Oku Nyoliwa Kuo Yerusalãi

Omanu vo ko Yuda va silepo oku vumba Yehova olonjanja vialua kuenje va fendela olosuku viesanda. Vokuenda kuanyamo alua Yehova wa seteka oku va kuatisa. Eye wa tuma ovaprofeto valua oco va ece elungulo kokuavo, pole, ovo ka va tavele oku yevelela. Handi vali, ovo va yola epembe ovaprofeto. Yehova wa imula ndati efendelo liavo lioviteka?

Soma yo ko Bavulono, Nevukandesa, wa yula olofeka vialua. Onjanja yatete a yula o Yerusalãi, wa kuata Soma Yehoyakini, olombuale, asualali, alume olomesele kuenje vosi wa vambata ko Bavulono. Eye wambatavo ovokuasi osi o vonembele ya Yehova. Noke Nevukandesa wa nõla Sedekiya oco a linge osoma yo Yuda.

Tete Sedekiya wa pokola ku Nevukandesa. Pole, olofeka vi lisungue kuenda ovaprofeto vesanda, va vetiya Sedekiya oco a sinile uviali wo Bavulono. Yeremiya wa lungula Sedekiya hati: ‘Nda kua lekisile epokolo, ko Yuda ku ka kala oku pondiwa, onjala kuenda uvei.’

Noke yoku viala vokuenda kueci ci soka anyamo ecelãla, Sedekiya wa nolapo oku sinila uviali wo Bavulono. Eye wa pinga kolohoka vio Kegito oco viu kuatise. Noke Nevukandesa wa tuma asualali vaye oco va kundule o Yerusalãi kuenje va ñuala ocingonja olupale. Yeremiya wa sapuila Sedekiya hati: ‘Yehova wa popia hati, nda o tava oku lieca ko Bavulono ove kumue lolupale vu popeliwa. Pole, nda kua tavele oku lieca, va Bavulono va laika oku yoka o Yerusalãi kuenje ove wambatiwa kumandekua.’ Sedekiya wa popia hati: ‘Ame si ka lieca ku va Bavulono!’

Noke yoku pita unyamo lolosãi epandu, olohoka vio ko Bavulono via nyola ovimbaka vio Yerusalãi kuenda va timĩha olupale. Ovo va timĩha onembele, va ponda omanu valua kuenda vambata omanu valua kumandekua.

Sedekiya wa tila poku tunda vo Yerusalãi, pole, va Bavulono vo landula. Ovo vo kuata eci va kala ocipepi lo Yeriko kuenje vo tuala ku Nevukandesa. Soma yo Bavulono wa ecelela okuti Sedekiya o tala ndomo omãla vaye va pondiwa. Noke Nevukandesa wa tofola ovaso a Sedekiya, wo kapa vokayike kuenje omo a fila. Pole, Yehova wa likuminyile omanu vo ko Yuda hati: ‘Eci pa pita 70 kanyamo ndu ku neni vali kocitumãlo cene ko Yerusalãi.’

Nye ca laikele oku pita lamalẽhe vana vambatiwa kumandekua ko Bavulono? Ovo va ponduile hẽ oku amamako oku pokola ku Yehova?