Yehosua
17 Noke ocela+ ca kupukila kocikoti ca Manase,+ momo eye wa kala omõla uveli wa Yosefe.+ Omo okuti Makiri+ omõla uveli wa Manase haeye isia ya Gileada, wa kala ulume umue ukuavita, eye wa tambula o Gileada kuenda o Basiane.+ 2 Kuenje ocela ca kupukila konepa yikuavo yovitumbulukila via Manase ndomo ci likuata lapata avo okuti, komãla va Aviyesere,+ komãla va Heleke, komãla va Asiriyele, komãla va Sekeme, komãla va Hefere kuenda komãla va Semida. Evi via kala ovitumbulukila via Manase omõla a Yosefe okuti, alume ndomo ci likuata lapata avo.+ 3 Pole, Celofehada+ omõla a Hefere, omõla a Gileada, omõla a Makiri, omõla a Manase, ka kuatele omãla valume, pole, wa kuatele lika omãla vakãi kuenje olonduko viomãla vaye vakãi vievi: Mahala, Noha, Hogila, Milika kuenda Tirisa. 4 Noke ovo va limolẽhisa kovaso a Eleasa+ ocitunda, ku Yehosua omõla a Nune kuenda kasongui poku popia vati: “Yehova eye wa handelekele Mose oco a ece kokuetu ocipiñalo cimue pokati ka vamanjetu.”+ Kuenje omo liocihandeleko ca Yehova, kua eciwa kokuavo ocipiñalo cimue pokati ka vamanji a va isiavo.+
5 Ndaño okuti Manase wa tambula ofeka yo Gileada kuenda yo Basiane vina via kala konele yikuavo* yo Yordão, pole, kua kalavo olonepa ekũi vina via eciwa kokuaye,+ 6 momo omãla vakãi va Manase va tambula ocipiñalo cimue kumue lomãla vaye valume kuenda ofeka yo Gileada ya linga ocipiñalo covitumbulukila vikuavo via Manase.
7 Ongave ya Manase ya kala oku upisa ko Asiyere toke ko Mikimeta,+ yina ya imba ovaso ko Sekeme+ kuenda ongave yamisako oku endela kombuelo* toke kofeka yolonungi vio ko Eni-Tapuha. 8 Ofeka yo Tapuha+ ya linga ya Manase, pole, o Tapuha kongave ya Manase ya tiamẽlele kovitumbulukila via Efarimi. 9 Kuenje ongave ya lokila toke Kekango lio Kana, kombuelo oku endela kekango. Kua kala alupale a Efarimi pokati kalupale a Manase+ kuenje ongave ya Manase ya kala konano yekango kuenda ya sulila kokalunga.+ 10 Onepa yo kombuelo ya tiamẽlele ku Efarimi kuenda onepa yo konano ya tiamẽlele ku Manase lokalunga ka kala ongave yaye+ kuenje konano ovo* va pitĩla toke ko Asiyere kuenda kutundilo va pitĩla toke ku Isakare.
11 Vovikanjo via Isakare levi via Asiyere, Manase wa tambula o Bete-Siane kumue lovaimbo a sungueko, o Yivileama+ kumue lovaimbo a sungueko, olonungi vio Dori+ kumue lovaimbo a sungueko, olonungi vio Endore+ kumue lovaimbo a sungueko, olonungi vio Taanake+ kumue lovaimbo a sungueko kuenda olonungi vio Megido kumue lovaimbo a sungueko okuti, ovaimbo aco atatu a kasi kolomunda.
12 Pole, ovitumbulukila via Manase ka via tẽlele oku tambula alupale aco; va Kanana vamamako oku tunga vofeka yaco.+ 13 Eci va Isareli va fetika oku pama, va kisika va Kanana oku linga upange wa tĩla,+ pole, ovo ka va va tundisile* vosi.+
14 Ovitumbulukila via Yosefe via sapuila Yehosua vati: “Momo lie wa ecela lika kokuetu* onepa yimosi ndocipiñalo+ kuenda onepa yimue yofeka? Etu tua lua momo Yehova wa tu sumũlũisa toke cilo.”+ 15 Yehosua wa va tambulula hati: “Nda ene wa lui, lamaneli kusenge kuenda yelisiko ocitumãlo cimue oco ci kale cene vofeka ya va Perisi+ la va Refayimi,+ momo ovaimbo a kasi kolomunda via Efarimi+ atito calua kokuene.” 16 Noke ovitumbulukila via Yosefe via popia vati: “Ovaimbo a kasi kolomunda ka a tẽla kokuetu kuenda va Kanana vosi vana va tunga vofeka yocimbota,* va kuete akãlu wuyaki+ kumue lakãlu wutale, ci kaile vana va kasi ko Bete-Siane+ kumue lovaimbo a sungueko kuenda vana va kasi Kocimbota* co Yesirele.”+ 17 Kuenje Yehosua wa sapuila olondaka evi komãla va Yosefe okuti, Efarimi la Manase hati: “Ene wa lui kuenda vu kuete ongusu yalua. Ka vu ka tambula lika onepa yimosi,+ 18 pole, imbo li kasi kolomunda li ka kalavo liene.+ Ndaño okuti olio usenge umue, ene vu ka li yelisa kuenje li ka kala esulilo liocikanjo cene. Momo ene vu ka tundisa va Kanana, ndaño okuti ovo va pama haivo va kuete akãlu wuyaki kumue lakãlu wutale.”+