Ovindululu Kilu Lieve

NDA ove wa kaile oku enda lomunu umue okuti wa lepa calua haeye wa pitahãla olusoka luonjo yove, nye nda wa sima catiamẽla kokuaye? Omunu waco citava okuti ocindululu. Kua kala otembo yimue okuti, voluali mua kala ovindululu. Embimbiliya li lombolola okuti va isia yovindululu viaco, va kala ovangelo vamue va tundile kilu. Oco hẽ ca pita ndati?

Satana, wa nenele ovitangi vialua. Eye wa seteka oku vetiya ovangelo va Suku oco va kale olondingaĩvi. Vokuenda kuotembo, vamue pokati kovangelo vaco va fetika oku yevelela kondaka yaye. Noke va liwekapo oku linga upange wa Suku. Kuenje veya mulo voluali, va li pongolola vetimba liositu. Momo lie va cilingila?

Embimbiliya li lombolola okuti, omãla va Suku valume va mola omãla vomanu vakãi okuti va posoka. Kuenje, va kuata onjongole yoku likuela lavo. Omo liaco, veya voluali kuenje va likuela lavo. Embimbiliya li lombolola okuti ovangelo vaco va linga ocituwa cimue ka ca sungulukile momo Suku wa va lulikile oco va kale kilu.

Eci akãi vavo va fetika oku cita omãla, omãla vaco va litepele calua. Kefetikilo, ka va molẽhele ndu okuti va litepa lavakuavo. Pole osimbu va kala loku kula, va fetika oku linga omanu vamue vanene haivo va pama calua kuenje va pongoloka ovindululu.

Ovindululu viaco via kala olondingaĩvi. Omo okuti ovo va kala omanu vamue va pama, va enda loku linga ungangala kuenda oku vetiya omanu oco va kale olondingaĩvi.

Ndaño okuti kotembo yaco Enoke wa fa ale, pole kilu lieve kua kala vali omunu umue ukuesunga. Omunu waco onduko yaye, Noha. Noha wa enda oku linga ocipango ca Suku.

Eteke limue Suku wa sapuila Noha okuti, kaliye ndi nyõla olondingaĩvi viosi kilu lieve. Pole Suku wa kala lonjongole yoku popela Noha lepata liaye kuenda ovinyama vialua. Tu konomuisi ndomo Suku a cilinga.