Olohoka Via Yehova Viondalu

Soma yo ko Suria, Benehadada, wamamako oku liyaka la va Isareli. Pole, uprofeto Elisia otembo yosi wa enda oku lungula soma yo ko Isareli, kuenje eci ca ecelela okuti soma olonjanja viosi o puluka. Omo liaco, Benehadada wa nõlapo oku kuata Elisia. Eye wa limbuka okuti Elisia wa kala volupale luo Dotane kuenje wa tuma asualali vo ko Suria volupale luaco oco vo kuate.

Va Suria veya ko Dotane luteke. Keteke likuavo komẽle, ukuenje wa Elisia wa tundila posamua kuenje wa mola okuti olupale lua ñualiwa lolohoka vialua. Eye wa kuata usumba kuenje wa kaluka lolukandi hati: ‘A Elisia nye tu sukila oku linga?’ Elisia wa tambulula hati: ‘Ava va kasi letu ovo valua, ava va kasi lavo va sule.’ Vepuluvi liaco, Yehova wa lingisa okuti ukuenje wa Elisia o mola okuti olomunda viosi via ñuala olupale, vieyuka otuvalu kuenda akãlu ondalu uyaki.

Eci asualali vo ko Suria va seteka oku kuata Elisia, eye wa likutilila hati: ‘A Yehova hu pinga, okuti omanu ava va kuatiwe lupeke.’ Vepuluvi liaco, ndaño okuti asualali va kala oku vanja, pole, ka va limbukile ocitumãlo va kala. Elisia wa sapuila asualali vaco hati: ‘Olupale vu sandiliya haluoko lulo. Ñuami, oco ndu songuili kulume vu kasi oku sandiliya.’ Ovo va kuama Elisia toke ko Samaria kuna kua kala soma yo ko Isareli.

Noke va Suria va limbuka ocitumãlo va kala. Soma yo Isareli wa pula Elisia hati: ‘Ndi pondola oku va ponda?’ Anga hẽ Elisia wa mola okuti eli olio epuluvi lioku fetuluinya omanu vana va kala oku seteka oku u linga cimue cĩvi? Sio. Elisia wa popia hati: ‘Ku ka va ipaye. Eca kokuavo okulia kuenje va ende lonjila yavo.’ Omo liaco, Soma yo Isareli wa va lingila ocipito cimue kuenje wa va tuma konjo.