Isaya
34 Alofeka, amẽli ocipepi oco vu yeveleli,
Kuenda yeveleli lutate, amanu.
Ongongo la cosi ci kasimo vi yeve,
Osi kuenda ovaima ayo osi.
2 Momo Yehova o kuetele onyeño yalua olofeka viosi,+
Kuenda onyeño yaye ya wengukila olohoka viayo viosi.+
Eye o ka vi eca kenyõleho;
Eye o ka vi songuila koku pondiwa.+
3 Ovivimbi viayo vi ka inasiwa,
Kuenda elemba lĩvi liovivimbi viayo li ka lamana;+
4 Olohoka viosi vio kovailu vi ka vola,
Kuenda ovailu a ka muñiwa ndociña cimue.
Olohoka vialio viosi vi ka hongua
Ndeci emẽla limue liowuka li loka vuti wayuva
Kuenda ekuyu liowuka li loka vuti wukuyu.
5 “Momo kovailu osipata yange yi keyuka losonde.+
Ndi ka nena esombiso ko Edome losipata yaco,+
Komanu vana nda sokiyila oku va kundula.
6 Ame ndi Yehova, ndi kuete osipata yimue; oyo yi keyuka osonde.
Momo Yehova o kuete ocilumba cimue eye a pongiya ko Bosara,
Oku pondiwa kualua kofeka yo Edome.+
7 Olongombe viovusenge vi ka pondiwa kumue lavo,
Olonãle la vana va pama.
Ofeka yavo yi keyuka osonde,
Kuenda oneketela yofeka yavo yi ka sitikiwa lulela.”
8 Momo Yehova o kuete eteke liaye lioku fetuluinya,+
Unyamo umue wefetuluinyo woku tetuluila o Siono.+
9 Olondui viaye* vi ka pongoloka ekokoto,
Kuenda oneketela yaye yi ka pongoloka ofuofuo,
Kuenje ofeka yaye yi ka linga ndekokoto li taima.
10 Luteke ale lutanya oyo ka yi ka ima;
Owisi walio, u kamamako oku londa otembo ka yi pui.
Kocitumbulukila locitumbulukila oluo lu kamamako oku nyõliwa;
Lomue o ka pitamo otembo ka yi pui.+
11 Ohombe yenyãla kuenda ocisaka vi ka kalamo,
Kuenda okacukucuku* lovikuamanga vi ka kalamo,
Lukolo woku seteka kuenda opulumu yewe, Suku o ka seteka ofeka eyi oco a lekise okuti,
Oyo yi ka siala upolokoso kuenda ka yi ka silivila.
12 Lomue pokati kolombuale viayo, o ka kovongiwa oco a linge osoma,
Kuenda olombuale viayo viosi ka vi ka kalako vali.
13 Olosongo vi ka kulila kolosapalalo viayo via pama,
Ocambanda kuenda olosongo vi ka tundila kolombonge viayo,
Kuenda olonjo violombo.
14 Ovinyama vio vekalasoko vi ka lisanga lovinyama vi yuela,
Kuenda ohõha* yi ka vilikiya akamba vayo.
Ocili, ongendoteke yi ka tungamo kuenda yi ka sanga ocitumãlo cimue cepuyuko.
15 Oko onyõha yi palãla yi ka lingila ocanju calio loku imbilako asaila,
Kuenda oko yi ka totuila asaila aco loku kongela omãla valio oco a va teyuile.
Ocili, oko oviselele vi ka liongoluila okuti, ociselele lociselele lekamba liayo.
16 Sandiliyi velivulu lia Yehova kuenda li tangi lolukandi:
Layimue pokati kavio yi ka kambapo;
Layimue pokati kavio yi ka kala okuti ka yi kuete ekamba,
Momo omẽla wa Yehova owo wa eca ocihandeleko caco,
Kuenje espiritu liaye, olio lia vi kongela pamosi.
17 Eye Una wa vi imbila ocela,
Kuenje eka liaye muẽle lia seteka ocitumãlo* via nõliwila.
Ovio vi ka kalamo otembo yosi;
Ovio vi ka tungamo vokuenda kuovitumbulukila viosi.