Esekiele
14 Vamue pokati kakulu vo ko Isareli veya kuenda va tumãla kovaso yange.+ 2 Noke ondaka ya Yehova yeya vali kokuange yiti: 3 “A mõlomunu, alume ava va nõlapo oku kuama oviteka viavo via vĩha* kuenda va kapa kovaso yomanu ewe limue liocilondokua ci va kokela oku linga ekandu. Anga hẽ ngecelela okuti ovo va ñulĩhĩsa?+ 4 Cilo, vangula lavo poku va sapuila hati: ‘Ñala Tõlo Yehova wa popia hati: “Nda u Isareli umue o nõlapo oku kuama oviteka viaye via vĩha kuenda o kapa ewe limue liocilondokua poku kokela omanu oku linga ekandu kuenje eye o kũlĩhĩsa uprofeto umue, ame ndi Yehova, ndi ko tambulula ndomo ci likuata loviteka viaye vialua haivio via vĩha. 5 Ndi ka ci linga oco okuti va Isareli* va kuata usumba, momo ovo va njanduluka kuenda va kuãi oviteka viavo via vĩha.”’+
6 “Omo liaco, sapuila onjo ya Isareli hati, ‘Ca popia Ñala Tõlo Yehova ceci hati: “Tiuki kokuange kuenda liwekipo oku kuama oviteka viene via vĩha loku yuvula ovilinga viene viosi viumbondo.+ 7 Momo nda u Isareli umue ale ocingendeleyi cimue ci kasi pokati ka va Isareli o ndi yanduluka kuenda o nõlapo oku kuama oviteka viaye via vĩha loku kapa ewe limue liocilondokua ci kokela omanu oku linga ekandu kuenje wiya oku livondela kuprofeto wange,+ ame ndi Yehova, ndi ko tambulula ame muẽle. 8 Ndi ka ñualelapo omunu waco kuenda ndu lingisa ondimbukiso yimue yelungulo kuenda ombangulo yolusapo kuenje ndi ko tundisa pokati komanu vange;+ kuenda vu ka kũlĩha okuti, ame ndi Yehova.”’
9 “‘Pole, nda uprofeto o kembiwa kuenda eca etambululo limue, ame ndi Yehova, ame nda kemba uprofeto waco.+ Ndi kolõla eka liange poku u katukila kuenda ndi ko kundula pokati komanu vange va Isareli. 10 Ovo va ka kuata eko; eko lia una o kũlĩhĩsa li ka lisoka leko liuprofeto, 11 oco okuti onjo ya Isareli yi liwekapo oku njanduluka loku liwekapo oku li vĩhisa ovo muẽle omo liakandu avo osi. Kuenje ovo va ka linga omanu vange kuenda ame ndi ka linga Suku yavo,’+ oco Ñala Tõlo Yehova a popia.”
12 Kuenje ondaka ya Yehova yeya vali kokuange yiti: 13 “A mõlomunu, nda ofeka yimue yi ndi lingila ekandu poku linga ovina ka via sungulukile, ame ndi koluĩla eka liange kofeka yaco kuenda oku kundula olosila*+ vialio viokulia,+ ndi ka tuma onjala kofeka yaco loku kundula omanu kuenda ovinyama vi kasimo.”+ 14 “‘Ndaño okuti alume ava vatatu okuti Noha,+ Daniele+ kuenda Yovi+ va kalele vofeka yaco, nda va tẽla lika oku li popela ovo muẽle omo liesunga liavo,’+ oco Ñala Tõlo Yehova a popia.”
15 “‘Nda nda tumile ovinyama viovusenge oco vi pite vofeka loku nyõla ofeka yaco kuenda oku yi lingisa ekalasoko, nda lomue wa pitamo vali omo liovinyama viovusenge.+ 16 Ndeci ndi kasi lomuenyo,’ oco Ñala Tõlo Yehova a popia hati, ‘ndaño okuti alume vaco vatatu va kalele vofeka yaco, nda ka va tẽlele oku popela omãla vavo valume ale vakãi; nda va tẽla lika oku li popela ovo muẽle kuenda ofeka nda ya siala upolokoso.’”
17 “‘Nda nda tumile osipata vofeka poku+ popia hati: “Eceleli okuti osipata yi pita vofeka” kuenda yi kundulemo omanu lovinyama,+ 18 ndaño okuti alume vaco vatatu va kalele vofeka yaco, ndeci ñasi lomuenyo,’ oco Ñala Tõlo Yehova a popia,’ nda ka va tẽlele oku popela omãla vavo valume ale vakãi; nda va tẽla lika oku li popela ovo muẽle.’”
19 “‘Nda nda tumile efengi vofeka+ kuenda onyeño yange yi wengukila ofeka yaco loku pesela osonde oco omanu kuenda ovinyama vi kunduiwe, 20 ndaño okuti Noha,+ Daniele+ kuenda Yovi+ va kalele vofeka yaco, ndeci ñasi lomuenyo,’ oco Ñala Tõlo Yehova a popia, ‘nda ka va tẽlele oku popela omãla vavo valume ale vakãi; nda va tẽla lika oku li popela ovo muẽle omo liesunga liavo.’”+
21 “Ca popia Ñala Tõlo Yehova ceci hati: ‘Eci oco ci ka lingiwa eci ndi ka tuma akangiso*+ ange akuãla okuti osipata, onjala, ovinyama via tema viovusenge kuenda+ efengi ko Yerusalãi, oco vi kundule omanu kuenda ovinyama vi kasi vofeka yaco.+ 22 Omo liaco, vamue va ka supamo va ka puluka kuenda va ka tualiwa kosamua+ ci kaile omãla valume ale omãla vakãi. Ovo va kasi oku iya kokuene kuenda eci vu mola olonjila viavo kuenda ovilinga viavo, ene vu ka lembelekiwa kohali ndi ka nena vo Yerusalãi catiamẽla kovina viosi nda lingilamo.’”
23 “‘Ovo va ka ku lembeleki eci ene vu mola olonjila viavo kuenda ovilinga viavo kuenje vu ka kũlĩha okuti ovina nda sukilile oku linga vofeka yaco, sia vi lingile elivova,’+ oco Ñala Tõlo Yehova a popia.”