Ovo va Kundila Olondaka Viwa Kovisitatũi

ULUME umue kofeka yo Espanya, mitavaso yonjo yomanu va liwekapo oku talavaya omo lioku kuka, wa popia hati: ‘Ovo va nena ovina viespiritu kokuene.’ Ulume waco, wa lombolola eci catiamẽla Kolombangi via Yehova ndomo via enda oku nyula omanu kocitumãlo caco. Oco hẽ, nye covetiya oku popia olondaka evi?

Kocitumãlo caco, kuli omanu valua ovisitatũi. Olombangi via Yehova kofeka yo Espanya omo okuti via lilongisa Elimi Liovindekaise, via siata oku sapela lomanu vaco. Mitavaso yocitumãlo caco, wa pandiya Olombangi via Yehova omo liotembo va siata oku pesela koku sapela lomanu vaco catiamẽla Kondaka ya Suku. Momo wa limbuka ndomo esapulo Liusoma lia siata oku kuatisa omanu vaco. Handi vali, omanu vana okuti ovisitatũi haivo olomeke, va ecavo olopandu viavo Kolombangi via Yehova. Momo va tambulavo ekuatiso liwa kokuavo.

Ulume umue o tukuiwa hati, Eulogio okuti omeke haeye ocisitatũi, cilo o kasi oku lilongisa Embimbiliya Lolombangi via Yehova. Eteke limue eci a kala oku lilongisa Embimbiliya, osekulu yimue yeya ocipepi lavo. Kuenje, ya eca kumanji opapelo yocisungo cimue ca sonehiwa lomanu vopocitumãlo caco. Vocisungo caco, va lombolola olopandu va eca Kolombangi via Yehova omo liekuatiso va tambula kokuavo. Osapi yocisungo caco ya linga hati: ‘Oku Kala Ombangi ya Yehova.’ Ulandu waco wa popia hati: ‘Olombangi via Yehova viambata omuenyo umue wa sunguluka. Vi kuete esumbilo lialua. Olondunge viavo vi tunda ku Yehova. Ovo va siata oku nyula omanu kolonjo viavo. Momo, va kolela lika Yehova.’

Oku kolela ku Yehova oko kua siata oku kuatisa Akristão valua oku lilongisa elimi liovindekaise oco va kundile ondaka ya Suku kovisitatũi vi kasi kovitumãlo viavo. Omo liaco, va siata oku kundila omanu vaco elavoko Liusoma wa Suku.