلغانلىقىنى كۆز ئالدىڭىزغا كەلتۈرۈڭ. داۋۇتنىڭ ئوغلى ئابشالوم خەلقنىڭ ياخشى كۆرۈشىنى قولغا كەلتۈرۈش ئۈچۈن بىرنەچچە يىل تىرىشقان (2-سام. 15:7). ئابشالوم ھەرىكەت قىلىشنىڭ ۋاقتى كەلگەنلىكىنى چۈشەنگەندە، پۈتۈن ئىسرائىل زېمىنىغا مەخپىي ئەلچىلەرنى ئەۋەتىپ، خەلقنى ئۇنى پادىشاھ سۈپىتىدە قوبۇل قىلىشقا تەييارلىق قىلغان. ئۇ ھەتتا داۋۇتنىڭ يېقىن دوستلىرىنى ۋە مەسلىھەتچىسى ئاخىتوفېلنى ئىسىيان كۆتۈرۈشكە كۆندۈرگەن. ئابشالوم ئۆزىنى پادىشاھ دەپ جاكارلىغاندىن كېيىن، بەلكىم شۇ ۋاقىتتا قاتتىق ئاغرىۋاتقان داۋۇتنى تۇتۇۋېلىپ ئۆلتۈرۈشكە ئۇرۇنغان (زەبۇر 41:1—9). داۋۇت ئۇنىڭ پىلانىنى بىلىپ، يېرۇسالىمدىن قېچىپ كەتكەن. ئاخىرىدا، داۋۇتنىڭ سادىق ئەسكەرلىرى ئابشالومنىڭ ئەسكەرلىرى بىلەن ئۇچرىشىپ، ئۇلارنىڭ ئۈستىدىن غەلبە قازىنىپ، ئابشالومنى ئۆلتۈرگەن.
10. داۋۇت نېمە قىلسا بولاتتى؟
10 ئاندىن داۋۇت شۇ ئىشلارغا دۇچ كەلگەندە، ئۇنىڭ قانداق ھېس-تۇيغۇدا بولغانلىقىنى تەسەۋۋۇر قىلىپ كۆرۈڭ. ئۇ ئابشالومنى ياخشى كۆرگەن ھەم ئاخىتوفېلغا ئىشەنگەن. ئەمما، شۇ ئىككى يېقىن ئادىمى ئۇنىڭغا ساتقۇنلۇق قىلغان. ئۇلار ئۇنى قاتتىق رەنجىتىپ، ھەتتا ئۆلتۈرمەكچى بولغان. داۋۇت ئۆزىنىڭ باشقا دوستلىرىمۇ ئابشالومغا قوشۇلدى دەپ، ئۇلاردىن گۇمان قىلىشى مۇمكىن ئىدى. داۋۇت پەقەت ئۆزىنىلا ئويلاپ يۇرتىنى تاشلاپ يالغۇز قېچىپ كەتسە بولاتتى ياكى ئۇ پۈتۈنلەي ئۈمىدسىزلىنىپ بەل قويۇۋەتسە بولاتتى. بىراق، داۋۇت بۇنىڭ ھېچ قايسىسىنى قىلمىغان. ئەكسىنچە، ئۇ ئېغىر سىناقلارنى يەڭگەن. نېمە ئۈچۈن ئۇ شۇنداق قىلالىغان؟
11. داۋۇت قىيىن ئەھۋالدا نېمە قىلغان؟
11 (3) چوڭقۇر ئويلىنىش. مۇشۇ ۋەقەدىن سىز قانداق پرىنسىپلارنى ئۆگىنەلەيسىز؟ مۇشۇ سوئالغا جاۋاب بېرىڭ: داۋۇت ئۆزىگە ياردەم بېرىشى ئۈچۈن نېمە قىلغان؟ داۋۇت ھودۇقۇپ قورۇپ كەتمىگەن ۋە تېزلا ناتوغرا قارارلارنى چىقارمىغان. ياكى قورقۇپ كېتىپ، نېمە قىلارىنى بىلمەي تۇرۇپ قالمىغان. ئۇ يەھۋاغا دۇئا قىلىپ ياردەم سورىغان. يەنە ئۇ دوستلىرىدىن ئۇنىڭغا ياردەم بېرىشنى سورىغان. ئۇنىڭدىن باشقا، ئۇ قارارلارنى چىقىرىش ئۈچۈن تېز ھەرىكەت قىلغان. ھەتتا داۋۇتنىڭ كۆڭلى يېرىم بولسىمۇ، ئۇ باشقىلارغا ئىشەنمەي ۋە غەزىپى قايناپ يۈرمىگەن. ئۇ يەھۋاغا ۋە ئۆز دوستلىرىغا داۋاملىق ئىشەنگەن ئىدى.
