Esekiele
32 Kunyamo 12, kosãi 12 keteke liatete liosãi, ondaka ya Yehova yeya vali kokuange yiti: 2 “A mõlomunu, imba ocisungo cimue celisiõsuĩlo* catiamẽla ku Fareo soma Yegito kuenda u sapuila hati:
‘Ove wa kala ndohosi ya pama yumalẽhe* yolofeka,
Pole, ove wa nyõliwa.
Ove wa kala ndocimuandu cinene co vokalunga+ ca tema volondui viove,
Poku vengisa ovava lomãhi yove kuenda oku silĩsa olondui.’*
3 Ca popia Ñala Tõlo Yehova ceci hati:
‘Pocakati cocimunga colofeka vialua, ndi ka imba owanda wange kokuove
Kuenje ovo va ka ku kuatela vowanda wange.
4 Ndi ka ku sia vofeka;
Ndi ka ku imba venyãla.
Ndi ka ecelela okuti olonjila viosi vio kilu vi vata kokuove,
Ndi ka kutisa ovinyama viovusenge vio kilu lieve liosi lositu yove.+
5 Ndi ka imba ositu yove kolomunda
Kuenda ndi ka yukisa ovimbota lositu yi ka supa kokuove.+
6 Ndi ka yukisa ofeka losonde yi tunda kokuove toke kolomunda,
Kuenje oyo yi ka yukisa olondui.’*
7 ‘Eci omuenyo wove u ka nyõliwa, ame ndi ka sitika ovailu kuenda ndi ka tekãvisa olombungululu vialio.
Ndi ka sitika ekumbi lalende,
Kuenda osãi ka yi ka eca ocinyi calio.+
8 Ndi ka tekãvisa ovinyi viosi vi tuila kovailu mekonda liove,
Kuenda ndi ka sitika ofeka yove lowelema,’ oco Ñala Tõlo Yehova a popia.
9 ‘Ndi ka talisa ohali ovitima viomanu valua eci ndi songuila olomandekua viove kolofeka vikuavo,
Kolofeka vina ove kua kũlĩhĩle.+
10 Ndi ka kokela omanu valua oku komõha,
Kuenda olosoma viavo vi ka luluma lusumba omo liove eci ndi ka pola osipata yange kovaso yavo.
Ovo va kamamako oku luluma okuti, omunu lomunu o kuata usumba omo liomuenyo waye,
Keteke lioku nyõliwa kuove.’
11 Momo ca popia Ñala Tõlo Yehova ceci hati:
‘Osipata ya soma yo Bavulono yi keya kokuove.+
12 Ndi ka lingisa okuti owiñi wove u kupuka lolosipata viasualali va pama,
Va velapo kungangala volofeka okuti, vosi yavo.+
Ovo va ka malako epela lio Egito kuenda owiñi wosi wofeka u ka nyõliwa.+
13 Ndi ka kundula oviunda vialio viosi vi kasi ocipepi lovava alio alua,+
Kuenda layimue omãhi yomunu ale akonjo oviunda a ka a vengisa vali.’+
14 ‘Kotembo yaco, ndi ka yelisa ovava avo,
Kuenda ndi ka lingisa okuti, olondui viavo vi tumõha ndulela,’ oco Ñala Tõlo Yehova a popia.
15 ‘Eci ndi ka lingisa o Egito ekango limue liekalasoko, haiyo ofeka yimue yupiwa ovina viosi vi kasimo,+
Eci ndi kundula olonungi viosi vi kasimo,
Ovo va ka kũlĩha okuti, ame ndi Yehova.+
16 Eli elisiõsuĩlo limue kuenda omanu va ka limba muẽle;
Akãi vo kolofeka va ka imba elisiõsuĩlo liaco.
Ovo va ka imba elisiõsuĩlo liatiamẽla Kegito kuenda kowiñi walio wosi,’ oco Ñala Tõlo Yehova a popia.”
17 Kuenje kunyamo 12 keteke 15 kosãi, ondaka ya Yehova yeya kokuange yiti: 18 “A mõlomunu, lisiõsuĩla owiñi wo ko Egito kuenda nena ofeka kombuelo yalondo ongongo, oyo* kumue lomanu volofeka via pama kuenda vana va kasi oku lokila vocitunu.*
19 “‘Helie ove wa velapo keposo? Loka kuenda pekela kumue la vana ka va seviwile evamba!’
