“Nda Sanga Ovina Viosi Nda Yonguile”
OCISOKO ci tukuiwa okuti, Organização Mundial da Saúde (OMS), ca lombolola okuti, cilo voluali luosi eci ci soka 120 kolohuluwa viomanu va siata oku tala ohali omo lienyumãlo. Vunyamo lunyamo eci ci soka ohuluwa yomanu va siata oku liponda omo liesumuo kuenda pokati keci ci soka 10 ale 20 komanu, va siata oku seteka oku liponda ovo muẽle. Ekuatiso lipi li pondola oku eciwa komanu vana va sumua calua komuenyo wavo? Ocili okuti, ovihemba pamue vi pondola oku tepulula esumuo liaco, pole ekuatiso lioku lembeleka utima wateka li kuete vali esilivilo komuenyo womunu. Handi vali, omanu vamue va siata oku pita lovitangi viaco, va sanga ekuatiso likuavo valivulu a lombolola ovisonehua Viembimbiliya ana a sandekiwa Lolombangi via Yehova, ndomo ukanda ukuaĩmo u tundilila kofeka yo França u ci lekisa.
“Onjanja yimue, sia kuatele vali onjongole yoku kala lomuenyo. Nda likutilila ku Suku oco ndi fe. Nda kala ndomunu umue okuti ndaño kilu o kasi lomuenyo, pole vokati nda file ale osimbu. Nda likutilila calua ku Yehova oco a ndi lekisa yimue onjila yiwa komuenyo wange. Omo liaco, nda nõlapo oku tanga o Anuário das Testemunhas de Jeová yunyamo wo 2002, kuenje nda yi mãla vateke atatu. Elivulu eli lia ndi vetiya calua kuenda lia pamisa ekolelo liange.”
“Nda konomuisa ciwa lutate Vutala Wondavululi kuenda vo Despertai! ovina viosi nda sukilile oco vi ndi lomboloke. Nda enda oku tanga olorevista evi tunde osimbu vokuenda kueci ci pitahãla 15 kanyamo, pole lalimue eteke nda limbukile ndomo ovipama violorevista viaco vieca evetiyo lialua kuenda esilivilo komuenyo. Ovio vieyuka ocisola, okuti ocituwa caco cilo ka ca siatele oku sangiwa komanu olonjanja viosi. Nda sanga ovina viosi nda yonguile.”
Embimbiliya li lombolola okuti: “Yehova yu ocipepi la vakuavitima via teka. O popela ava va kasi lovitima via samba.” (Osamo 34:18) Ka kuli atatahãi okuti omanu vana “vakuavitima via teka” ale vana va kuete ‘ovitima via samba’ va pondola oku sanga evetiyo Vembimbiliya kuenda elavoko liatiamẽla kotembo yo kovaso. Olombangi via Yehova via siata oku eca alivulu a lombolola ovisonehua Viembimbiliya oco va kuatise omanu vana va kuete esukila okuti poku ci linga ovo va pondola oku sanga ono yelembeleko lia Suku.