Ukanda wa Loñisiwa ku Noha

UMALẼHE umue o tukuiwa hati Minnamaria o kuete eci ci soka 15 kanyamo wa soneha hati: “Amanji a Noha, ame nda tanga olonjanja vialua Vembimbiliya ulandu watiamẽla kokuove. Nda kũlĩha ndomo wa tunga ocimbaluku cina ca ku yovola Ketande kumue lepata liove.”

Alongisi velimi lio Finnish va pingile kolondonge vi kuete 14 toke 21 kanyamo oco vi sonehe ukanda u lombolola eci ci kasi velivulu limue. Alongisi va yonguile okuti ukanda waco u tumiwa komunu umue wa tukuiwa velivulu liaco. Ovo veya oku tambula kolondonge ci soka 1.400 kovikanda. Noke olonganji via kũlĩhĩsa ciwa ovikanda viaco. Kuenje ovo veya oku limbuka okuti kafeko Minnamaria wa soneha ulandu umue uwa. Kuenje ukanda waye va u kapa pokati kovikanda via nõliwa okuti ovio vi kasi ciwa.

Tunde kotembo ya Noha toke cilo, pa pita ale olohũlũkãi vitãlo vianyamo. Oco hẽ momo lie Minnamaria a loñisila ukanda waye ku Noha? Eye wa popia hati: ‘Poku soneha ukanda, nda ivaluka tete ulandu Wembimbiliya. Momo nda kũlĩha ciwa ulandu womanu va tukuiwamo. Ame nda tanga olonjanja vialua ulandu wavo. Kuenje ca ndi kalila ndu okuti omanu vaco va kasi handi lomuenyo. Nda nõla ulandu wa Noha. Momo wa ndi komohĩsa calua.’

Kafeko Minnamaria wa malusula ukanda waye loku popia hati: ‘A manji a Noha. Ove wa lekisa ongangu yiwa yekolelo lepokolo. Ekalo liove lia siata oku vetiya vosi va sole oku tanga Embimbiliya. Kuenda ulandu wove u pamisa ekolelo liavo.’

Ukanda owu wa kafeko u lekisa okuti ‘ondaka ya Suku yi kuete unene’ woku kuatisa amalẽhe lakulu.​—⁠Va Heveru 4:⁠12.

[Okakasia kemẽla 32]

OYONGOLA OKUPASUISIWA?

Ndaño ove okasi voluali lulo luohali, citava okuti osanga esanju litunda kokukuata ukũlĩhĩso wasuapo watiamẽla ku Suku, Kusoma waye, kuenda kocipango caye cikomõhisa catiamẽla komanu. Nda oyongola vali amue alomboluilo ale oyongola okuti omunu umue okupasuisa oco alilongise love Embimbiliya, ocali konjo yove, sonehela ko Associação das Testemunhas de Jeová, Caixa Postal 6877, Luanda, Angola, ale konumbi yakusungulukila yisangiwa kemẽla 2.