Lacimue ca Tẽla Oku va Tateka

Ulume umue okuti ocilema, wa endaenda oku tumala pombundi yonembele oku pinga osimola oloneke viosi. Eteke limue kekumbi, eye wa mola Petulu la Yoano va kala oku iñila vonembele. Eye wa va sapuila hati: ‘Lingi ohenda, ndi kuatisi.’ Petulu wa popia hati: ‘Ndi kuete ocina cimue ca velapo ndu ku ĩha okuti olombongo vi sule. Vonduko ya Yesu votoka, enda!’ Noke Petulu wo kuatisa oku votoka kuenje ulume wa fetika oku enda! Owiñi wa sanjuka omo liocikomo caco kuenje omanu valua va tava kocili.

Pole, ovitunda la va Sadukeo va tema. Ovo va kuata ovapostolo loku vambata kombonge kuenda va va pula hati: ‘Helie wa ku ĩhi unene woku sakula ulume u-u?’ Petulu wa tambulula hati: ‘Tua tambula unene waco ku Yesu Kristu una wa pondi.’ Asongui vetavo va kaluka vati: ‘Liwekipo oku vangula eci catiamẽla ku Yesu!’ Pole, ovapostolo va popia vati: ‘Tu sukila oku vangula eci catiamẽla kokuaye. Ka tu liwekapo.’

Eci Petulu la Yoano va eciwa, va enda kolondonge vikuavo kuenje va vi sapuila ovina viosi via pita lavo. Ovo va likutilila kumosi oku pinga ku Yehova hati: ‘A Yehova, tu kuatise oku kuata utõi oco tuamameko oku linga upange wove.’ Yehova wa eca kokuavo espiritu sandu kuenda vamamako oku kunda loku sakula. Omanu valua va tava. Va Sadukeo va kala lonya kuenje va kuata ovapostolo kuenda va va kapa vokayike. Pole, vokuenda kuteke, Yehova wa tuma ungelo umue, wa yikula epito liokayike kuenda wa sapuila ovapostolo hati: ‘Tiukili vonembele kuenje omo vu ka longisa.’

Komẽle ya kuamamo, Ekanga kuenda asongui vetavo va tambula esapulo liokuti: ‘Okayike ka yikiwa, pole, alume wa kapimo va tundamo! Ovo va kasi vonembele oku longisa omanu!’ Ovapostolo va kuatiwa vali kuenje va va tuala Kekanga. Kuenje ocitunda cinene ca popia hati: ‘Tuo handeleki ale oco ka vu ka vanguli eci catiamẽla ku Yesu!’ Pole, Petulu wa tambulula hati: “Cetu oku pokola ku Suku ndombiali, komanu hakoko.”

Asongui vetavo va temele calua kuenje va yonguile oku ponda ovapostolo. Pole, u Fariseo umue o tukuiwa hati Gamaliyele wa talama kuenje wa popia hati: ‘Lunguki! Suku o kasi lalume ava. Anga hẽ vu yongola oku liyaka la Suku?’ Kuenje va kapako elungulo liaye. Noke yoku tipula ovapostolo lolombueti, va va handeleka vali oco va liwekepo oku kunda kuenje va va eca. Pole, ovapostolo ka va liwekelepo. Ovo vamamako oku kunda olondaka viwa ci kale vonembele kuenda konjo lanjo.