Yesu O Pindula Omõla Ulume Wacimbumba

Yesu noke yoku sakula upika wa kesongo kolohoka, enda ko Naini olupale lumue lua kala ocinãla ci panda 30 kolokilometulu lo kombuelo luo Kafarinau. Eye ka kasi lika liaye. Pole, o linga ungende lolondonge viaye kuenda owiñi walua. Eci va kala ocipepi lo Naini ekumbi lia kala ale loku iñila. Volupale luaco, va sangamo owiñi walua wa va Yudea okuti va kasi oku enda koku kenda. Etimba liukuenje umue wa fa li kasi oku ambatiwa kosamua yolupale oco li kendiwe.

Omunu wa sumuapo vali calua pokati kavo, ina yukuenje. Ukãi waco ocimbumba, kaliye omõlaye wongunga wa fa. Eci ulume waye a fa, eye wa kala handi lomõlaye. Ivaluka okuti, ukãi wa kolelele calua komõlaco kuenda ekalo liaye lio kovaso yoloneke lia kunamẽlele kokuaye. Omo liaco, tu pondola oku limbuka ocisola a kuatela omõlaye. Pole, cilo omõla waco wa fa. Helie o ka kala laye kuenda oko kuatisa?

Eci Yesu a mola ukãi waco, u kuatela ohenda momo wa kala oku lila calua kuenda wa sumua. Yesu lohenda yalua o sapuila ukãi olondaka vi pamisa ekolelo liaye hati: “Ku ka lile vali.” Kuenje eye amela kocikalavekua ci kasi oku ambatiwa kuenda o ci lamba. (Luka 7:13, 14) Ocituwa Yesu a lekisa ci komõhisa calua omanu kuenje ovo va talama. Citava okuti omanu valua va lipula ndoco: Eci Yesu a kasi oku linga ci lomboloka nye? Nye a yongola oku linga?

Nye ci popiwa komanu vana va kasi oku linga ungende kumue la Yesu okuti, vo mola ale oku linga ovikomo vioku sakula omanu valua va vela? Citava okuti, ovo lalimue eteke va muile Yesu oku linga ocikomo coku pindula omunu wa fa. Ndaño okuti kuli ovolandu epinduko a lingiwa kosimbu, anga hẽ Yesu o pondolavo oku ci linga? (1 Olosoma 17:17-23; 2 Olosoma 4:32-37) Yesu o handeleka hati: “Okuenje u sapuila siti, votoka!” (Luka 7:14) Kuenje umalẽhe wa file o tumãla kuenda o fetika oku vangula! Yesu eca omõla ku inaye, pole, ina o saluka kuenda o sanjuka, momo ka kasi vali likaliaye.

Eci omanu va mola okuti ukuenje o kasi lomuenyo, va sivaya Yehova Ono Yomuenyo poku popia hati: “Pokati ketu pa votuiwa uprofeto umue wa velapo.” Omanu vakuavo omo lioku kuata elomboloko liovina vi komõhisa Yesu a linga, va popia vati: “Suku wa lekisa ohenda komanu vaye.” (Luka 7:16) Asapulo atiamẽla kovina viaco vi komõhisa, a lisanduila lonjanga yalua vimbo. Citava okuti esapulo liaco, lia pitĩla toke ko Nasara imbo Yesu a kulila okuti, li sangiwa ocinãla ci soka 10 kolokilometulu. Omanu kombuelo yo Yudea va yevavo ovina Yesu a linga.

Yoano Upapatisi handi o kasi vokayike, pole, o yongola oku kũlĩha ovina Yesu a kasi oku linga. Olondonge via Yoano viu sapuila ovikomo viosi Yesu a kasi oku linga. Nye Yoano a yeva vutima?