‘Okulepa Nduti wo Cedro Woko Levanone’

Okolomunda viaposoka vioko Levanone kukulila oviti viakulihiwa londuko ya Arz Ar–rab, cilomboloka okuti olo “Cedro via Ñala.” Oviti viaco evi vinene havio vitalaño otembo yosi kosimbu vianda lokusitika olomunda viaco viosi. Ovio vitukuiwa eci cisoka 70 kolonjanja Vembimbiliya−okuti kakuli vali uti ukuavo utukuiwa ndoco.

Pokulombolola unene wo cedro yoko Levanone, Embimbiliya litukula olondaka ndeci hati ya “posoka” kuenda “yulamba [NW].” (Ocisungo ca Salomone 5:15; Esekiele 17:23) Okutanda kuenda okupama kuavaya vatunda kuti wo cedro oko kuawulingisa okuti wukulihiwa calua la vakuakutunga olonjo, owato kuenda vakuakutunga ovikuata viovonjo. Elemba liwa lokukusuka kuavaya vaco kuaposoka calua okukutala, owo wukuete ondembe yalua yiwukuatisa okuti kawuvoli kuenda kawuliwa lapuka. Oviti viaco vialepa calua kuendavo viatanda calua, okuti vipitila kueci cisoka 37 kolometro vosõvi kuenda 12 kolometro vokutanda, kuenda ovio vikuete olombombo viapama calua, havio vianda toke kosi. Omo liaco, kasikomohisa eci vamue vakuakutala ovisenge vautukula hati “soma yoviti viosi visangiwa voluali”!

Usonehi Wembimbiliya Esekiele vocitumasuku asoneha wasokisa Mesiya lonjovo yuti wo cedro, okuti muẽle Suku eye wacipeka. (Esekiele 17:22) Ondaka yo Heveru yilomboloka “cedro” yopiwa kondaka yatete yilombokoka “okutuamela.” Oloneke vilo, oloñame via Mesiya, Yesu Kristu, visukilavo ‘okutamela vetavo kuenda okukuata utõi, ’ nduti walepa hawo wapama wo cedro. (1 Va Korindo 16:13) Eci cilingiwa hẽ ndati? Cilingiwa lokulikolisilako lutõi okulikala kuenda okukuamelela lokupandikisa vonjila yokufendela Suku. Vosi vacilinga Vembimbiliya vatukuiwa okuti “olondingesunga vilepa [nduti] wo cedro woko Levanone.”−Osamo 92:12, The New English Bible.