12. يەھۋا داۋۇتقا قانداق ياردەم بەرگەن؟
12 يەھۋا خۇدا داۋۇتقا قانداق ياردەم بەرگەن؟ بەزى ئىزدىنىشنىڭ نەتىجىسىدە، داۋۇتنىڭ سىناقلارغا بەرداشلىق بېرىشى ئۈچۈن يەھۋانىڭ ئۇنىڭغا كېرەكلىك كۈچ بەرگەنلىكىنى بىلەلەيسىز (زەبۇر 3:1—8). خۇدا داۋۇتنىڭ قىلغان قارارلىرىنى بەرىكەتلىگەن. ئۇ يەنە پادىشاھى داۋۇتنى ھىمايە قىلىدىغان سادىق دوستلىرىنى قوللاپ-قۇۋۋەتلىگەن.
13. ئەگەر بىرسى سىزنى قاتتىق رەنجىتىپ قويسا، سىز داۋۇتتىن قانداق ئۈلگە ئالالايسىز؟ (مەتتا 18:15—17)
13 (4) ئەمەلىيەتتە قوللىنىش. ئۆزىڭىزدىن مۇنداق سوراڭ: مەن داۋۇتتىن قانداق ئۈلگە ئالالايمەن؟ قىيىنچىلىقنى ھەل قىلىش ئۈچۈن تېز ھەرىكەت قىلىڭ. ۋەزىيىتىڭىزگە قاراپ، ئەيسا مەتتا 18-بابتا ئېيتقان قەدەملەرنى باسالايسىز ياكى شۇ نەسىھەتتىكى پرىنسىپقا ئەمەل قىلالايسىز (مەتتا 18:15—17-نى ئوقۇڭ). ئەمما، ھېس-تۇيغۇلارغا بېرىلىپ، بەك ئالدىراپلا قارارلارنى چىقارماسلىقىڭىز كېرەك. يەھۋا سىزگە مەسىلىنى ھەل قىلىش ئۈچۈن تىنچ-خاتىرجەملىك ۋە دانالىقنى بېرىشى ئۈچۈن دۇئا قىلىشىڭىز لازىم. دوستلىرىڭىزغا بولغان ئىشەنچىڭىزنى يوقاتماڭ. ئەكسىنچە، ئۇلار بەرگەن ياردەمنى قوبۇل قىلىڭ (پەند. نە 17:17). ئەڭ مۇھىمى، يەھۋا ئۆز سۆزىدە سىزگە بەرگەن نەسىھەتكە ئەمەل قىلىڭ.—پەند. نە 3:5، 6.
ئەلچى پاۋلۇستىن نېمىنى ئۆگىنەلەيسىز؟
14. 2-تىموتىي 1:12—16؛ 4:6—11، 17—22-ئايەتلەر، سىزگە قانداق ۋەزىيەتلەردە ئىلھام بېرەلەيدۇ؟
14 بەلكىم، ئائىلە ئەزالىرىڭىزنىڭ قارشىلىقىغا دۇچ كېلىۋاتقانسىز. ياكى بولمىسا، يەھۋا گۇۋاھچىلىرىنىڭ ئىش-پائالىيىتى چەكلەنگەن ياكى مەنئىي قىلىنغان دۆلەتتە ياشاۋاتقانسىز. ئەگەر شۇنداق بولسا، 2-تىموتىي 1:12—16؛ 4:6—11، 17—22-ئايەتلەرنى ئوقۇپ، ئىلھام تاپالايسىزc. ئەلچى پاۋلۇس مۇقەددەس يازمىلاردىكى بۇ ئايەتلەرنى زىنداندا ياتقاندا يازغان.
