Elembeleko Komanu Vosi va Yongola Ekuatiso
EMBIMBILIYA helivulu limueko okuti lieca olonumbi vina vi pondola oku sakula omunu umue o kuete ovitangi kutue. Pole, olio li pondola oku eca elembeleko kuenda li tu kuatisa oku kuata esanju komuenyo ndaño lovitangi. Ocili okuti Embimbiliya li lombolola okuti: “Omunu wa citiwa lukãi ukualoneke viñamiñami, haiye we yuka lohali.” (Yovi 14:1) Ekalo lietu lioku kala omanu ka va lipuile, olonjanja vimue olio esunga lieci tua siatela oku kuata ovitangi komuenyo wetu. Pole, helie o kuete eko lia velapo lieci omanu va kasilili oku tala ohali?
Embimbiliya li lekisa okuti omunu waco, espiritu limue lĩvi li tukuiwa hati; Eliapu haiye Satana. Eye, o kasi oku ‘yapuisa omanu vosi voluali’ kuenda oku nena ovitangi viosi vina vi kasi oku talisa ohali omanu. Pole, Embimbiliya li tu sapuilavo okuti otembo yaye yi kasi kesulilo. (Esituluilo 12:9, 12) Ndopo muẽle ovitangi viosi vina Satana a nenela olonungi violuali lulo, Suku oka vi malako. Embimbiliya li lekisa okuti ohuminyo ya Suku yoluali luokaliye luesunga, yika malako ovitangi kuenda esumuo liosi.—2 Petulu 3:13.
Ceca esanju lialua oku kũlĩha okuti olohali viomanu ka vi kalako otembo ka yi pui! Vemẽhi Liusoma wa Suku wokilu una u kasi peka lia Yesu Kristu, ũvi wosi kuenda olohali vika puako. Kueci catiamẽla Kosoma ombuavekua ya Suku, ovisonehua vi lombolola okuti: “[Eye oka] popela osuke eci yi vilikiya, ndaño ohukui lu ka kuete oñuatisi. O kuatela ohenda ohukui losuke. O popela ovimuenyo violosuke. O popela ovimuenyo viavio kundiandia lo kungangala. Osonde yavio kokuaye yi kola.”—Osamo 72:12-14.
Otembo yoku tẽlisiwa kuocitumasuku eci, yi kasi calua ocipepi. Tuka kuata omuenyo ko pui vofeka yelau palo posi lovina viosi viwa tu yongola komuenyo wetu. (Luka 23:43; Yoano 17:3) Oku kũlĩha olohuminyo viaco, ceca elavoko kuenda elembeleko komanu vosi vana va yongola ekuatiso.
[Ono Yelitalatu kemẽla 32]
Ufeko wa sumua: Photo ILO/J. Maillard