تويلۇق سۈپىتىدە مال-چارۋىلار بېرىلەتتى
سىز بىلەمسىز؟
نېمە ئۈچۈن قەدىمدە ئىسرائىللار تويلۇق بېرىشى كېرەك ئىدى؟
قەدىمدە ئۆيلەنمەكچى بولغان يىگىت ياكى ئۇنىڭ ئائىلىسىدىن بىرى قىزنىڭ ئاتا-ئانىسىغا تويلۇق بېرىشى زۆرۈر ئىدى. تويلۇق سۈپىتىدە قىممەتباھا بۇيۇم، مال-چارۋىلار ياكى پۇل بېرىلەتتى. بەزىدە يىگىت كېلىننىڭ ئائىلىسى ئۈچۈن ئىشلەپ بېرەتتى. مەسىلەن، ياقۇپ راھىلە بىلەن توي قىلىش ئۈچۈن يەتتە يىل ئىشلەپ بېرىشكە تەييار بولغان (يارىت. 29:17، 18، 20). بۇ ئۆرپ-ئادەتنىڭ مەقسىتى نېمە؟
مۇقەددەس كىتاب تەتقىقاتچىسى كارول مېيرېس مۇنداق دەيدۇ: «ئائىلىدىن بىر ئەمگەكچىنىڭ كېتىشى سەۋەبلىك، ئائىلىنىڭ دېھقانچىلىق ئىشلىرى ئاسان بولمايتتى. شۇڭا، قىز ئۈچۈن تويلۇق بېرىلىشى زۆرۈر بولغان». بۇنداق ئۆرپ-ئادەت قۇدىلار ئارىسىدا تۇغقانلىق مۇناسىۋىتىنى شەكىللەندۈرۈپ، ئۇلار بېشىغا كۈن چۈشكەندە، بىر-بىرىگە يار-يۆلەك بولالايتتى. بۇنىڭدىن باشقا، تويلۇق بېرىش ئۆرپ-ئادىتى ئۇلارنىڭ چېيى ئىچۈرۈلگەنلىكى ۋە ئەمدى قىزنى قوغداش ۋە ئۇنى ھىمايە قىلىش ئاتىسىنىڭ ئەمەس، بەلكى يولدىشىنىڭ مەسئۇلىيىتى ئىكەنلىكىنى كۆرسىتەتتى.
تويلۇق بېرىش ئۆرپ-ئادىتى — بۇ قىزنى سېتىش ياكى سېتىۋېلىشقا بولىدۇ دېگەننى بىلدۈرمىگەن. بىر كىتابتا بۇ توغرۇلۇق مۇنداق دەپ يېزىلغان: «كېلىننىڭ ئائىلىسىگە مەلۇم مىقداردا پۇل ياكى شۇنىڭغا تەڭ قىممەتتە نەرسىلەرنى بېرىش، ئىسرائىل خەلقى ئارىسىدا قىزنى سېتىۋالغىلى بولىدىغاندەك كۆرۈنگەن بولۇشى مۇمكىن. ئەمما، تويلۇق بېرىش كېلىن ئۈچۈن تۆلىنىدىغان ھەق ئەمەس، بەلكى كېلىننىڭ ئائىلىسىدىكىلەر ئايرىلىپ قالغان ئەمگەك كۈچى ئۈچۈن تۆلىنىدىغان ھەق دەپ قارالغان» («Ancient Israel—Its Life and Institutions»).
بۈگۈنكى كۈندە، بەزى دۆلەتلەردە كىشىلەرنىڭ تويلۇق بېرىش ئۆرپ-ئادىتى تېخى داۋام قىلىپ كەلمەكتە. مەسىھنىڭ ئەگەشكۈچىلىرى بولغان ئاتا-ئانا تويلۇق بېرىشنى سورىغاندا، ھەددىدىن زىيادە كۆپ تەلەپ قىلماسلىقى لازىم. شۇ ئارقىلىق ئۇلارنىڭ غەرەز ئۇقىدىغان كىشىلەر ئىكەنلىكى باشقىلارغا ئايان بولىدۇ (فىلىپى. 4:5؛ 1-كورىنت. 10:32، 33). بۇنداق يول تۇتۇپ، ئۇلار پۇلپەرەس ئەمەسلىكىنى كۆرسىتىدۇ (2-تىموت. 3:2). ئۇنىڭدىن باشقا، خۇداغا ئىخلاسمەن ئاتا-ئانا كۆپ تويلۇق تەلەپ قىلمىسا، يىگىت ئۇنى تۆلەش ئۈچۈن توينى كېچىكتۈرۈشكە مەجبۇر بولمايدۇ. ياكى بولمىسا، يىگىت تەلەپ قىلىنغان كۆپ تويلۇقنى بېرىش ئۈچۈن، تاڭ سەھەردىن تاكى كۈن ئولتۇرغىچە ئىشلەيمەن دەپ، پىدائىي ۋەز ئېيتىش خىزمىتىدىن ۋاز كېچىشكە مەجبۇر بولمايدۇ.
بەزى دۆلەتلەردە تويلۇق بېرىش قانۇن تەرىپىدىن بەلگىلەنگەن. بۇنداق ۋەزىيەتتە، خۇدانىڭ خىزمەتچىلىرى بولغان ئاتا-ئانىلار شۇ قانۇنغا بويسۇنىدۇ. نېمە ئۈچۈن؟ سەۋەبى، خۇدا سۆزى مەسىھ ئەگەشكۈچىلىرىنى ھۆكۈمەتكە بويسۇنۇشقا، بولۇپمۇ خۇدانىڭ قانۇنلىرىغا زىت بولمىغان قانۇنلارغا بويسۇنۇشقا ئۈندەيدۇ.—رىملىقلار 13:1؛ ئەلچى. 5:29.