15. خۇدادىن نېمىنى سورىسىڭىز بولىدۇ؟
15 (1) دۇئا قىلىش. كەلتۈرۈلگەن ئايەتلەرنى ئوقۇشتىن ئاۋۋال، يەھۋاغا ئۆز قىيىنچىلىقلىرىڭىزنى ئېيتىپ، ئىچ-باغرىڭىزنى تۆكۈڭ. ئۇنىڭغا دۇئادا نېمىنى ھېس قىلىۋاتقانلىقىڭىزنى ئېنىق ئېيتىپ بېرىڭ. ئاندىن ئەلچى پاۋلۇس باشتىن ئۆتكۈزگەن ئىش-ۋەقەلەردىن، ئۆزىڭىز دۇچ كېلىۋاتقان قىيىنچىلىقلارغا قانداق ئىنكاس قايتۇرۇشىڭىزغا ياردەم بېرىدىغان پرىنسىپلارنى تاپالىشىڭىز ئۈچۈن يەھۋادىن ياردەم سوراڭ.
16. پاۋلۇسقا نېمە ئىش بولغان؟
16 (2) تەسەۋۋۇر قىلىش. ئۆزىڭىزنى پاۋلۇسنىڭ ئورنىغا قويۇپ تەسەۋۋۇر قىلىڭ. رىمدا پاۋلۇسنىڭ قوللىرى زەنجىر بىلەن باغلىنىپ، زىنداندا ئولتۇرىدۇ. ئۇ بۇرۇنمۇ زىنداندا ياتقان، بىراق بۇ قېتىم ئۆزىنىڭ ئۆلۈم جازاسىغا ھۆكۈم قىلىنىدىغانلىقىغا كۆز يەتكۈزدى. بەزى ھەمراھلىرى ئۇنى تاشلاپ كەتكەن ۋە ئۇ ھېرىپ چارچاپ، كۈچ ماغدۇرىدىن كەتكەن ئىدى.—2-تىموت. 1:15.
17. ئەلچى پاۋلۇس نېمە قىلالايتتى؟
17 ئەلچى پاۋلۇس بەلكىم ئۆتمۈشىنى ئەسلەپ، بۇنچە بەك قىزغىن ئەيسانىڭ ئەگەشكۈچىسى بولمىغان بولسام، زىنداندا ياتماس بولغۇيتۇم، دەپ ئويلىشى مۇمكىن ئىدى. ئۇ ئاسىيا ئۆلكىسىدىكى ئۇنى تاشلاپ كەتكەن قېرىنداشلارغا ئاچچىقلىنىپ، باشقا قېرىنداشلارغىمۇ ئىشىنىشنى توختاتسا بولاتتى. بىراق، ئەلچى پاۋلۇس شۇلارنىڭ ھېچ بىرىنى قىلمىغان. نېمە ئۈچۈن پاۋلۇس ئۆز دوستلىرىنىڭ ئۇنىڭغا سادىق بولغانلىقىغا ۋە يەھۋانىڭ ئۇنى مۇكاپاتلايدىغانلىقىغا ئىشەنگەن؟
18. ئەلچى پاۋلۇس ئېغىر سىناقلارغا دۇچ كەلگەندە، نېمە قىلغان؟
18 (3) چوڭقۇر ئويلىنىش. ئۆزىڭىزدىن سوراڭ: ئەلچى پاۋلۇس ئۆز-ئۆزىگە قانداق ياردەم بەرگەن؟ پاۋلۇس ھەتتا ئۆلۈم تەھدىتى ئالدىدا، يەھۋا خۇدانى مەدھىيىلەش پۇرسىتىنى قولدىن چىقارمىغان. ئۇ باشقىلارغا قانداق ئىلھام بېرەلەيدىغانلىقى ھەققىدە داۋاملىق ئويلىغان. شۇنداقلا ئۇ داۋاملىق دۇئا قىلىش ئارقىلىق يەھۋاغا تايانغان (2-تىموت. 