Momo Lie Olombangi Via Yehova Via Siatela Oku ku Pasuisa?
KOLUALI luosi, omanu va kũlĩha ciwa ombili Yolombangi via Yehova omo lioku kundila konjo lanjo. Omanu vamue va siata oku lipula esunga lieci Olombangi via Yehova via siatela oku iya kolonjo viavo, ca piãla enene nda onjanja yatete ovo ka va lekisile ño enene onjongole kondaka Olombangi via Yehova via va kundila. Ovikanda vivali via tunda kofeka yo Russia vi lekisa esunga lieci Olombangi via Yehova via siatela oku pasuisa omanu kolonjo viavo.
Ufeko umue ukuanyamo 19 otukuiwa hati Masha, wovolupale lu tukuiwa hati, Khabarovsk, wa soneha hati: “Oku popia muẽle ocili, ame kosimbu nda tilaile Olombangi via Yehova ndacina omanu va tila uvei umue u sambuka.” Pole, noke yoku tanga alivulu amue a siata oku sandekiwa Lolombangi via Yehova, eye wa pongolola ocisimĩlo caye. Eye wa popia hati: ‘Cosi nda tanga valivulu ciwa, kuenda ci longisa. Pole ca velapo handi, ceci okuti olondaka vi sangiwa valivulu aco, vi kuatisa oku tenda oluali locisimĩlo cimue ciñi. Ame vokuenda kuotembo, ndeya oku kuata elomboloko lieci omanu va kasilili komuenyo.’
Svetlana, o kasi kolupale luo Ussuriysk, vocinala cimue ci soka 80 kolokilometulu konano yo Vladivostok, wa soneha hati: “Ame ndopo nda fetika oku tanga Utala Wondavululi lo Despertai!. Otualivulu tuaco tu sukiliwa calua koloneke vilo tu kasi ndeti. Ame ndi sole atendelo osi. Otualivulu tuaco tua posoka calua, kuenda tu longisa ovina viñi viñi. Nda pandula. Nda pandula muẽle calua omo u kasi voluali lulo loku linga upange waco uwa haiwo u sukiliwa.”
Olombangi via Yehova koluali luosi via kapako olondaka viupostolo Paulu eci a popia hati: “Va yeva ndati nda lu o kunda sio?” (Va Roma 10:14) Onjanja yikuavo eci Olombangi via Yehova vi ku pasuisa, nye ku sandela akukutu amue oco o va yevelele? Ove oka solavo olondaka vielembeleko vi sangiwa Vembimbiliya.
[Okakasia kemẽla 32]
OYONGOLA OKUPASUISIWA?
Ndaño okasi voluali lulo luohali, citava okuti osanga esanju litunda kokukuata ukũlĩhĩso wasuapo watiamẽla ku Suku, Kusoma waye, kuenda kocipango caye cikomõhisa catiamẽla komanu. Nda oyongola vali amue alomboluilo ale oyongola okuti omunu umue okupasuisa oco alilongise love Embimbiliya, ocali konjo yove, sonehela ko Associação das Testemunhas de Jeová, Caixa Postal 6877, Luanda, Angola, ale konumbi yakusungulukila yisangiwa kemẽla 2.