Ci Tava hẽ Okuti Ekolelo Litiamisiwila Kesunga?

Umue mitavaso yohongele yoku konomuisa eci catiamẽla ku Suku kofeka yoko Estados Unidos, wa popia hati: “Kuli omanu valua okuti eci va linga vakuetavo ka ca sukilile oku sokolola ale oku kũlĩhĩsa esunga lieci va tavela ketavo liaco. Ovo va kuata onjongole yoku tava kovina viosi viatiamẽla ketavo liavo lekolelo.”

OCITANGI ceci okuti omanu valua vakuetavo ka va sokolola esunga lieci va tavela ketavo liaco. Handi vali, ka va kũlĩhĩsa nda eci ovo va kasi loku linga, ale eci ovo va tava ca sunguluka. Kuenje eci ka ci komohĩsa oku limbuka okuti etavo lia linga ombangulo yimue ka yi soliwe lomanu.

Ocili okuti, ovituwa vimue ndeci oku fendela oviñumañuma kuenda oku pitolola olondaka vimuamue olonjanja viosi vohutililo, cosi ci vetiya omunu oco a kuate owesi woku sokolola. Ovilinga viaco evi vi kuete elitokeko luloño woku tunga ovikuata vi komohĩsa, oku tunga olonjanela viovindalasa via fina calua kuenda ovisikilo vi tulisa utima. Ovina viaco evi ovio omanu valua va fendela. Ndaño okuti atavo amue a siata oku vangula okuti ekolelo liavo li kuete ono Yembimbiliya, esapulo liavo liokuti, ‘tava ku Yesu kuenje oka popeliwa,’ ka li vetiya oku lilongisa Embimbiliya. Atavo amue a kunda eci catiamẽla koku potolola ovitangi viomanu cilo muẽle ale oku potolola ovitangi omo liopulitika. Nye ci yilila kovina viaco viosi evi?

Umue usonehi weci catiamẽla ketavo wa lombolola ocitangi ca pita konano yofeka yo Amerika hati: “Akristão . . . va lekaisa ehonguo kuenda elilongiso liekolelo Liakristão ka li kuete esilivilo.” Handi vali, onoño eyi yamamako oku lombolola eci catiamẽla kofeka yo Estados Unidos “ndofeka yimue yomanu ka va kũlĩhĩle Embimbiliya.” Ocili okuti eci haico ci kasivo kolofeka vina vi tukuiwa ndolofeka Viakristão. Kuenje, atavo alua ka a tava ku Kristu kuenda ka a vetiya oku sokolola esunga liovina. Pole, a vetiya omanu oco volohutililo viavo va pitolole olondaka vimuamue okuti mu kongeliwa ovihilahila viñi viñi. Kuenje, atavo aco a kuama olonjila viñi viñi vioku sokolola okuti mua kongela oviteka kuenda ka va likolisilako oku sokolola eci ca sunguluka.

Omo liaco, vomuenyo wavo weteke leteke, ka va kapeleko calua catiamẽla koku sokolola eci ovo va ta va nda ocili muẽle ale nda etavo liaco limue ovo va pondola oku kolela muẽle ocili. Pole, ovo olonjanja vialua va siata oku sokolola ovina vi kuavo lutate wocili. Ocili okuti, omunu poku landa ombinete okuti eteke limue utale waco u vola, o sokolola calua kuenda tete o kũlĩhĩsa lutate walua. Oco hẽ, catiamẽla ketavo ca sunguluka hẽ okuti omunu waco o popia hati: ‘Etavo liolonjali viange olio muẽle ndi sukila oku kuamavo’?

Nda okuti tu yongola muẽle oku sanjuisa Suku, ka tu konomuisa hẽ lutate walua nda okuti eci tu tavela kokuaye ocili muẽle? Upostolo Paulu wa vangula eci catiamẽla komanu vatavo vo koloneke viaye hati: “va kuetele Suku ombili, puãi ha lukũlĩhiso ko.” (Va Roma 10:⁠2) Ovo, va sokisiwa lomunu ukuakukolonga vonjo lotinda okuti o talavaya calua, pole eye ka kolongamo o tinda muẽlianjo a yongola omo lioku kuama olonumbi viaye muẽle. Ndaño ci tava okuti omunu waco o sanjukila upange waye, anga hẽ muẽlianjo o pondolavo oku sanjukila upange waye?

Nye hẽ ci taviwa la Suku kueci catiamẽla kefendelo liocili? Embimbiliya lieca etambululo okuti: “Oco ciwa, haico ca sunguluka ku Suku Upopeli wetu, u o yongola okuti omanu vosi va popeliwa ha veya kukũlĩhiso w’Ocili.” (1 Timoteo 2:​3, 4) Ci tava okuti omanu vamue va sima okuti oku sanga ukũlĩhĩso wocili pokati katavo alua etaili ocina cimue ka ci tẽliwa. Pole, nda okuti ocipango ca Suku ceci okuti omanu va kuatisiwa oco va sange ukũlĩhĩso wocili, ci tava hẽ okuti o va limbika vali ocili caco? Eci hacoko Embimbiliya li lombolola, pole li popia hati: “Nda ove [o sanda Suku], eye o tava oku sangiwa love.”​—⁠1 Asapulo 28:⁠9.

Ndamupi Suku a tava oku sangiwa lomanu vana vo sanda lutima wosi? Ocipama ci kuãimo cika eca etambululo.