1:3). ئۇ توختىماي ئۇنى تاشلاپ كەتكەن قېرىنداشلار ھەققىدە ئويلىنىشنىڭ ئورنىغا، ئۇنىڭغا ياردەم قولىنى سۇنغان قېرىنداشلارنىڭ ياردىمى ئۈچۈن چوڭقۇر مىننەتدارلىقىنى بىلدۈرگەن. ئۇنىڭدىن باشقا، ئەلچى پاۋلۇس خۇدا سۆزىنى داۋاملىق تەتقىق قىلغان (2-تىموت. 3:16، 17؛ 4:13). ئەڭ مۇھىمى، ئۇ يەھۋا ۋە ئەيسا مەسىھنىڭ ئۇنى ياخشى كۆرىدىغانلىقىغا تولۇق ئىشەنگەن. ئۇلار ئۇنى تاشلىمىغان ۋە ئۇنىڭ سادىق خىزمىتى ئۈچۈن ئۇنى بەرىكەتلەيدۇ.
19. يەھۋا ئەلچى پاۋلۇسقا قانداق ياردەم بەرگەن؟
19 يەھۋا ئەلچى پاۋلۇسنى مەسىھ ئەگەشكۈچىسى بولغانلىقى ئۈچۈن زىيانكەشلىككە دۇچ كېلىدىغانلىقى ھەققىدە ئاگاھلاندۇرغان (ئەلچى. 21:11—13). خۇدا پاۋلۇسقا قانداق ياردەم بەرگەن؟ خۇدا ئۇنىڭ دۇئالىرىغا جاۋاب بەرگەن ۋە ۋاقىت ئۆتۈپ ئۇنىڭغا كۈچ بەرگەن (2-تىموت. 4:17). ئۇ ئەلچى پاۋلۇسنى جاپالىق خىزمەت قىلغىنى ئۈچۈن مۇكاپاتقا ئېرىشتۈرىدىغانلىقىغا ئىشەندۈرگەن. يەھۋا پاۋلۇسنىڭ سادىق دوستلىرىنى ئۇنىڭغا ياردەم قولىنى سۇنۇشقا دەۋەت قىلغان.
20. رىملىقلار 8:38، 39-ئايەتلەرنى نەزەردە تۇتۇپ، بىز پاۋلۇسنى قانداق ئۈلگە قىلالايمىز؟
20 (4) ئەمەلىيەتتە قوللىنىش. ئۆزىڭىزدىن مۇنداق سوراڭ: مەن پاۋلۇستىن قانداق ئۈلگە ئالالايمەن؟ ئەلچى پاۋلۇسقا ئوخشاش، بىز ئىمان-ئېتىقادىمىز سەۋەبلىك زىيانكەشلىككە ئۇچرىساق ھەيران بولمايمىز (ماركۇس 10:29، 30). قىيىنچىلىقلارغا دۇچ كەلگەندە، خۇداغا بولغان ساداقەتمەنلىكىمىزنى ساقلاپ قېلىش ئۈچۈن بىز ئۇنىڭغا داۋاملىق دۇئا قىلىشىمىز ۋە ئۇنىڭ سۆزىنى دائىم تەتقىق قىلىشىمىز كېرەك. بىز شۇنى ئۇنتۇپ قالماسلىقىمىز كېرەككى، بىز قىلالايدىغان ئەڭ مۇھىم ئىشلارنىڭ بىرى يەھۋاغا شان-شەرەپ كەلتۈرۈشتۇر. بىز خۇدانىڭ بىزنى تاشلاپ كەتمەيدىغانلىقىغا ۋە ھېچقانداق نەرسىنىڭ بىزنى ئۇنىڭ مېھىر-مۇھەببىتىدىن ئايرىۋېتەلمەيدىغانلىقىغا ئىشىنەلەيمىز.—رىملىقلار 8:38، 39-نى ئوقۇڭ؛ ئىبرانىي. 13:5، 6.
