Akundi Vusoma Valombolola Ovolandu

India—“Ocitumãlo Pokati Kolonepele via Lua”

“OCITUMÃLO Pokati Kolonepele via Lua,” ondaka ya siata oku vanguiwa lowiñi poku lekisa epandi liolonyitiwe vio India. Oku kuata elitokeko vofeka eyi yi kuete olonepele via lua viatiamẽla kovituwa, kelimi, ketavo, kovituwa viapata añi añi, kuwalo kuenda oku lia, ocina cimue catila calua. Omo liaco, elitokeko liaco lia siata oku muiwa komanu vatalavaya olumue haivo va kasi voseketa yupange Wolombangi via Yehova ko India, ndaño muẽle va tundilila vovoviali añi añi, vovikanjo vialitokeka kuenda va vangula alimi alua alitepa.

• Tu kulihisi Rajrani okuti umalẽhe umue ufeko wa tunda ko Punjabi onepa yoku tundilo yoko India. Eci Rajrani a kala kosikola, umue vatangela kumosi wa fetika oku li longisa Embimbiliya Lolombangi via Yehova. Umalẽhe u ndeti ufeko wa vetiya Rajrani oku oku kuatela onjongole Embimbiliya. Mekonda ava vatangela kumosi okuti ovingelesi va kala vatito kuenda ka kuakalele Utala Wondavululi velimi lio Punjabi kotembo yaco, eye wa pingavo ekuatiso lia Rajrani oco o pongoluileko ovipama vio revista. Eci Rajrani a tanga Utala Wondavululi ca fetika oku vetiya ca lua okuti ndaño muẽle lumbindiliki wolonjali viaye ka ca lingile cimue, eye wamamako toke petosi lioku tumbika omuenyo waye ku Yehova Suku. Cilo o kasi loku talavaya ko Betele yoko India, eye wa linga cimue ca yulula ovaso aye kocili. Eye o kasi oku pongolola alivulu Akristão velimi lio Punjabi!

• Kulihisavo Bijoe, wa tundilila konepa yikuavo yo kutudilo yo India, vombala yoko Kerala. Bejoe wa tundisiwa kosikola ya velapo mekonda lioku kala omunu ka pangi onepa yoluali vokuenda kuovipito viofeka. Ocitangi caco ca kala kombonge otembo yalua okuti noke kueyilila eyulo liefendelo liocili vesapulo kuenje Bejoe wa tikila kosikola.a Eye wa kuata elilongiso litukuiwa okuti educação universitária. Pole, omo liekalo ka lia sungulukile lia kalako eye wa sanga atatahãi vovisimilo, kuenje wa liwekapo vokati kunyamo waye watete kosikola. Cilo, noke yoku kala anyamo akui vo Betele, eye o liyevite okuti wopa esilivilo lia lua koku kala ukuacisoko comanu valitepa calua, pole va kasi velitokeko liepata lio Betele okuti eci eye nda a pondola oku kuata omo lielilongiso lia velapo ci sule.

• Norma kuenda Lily kavali kavo va kuete ale eci ci pitahãla 70 kanyamo kuenda va kasi umbumba otembo ya lua. Kavali kavo va tẽlisa ale anyamo a pitahãla 40 kupange wotembo yosi. Lily o kasi oku talavaya ko filiale anyamo a soka 20 ndupongoluisi kelimi lio Tamali. Norma weya ko Betele ci soka 13 kanyamo noke yoku fisa ulume waye. Omo lioku kala ongangu yiwa yepandi kuenda yupange wapua wapua eko, ovo vaeca ongangu yelitokeko vepata liosi lio Betele. Ovo va sole oku sanjuisa akombe kuenda va kuetele esanju amalẽhe vakuepata, loku eca esilivilo liesanju liavo liokuenda kuanyamo a lua vomuenyo Wakristão. Kuenje, amalẽhe va valalekavo oco vaende volohondo viavo oku kala vukamba kuenda oku vaeha ekuatiso eci li sukiliwa. Ocili muẽle, eyi pokati ka via lua ongungu yimue yiwa!

Loku yula olonepele vi koka ovitangi kuenda atatahãi vovitumãlo viñi viñi, olondingupange evi via lieca ndeti olumue vi talavayela pamosi lesanju oku vumbila vakuavo vakuacisoko cepata lio Betele li likuete ocimunga vo India.—Osamo 133:1.

[Etosi pombuelo yemela]