20 “‘Ovo va ka kupukila pokati ka vana va pondiwa losipata.+ Ofeka Yegito ya eciwa kosipata; yambati kumue lowiñi walio wosi.
21 “‘Oku upisa valondo Onjembo,* asualali va pamapo vali va ka vangula la soma kumue loloñuatisi viaye. Ovo va ka loka muẽle kuenda va ka pekela ndava ka va seviwile evamba, va pondiwa losipata. 22 O Asuria oko yi kasi kumue lowiñi walio wosi. Ayambo avo osi o ñuala,* vosi yavo va kupuka losipata.+ 23 Ayambo alio a kasi valondo ocitunu* kuenda owiñi walio wa ñuala eyambo liayo, vosi yavo va pondiwa losipata, momo osimbu va kala lomuenyo va koka ocinjoko pokati komanu.
24 “‘Ofeka yo Elami+ oko yi kasi kumue lowiñi walio wa ñuala eyambo liayo, vosi yavo va kupuka losipata. Ovo va lokila lesepu* valondo ongongo vana okuti, osimbu va kala lomuenyo va koka ocinjoko pokati komanu. Ovo va ka kutisiwa kumuamue osõi la vana va lokila vocitunu.* 25 Ovo va lingila ula ofeka yo Elami pokati kovivimbi kumue lowiñi walio wosi wa ñuala ayambo alio. Vosi yavo ka va seviwile evamba okuti, va pondiwa losipata momo, osimbu va kala lomuenyo va koka ocinjoko pokati komanu; kuenda ovo va ka kutisiwa kumuamue osõi la vana va lokila vocitunu.* Oyo ya kapiwa pokati kovivimbi.
26 “‘Ofeka yo Meseke kuenda yo Tuvale+ oko vi kasi kumue lowiñi wavio* wosi. Ayambo avio* osi a ñuala osoma yalio. Vosi yavo ka va seviwile evamba, va pondiwa losipata momo osimbu va kala lomuenyo va koka ocinjoko pokati komanu. 27 Ovo hẽ ka va ka pekela kumue lasualali va pama ka va seviwile evamba vana va pondiwa okuti, va lokila Vonjembo* lovimalẽho viavo viuyaki? Ovo va ka kapa olosipata viavo vemẽhi liovitue* viavo kuenda akandu avo kilu liakepa avo, momo asualali vaco va pama, osimbu va kala lomuenyo va koka ocinjoko pokati komanu. 28 Pole, catiamẽla kokuove, o ka nyanyuĩwa pokati ka vana ka va seviwile evamba kuenda o ka pekela la vana va pondiwa losipata.
29 “‘Ofeka yo Edome+ oko yi kasi, olosoma vialio kuenda asongui valio vosi vana okuti ndaño lunene wavo, va pekelisiwa pokati ka vana va pondiwa losipata; ovo va ka pekelisiwavo la vana ka va seviwile evamba+ kuenda vana va kasi oku lokila vocitunu.*
30 “‘Olombuale* viosi vio konano kumue la va Sidono vosi+ oko va kasi, vana va loka losõi la vana va pondiwa ndaño lusumba wa kokiwa lunene wavo. Ovo va ka pekela okuti, ka va seviwile evamba kumue lava va pondiwa losipata kuenda ovo va ka kutisiwa kumuamue osõi la vana va lokila vocitunu.*
31 “‘Fareo o ka mola vosi ava kuenda o ka lembelekiwa omo liovina viosi via pita lowiñi waye;+ Fareo kumue lolohoka viaye viosi, va ka pondiwa losipata,’ oco Ñala Tõlo Yehova a popia.
32 “‘Omo okuti Fareo osimbu a kala lomuenyo wa koka ocinjoko pokati komanu, eye kumue lowiñi waye wosi va ka pekelisiwa kumue la vana ka va seviwile evamba okuti, vana va pondiwa losipata,’ oco Ñala Tõlo Yehova a popia.”