Esekiele
25 Ondaka ya Yehova yeya vali kokuange yiti: 2 “A mõlomunu, imba ovaso konele ya va Amoni+ kuenda imba owanji woku va pisa.+ 3 O sukila oku popia eci catiamẽla ku va Amoni hati: ‘Yeveleli ondaka ya Ñala Tõlo Yehova. Ca popia Ñala Tõlo Yehova ceci hati: “Eci ocitumãlo cange ci kola ca sepuiwa kuenda eci ofeka ya Isareli ya siala upolokoso leci onjo ya Yuda yambatiwa kumandekua, ene wa popi loku pembula hati ‘Haka ciwa!’ 4 omo liaco, ame ndi ku eca komanu vo Kutundilo ndocipiñalo. Ovo va ka tunga ovilombo* viavo pokati kove kuenda oku tunga olombalaka viavo pokati kove. Ovo va ka lia apako ove kuenda va ka nyua asenjele ove. 5 Ndi ka lingisa o Raba+ ocililo colongamelo kuenda ofeka ya va Amoni ndi ka yi lingisa ocitumãlo cimue cepuyuko cocunda; kuenje vu ka kũlĩha okuti, ame ndi Yehova.”’”
6 “Ca popia Ñala Tõlo Yehova ceci hati: ‘Omo okuti ove wa pandula lovaka ove+ loku tutula posi lolomãhi viove kuenda wa sanjukila ofeka yo Isareli omo liepembulo liaco,+ 7 ndi koluĩla eka liange kokuove poku ku kueca kolofeka ndocina cimue ca pundiwa. Ndi ka ku tepa pokati komanu loku ku kunduila pokati kolofeka.+ Ndi ka ku nyõla kuenje o ka kũlĩha okuti, ame ndi Yehova.’
8 “Ca popia Ñala Tõlo Yehova ceci hati: ‘Omo okuti Moavi+ la Seire+ va popia vati: “Tala! Onjo ya Yuda yi sokisiwa lolofeka viosi vikuavo,” 9 ndi ka ecelela okuti, alupale a kasi kongave yo Moavi ka a kuata eteyuilo, oku kongelamo olonepa viwa vialupale o Bete-Yesimoti, o Baale-Meone kuenda o Kiriyatayi.+ 10 Ndi ka eca o Moavi kumue la va Amoni ndocipiñalo comanu vo Kutundilo+ oco okuti, va Amoni ka va ivalukiwa pokati kolofeka.+ 11 Kuenje ndi ka sombisa o Moavi+ kuenda ovo va ka kũlĩha okuti, ame ndi Yehova.’
12 “Ca popia Ñala Tõlo Yehova ceci hati: ‘Edome wa fetuluinya onjo ya Yuda kuenda poku ci linga wa kuata eko linene poku va fetuluinya;+ 13 omo liaco, Ñala Tõlo Yehova wa popia hati: “Ndi koluĩla eka liange poku katukila Edome kuenda ndi ka kundulamo ci kaile omanu ale ovinyama kuenje ndi ka yi lingisa okuti yi siala upolokoso.+ Oku upisa ko Temani toke ko Dedane, ovo va ka pondiwa losipata.+ 14 ‘Ndi ka fetuluinya o Edome peka liomanu vange va Isareli.+ Ovo va ka nena onyeño yange ko Edome kuenda oku tema kuange oco okuti, va limbuka efetuluinyo liange muẽle,’+ oco Ñala Tõlo Yehova a popia.”’
15 “Ca popia Ñala Tõlo Yehova ceci hati: ‘Va Filisiti omo liungangala wavo walua, va kasi oku sanda oku nena efetuluinyo lukuse kuenda enyõleho.+ 16 Omo liaco, ca popia Ñala Tõlo Yehova ceci hati: “Ndi kasi oku oluĩla eka liange poku katukila va Filisiti+ kuenda ndi ka kundula va Kereti+ loku kundula olonungi via supapo konele yokalunga.+ 17 Ndi ka nena kokuavo ovilinga vialua viefetuluinyo lakangiso onyeño kuenda ovo va ka kũlĩha okuti, ame ndi Yehova eci ndi ka nena efetuluinyo liange kokuavo.”’”