OLONDAKA VIOKU FETIKA
Ku Vamanji va Soliwa Alume Lakãi:
Oku upisa kosãi ya Susu kunyamo wo 2008, vetendelo liatete, Liutala Wondavululi wowiñi, mua fetikiwa oku sandeka ovipama vimue vi vetiya calua losapi hati: “Setukuli Ekolelo Liavo.” Tunde kunyamo waco, onjanja lonjanja eci pa pita olosãi vitatu, kua enda oku sandekiwa ocipama cokaliye ci nena esanju lialua!
Vakuakutanga va tenda ndati ovipama viaco? Noke yoku tanga ocipama ci lombolola ulandu wa Marta, omunu umue wa soneha ndoco: “Eci nda tanga ulandu waco nda yola, momo olonjanja viosi eci ndi tambula akombe, ndi yongola oku va lingila ovina viwa, kuenje ndi sakalala calua, kuenda ndi ivalako esilivilo lioku kala lakamba.” Kafeko umue poku tanga ulandu wa Ester, wa popia olondaka vi vetiya hati: “Nda limbuka okuti tua siata oku sakalala calua loku landa uwalo wokaliye. Ocili okuti tu sukila oku wala ciwa,. . . pole ka tu sukila oku sakalala ño enene luwalo.” Noke wa amisako hati: “Yehova wa velisapo calua eposo liovutima wetu.” Handi vali ulandu wupostolo Petulu wa vetiya Manji umue ukãi oku popia hati: “Eci nda tanga ulandu waco, nda limbuka okuti u tiamisiwila kokuange. Ca kala ndu okuti eci ulandu waco wa pita, opo nda kala. Nda sokolola calua ulandu waco!”
Vakuakutanga va tu sonehela kuenda omanu vakuavo olopandu va eca, vi situlula ovina upostolo Paulu a soneha kosimbu poku popia hati: “Cosi ca sonehiwa kosiahũlu ca sonehiwila oku tu longisa okuti, epandi kuenda oku kolisiwa lovisonehua ku tu kokela elavoko.” (Va Rom. 15:4) Ocili okuti, Yehova wa siata oku eca ovolandu aco oku kongelamo ana a sangiwa Vembimbiliya oco a tu longise ovina vi kuete esilivilo. Vosi yetu, ci kale okuti tu kasi ale oku vumba Suku otembo yalua ale sio, tu pondola oku lilongisila kovolandu aco.
Omo liaco, tu vu vetiyi locisola okuti vu tangi elivulu lilo. Kongeli ovipama vimue Vefendelo liene Liepata. Omãla vatito lavovo va sanjukila ovipama viaco! Eci tu ka lilongisa elivulu lilo Kelilongiso Liembimbiliya Vekongelo, ku ka pumbe ndaño onjanja yimosi! Li tanga levando, kuenda sokiya ciwa otembo yove. Sokolola lutate ovina wa tanga. Seteka oku limbuka eci omanu va tukuiwa Vembimbiliya va kala oku sima oco o mole ovina ovo va mola. Sokisa ndomo va kala eci va pita lovina viaco leci o yongola oku linga poku pita locitangi cimue.
Tu kuete esanju lioku ku ĩha elivulu lilo. Olio li ka linga esumũlũho linene kokuove kuenda kepata liove. Tambuli ovilamo vietu viocisola lombembua.
Osungu Yolombangi Via Yehova