مۇقەددەس كىتابتىكى باشقا سادىق ئەر ۋە ئاياللارنىڭ مىسالىدىن ئۆگىنىڭ
21. ئاييا ۋە خېكتورغا دۇچ كەلگەن قىيىنچىلىقلارنى يېڭىشكە نېمە ياردەم بەرگەن؟
21 مەيلى بىزنىڭ ئەھۋالىمىز قانداق بولسۇن، بىز مۇقەددەس كىتابتىكى مىساللاردىن كۈچ ئالالايمىز. مەسىلەن، ياپونىيەدە ياشاۋاتقان ئاييا ئىسىملىك پىدائىي ۋەز ئېيتقۇچىنىڭ ئېيتىشىچە، ئۇنىڭغا يۇنۇس پەيغەمبەرنىڭ مىسالى كۆپچىلىكنىڭ ئالدىدا ۋەز قىلىشتىن قورقۇشنى يېڭىشكە ياردەم بەرگەن. ئاتا-ئانىسى يەھۋا گۇۋاھچىسى ئەمەس، ھىندىنوزىيىدە ياشاۋاتقان خېكتور ئىسىملىك ياش يىگىتنىڭ ئېيتىشىچە، ئۇنى رۇتنىڭ ئۈلگىسى يەھۋا خۇدا توغرۇلۇق بىلىم ئېلىشقا ۋە ئۇنىڭغا خىزمەت قىلىشقا دەۋەت قىلىدۇ.
22. مۇقەددەس كىتابنىڭ ئاۋازلىق ۋە سۈرەتلىك (فىلىم) درامىلار ۋە «ئۇلارنىڭ ئېتىقادىدىن ئۈلگە ئېلىڭلار» دېگەن بىر قاتار ماقالىلەردىن قانداق پايدىلىنالايسىز؟
22 سىزنى مۇستەھكەملەيدىغان مۇقەددەس كىتابتىكى مىساللارنى نەدىن تاپالايسىز؟ مۇقەددەس كىتابنىڭ ئاۋازلىق ۋە سۈرەتلىك (فىلىم) درامىلىرى ۋە «ئۇلارنىڭ ئېتىقادىدىن ئۈلگە ئېلىڭلار»، دېگەن بىر قاتار ماقالىلەر مۇقەددەس كىتابتىكى ۋەقەلەرنى تەسەۋۋۇر قىلىشىمىزغا ياردەم بېرەلەيدۇd. بۇ پۇختا تەتقىق قىلىنغان مۇقەددەس كىتابتىكى ۋەقەلەرنى كۆرۈش، ئاڭلاش ۋە ئوقۇشتىن ئاۋۋال، ئەمەلىيەتتە قوللىنالايدىغان مۇھىم ساۋاقلارنى تاپالىشىڭىز ئۈچۈن دۇئا قىلىپ يەھۋادىن ياردەم سوراڭ. ئۆزىڭىزنى باش قەھرىماننىڭ ئورنىغا قويۇپ تەسەۋۋۇر قىلىڭ. خۇدانىڭ سادىق خىزمەتچىلىرىنىڭ ئىش ئىزلىرى ۋە ئۇلارنىڭ قىيىنچىلىقلارنى يېڭىشىگە خۇدا قانداق ياردەم بەرگەنلىكى ھەققىدە چوڭقۇر پىكىر يۈرگۈزۈڭ. ئالغان ساۋاقلارنى ئۆز ۋەزىيىتىڭىزگە قاراپ ئەمەلىيەتتە قوللىنىڭ. سىزگە قىلغان ياردىمى ئۈچۈن يەھۋاغا مىننەتدارلىقىڭىزنى بىلدۈرۈڭ. باشقىلارغا ئىلھام بېرىش ۋە قوللاپ-قۇۋۋەتلەش ئىمكانىيەتلىرىنى ئىزدەش ئارقىلىق يەھۋانىڭ سىزگە قىلغان ياردىمىنى قەدىرلەيدىغانلىقىڭىزنى كۆرسىتىڭ.
