12 “Ovikoti vi kuãimo, vi ka talama kovaso Yomunda Gerisimi+ oco vi sumũlũise omanu eci va ka yoka o Yordão vievi: Simeone, Lewi, Yuda, Isakare, Yosefe kuenda Benjamini. 13 Ovikoti vi kuãimo vi ka talama Komunda Evale+ oco vi tukule esiñalo vievi: Ruvene, Gadi, Asiyere, Sevulono, Dani kuenda Nafitali.

33 O Isareli yosi, lakulu vavo, asongui kuenda olonganji viavo, va talama kolonele vivali Viocikasia kovaso ya va Lewi ovitunda, vana va kala oku ambata ocikasia covisila via Yehova. Ovingendeleyi kuenda olonyitiwe+ opo via kala. Onepa yimue pokati kavo ya talamele kovaso Yomunda Gerisimi kuenda onepa yikuavo ya kala kovaso Yomunda Evale+ (ndeci Mose ukuenje wa Yehova a handelekele kosimbu),+ oco a sumũlũise omanu va Isareli. 34 Noke liovina viaco, eye wa tanga lolukandi olondaka viosi Viocihandeleko,+ asumũlũho+ kuenda asiñalo+ ndomo cosi ca sonehiwa velivulu Liocihandeleko.