Ungende Umue Wesumũlũho

KOFEKA yo Kongu, kua tunda ulandu umue wa vamanji vavali akãi okuti olonjali viavo vimuamue. Ndaño okuti vofeka yavo mua kala uyaki, pole, va nolelepo oku enda Kohongele Yofeka losapi ya linga hati: ‘Eci Esivayo ku Suku.’ Ohongele yaco ya lingiwila volupale luo Lisala. Ovo va yonguile oku ka yevelela olonumbi vialua via Yehova kuenda oku kuata ukamba la vamanji. Handi vali, va yonguilevo oku lisanga lolomitavaso vioseketa Yolombangi via Yehova via tunda ko Kinshasa. Momo va pitile anyamo alua okuti kava la mõla umue wa tunda koseketa yaco omo liuyaki wa kala vofeka yavo.

Poku tunda kolupale luavo ko Basankusu toke ko Lisala, va linga ungende wa soka 300 kolokilometulu. Ovo va pita vovisenge vinene kuenda va yoka olondui vivali vinene lowato. Oco va pitile ko Lisala, va pita olosemana vitatu loku enda. Vamanji ava vavali va litumbika kupange wakundi votembo yosi. Umue o kasi kupange waco ci soka anyamo atatu. Ukuavo wa tẽlisa 19 kanyamo. Vokuenda kungende wavo, va kundila omanu valua esapulo Liusoma. Kuenje, va tẽlisa eci ci soka 110 kolowola loku kundila omanu vosi va ñualehela lavo vonjila. Handi vali, va eca 200 kolotratadu kuenda 30 kotualivulu Utala Wondavululi lo Despertai!.

Olondui va yoka vi kuete olongeve kuenda olongandu vialua. Omo liaco, ka ca tavele oku pitamo kuteke. Ovo va pitavo povitumãlo vialua viasualali va sole oku pulisa olopapelo viuvangi.

Ka ca lelukile oku linga ungende waco, pole, vamanji va likolisilako calua. Kuenje va sanjukile calua omo lioku kala kohongele yofeka ya lingiwila volupale luo Lisala. Handi vali, va sanjukilevo omo lioku yeva olonumbi vialua via Yehova kuenda oku kala pokati keci ci soka 7.000 ya vamanji. Kesulilo liohongele, vamanji va liyaka vali locitangi coku tiukila kimbo liavo. Pole, eci va pitila va sanga okuti epata liavo liosi li kasi ciwa.