Ovilinga
2 Osimbu eteke Liocipito co Pendekoste lia kala ocipepi, vosi va liongoluila pocitumãlo cimuamue. 2 Vocipikipiki kilu kua tunda onjuela ndokuõla kuofela yalua kuenje ya yevala vonjo yosi, muna ovo va tumãlele. 3 Kuenje kua tukuluka alimi a setahãla ondalu, yu a molẽha kokuavo, a lisandula kuenda a vata komunu lomunu pokati kavo, 4 vosi yavo ve yukisua lespiritu sandu kuenda va fetika oku vangula alimi aiñi aiñi, ndeci espiritu lia va ecelela oku vangula.
5 Vepuluvi liaco va Yudea vana va tavele haivo va tundile kolofeka viñi viñi voluali luosi, va kala vo Yerusalãi. 6 Eci kua yevala onjuela yaco, owiñi wa liongoluile pamosi wa kala lusumba, momo omunu lomunu wa va yeva oku vangula velimi liavo muẽle. 7 Ovo va komõha calua loku lipula vati: “Ava va vangula ndeti, siti vosi va Galilea? 8 Omunu lomunu pokati ketu, o yeva ndati kelimi liaye muẽle?* 9 Va Partia, va Media, va Elami; olonungi vio Mesopotamia, va Yudea, va Kapadokia, va Pondu kuenda olupale luo Asia, 10 va Frugia, va Pamfulia, va Egito, ovaimbo vo ko Libia, okuti va lisunguile lo Kurene; akombe vo ko Roma, va Yudea, lolomongoloke; 11 va Kurete; kuenda va Arabia—tua va yeva oku vangula alimi etu catiamẽla kovilinga vi komõhisa via Suku.” 12 Va saluka kuenda va komõha loku lipula pokati vati: “Eci ci lomboloka nye?” 13 Kuenje vakuavo va va pembula kuenda va popia vati: “Va kolua ovinyu.”*
14 Pole Petulu wa votoka pokati kolondonge Ekũi la Mosi kuenje wa va sapuila lolukandi hati: “Ene amanu vo Yudea lolonungi viosi vio Yerusalãi, yeveleli lutate olondaka viange. 15 Omanu ava ka va koluele, ndomo vu kasi oku sima, momo handi owola yatatu.* 16 Puãi, eci oco uprofeto Yoeli a popele hati: 17 ‘“Koloneke via sulako” Suku hati, “Ndi sukumuila espiritu liange komanu vosi kuenje omãla vene valume lomãla vene vakãi va ka imba owanji kuenda amalẽhe vene va mola ovinjoinjoi, lakulu vene vendamba va lota olonjoi, 18 ndaño muẽle apika vange akuenje lafeko, ndi va sukumuilavo espiritu liange koloneke viaco kuenje va ka imba owanji. 19 Ngeca ovikomo* kilu kuenda olondimbukiso kilu lieve—losonde, londalu kuenda alende owisi. 20 Ekumbi li pongoloka owelema kuenda osãi yi pongoloka osonde osimbu eteke linene halio li komõhisa lia Yehova ka lieyile. 21 Wosi o likutilila vonduko ya Yehova loku pinga ekuatiso, o popeliwa.”’
22 “Ene alume vo ko Isareli, yeveleli olondaka evi: Yesu u Nasara, eye ulume una Suku a situluila kokuene lovilinga vi komõhisa, lovikomo* kuenda olondimbukiso Suku a linga pokati kene vonduko yaye, ndeci ene muẽle wa ci kũlĩhi. 23 Ulume u, una wa eciwile kovanyali vaye ndomo co sokiyilua okuti Suku wa ci kũlĩhĩle ale, haeye ene wa valelisi kuti peka liolondingaĩvi kuenda wo pondisi. 24 Pole, Suku wo pindula poku u yovola kevalo* liolofa, momo ka ca tavele okuti eye o kutiwa lalio. 25 Catiamẽla kokuaye Daviti wa popia hati: ‘Ndukuakumola Yehova kovaso yange olonjanja viosi, momo eye o kasi konele yange yondio, okuti lalimue eteke ndi sengiwa. 26 Omo liaco, utima wange kuenda elimi liange via sanjuka calua. Kuenje ame* ñasi lelavoko; 27 momo ove ku ndi* si Veyambo* kuenda ku ecelela okuti ufendeli wove o futa. 28 O ndekisa onjila yi tuala komuenyo; kuenda o njukisa esanju lialua kovaso yove.’
29 “Ene a vamanji, ca sunguluka oku vangula lene lutõi catiamẽla ku kukululu Daviti okuti, layevo wa fa, wa kendiwa kuenje eyambo liaye li kasi pokati ketu toke etaili. 30 Omo wa kala uprofeto kuenda wa kũlĩhĩle okuti Suku wa likuminyile kokuaye okuti umue pokati kocitumbulukila* caye o tumãla kocalo caye, 31 Daviti wa mola kuenda wa vangula eci catiamẽla kepinduko lia Kristu, okuti ka vo sile Veyambo,* ndaño etimba liaye ka lia futile. 32 Yesu u-u, Suku wo pindula kuenda vosi yetu tu ci imbila uvangi. 33 Omo okuti wa kemalisua kondio ya Suku kuenda wa tambula espiritu sandu Isia o likuminyile, eye wa sukumũla eci vu lete leci vu yevite. 34 Daviti ka londele kilu, pole wa popia hati, ‘Yehova wa sapuila Ñala yange hati: “Tumãla kondio yange, 35 toke eci ñapa ovanyãli vove ndociliatelo colomãhi viove.”’ 36 Kuenje onjo yosi ya Isareli yi kũlĩhe okuti Suku wo lingisa Ñala haeye Kristu, Yesu una wa pondiwila kuti.”
37 Eci va yeva olondaka evi, va tomiwa vovitima kuenda va pula Petulu lovapostolo vakuavo vati: “Ene a vamanji, nye tu linga?” 38 Petulu wa va tambulula hati: “Likekembeli kuenda omunu lomunu pokati kene a papatisiwe vonduko ya Yesu Kristu oco akandu ene a ecelue kuenje vu tambula ocali cespiritu sandu. 39 Momo ohuminyo yaco ya lingiwa kokuene, komãla vene kuenda komanu vana va kasi ocipãla, la vosi Yehova Suku yetu a kokela kokuaye.” 40 Lolondaka vikuavo wa imba uvangi loku va lungula hati: “Lipopeli ene muẽle kocitumbulukila eci ca vĩha.” 41 Kuenje vana va tava kondaka yaye lutima wosi, va papatisiwa kuenda keteke liaco kua vokiyiwa 3.000 komanu. 42 Ovo va pandakaisa kelongiso liovapostolo, loku kala kumosi* kuenda oku likutilila.
43 Vosi yavo* va kuata usumba kuenje ovapostolo va fetika oku linga ovikomo* lolondimbukiso vialua. 44 Vana va tava va likuata omunga kuenda va kuata ovina vimuamue, 45 kuenje va fetika oku landisa ovikuata lovipako viavo, loku vi avela vosi ndeci omunu lomunu a sukilile. 46 Eteke leteke va enda oku liongoluila pamosi vonembele locimãho cimuamue, va lia lia kolonjo viñi viñi loku litepaila okulia lesanju kuenda lutima wa sunguluka, 47 va sivaya Suku, loku soliwa lomanu vosi. Kuenje eteke leteke, Yehova wa amamako oku kongela kokuavo vana va kala oku popeliwa.