23. يەشايا 41:10، 13-ئايەتلەرگە ئاساسەن، يەھۋا بىزگە نېمە قىلىدىغانلىقىنى ۋەدە قىلغان؟
23 شەيتان باشقۇرۇۋاتقان دۇنيادا ياشاش قىيىن بولۇشى مۇمكىن ۋە بەزىدە نېمە قىلىش كېرەكلىكىنى بىلمەي قالىمىز (2-تىموت. 3:1). بىراق، بىز ئەنسىرىمەسلىكىمىز ياكى قورقماسلىقىمىز كېرەك. ئاتىمىز يەھۋا نېمىلەرنى بېشىمىزدىن ئۆتكۈزۈۋاتقانلىقىمىزنى ياخشى بىلىدۇ. بىز يىقىلىپ چۈشكەندە، ئۇ كۈچلۈك ئوڭ قولى بىلەن بىزنى چىڭ تۇتۇۋالىدىغانلىقىنى ۋەدە قىلىدۇ (يەشايا 41:10، 13-نى ئوقۇڭ). بىز يەھۋانىڭ قوللاپ-قۇۋۋەتلەيدىغانلىقىغا تولۇق ئىشەنسەك، مۇقەددەس كىتابتىن كۈچ ئالالايمىز ۋە ھەرقانداق قىيىنچىلىقلارنى يېڭەلەيمىز.
152-ناخشا كۈچىمىز، ئۈمىدىمىز ۋە يار-يۆلىكىمىز
a مۇقەددەس كىتابتىكى كۆپلىگەن ۋەقەلەر يەھۋانىڭ ئۆز خىزمەتچىلىرىنى ياخشى كۆرىدىغانلىقىنى ۋە ئۇلارغا ھەرخىل سىناقلاردا ياردەم بېرىدىغانلىقىنى ئىسپاتلايدۇ. بۇ ماقالىدە، سىز ئوقۇغان ۋەقەلەردىن كۆپرەك بىلىم ئېلىش ئۈچۈن شەخسىي ئۆگىنىشنىڭ قانداق ياردەم بېرىدىغانلىقىنى كۆرۈپ چىقىمىز.
b مۇشۇ يەردە كەلتۈرۈلگەن ئۇسۇل نۇرغۇنلىغان تەتقىق قىلىش ئۇسۇللىرىنىڭ بىرى خالاس. مۇقەددەس كىتابنى تەتقىق قىلىپ ئۆگىنىشنىڭ باشقا ئۇسۇللىرىنى «ۋەز خىزمىتىمىز ۋە ھاياتىمىز — يىغىلىش قوللانمىسى» 18.03، 8-بەتتىكى «خۇدانى ۋە يېقىنلىرىڭىزنى ياخشى كۆرۈڭ. بۇنى قانداق قىلىشقا بولىدۇ؟» ناملىق ماقالىدىن تاپالايسىز.
c كۈزىتىش مۇنارىنى مۇھاكىمە قىلىۋاتقاندا، بۇ ئايەتلەرنى ئوقۇماڭ.
d «ئۇلارنىڭ ئېتىقادىدىن ئۈلگە ئېلىڭلار. مۇقەددەس كىتابتىكى ئەرلەر بىلەن ئاياللار» دېگەن بىر قاتار ماقالىلەرنى jw.org تور بېكىتىدىن تاپالايسىز (مۇقەددەس كىتاب تەلىملىرى > خۇداغا ئىشىنىش دېگەن يەرگە قاراڭ)